मैसूरु हागू कर्नाटका राज्यद समस्त नागरीक बंधुगड़िगे, नन्न प्रीतिय नमस्कारगड़ु। विविध अभिवृद्धि, काम-गारिगड़अ उद्घाटनेय जोतेगे, फलानुभवि गड़ोन्दिगे, संवाद नडेसलु, नानु इंदु इल्लिगे बंदिद्देने।

(কন্নর লোলদা হৌদোকপগী ৱারোল পীবা)

কর্নাতকাগী রাজ্যপাল, শ্রী থাৱরচন্দ গহলোৎ, মীয়াম্না পাম্নরবা মুখ্য মন্ত্রী শ্রী বসবরাজ বোম্মৈ, মন্ত্রী-মন্দলদা ঐহাক্কী মরুপ ওইরিবা কেন্দ্রগী মন্ত্রী শ্রী প্রলহাদ জোশি, কর্নাতকা সরকারগী মন্ত্রী, এম.পি.শিং, লেজিসলেচরশিং, ফম্ফম লাংদা লেংশিল্লিবা অতোপ্পা দিগনিতরী পুম্নমক অমসুং ঐহাক্কী মৈসুরুগী ইচিল-ইনাওশিং।

কর্নাতকা অসি লৈবাক্কী শেন্মীৎলোন অমসুং লাইনীংগী ওইবা অনিমক্তা চাউখৎপা পুন্না উবা ফংবা রাজ্য অমনি। কর্নাতকা অসি ঐখোয়গী অরিবা নাৎ অসি য়োকখৎতুনা ২১শুবা চহিচাগী ফিরেপশিং ঐখোয়না করম্নবা মঙফাওনবা ঙমহনবগে হায়বগী মতিক চারবা খুদম অমা ওইরি অমসুং মৈসুরুদা পুৱারী, হেরিতেজ অমসুং মোদর্নিতীগী অপুনবা অসি মফম খুদিংদা উবা ফংলি। মরম অসিনা মৈসুরুগী হেরিতেজ অসিবু ইকাই খুম্নবা উৎনবা অমসুং অফবা পুন্সি মহিং অমগা লোয়ননা মালেমদা লৈরিবা মীওই করোর কয়াগা কন্নেক্ত তৌনবা হন্দক ইন্তর্নেস্নেল দে ওফ য়োগ পাঙথোক্নবা মফম অমা ওইনা খনখি। হয়েং মালেমগী তোঙান-তোঙানবা মীওইশিংনা মসিদা শরুক য়াগনি অমসুং মৈসুরুগী পুৱারী ওইরবা লমদম অসিদা য়োগ তৌগনি।

ইচিল-ইনাওশিং,

লমদম অসিনা নলৱাদী কৃষ্ণ ৱাদিয়ার, সর এম. বিস্বেসর‍য়্য অমসুং রাস্ত্রকবী কুবেমপুগুম্বা অথোইবা মীশক কয়া লৈবাক অসিদা পীখি। অসিগুম্বা মীশকশিং অসিনা ভারতকী হেরিতেজ অমসুং চাউখৎ খোঙচৎতা শীংথানীংঙাই ওইনা শরুক তমখি। ঐখোয়গী ইপা-ইপুশিং অসিনা খুদোংচাবা অমসুং ইকাই খুম্নবা ফংহনবগা লোয়ননা মীচম মীয়ামগী পুন্সিগা শম্ননবগী পাম্বৈ পুম্নমক ঐখোয়দা তাকপীখি অমসুং উৎখি। ‘দবল ইঞ্জিন’ সরকার অসিনা থৌনা লৈনা অমসুং খুৎশম্নদুনা কর্নাতকাগী চাউখৎনবগী থবক পাইখৎলি। সবকা সাথ, সবকা বিকাস, সবকা বিশ্বাস অমসুং সবকা প্রয়াস অসি ঙসি ঐখোয়না মৈসুরুদসু উবা ফংলি। মীকুপ খরগী মমাংদা ঐহাক্না সরকার অসিনা মীয়ামগী য়াইফনবা পাইখৎপা স্কিম কয়ামরুমগী বেনিফিসরীশিংগা ৱারী শাখি অমসুং মফম অসিদা লাকপদসু ঐহাক্না থেংখি মরমদি মখোয়না হায়গদবা য়াম্না লৈখি অমসুং ঐহাক্না মখোয়না হায়রিবা অদু তাবদসু নুংঙাইবা পোকখি। মতম শাংনা ঐহাক্না মখোয়গা লোয়ননা ৱারী শাদুনা লৈরুরে। অমসুং মসিনা মরম ওইদুনা মফম অসিদা লাকপদা থেংখ্রে। মীওইশিং অদুনা ফোঙদোরকখিবা সমস্যাশিং কোকহন্নবা অমসুং ৱা ঙাংবা ঙমদ্রবশিং অদুগীদমক লায়েংনবা হেন্না ফবা রিসর্চ তৌনবা পুক্নিং থৌগৎললিবা সেন্তর অমা ঙসি শঙ্গাখি। মৈসুরু কোচিং কমপ্লেক্স প্রোজেক্তকী উরেপ-উয়ুং তম্বগা লোয়ননা মৈসুরু রেলৱে স্তেসন মতমগা চুনবা ওইহনবা, মাগী রেল কন্নেক্তিবিতী অসি মপাঙ্গল কনখৎহনবা ঙম্লগনি।

