ন্যু অমসুং রিনুএবল ইনর্জী মন্ত্রালয় (এম.এন.আর.ই.)না প্রধান মন্ত্রী কিসান উর্জা সুরকশা এবম উত্থান মহাঅভিয়ান (পি.এম.-কুসুম)গী থবক পায়খৎলি। স্কিম অসিদা মখাদা স্তেন্দ এলোন সোলর পম্প অমসুং লৌউবদা শিজিন্নবা পম্পশিংবু সোলরগী ওন্থোকপগী সবসিদী পীগনি। লৌমীশিংনা মেগাৱাত ২ ফাওবগী গ্রিদকা শম্নবা সোলর পাৱর প্লান্ত খিনবসু য়াগনি। স্কিম অসি রাজ্য সরকারগী খনগৎলবা বিভাগনা চলাইগনি অমসুং অসিগুম্বা খনগৎলবা বিভাগশিংগী অকুপ্পা মরোল এম.এন.আর.ই.গী ৱেবসাইত্তা (www.mnre.gov.in) ফংগনি।

স্কিম অসি হৌদোকখ্রবা মতুংদা, পি.এম.-কুসুমগী রেজিস্ত্রেসন পোর্তেলনি হায়বা অরানবা ৱেবসাইত কয়া থোক্লকখিবগী থৌওং খরা মন্ত্রালয়না থেংনখি। অসিগুম্বা অয়াবা পীদবা ৱেবসাইতশিংনা স্কিম অসিদা থৱাই য়াওজবা মীওইশিংদগী শেল অমসুং ই-পাউ কয়া লৌথোকখি। মীয়ামদা অমাঙবা লৈহন্দনবগীদমক্তা, এম.এন.আর.ই.না মমাংগী মতমদা পব্লিক নোতিস কয়া থোকখি অমসুং অসিগুম্বা ৱেবসাইতশিংদা শেল পীদনবা অমসুং মশাগী ওইবা ই-পাউ অমত্তা পীদনবা খঙহনখি। করিগুম্বা ৱাকত অমা হেক ফংবা মতমদা, অরানবা তৌবা মীওইগী মাইয়োক্তা থবক লৌখৎখি অমসুং অসিগুম্বা অরানবা রেজিস্ত্রেসন তৌবগী পোর্তেল কয়াসু থিংজিনখি।

অরানবা ৱেবসাইতশিংগী মথক্তা, ৱাৎসএপ অমসুং অতোপ্পা পাম্বৈ কয়ানা বেনিফিশরী ওইবা য়াবা মীওই কয়াবু লান্না লমজিংবগী থৌওং লৈখি। মসিনা মরম ওইরগা, পি.এম.-কুসুমগী কান্নবা ফংনিংবা কয়ানা মশাগী ই-পাউ নত্ত্রগা শেল পীদ্রিঙৈগী মমাংদা ৱেবসাইতকী অচুম-অরান থীদোকফম থোকই হায়না মন্ত্রালয়না পাউতাক পীখি। পি.এম.-কুসুম স্কিমগী রেজিস্ত্রেসন পোর্তেলনি হায়জবা চুম্লে খঙদ্রিবা নত্ত্রগা ৱাৎসএপ/এস.এম.এস.তা ফংবা চিংননীংঙাই ওইবা লিঙ্কতা চঙবীগনি হায়না মন্ত্রালয়না মখা তানা চেকশিনৱা তাকখি।

স্কিম অসিগী কান্নবা ফংবা য়াবা মরিক চারবা মীওই নত্ত্রগা স্কিমগী থবক পায়খৎপগী থৌওংগী অকুপ্পা মরোলশিং এম.এন.আর.ই.গী ৱেবসাইত (http://www.mnre.gov.in) নত্ত্রগা পি.এম.-কুসুমগী সেন্ত্রেল পোর্তেল (https://pmkusum.mnre.gov.in) নত্ত্রগা তোল-ফ্রী নম্বর (১৮০০-১৮০-৩৩৩৩)দগী লৌবা য়াগনি।

***