এল্লরিগু নমস্কারম!

সুত্তুরু সংস্থানৱু শিক্ষন, সামাজিক সেবে, অন্নদা-সোহক্কে, প্রখ্যাতি পডোদিরুব, বিস্ব প্রসিদ্ধ সংস্থেয়-গিদে, ই খেত্রক্কে, আগমি-সিরু-বুদক্কে, ননগে অতিব সন্তোশ-বগিদে।

ইকায় খুম্ননীংঙাই ওইরবা শ্রী শিবরাত্রী দেশিকেন্দ্র মহাস্বামীজী, শ্রী সিধেস্বর মহাস্বামীজী, শ্রী সিধলিংগ মহাস্বামীজী, কর্নাতকাগী মুখ্য মন্ত্রী, শ্রী বাসবরাজজী, কেন্দ্র মন্ত্রী মন্দলগী ঐহাক্কী মরুপ, প্রহলাদ জোশীজী, কর্নাতকা সরকারগী মন্ত্রী, এম.পি., এম.এল.এ. অমসুং সুত্তুর মথকা মরী লৈনবা অদোম লাইনীংবা পুম্নমক অমসুং ঐখোয়বু থৌজালবীনবগীদমক্তা মশিং য়াম্না লেংবীরক্লিবা নুংশিরবা সন্তশিং!

ঐহাক্না মৈসুরগী অধিসথাত্রী দেবী ইমা চমুন্দেস্বরীবু কোক নোন্দুনা খুরুমজরী! ঐহাক্না ঙসি মৈসুরদা লাকপগী খুদোংচাবা ফংজরিবসি ইমাগী থৌজালদগীনি অমসুং মৈসুরগী চাউখৎ-থৌরাংগীদমক্তা অচৌবা থবক কয়াবু মীয়ামদা খুৎশিন্নবগী খুদোংচাবসু ফংজরে। অদুগা ঐহাক ইশামকসু অদোম সন্তশিংগী মরক্তা তিন্দুনা ঙসিগী থৌরমগী শরুক য়াজবসিদা য়াম্না নুংঙাইবা ফাওজৈ। ঐহাক্না হৌজিক মফমসিদগী ইমা চমুন্দেস্বরীগী খুয়াখাদা চঙজগনি, মহাক্কী থৌজালসু লৌজগনি। ঙসিগী য়াইফরবা পুংফম অসিদা ঐহাক্না শ্রী সুত্তুরু মথকী সন্ত, আচার্য় অমসুং মনিষশিংবু মথ অসিগী শক্নাইরবা চৎনবী অমসুং হোৎনজমন কয়াগীদমক্তা ইকায় খুম্নবা ফোংদোকচরি। ঐহাক্না অসিগুম্বা স্পিরিচুএল ওইবা খোঙনাংগী মরূ হুনবীরিবা আদি জগৎগুরু শিবরাত্রী শিবয়োগী মহাস্বামীবু অখন্ননা খুরুমজরি। সুত্তুরু মথকী হৌজিক লৈফম ওইরিবা পরম পুজ্য শ্রী শিবরাত্রী দেশিকেন্দ্র মহাস্বামীজীগী মমাংমক্তদা লৌশিং অমসুং স্পিরিচুএলিতীগী চৎনবীনা খোঙজেল য়াঙনা চাউখৎলি। শ্রী মন্ত্রা মহারিশীজীনা হৌদোকপীরম্বা স্কুলনা শ্রী রাজেন্দ্র মহাস্বামীজীগী মখাদা চাউরবা প্রোজেক্ত অমা পায়খৎলি। ভারতকী সংস্কৃতী অমসুং সংস্কৃতীগী শিক্ষাগীদমক্তা স্কুল অসিগী অনৌবা ভবনসু ঙসি মীয়ামদা খুৎশিন্নরে। মসিগুম্বা মতমগা চুনবা অমসুং চাউরবা স্কুল অসিনা তুংগী মতম্বু হেন্না ফগৎহন্নবা শেম শাবগী ৱারেপ অসিবু হেন্না পাকথোক চাউথোকহনগনি হায়বগী ঐহাক্না থাজবা থম্মি। অসিগুম্বা থৌদাং অসিগীদমক্তা ঐহাক্না খ্বাই পুম্নমক্কী মফমদা কোক নোঞ্জদুনা ইকায় খুম্নজরি, য়াইফ পাউজেল কয়াসু পীজরি।