মৈসুরুগী ঐহাক্কী নুংশিরবা ইচিল-ইনাওশিং,

চহি অসি নীংতম্বা ফংবগী চহি ৭৫শুবনি। হৌখিবা দিকেদ ৭ অসিদা কর্নাতকাদা সরকার কয়া উবা ফংখ্রে, লৈবাক অসিদসু সরকার কয়া শেমখ্রে। সরকার খুদিংমক্না খুঙ্গং, লায়রবা, দলিত, খুদোংচাবা ফংদ্রবা, শোত্থরবা, নুপী অমসুং লৌমীশিংগী মরমদা য়াম্না ঙাংই, স্কিম কয়া শেমখি। অদুবু মখোয়না য়ৌশিনবা ঙম্বা অদুদি অকক্নবা লৈখি, মখোয়গী ইথিল অদু অকক্নবা ওইখি, মখোয়গী শেন্দোং অদুসু অপীকপা সর্কল অমদা অকক্নবা লৈখি। ইং কুমজা ২০১৪দা নখোয়না ঐখোয়দা দিল্লীদা খুদোংচাবা অমা পীখিবা মতমদা ঐখোয়না অরিবা চৎনবী অমসুং মওং-মতৌ অসি শেমদোক্নবা ৱারেপ লৌখি। ঐখোয়না সরকারগী কান্নবশিং, সরকারগী স্কিমশিং অসি মীপুম খুদিংদা, সেক্সন খুদিংদা, ফংফম থোকপা মীওইশিংদা ফংনবা মিসন মোদতা থবক হৌখি।

ইচিল-ইনাওশিং,

হৌখিবা চহি ৮ অসিদা ঐখোয়না লায়রবশিংগী য়াইফ-থৌরাংগী স্কিম কয়া পাকথোক-চাউথোকহনখি। মমাংদা মসি রাজ্য অমা খক্তগী ঙমখৈশিংদা ৱাংমদা হেন্দোকপা ঙমদনা লৈরমখি হৌজিক্তি মখোয় অদু লৈবাক পুম্বনা এক্সেসিবল ওইরে। ৱান নেসন ৱান রাসন কার্দ অসিগুম্বা থৌশিলশিং, স্কিমশিং অসিনা হৌজিক ভারত শিনবা থুংনা কোনশিল্লি। কর্নাতকাগী লায়রবা মীওই করোর ৪.২৫ হেনবনা হৌখিবা চহি অনি অসিদা লেম্না রাসনশিং ফংলি। করিগুম্বা কর্নাতকাদগী মীওই অমনা থবক্কীদমক অতোপ্পা রাজ্য অমদা চৎপা মতমদা মখোয়না মফম অদুদা ৱান নেসন, ৱান রাসন কার্দকী কান্নবা ফংগনি।

মসিগা চপ মান্নবা মওংদা লৈবাক শিনবা থুংবদা আয়ুশ্মান ভারত অভিয়ানগী কান্নবা ফংলি। স্কিম অসিগী মতেংনা লায়রবা অনাবা মীওই লাখ ২৯ হেনবনা রাজ্য অসিদগী লেম্না লায়েং ফংখি। মসিনা মরম ওইদুনা লায়রবশিংনা লুপা করোর লিশিং ৪ তুংশিনবা ঙমখি।

