প্রধান মন্ত্রী, শ্রী নরেন্দ্র মোদীনা লুচিংবা কেন্দ্রগী কেবিনেতনা খা ছতিসগরগী জিলা অহুম, মিং ওইনা পল্লবদা বিজাপুর, দান্তেৱারা অমসুং সুকমাদগী সি.আর.পি.এফ.তা কন্সতেবল (জেনেরেল দ্যুতী) ওইনা কেন্দিদেত ৪০০ খনবগা মরী লৈননা মখোয়গী খ্বাইদগী নেম্বা মহৈগী থাকপু ক্লাস ১০দগী ক্লাস ৮দা কোম্থোক্নবা গৃহ মন্ত্রালয়না থম্লকপা ৱাফমগী অয়াবা পীখ্রে।

জিলা অহুমসিদা রেলী অসিগীদমক্তা পাক শন্না খঙহন্নবগীদমক্তা পায়খৎপা পাম্বৈ ওইনা লোকেল পাউ-চেদা এদভর্তিজমেন্ত পীবা অমসুং অতোপ্পা থৌওংশিং পাংথোকপগী মথক্তা, সি.আর.পি.এফ.না নৌনা খল্লবা ত্রেনীশিং অসিদা মখোয়গী প্রোবেসন মতমগী মনুংদা ফোর্মেল ওইবা এজুকেসনসু পীগনি।

ছতিসগর রাজ্যগী মনুং হঞ্জিনবা জিলা অহুম, মিং ওইনা পল্লবদা বিজাপুর, দান্তেৱারা অমসুং সুকমাদগী ত্রাইবেল নহা ৪০০না থবক ফংবগী খুদোংচাবা ফংগনি। থবক খনবা অসিগীদমক্তা ফিজিকেলদা চুনবা মওংদা কোম্থোকপগী ৱারোলসু গৃহ মন্ত্রালয়না পীগনি।

সি.আর.পি.এফ. অসি সেন্ত্রেল আর্ম্দ পুলিস ফোর্স অমনি অমসুং মখোয়গী মপুং ওইবা থৌদাংদি লো অমসুং ওর্দরগী ফিভম ঙাকপা, কাউন্তর ইন্সর্জেন্সী মাইয়োক্নবা অমসুং ইন্তর্নেল সেক্যুরিতী ঙাক শেনবনি। অথুবা থবক অমা ওইনা, সি.আর.পি.এফ.না ছতিসগরগী শোত্থবা মফমশিংদগী নহা ৪০০বু কন্সতেবল (জেনেরেল দ্যুতী) ওইনা খনবগী ৱাহৌদোক থম্লকপনি। মখোয়না ক্লাস ১০ পাস তৌগদবনি হায়বা খ্বাইদগী নেম্বা মহৈগী থাক য়ৌরবা মতুংদা মখোয়গী থবক শোইদ্রে হায়না লৌগনি, মরম অদুনা খনগৎলবা নহাশিংদা ফোর্মেল এজুকেসন পীবগা লোয়ননা মখোয়গী প্রোবেসনগী মতমগী মনুংদা মহৈ তম্বাদা চঙবা লাইরিক, বোই অমসুং মরী লৈনবা পোৎলম খুদিংমক সি.আর.পি.এফ.কী মাইকৈদগী পীগনি। প্রোবেসনগী মতম অসি করিগুম্বা তঙাই ফদবা লৈরবদি, নৌনা খল্লিবশিংবু লোইফম থোকপা মহৈগী থাক লোইশিলহন্নবা শাংদোকপসু য়াই। মখোয়বু ক্লাস ১০গী পরিখা থাবদা তেংবাংনবগীদমক্তা, খল্লবা নহাশিং অসিবু কেন্দ্র।রাজ্য সরকারনা শকখঙলবা নেস্নেল ইন্সতিত্যুত ওফ ওপন স্কুলদা মিং চনগনি।

সি.আর.পি.এফ.না ইং ২০১৬-১৭কী মনুংদা ছতিসগরগী জিলা মরি, মিং ওইনা পল্লবদা, বিজাপুর, দান্তেৱারা, নরায়নপুর অমসুং সুকমাদগী সেদ্যুল ত্রাইব কেন্দিদেতশিং লৌখত্তুনা বস্তারিয়া বত্তালিয়ন অমা শেমখিবনি। অদুবু, মনুং হঞ্জিনবা মফমশিংগী নহাশিং অদুনা তঙাই ফদবা মহৈগী থাক, ক্লাস ১০, য়ৌদবনা মরম ওইরগা থবক খনবগী থৌওং শরুক য়াবা য়াদবনা হায়রিবা খোঙথাং অসিগী অপাম্বা মহৈ ফংবা ঙমখিদবনি।

***