মরূপশিং,

ঙসিদি, শ্রী সিধেস্বর স্বামীজীগী নার্দবু নীংজবা সুত্র, শিব সুত্র অমসুং পতাঞ্জলী য়োগ সুত্রগী মতাংদা থম্বা ৱারোল কয়াবু মীয়ামদা খুৎশিন্নবগী খুদোংচাবা ফংজরি। নুংশিজরবা শ্রী সিধেস্বর স্বামীজীনা ভারতকী ঋষিশিংগী অরীবা চৎনবী, সাস্ত্রশিংদা স্রুতগী চৎনবী হায়নসু খঙনবসিগী মীহুৎ ওইরি। ঐখোয়না তাখিবা খুদিংবু ৱাখল অমসুং থম্মোইদা লোইশিল্লি হায়না  স্রুতগী চৎনবীনা তাক্লি। মালেমগী য়োগ নুমিৎকী তাঞ্জা অসিদা পতাঞ্জলী য়োগ সুত্রগী ৱাফম, নারদা ভক্তিসুত্রা অমসুং শিবসুত্রগী খুত্থাংদা ভক্তিয়োগ অমসুং গ্যানয়োগবু মীয়ামদা য়ৌহন্নবা হোৎনরিবা অসিগী কান্নবনা ভারত খক্তা নত্তনা মালেম পুম্বনা ফংগনি। অদুগা ঙসি ঐহাক্না অদোম খ্বাইগী নাক্তা পুল্লিবা অসিদা কর্নাতকাগী খঙ-হৈরবা মীওইশিংনা, মমাংগী চহি-চা ৪-৫গী মনুংদা খুন্নাইগী বিগ্যানগী মতাংদা মালেমসিদা ইখিবা খুদিংবু নীংথিনা নৈনবীয়ু হায়জনীংই অমসুং মীয়াম্না হীরম অসিগী মতাংদা নীংথিনা খঙনরকপা মতমদা নারদা ভক্তিনা মখোয়দগীসু হেন্না অরিবা ওই অমসুং খুন্নাইগী বিগ্যানগী মরী লৈনবা চাউরবা ৱারোল কয়াগী খোমজিনবা অমা লৈ হায়বা খঙগনি হায়না হায়জনীংই। মসিবু মালেম্না নীংথনা খন্ন-নৈনবগী মথৌ তাই। নোংচুপকী ৱাখল্লোনবু খঙবা মীওইশিংনা নারদা সুক্তগী মিৎয়েংদগী মালেম্বু য়েংনবা, খুন্নাইগী খুদোংচাবশিংবু য়েংনবা, মীওইবা খুন্নাইগী ভেল্যুবু য়েংনবা খ্বাইদগী অফবা লাইরিক্তি নারদা সুক্তা অসিনি অমসুং মসিবু হৌজিক্কী মতমগী ৱারোলদা ৱাহন্থোক্সু হনখ্রবনি। অদোম্না খুন্নাইগী অচৌবা মতেং অমা পাংখ্রবনি।

মরূপশিং,

লৌশিংগুম্না শেংবা অমত্তা লৈতে অমসুং লৌশিংগী মহুৎ শিনবা য়াবা অমত্তা লৈতে হায়না ঐখোয়গী সাস্ত্রশিংদা ইদুনা লৈরম্লবনি। মরম অদুনা, ঐখোয়গী ঋষি, মনিষশিংনা লৌশিংনা ইথিল পীবা, সাইন্সনা শাগোন্নবা ৱাখল্লোনগা লোয়ননা ভারতপু শেম্বীরম্বনি। ৱাখল তানবগী মতুং ইন্না মসিনা চাউখৎলি অমসুং রিসর্চনা অমুক্কা হেন্না মপাঙ্গল হাপ্লি। মতম কয়া হৌখ্রে, য়ুগ কয়া হোংখ্রে, ভারতনা মতমগী শিংনবা কয়াগা মাইয়োক্নদুনা লাকখ্রে। অদুবু ভারতকী ৱাখল তাবগী মতৌনা শোন্থরকপা মতম খুদিংদা ঐখোয়গী সন্ত, ঋষি, মুনি অমসুং আচার্য়শিংনা লৈবাক্কী কাচিন কোয়া খুদিংদগী পাউতাক কয়া পুথোক্তুনা ভারতকী থৱাইবু নৌহৌননা অমুক্কা হিংগৎহনখিবনি। ঐহাক্কী কাশীনা অৱাংদগী অমসুং ইনক নক্না লৈবা খা কাশীগী নঞ্জনগুর ফাওবা, মতম শাংনা মীখা পোল্লিঙৈ মনুংদা ঐখোয়গী লাইশঙ অমসুং মোনাস্ত্ররীগী মপাঙ্গল লৈরবা ইন্সতিত্যুসনশিংনা ভারতকী লৌশিংবু মুৎহন্দনা থমখিবনি। মৈসুরগী শ্রী সুত্তুরু মথ, তুমকুরগী শ্রী সিধগঙ্গা মথ, চিত্রদুর্গগী শ্রী সিরিগেরে মথ, শ্রী মুরুগু-রাঞ্জেন্দ্র মথ! চিকমগলুরগী শ্রী রম্ভাপুরী মথ, হুব্লীগী শ্রী মুরুসাবীরা মথ, বিদরগী বসবকলয়ান মথ! খা ভারত খক্তদা মথকী মশিং য়াম্লবা মফম লৈরে, মখোয়না চহি চা কয়াদগী মশিং থীঙমদ্রবা লিচৎ-শাজৎ কয়া অমা চাইখায়দুনা লাকখিবনি।

