জয় স্বামী নরায়নয়!

থৌরম অসিদা শরুক য়াবীরিবা পরম পুজ্য গুরুজী, শ্রী গ্যাঞ্জীবন দাসজী স্বামী, ভারতিয় জনতা পার্তীগী গুজরাতকী প্রসিদেন্ত অমসুং ঐহাক্কী হাউস্কী মরুপ, শ্রীমান সি.আর. পাতিল, গুজরাত সরকারগী মন্ত্রী মনিশাবেন, বিনুভাই, সন্সদ রঞ্জনবেন, বদোদরাগী মেয়র কেয়ুরভাই, মীথুংলেন খুদিং, ইকায় খুম্নরবা সন্ত, হরিভক্ত পুম্নমক, ইচিল ইনাওশিং অমসুং ঐহাক্কী মাঙদা মশিং য়াম্না লৈরিবা নহারোল, নহা ওইরিবা ঝোম, ঝুসা, ইথিল, অদোম খুদিংবু ঐহাক্না কোক নোঞ্জরি। জয় স্বামীনরায়ন!

ঙসিগী সন্সকার অভ্যুদয়া শিবির অসিদা শরুক য়াবা ফংজবা অসি ঐহাক্কী লাইবক ফবনি, অমসুং মসিমক ঐহাক্কী য়াম্না নুংঙাইরবা পুংফম্নি। ঙসিগী শিবির অসিগী মওং-মতৌ, পান্দম, অমসুং শাফু অসিবু অদোম সন্তশিংনা শরুক য়াবদগী হেন্না হেনগৎহল্লিবনি।

ঐখোয়গী সন্ত অমসুং শাস্ত্রশিংনা চারোন-শুরোন খুদিংগী কেরেক্তর শেম্বা লেপ্তবগী মওং-মতৌনা খুন্নাই শেম্মি হায়বা তাকপীরে। মসিগী সিভিলাইজেসন, মসিগী নাৎ, মসিগী ইথিক্স, মসিগী মওং-মতৌনা ঐখোয়গী চৎনবীগী নীংথিবা মতৌগা মখল অমগী মরী লৈনরি। অদুগা, ঐখোয়গী চৎনবী শেম্বগী স্কুম অমা লৈরবদি, মদুদি ঐখোয়গী সন্সকারনা ওইগনি। মরম অদুনা, মসিগী সন্সকার অভ্যুদয়া শিবির অসি ঐখোয়গী নহা অমসুং খুন্নাই চাউখৎপগী ওইনা অভ্যুদয়াগী মহৌশাগী ওইবা শেংলবা খোঙথাং অমনি।

মসিদি ঐখোয়গী শক্তাক অমসুং চাউথোকচবগী মতৌবু অভ্যুদয়া ওইহন্নবা হোৎনবগী থৌওংনি। মসিদি ঐখোয়গী লৈবাকপু অভ্যুদয়া ওইহন্নবা হোৎনবনি। ঐখোয়গী নহারোলশিংনা শিবির অসিদগী হনখিবা মতমদা, মশাগী নুংদা অনৌবা শক্তি অমা লৈরে ফাওগনি হায়না ঐহাক্না থাজবা থম্মি। ময়েক শেংবা মিৎয়েং অমসুং ৱাখল্লোন অমা ফাওগনি। অসিগুম্বা অনৌবা অমা হৌবা, অনৌবা ৱারেপ অসিগীদমক্তা ঐহাক্না পুম্নমকপু থাগৎচরি।

মরূপশিং,

হন্দক্কী চহিগী ‘সন্সকার অভ্যুদয়া শিবির’ অসিনা লৈবাক্না নীংতম্বগী অমৃত মহোৎসব পাংথোকপগী মতমদা তারি। ঐখোয়না ঙসিদি অনৌবা ভারত অমা শেম্নবা ৱারেপ লৌরি, পুন্না হোৎনমিন্নরি। মশাগী শক্তাক্না অনৌবা ওইবা, তুংলমচত্তা মিৎয়েং থম্বা অমসুং নাৎনা অরিবা মতমগী ওইবা অনৌবা ভারত! অনৌবা ৱাখল্লোন অমসুং চহি কয়া লিরবা নাৎপু অমত্তা ওইনা পুদুনা তুংলমচৎকীদমক্তা খোঙদাবা অমসুং মীওইবা খুন্নাই খুদিংদা মাইকৈ তাক্কদবা অনৌবা ভারত অমা!