হৌজিক্তা ঐহাক্না নিতিশ কৌবা নহা ওইরিবা নুপামচা অমা থেংনরকখি। খঙহৌদনা মরম অমনা মহাক্কী শক্তম অদু মকশিনখি। আয়ুশ্মান কার্দকী মতেংনা মহাক্না অনৌবা পুন্সি অমা ফংজখি। মহাক য়াম্না হরাওখি, থাজবা কয়া লৈখি মরম অসিনা মহাক্কী মাইথোং অদু অমুক হন্না মকা লামখি। মহাক্কী ৱাহৈশিং অদু তারুবদা সরকারগী পৈসা খুদিংমক মীয়ামদা য়ৌহন্দুনা লায়রবশিংগী পুন্সিদা অনৌবা থাজবা পোকহল্লিবা অনৌবা থৌনা হাপ্পিব, অনৌবা ফিরেপশিং লৌবা ঙমহল্লিবা অসিদা ঐহাক্না য়াম্না অপেনবা পোকখি।

মরুপশিং,

করিগুম্বা মখোয়দা ঐখোয়না শেল অদু হকথেংননা পীরবদি মখোয়না লায়েংবা ঙমলমদবা য়াই। করিগুম্বা স্কিম অসিগী বেনিফিসরীশিংনা অতোপ্পা রাজ্যশিংদা লৈবা তারবসু মখোয়না মফম অদুদা কান্নবশিং মপুং ফানা ফংলি।

মরুপশিং,

সরকারনা হৌখিবা চহি ৮ অসিদা হৌদোকখিবা স্কিমশিংনা খুন্নাইগী শরুক অমদি খুন্নাইগী মফম পুম্নমক, লৈবাক অসিগী কাচিন-কোয়া খুদিংমক শুনা য়ৌবা হায়বা ৱাখল্লোন অসিদা মরু ওইবা মীৎয়েং চংখি। নাকল অমরোমদা ঐখোয়না স্তার্ত-অপ পোলিসীগী মখাদা নহারোলশিংদা শেন্থংশিং পীরি, অমরোমদা পি.এম. কিসান সম্মান নিধিগী মখাদা লৌমীশিংদা শেলসু পীরি। কর্নাতকাগী অপীকপা লৌমী লাখ ৫৬না মখোয়গী একাউন্তদা লুপা করোর ১০০০০ হেন্না ফংখ্রে। 

করিগুম্বা ঐখোয়না লৈবাক অসিদা লৈরিবা ইন্দস্ত্রী অমসুং মেন্যুফেকচরিং অসি চাউখৎহন্নবা লুপা করোর লাখ ২গী পি.এল.আই. স্কিম অমা শেম্বা তারবদি মুদ্রা য়োজনা, পি.এম. স্বনিধি য়োজনা অমসুং কিসান ক্রেদিৎ কার্দ কেম্পেনগী খুত্থাংদা অপীকপা ওন্তপ্রিনোরশিং, অপীকপা লৌমীশিং, শা-শন লোইবা মীওইশিং অমসুং স্ত্রিৎ ভেন্দরশিং অসিদা বেঙ্কশিংদগী লায়না লোনশিং ফংহনবা ঙমগনি।

মুদ্রা য়োজনাগী মখাদা কর্নাতকাগী অপীকপা ওন্তপ্রিনোর লাখ কয়াদা লুপা করোর লাখ ১গা লিশিং ৮০গী লোনশিং পীথখ্রে তাবদা অদোম্না অঙকপা পোক্কনি। তুরিস্ত দেস্তিনেসন অমা ওইবনা স্কিম অসিদা হোম স্তে, গেস্ত হাউস, অতোপ্পা সর্ভিসশিং পীরিবা মীওইশিংদা মতেং কয়া ফংহনখি। পি.এম. স্বনিধি য়োজনানা কর্নাতকাগী স্ত্রিৎ ভেন্দর লাখ ১.৫ হেনবদা মতেংসু পাংবা ঙমখি।