মরূপশিং,

অচুম্বগী ফম্বাক্তি রিসোর্স নত্তে, সেবা অমসুং কত্থোকপনা শেম্বনি। শ্রী সুত্তুরু মথ অমসুং জে.এস.এস. মহাবিদ্যা পীথনা মসিগী চাউরবা খুদম অমনি। শ্রী শিবরাত্রী রাজেন্দ্র মহাস্বামীজীনা মীয়ামগী সেবা তৌগে হায়বা ৱারেপ লৌদুনা শেল লৌদবা হোস্তেল হাংদোকখিবা মতমদা, মহাক্কী মফমদা করি রিসোর্স লৈরম্বগে? ভারাদা লৌবা য়ুম্নি, রাসনগী শীল-লাঙনবা মহাক্কী মফমদা শেল লৈরমদে। শেল লৈতবনা মরম ওইরগা হোস্তেলগী সপ্লাই লেপখিবা মতমদা মহাক্না মশাগী ‘লিঙ্গম করদিগে’ য়োনখি হায়বগী ৱাফম ফাওবা লৈখি হায়না ঐহাক্না তাজৈ। মসিনা হায়বদি, মহাক্না সেবাবু লাইনীংদগী হেন্না ৱাংই হায়না খনখি হায়বনি। দিকেদ কয়াগী মমাংদা কত্থোকখিবগী মহৈ ঙসিদি ঐখোয়গী মাঙদা লৈরে। ঙসিদি জে.এস.এস. মহাবিদ্য পীথনা লৈবাক্কী মন্নুংদা ইন্সতিত্যুসন ৩০০ হেন্না অমসুং লৈবাক অমসুং মীরম য়াওনা য়ুনিভর্সিতী অনি চলায়রি। ইন্সতিত্যুসন অসিনা ভারতকী স্পিরিচুএল অমসুং সংস্কৃতীগী পাউজেল্লোই ওইবতা নত্তনা সাইন্স, আর্ত, কম্মর্সকী লমদসু চাউরবা তেংবাং কয়া পীরি। সত্তুরু মথনা লাইরবা অঙাংশিং, ত্রাইবেল খুন্নাই অমসুং ঐখোয়গী খুঙ্গংগী মতেং পাংলিবা অসিনা পুম্নমক অসিগী খুদম্নি।

মরূপশিং,

কর্নাতকা, খা ভারত অমসুং ভারতকী ৱারী শারকপা মতমদা, এজুকেসন, মান্নবা মিৎয়েং য়েংবা অমসুং সেবাগুম্বা হীরম ওইরো, ভগবান বসভেশ্বরাগী থৌজালদগী শিংথাবগী ঙমখৈ নাইদে। ভগবান বসভেশ্বরাজীনা ঐখোয়গী খুন্নাইদা শক্তি পীখিবা, লোকতন্ত্রা, এজুকেসন অমসুং মান্নবা মিৎয়েং য়েংবগী ৱাখল্লোন শাগৎপীখিবশিং অসি ভারতকী ফম্বাক্তা ঙসিসু য়াওরি। ঐহাক্না লন্দন্দা ভগবান বসভেশ্বরাজীগী মীতমগী মায়খুম হাংদোকপগী খুদোংচাবা অমা ফংজখি, মদুদা নাকল অমদা মেগ্না কার্তা থম্বীরো অদুগা নাকল অমদনা ভগবান বসভেশ্বরাজীগী ৱারোল থম্বীরো, মেগ্না কার্তাগী চহি-চা কয়াগী মমাংদগী ঐখোয়গী লৈবাক্না খুন্নাইগী মতাংদা করম্বা মিৎয়েং য়েংলম্বগে হায়বা খঙবা ঙমগনি হায়না ঐহাক্না হায়খিবনি।

