কঞ্জ্যুমর এফিয়র্স, ফুদ প্রোসেসিং অমসুং পাব্লিক দিস্ত্রিব্যুসন মন্ত্রালয়

হোতেলশিং নত্ত্রগা রেসতুরান্তশিংনা মশা মরোমদোম নত্ত্রগা শোইবদগী অচা-অথক্কী বিলদা সর্বিস চার্জ হাপচিনবা য়ারোই: কঞ্জুমর এফেয়ার্স মিনিস্ত্রি


হোতেলশিং অমসুং রেসতুরান্তশিংদা সর্বিস চার্জ লৌবগা মরী লৈন্না মওং তাদনা শেন্দোং তান্নবা অমসুং কঞ্জুমরশিংগী হক খোঙ্গাউনবা ঙাকথোক্নবা সেন্ত্রেল কঞ্জুমর প্রোতেক্সন ওথোরিতি(সি সি পি এ)না চৎন-কাংলোনশিং ফোঙলে

সর্বিস চার্জ লৌবগী ময়োক্তা কঞ্জুমরনা নেসনেল কঞ্জুমর হেপ্লালাইন(এন সি ঐচ)দা ৱাকৎপা য়াগনি

য়াংনা অমসুং মপুংফানা ৱায়েন্নবা ই-দাখিল পোর্তেলগী খুৎথাংদা ইলেকত্রোনিক ওইনা ৱাকৎপা য়াগনি

Posted On: 04 JUL 2022 5:11PM by PIB Imphal

হোতেলশিং অমসুং রেসতুরান্তশিংদা সর্বিস চার্জ লৌবগা মরী লৈন্না মওং তাদনা শেন্দোং তান্নবা অমসুং কঞ্জুমরশিংগী হক খোঙ্গাউনবা ঙাকথোক্নবা সেন্ত্রেল কঞ্জুমর প্রোতেক্সন ওথোরিতি(সি সি পি এ)না চৎন-কাংলোনশিং ফোঙলে।

সি.সি.পি.এনা ফোঙবা চৎন-কাংলোনশিং অদুদা হায়রি মদুদি হোতেলশিং নত্ত্রগা রেসতুরান্তশিংনা মশা মরোমদোম নত্ত্রগা শোইবদগী অচা-অথক্কী বিলদা সর্বিস চার্জ হাপচিনবা য়ারোই। অতোপ্পা মমিং অমা থোন্দুনা সর্বিস চার্জ লৌবা য়ারোই। হোতেলশিং নত্ত্রগা রেসতুরান্তশিংনা কঞ্জুমর অমদগী নমদুনা সর্বিস চার্জ লৌনবা হোৎনরোইদবনি অমসুং সর্বিস চার্জ অসি মশানা য়ানা, অনিংবা অমসুং কঞ্জুমরগী অপাম্বগী মতুংইন্না পীগদবনি হায়না নাখৈ শেংনা খঙহনগদবনি। সর্বিস চার্জ লৌবদা য়ুম্ফম ওইরগা কঞ্জুমরশিং চংবদা অপনবা পীবা নত্ত্রগা সেবা তৌবদা অপনবা পীবা তৌরোইদবনি।  সর্বিস চার্জ অসি অচা-অথক্কী বিলদা হাপচিন্দুনা অমসুং অপুনবা শেনফমদা জি.এস.তি হাপচিন্দুনা লৌরোইদবনি। লিঙ্ক অসিদা চংলগা চৎন-কাংলোনশিং য়েংবা য়াগনি।

চৎন-কাংলোনশিং থুগাইদুনা করিগুম্বা হোতেলশিং নত্ত্রগা রেসতুরান্তশিংনা সর্বিস চার্জ লৌরবদি, কঞ্জুমর অমনা বিলগী শেনফমদগী সর্বিস চার্জ লৌথোক্নবা মরী লৈনবা হোতেল নত্ত্রগা রেসতুরান্ত অদুদা হায়গদবনি। আইনগী ওইবা থবকশিং পায়খৎত্রিঙৈ মমাংদা য়ানদবশিং লোইশিন্নবা কঞ্জুমর অমনা ১৯১৫দা কোল তৌদুনা নত্ত্রগা এন.সি.ঐচ মোবাইল এপ্পকী খুৎথাংদা নেসনেল কঞ্জুমর হেপ্ললাইন্দা ৱাকৎপা য়াগনি।

ফজদবা থবকশিং অসিগী মায়োক্তা কঞ্জুমর অমনা কঞ্জুমর কম্মিসন্দা ৱাকৎচে অমা পীশিনবা য়াগনি। য়াংনা অমসুং মপুংফানা ৱায়েন্নবা ই-দাখিল পোর্তেলগী (www.e-daakhil.nic.in) খুৎথাংদা ইলেকত্রোনিক ওইনা ৱাকৎপা য়াগনি। সি.সি.পি.এনা মখা তানা পায়খৎলকপা থবকশিংগী মতাংদা অমসুং থিজিন্নবা কঞ্জুমর অমনা মরী লৈনবা দিস্ত্রিক কল্লেক্তরদা ৱাকৎচে অমা পীশিনবা য়াগনি। ৱাকৎ অদু সি.সি.পি.এদা ই-মেল com-ccpa[at]nic[dot]in দা পীশিনবা য়াগনি।

সর্বিস চার্জ লৌবগী মতাংদা কঞ্জুমরশিংনা নেসনেল কঞ্জুমর হেল্পলাইন্দা ৱাকৎ কয়া লাক্লে। কঞ্জুমরশিংনা পীখৎলকপা ৱাকৎশিং অদুগী মনুংদা রেসতুরান্তশিংনা তঙাইফদনা সর্বিস চার্জ লৌবা অমসুং সর্বিস চার্জ অসি শোইবা শাদুনা অচা-অথক্কী বিলদা হাপচিল্লে হায়বা য়াওরি। লোয়ন্না অসিগুম্বা চার্জ অসি মশানা য়ানা পীগদবনি অমসুং মখোয়না সর্বিস চার্জ পীদনবা হোৎনবা মতমদা কঞ্জুমরশিং ইকায়বা নংলে হায়রি।

থবক অসি মওং তাদনা শেন্দোং তান্নবা হোৎনবা অমসুং কঞ্জুমরশিংগী হক খোঙ্গাউনবনি হায়না লৌদুনা, কঞ্জুমরশিংগী য়েংলগা সর্বিস চার্জ লৌবগী মতাংদা তোঙান-তোঙানবা কেসশিং কঞ্জুমর কম্মিসন্না ৱারেপ লৌরে।

*****



(Release ID: 1839171) Visitor Counter : 230