ইচিল-ইনাওশিং,

হৌখিবা চহি ৮ অসিদা সরকার অসিনা লাস্ত-মাইল দেলিবরী ফংহন্দুনা সোসিএল জস্তিস এম্পাৱর তৌনবা হোৎনখি। স্কিম অসিগী কান্নবা মাগী য়ুমথংনবনা ফংলিবা অসি ঙসি নত্ত্রগা হয়েং মহাকসু শোইদনা মসিগী কান্নবা ফংগনি; মহাক্কী মতম শোইদনা লাক্কনি হায়না লায়রবশিংনা থাজবা থম্লি। সেচুরেসন হায়বগী ৱাহন্থোক্তি ১০০% কান্নবা ফংবা, খেন্নবা থমদবা, লিকেজ লৈতবা হায়বনি, য়াইফ-থৌরাং স্কিমশিংগী সেচুরেসন য়ৌনবা হোৎনবনা খেন্নবা অমসুং লিকেজ লৈতনা কান্নবশিং ফংহনবগী থাজবা অসি ভারতকী মীয়াম মরক্তা হেনগৎহনখি। কর্নাতকাগী লায়রবা ইমুং লাখ ৪.৫না পক্কাগী য়ুম শাখিবা মতমদা মসিগী থাজবা অসি হেনগৎলকখি। কর্নাতকাগী ইমুং লাখ ৫০ হেনবনা অহানবা ওইনা তোতি ঈশিং ফংবা মতমদা মসিগী থাজবা অসি হেনগৎলকখি। লায়রবশিংনা তঙাই ফদবা পোৎলমশিং লেম্নবা ফংবা মতমদা মহাক্না হেন্না থৱায় য়াওনা লৈবাক অসিগী চাউখৎ-খোঙচৎতা য়াওশিনবা ঙমহল্লি।

আজাদীগা অমৃত মহোৎসব অসিদা ভারতকী চাউখৎ-থৌরাংদা মীপুম খুদিংমক শরুক য়ানবা মথৌ তাবা খোঙথাং খুদিংমক পাইখৎখি। ঐখোয়গী মতিক চাদ্রবা কম্পনীশিং অসিনা খোঙথাং খুদিংদা শীংনবশিং মায়োক্নবা তাখি। ঐখোয়গী সরকার অসিনা ঐখোয়গী মতিক চাদ্রবা কম্পনীশিং অসিনা অতোপ্পদা মীপাল তাংবা হন্থহন্নবা লেপ্পা লৈতনা খোঙথাংশিং পাইখৎলি। ঐখোয়গী শেনয়েক্তা, কোইনশিংদা দিব্যাঙ্গশিংগী খুদোংচানবা অনৌবা ফীচরশিং হাপচিনখি। মীমান্নদ্রবশিংগী এজুকেসনগা মরী লৈনবা কোর্সশিং লৈবাক অসিদা চাউখৎহল্লি। মীমান্নদ্রবশিংগীদমক মীয়াম তিনবা মফমশিং, বসশিং, রেলৱেজ অমসুং অতোপ্পা ওফিসশিং খুদোংচাগদবা মওংদা শেম্লি। মফম অমদগী মফম অমদা চৎপা মতমদা মীমান্নদ্রবা মীওইশিং অসিগী সমস্যা কোকহন্নবা কম্মন সাইন লেংগ্বেজ অমা শেমখি। লৈবাক অসিগী মীমান্নদ্রবা মীওই করোর কয়াদা লেম্না মথৌ তাবা ইক্বিপমেন্ত পীরি।

ঙসি বেঙ্গলুরুদা সর এম. বিস্বেস্বরেয়া রেলবৱে স্তেসন শঙ্গাখিবা অদুদা ব্রেল মেপশিং অমসুং স্পেসিএল সিগনেজ য়াওহনখি, রেম্প ফেসিলিতী অসি প্লেৎদোর্ম পুম্নমক কন্নেক্ত তৌরিবা সবৱেদা ফংহল্লি। মৈসুরুদা ওল ইন্দিয়া ইন্সতিত্যুত ওফ স্পীচ এন্দ হিয়রিংনা অচৌবা সর্ভিস অমা পীরি। ঙসি ইন্সতিত্যুত অসিগী সেন্তর ফোর এক্সিলেন্স অমা শঙ্গাখি মসিনা লৈবাক অসিগী দিব্যাঙ্গ হ্যুমেন রিসোর্স অসি মপাঙ্গল কনবা ভারতকী মরু ওইবা ফোর্স অমা ওইহনবদা মতেং পাংলগনি।