মরূপশিং,

অসিগুম্বা ৱাখল্লোনগী মখা পোন্না চত্তুনা, শ্রী সিধগঙ্গা মথনা ঙসি ইন্সতিত্যুসন চাম্মগা য়াঙখৈ হেন্না চলায়রি, খুন্নাইদা এজুকেসন অমসুং স্পিরিচুএলিতীগী ৱাফম শন্দোক্কলি। অদুগা হৌজিক হৌজিক, সিধগঙ্গা স্কুলদা মহৈরোই লিশিং তরা হেনবনা লৌশিং তাল্লি হায়না ঐহাক্কী ইফমদা পাউদম্লকখ্রে। ভগবান বসভেশ্বরাগী অসিগুম্বা ইথিল, ইশাগী খন্দনা সেবা তৌবগীদমক্তা কত্থোকপা, পুম্নমক অসিনা ভারতকী য়ুম্বীগী ফম্বাক্নি। ফম্বাক অসিনা মপাঙ্গল কল্লিবমখৈ, ঐখোয়গী লৈবাক্না মপাঙ্গল লৈবা হেনগনি।

মরূপশিং,

ঐখোয়না ঙসি লৈবাক্কী নীংতম্বগী চহি ৭৫ মপুং ফাবগী নুংঙাইবা ফোংদোক্লি, অদুনা নীংতম্বগী অমৃত কালগী মতমসিদা ‘সবকা প্রয়াস’কী খ্বাইদগী অফবা মতম অমা ওইরি। ঐখোয়গী ঋষিশিংনা অসিগুম্বা তেংবাংনবা, হোৎনমিন্নবগী মতৌবু ‘সহনাৱতু সহনৌভুনক্তু’ হায়না কৌই। সহ বির্য়ম কার্বাবাহাইগুম্বা বেদগী মওংদা ঐখোয়দা পীবিরি। চহি লিশিং কয়া শুরবা স্পিরিচুএলগী এক্সপেরিএন্সশিংবু তসেংবা ওইহন্নবা মতমসি অসি হৌজিক্নি। মীখ পোল্লিঙৈগী চহি কয়াগী মনুংদা মঙখিবা মঙলানশিংবু মঙফাওনহনবগী মতমসি হৌজিক ওইরবনি। মসিগীদমক্তা ঐখোয়না পুন্না হোৎনমিন্নবগী খোঙজেল হেন্না য়াঙখৎহনবা তাই। ঐখোয়না হোৎনরিবা অসিগা লৈবাক্কী ৱারেপশিংগা অমত্তা ওইহনবা তাবনি।

