প্রধান মন্ত্রী শ্রী নরেন্দ্র মোদীনা অজাদি অমৃত মহোৎসব থৌরমশিংগী শরুক অমা ওইনা ভারত সরকারগী মিনিস্ত্রি অমসুং বিভাগ মপানগী চাউরাক্না স্কিম অমসুং থবক ১৬কী কান্নবা ফংলবা মীওইশিংগা ৱারি শানগনি। মে ৩১, ২০২২দা সিমলাদা “গরিব কলয়ান সম্মেলন” কৌবা জাতি থাক্কী থৌরম পাংথোক্কনি অমসুং থৌরম অদুদা ভিদিও কনফরেন্সকী খুৎথাংদা প্রধান মন্ত্রীনা লৈবাক শীনবা থুংনা কান্নবা ফংলবা মীওইশিংগা হকথেংন্না ৱারি শানগনি। প্রধান মন্ত্রীনা লুপা কোতি ২১,০০০ হেনবগী কিসান সম্মান নিধিগী ১১শুবা ইন্সতোলমেন্তগী শেনফমশু য়েন্থোক্কনি।  

থৌরম অসিগী শরুক অমা ওইনা, রাজ্যশিংগী কোনুংশিং, জিলাগী হেদক্বাতরশিং অমসুং কে.ভি.কে সেন্তরশিংদশু থৌরমশিং পাংথোক্কনি। থৌরম পরেংশিং অসিগী মখাদা, চীফ মিনিস্তরশিং, কেন্দ্র অমসুং রাজ্য মন্ত্রীশিং, এম.পিশিং, এম.এল.এশিং অমসুং অতোপ্পা মীখলদগী খল্লকপা মীয়ামগী মীহুৎশিংগা স্কিমশিংগী কান্নবা ফংলবা মীওইশিংগা ৱারি শানগনি।

হায়রিবা স্কিমশিং অসিগী কান্নবা ফংলবা মীওই মশিং কোতি কয়া য়ৌরে অমসুং স্কিম খরদা কোতি ১০ হেনবা য়াওরে অমসুং য়ুম শাবা, থক্নবা ঈশিং ফংহনবা, চিঞ্জাক, হকশেল অমসুং মচি ওইবা চিঞ্জাক, হিংনবা শেন্দাল লম্বী অমসুং শেন-থুমগী থবকশিংদা কোনশিনবা য়াওনা খুন্নাইগী খ্বাইদগী লায়রবা কাংলুপশিংনা থেংনরিবা খুদোংচাদবশিং য়েংশিনগনি। ৱারি শানবা অসিনা স্কিমশিং পুনশিনবা য়াবগী ওইথোকপশিং খন্নগনি অমসুং ২০৪৭দা লৈবাক অসিনা নিংতম্বা চহি ১০০ মপুংফারকপগা লোয়ন্না ভারতকী মীয়ামগী অনিংবশিং থুংহন্নবা খুদোংচাবা অমা পীগনি। সম্মেলন অসি জিলা খুদিংমক কোনশিনবা লৈবাক শীনবা থুংনা অমুক্তদা পাংথোকপা খ্বাইদগী চাউবা থৌরম ওইগনি অমসুং প্রধান মন্ত্রীনা হায়রিবা স্কিমশিং অমসুং থবকশিং অসিনা মীয়ামগী পুন্সিদা ফংলিবা কান্নবশিংগী মতাংদা কান্নবা ফংলবা মীওইশিংগা ৱারি শানগনি।

তাঙ্কক অনি থোক্নবা পাংথোক্কদৌরিবা থৌরম অসিগী মখাদা, অয়ুক পুং ৯:৪৫দগী রাজ্য/জিলা/কে.ভি.কে থাক্কী থৌরম হৌগনি। চাউরাক্না অয়ুক পুং ১১:০০দগী হায়রিবা থৌরমশিং অসি জাতি থাক্কী থৌরমগা শম্নগনি। জাতি থাক্কী থৌরম দুরদর্সন্না মসিগী নেস্নেল অমসুং রিজনেল চেন্নেলশিংদা তেলিকাস্ত তৌগনি। জাতি থাক্কী থৌরম অদু মাইগোভকী খুৎথাংদা ৱেকাস্ত তৌনবা থৌরাং লৈরে অমসুং মসিগীদমক মীয়াম্না মখোয় মশামক রেজিস্তার তৌগদবনি। থৌরম অসি অতোপ্পা সোসিএল মেদিয়া চেন্নেলশিং হায়বদি য়ুতুব,ফেসবুক, ত্বুইতর, ইন্সতাগ্রামগী খুৎথাংদশু উবা ফংগনি।

মসিগী ৱারি শানবা অসিনা মীয়াম হিংবদা লাইহল্লিবা হায়রিবা মীয়ামদা য়ুম্ফম ওইবা স্কিমশিং অসিগী মতাংদা খঙহনবা খক নত্তনা মীয়ামগী অনিংবা-অপাম্বগী মতাংদা সরকার ৱাখল তাহনগনি অমসুং লৈবাক্কী চাউখৎপগী খোঙচৎ অসিদা কনাগুম্বা অমত্তা চিৎথহৌদবা ঙমহনগনি।

*****

স্কিমশিং/থবকশিংগী মমিং

১. প্রধান মন্ত্রী অৱাজ য়োজনা(খুঙ্গং অমসুং সহর অনিমক)

২. প্রধান মন্ত্রী কিসান সম্মান নিধি

৩. প্রধান মন্ত্রী উজ্বালা য়োজনা

৪. পোসান অভিয়ান

৫. প্রধান মন্ত্রী মাত্রু বন্দনা য়োজনা

৬. শ্বাছ ভারত মিসন(খুঙ্গং অমসুং সহর অনিমক)

৭. জল জিবন মিসন অমসুং অমরুত

৮. প্রধান মন্ত্রী শ্বানিধি স্কিম

৯. লৈবাক অমা রেসন কার্দ অমা

১০. প্রধান মন্ত্রী গরিব কলয়ান য়োজনা

১১. অয়ুস্মান ভারত প্রধান মন্ত্রী জন অরোগ্যা য়োজনা

১২. অয়ুস্মান ভারত হেল্থ এন্দ ৱেলনেস সেন্তর

১৩. প্রধান মন্ত্রী মুদ্রা য়োজনা

*****