ৱা ঙাংবা ঙমদ্রবা মীওইশিংগী সেন্তর অসিনা মখোয়গী সমস্যাশিং কোকহন্নবা অফবা লায়েং ফংহনবগা মরী লৈনবা রিসর্চ তৌনবা পুক্নিং থৌগৎলগনি, অসিগুম্বা মীওইশিং অসিগী পুন্সি ফগৎহন্নবা অমসুং মপাঙ্গল হাপনবা লম্বীশিং পুথোক্লগনি। অমসুং ঙসি স্তার্তঅপকী লমদা লৈরিবা নহারোলশিংদা অখন্নবা ৱাফম অমা থমজনীংই মদুদি নখোয়দা আইদিয়াশিং লৈ, নখোয় অসি ইনোবেতিব থিঙ্করশিংনি। নখোয়না তৌবা অনৌবা খুদিংমক্না, নখোয়গী স্তার্তঅপশিংনা মীমান্নদ্রবা ইচিল-ইনাওশিং অসিগীদমক মতেং য়াম্না পাংবা য়াগনি। মখোয়গী মপাঙ্গল হাপ্নবা অদুগুম্বা পোৎলমশিং নখোয়না পুথোকপা য়াগনি। অমসুং ঐহাক্কী মীমান্নদ্রবা ইচিল-ইনাওশিং অসিগীদমক খনবীবদা ঐহাক্কী স্তার্তঅপকী নহারোলশিংনা অমত্তা ওইনা লেপতুনা মখোয়গীদমক করিগুম্বা অফবা অমা তৌরক্কনি হায়না ঐহাক্না থাজৈ।

ইচিল-ইনাওশিং,

মোদর্ন ইনফ্রাস্ত্রকচরনা পুন্সি অমসুং বিজিনেস লায়থোকহনবদা অচৌবা থৌদাং অমা লৌরি। কর্নাতকাগী দবল ইঞ্জিন সরকার অসিনা অচৌবা মওংদা মাইকৈ অসিদা থবক পাইখৎলি। হৌখিবা চহি ৮ অসিদা কিমি ৫০০০ শেমগৎনবগীদমক লুপা করোর লিশিং ৭০রোম কাইথখি হায়না পাউদমখি। ঙসি বেঙ্গলুরুদা লুপা করোর ৭০০০ হেনবগী নেস্নেল হায়ৱে প্রোজেক্তশিংগী উরেপ-উয়ুং তমখি। কেন্দ্র সরকারনা নেস্নেল হায়ৱেগী খুত্থাংদা কর্নাতকাদা থবক্কী খুদোংচাবশিং পীনবা অমসুং কন্নেক্তিবিতী লৈহন্নবা চহি অসিদা লুপা করোর ৩৫,০০০ চাদিং তৌরি। দবল ইঞ্জিন সরকার অসিনা মীয়ামগী ইজ ওফ লিবিং হেনগৎহন্নবা প্রোজেক্তশিং অসি অথুবদা লোইশিনবা ঙম্নবা হোৎনরি।

মরুপশিং,

রেল কন্নেক্তিবিতীনা হৌখিবা চহি ৮ অসিদা কর্নাতকাদা হেন্না কান্নবা ফংহল্লে। মৈসুরু রেলৱে স্তেসন অমসুং নাগনহল্লি স্তেসন মোদর্নাইজেসন তৌবা হৌখিবা অসিনা মফম অসিদা লৈরিবা লৌমীশিং অমসুং নহারোলশিংগী পুন্সি মহিংদা মতেং পাংলগনি। নাগনহল্লি অসি সবঅর্বান ত্রাফিক্কী কোচিং তর্মিনেল অমসুং এম.ই.এম.য়ু. ত্রেন শেদ ওইনা শেমগৎলি। মসিনা হৌখিবা মৈসুরু য়ার্দতা লৈরিবা পোৎলুম অসি হন্থহল্লগনি। এম.ই.এম.য়ু. ত্রেনশিং চেনবা হৌখিবা অসিনা সেন্ত্রেল বেঙ্গলোর, মন্দিয়া অমসুং অতোপ্পা থংনবা মফমশিংদগী নোংমগী ওইনা মৈসুরু সহরদা চত্থোক চৎশিন তৌরিবা মীওইশিংদা মসিনা অখন্ননা কান্নবা ফংহল্লগনি। মসিগা লোয়ননা মৈসুরুগী তুরিজমসু মপাঙ্গল কয়ামরুম হাপ্পা ঙম্লগনি অমসুং তুরিজমগা মরী লৈনবা অনৌবা থবকশিংসু পীবা ঙমলগনি।   