মরূপশিং,

এজুকেসনগী লমদা ‘নেস্নেল এজুকেসন পোলিসী’না ঐখোয়গী মাঙদা খুদম ওইনা লৈরে। এজুকেসন্না ঐখোয়গী লৈবাক্কী নুংদা শাগোন্নরবা লিচৎ অমা ওইদুনা লাক্লি। অসিগুম্বা মতৌ অসিগা লোয়ননা ঐখোয়গী অনৌবা চারোন শুরোনবু মাঙজিল থানা চৎপগী খুদোংচাবা ফংহনফম থোকই। মসিগীদমক্তা মমালোলদা মহৈ তম্বগী খুদোংচাবা ফংহল্লি। কন্নর, তমিল, তেলেগুগা লোয়ননা সংস্কৃতকুম্বা লোলশিংবু খুমাং চাউশিনহল্লি। ঐখোয়গী মথ পুম্নমক অমসুং ধর্মগী ইন্সতিত্যুসনশিংনা থবক অসিদা চহি কয়াদগী মথৌ পাংথোক্তুনা লাক্লি। নুংতিগী ফোঙবা সংস্কৃতকী অমত্তা ঙাইরবা পাউ-চে, সুধর্মা ঙসি ফাওবদা ফোঙলিবা অসি মৈসুর হায়রিবা মফমসিনি। লৈবাক্নসু মসিগী খোঙথাং অসিদা ঙসি তেংবাংলি, হোৎনফম থোকপা হোৎনবীরি। মান্নবা মতৌ অমা ওইনা, হকশেল অমসুং নুংঙাই য়াইফনা হিংবগী লমদা ভারতনা হোৎনবদগী মালেম পুম্বনা য়োগ অমসুং অয়ুর্বেদ মশক খঙলি। লৈবাক্কী অসিগুম্বা চৎনবীবু লৈবাক মীয়াম খুদিংদা খঙহন্নবা ঐখোয়না কন্না হোৎনরি। খোঙথাং অসিবু মহৈ য়ালহন্নবগীদমক্তা লৈবাক্কী স্পিরিচুএল ইন্সতিত্যুসনশিংনা তেংবাংবগী য়াম্না মরু ওইবা তঙাই ফদবা লৈ। মতৌ অসুম্না, নুপীমচাশিংগী মহৈ-মশিং, ঈশিং য়োকখৎপা, অকোয়বগী ফিভম অমসুং লু-নানবা ভারতকীদমক্তা ঐখোয়না অমত্তা ওইনা মাঙ থানা থোক্লকপা তাবনি। মরু ওইবা ৱারেপ অমগা লৈরি, নেচরেল ফার্মিং। ঐখোয়গী চেং-হৱাইনা শেংলিবমখৈ, ঐখোয়গী হকচাং অমসুং ৱাখলসু অশেংবা ওইগনি। হীরম অসিগা মরী লৈননা ঐখোয়গী ধর্মগী মথ অমসুং ইন্সতিত্যুসনশিংনা মাঙ থানা থোকপীরক্তুনা মীয়ামদা খঙহন্নবা হোৎনবা হায়বসি ঐহাক্কী অপাম্বনি। ঐখোয়গী ভারত ইমা, ভারতকী লৈহাওবু কেমিকেলদগী মনীং তমহল্লসি। ঐখোয়না থবক অসি হেন্না পাংথোক্লিবমখৈ ইমাগী থৌজালনা ঐখোয়বু তেংবাংবা হেনগনি।

মরূপশিং,

সন্তশিংনা হোৎনরিবা কয়াগা মরী লৈনবা থবক-থৌরম কয়াদা স্পিরিচুএলগী ইথিল অমসুং ভগবানগী থৌজালসু য়াওরবনি। অদোম সন্ত পুম্নমক্কী থৌজালনা লৈবাক মীয়ামদা লেপ্তনা য়ৌগনি হায়বসি ঐহাক্কী থাজবনি। ঐখোয় পুন্না অনৌবা ভারতকী মঙলান মঙফাওনহনসি। ঙসিদি ঐহাক্কী য়াম্না লাইবক ফবা নুমিৎনি। নুংশিরবা সন্তশিংনা ঐহাক্কী মরমদা ফোংদোকপীরিবা ৱাফম কয়া তাজরে, অদুবু থাক অদু য়ৌনবা ঐহাক্না হোৎনগদবা য়াম্না ৱাৎলি হায়বা ঐহাক খঙজৈ। অদোম সন্তশিংগী থৌজাল, ঐখোয়গী নীংথিরবা চৎনবী অমসুং অদোম সন্তশিংনা ঐহাক্কী ইফমদা থম্লিবা থাজবগা লোয়ননা অদোম্না ঐহাকপু লমজিং লমতাকপীগনি, অমসুং ঐখোয়গী নীংথিরবা চৎনবীগী ইথিলনা ঐহাক্না পাংথোক্কে খল্লিবা থবকশিং পাংথোকপা ঙমজরো হায়না থৌজাল পীবিয়ু হায়না ঐহাক্না থৌনিজরি। অদোমগী মরক্তা তিঞ্জদুনা ঐহাক্কী ৱাখল্লোন ফোংদোচবসু ফংজরে। ঐহাক্কী পুন্সি অসিবু থৌজানবীরে হায়না ঐহাক্না ফাওজরে। মসিগীদমক্তা ঐহাক্না পুম্নমকপু অমুক্কা হন্না কোক নোঞ্জরি।

য়েল্লারিগু নমস্কার!

*****