মরুপশিং

দবল ইঞ্জিন সরকার অসিনা কন্নেক্তিবিতীদা কর্নাতকাদা চাউখৎপা পুরক্নবা মতৌ করম্না হোৎনরিবগে হায়বগী মতাংদা অতোপ্পা খুদম অমসু ঐহাক্না পীবা পাম্মি। ২০১৪গী মমাংদা কেন্দ্রদা লৈরম্বা সরকার অদুনা রেলৱেগী বজেদতা চহি খুদিংগী কর্নতকাগী চাংচত্তা লুপা করোর ৮০০ হাপলম্মি। কর্নতকাগী মিদিয়াগী মরুপশিং মুন্না তাবীয়ু, মমাংদা সরকারনা চহি খুদিংগী চাংচত্তা লুপা করোর ৮০০ হাপলম্মি। চহি অসিদা কেন্দ্র সরকারনা মসিগীদমক্তা লুপা করোর ৭,০০০ হাপখ্রে। মসি শরুক তরুক হেন্না খঙহেন হেনগৎপা হায়বদুনি। কর্নাতকাগী ওইনা রেলৱেজগী লুপা করোর ৩৪, হেন্না চংগদবা প্রোজেক্তশিংগী থবক পাইখৎলি। রেলৱে লাইনশিংগী ইলেক্ত্রিফিকেসনগী লমদসু ঐখোয়গী সরকারনা পাইখিবা থবকশিংগী মতাংদা তাবদা অদোম্না অঙকপা পোক্কনি। ঐহাক্না ফিগর মচা অমখক্তা হায়গে, অদোম্না য়াম্না চেশিন্না তাবীয়ু। ২০১৪গী মমাংগী চহি তরা হাববদি ২০০৪দগী ২০১৪ ফাওবদা কর্নাতকাদা কি.মি. ১৬কী রেলৱে লাইন খক্তমক ইলেক্ত্রিফাই তৌরম্মি। হৈখোয়গী সরকারগী মতমদা কর্নাতকাদা কি.মি. ১৬০০কী রেলৱে লাইন ইলেক্তিফাই তৌখি। চহি ১০দা কিলোমীতর ১৬…. চহি ৮দা কিলোমীতর ১৬০০। কিলোমীতর ১৬কা কিলোমীতর ১৬০০ কা চাংদম্নদুনা য়েংবীয়ু। মসি দবল ইঞ্জিনগী থবক তৌবগী খোঙজেলনি।

নুংশিরবা ইচিল ইনাওশিং

মসিগী কর্নাতকাগী অপুনবা চাউখৎ থৌরাংগী খোঙজেল অসি অসুম্না চৎপা ওইরসু। দবল ইঞ্জিন সরকার অসিনা মখাতানা অদোমগী সেবা অসুম্না তৌবা ওইরসনু। মসিগী অখাং কনবা অসিগা লোয়ননা ঐখোয়না অদোমগী সেবা তৌনবা মতম চুপ্পদা শেম শাদুনা লৈরে অমসুং অদোমগী থৌজালশিংনা ঐখোয়গী খ্বাইদগী চাউবা থৌনা ওইরিবনি। ঐখোয়বু থৌজাল পীবীনবা নখোয় কয়ামরুম্না থোকপীরকখিবা অসিনা অদোমগী থৌজালগী, অদোমগী সেবা তৌনবা থৌনা অদু পীবিরে।

মসিগী স্কিম কয়ামরুম অসিগীদমক নখোয় পুম্নমকপু ঐহাক্না অমুক্কা হন্না থাগৎপা ফোঙদোকচরি। বেঙ্গলোরবু ওইরো মৈসুরবু ওইরো কর্নাতকানা ঙসি ঐহাকপু তরাম্না ওকপিরিবা মতৌ অসিদা ঐহাক্না নখোয় পুম্নমক্তা থমোয় শেংনা তৌবীমল খঙবা উৎচরি। অদুগা হয়েং মালেম পুম্বনা য়োগগী নুমিৎ পালন তৌবা মতমদা মালেম অসিনা য়োগগা লোয়ননা কন্নেক্ত তৌবা মতমদা মালেমগী পুম্বগী মীৎয়েংফম অসি মৈসুরদা ওইরগনি। ঐহাক্না য়াইফ-পাউজেল পীজরি, থাগৎপা ফোঙদোকচরি। হন্না হন্না থাগৎচরি!

*****