অদোম্না সেক্তর অমা হেক্তদা য়েংবীয়ু, শিংনবা লৈবা মতমদা, ভারতনা ওইথোকপা য়াগনি হায়বা থাজবা কয়া পুদুনা লাক্লি। খুদোংচাদবা লৈবা খুদিংদা, ভারতনা ৱারোইশিন পুরক্লি। কোরোনাগী ইরাং মনুংদা মালেমদা ভেক্সিন অমসুং হিদাক-লাংথক পীবদগী হৌদুনা সপ্লাই চেন ততলিবা মরকসিদা মরোমদোম লেপচবা ঙম্বা ভারত শেম্বগী মঙলান ফাওবা, মালেমদা থোক্লিবা চরাংনবা অমসুং য়েংথীনবা কয়াগী মরক্তা শান্তি পুরকপা ঙমগদবা মতিক লৈবা লৈবাক অমা ওইবা ফাওবদা, ভারতনা ঙসিগী মালেমগী অনৌবা থাজবা অমা ওইরি। মালেমগী মাঙদা ক্লাইমেত চেঞ্জকুম্বা চাওরবা শিংনবা অমা লৈরি, মসিদসু, ভারতনা মশাগী চহি চা কয়াগী লৈজবা সস্তেনেবল ওইবা পুন্সিগী লৌশিং কয়াগা লোয়ননা তুংগী মতমগীদমক্তা লুচিংলি। ঐখোয়না মীওইবা খুন্নাই অপুনবদা য়োগগী লম্বী তাক্লি, অয়ুর্বেদগী শক্তিবু মখোয়দা শক্তাক্লি। ঐখোয়না সোফৱেয়রদগী স্পেস ফাওবদা হয়েংগী অনৌবা মতমগীদমক্তা শেম-শারবা লৈবাক অমা ওইনা থোক্লক্লি।

মরূপশিং,

ঙসি ভারতনা মায় পাক্লিবসি ঐখোয়গী নহারোলশিংগী তৌবা ঙম্বগী মতিক্কী চাউরবা খুদম অমনি। সরকারগী মথৌ তৌবগী মওং অমসুং খুন্নাইগী ৱাখল খনবগী মতৌদা অহোংবা লাক্লে, অদুগা য়াম্না নুংঙাইবা ৱাফম অমনা মীয়াম্না মসিদা শরুক য়াবগী চাংসু হেনগৎলে। ভারতনা কৈদৌনুংদা ফংবা ঙম্লোই খন্নরম্বা পান্দম খুদিংদা ভারতনা থবক পাংথোকপগী মতৌবু মালেম পুম্বনা ঙসি য়েংনরি। স্তার্ত-অপ মালেমদা ভারতনা থাক ৱাংলিবা অসিসু মসিগী খুদম অমনি। ঙসিদি ভারতনা মালেমগী স্তার্ত-অপকী খ্বাইদগী অহুমশুবা চাউবা পথাপ লৈরি। মসিবু লুচিংলিবা অসিসু ঐখোয়গী নহারোলশিংনি।

মরূপশিং,

ৱাখল অমসুং হকশেল ফনা লৈবনা ইশা খক্তা নত্তনা অতোপ্পগী য়াইফবা ওইহল্লি হায়বসি ঐখোয়গী লৈবাক্তা হায়নবা ৱাফম অমনি। করিগুম্বা, ৱাখলনবু শেংলবদি, ওইথোক্লোইদবা করিমত্তা লৈতে। মরম অদুনা, স্বামী নরায়ন কাঙলুপকী সন্তশিংনা ইশাগী লিচৎ-শাজৎ শেমজবগী অসুক য়াম্না নীংথিরবা থৌওং অমা সন্সকার অভ্যুদয়া থৌরমগী খুত্থাংদা পাংথোক্লি। ঐখোয়গী ওইনদি, সন্সকার হায়বসিনা এজুকেসন, মীয়ামগী সেবা অমসুং মীয়ামগী অপাম-পামদ খঙবনি! ঐখোয়গী ওইনদি, সন্সকার হায়বদি পুক্নিং চঙবা, খোঙফম চেৎপা অমসুং পাঙ্গল হায়বনি! ঐখোয়না ইশাবু থাক ৱাংনা পুখৎসি, অদুবু থৌওং অসিনা অতোপ্পগী য়াইফ-য়ুম্বালগী পাম্বৈসু ওইগদবনি! ঐখোয়গী মায়-পাকপগী অৱাংবা থাক্তা য়ৌবা ঙম্বা ওইসনু, অদুগা ঐখোয়গী মায় পাকপা হায়বসিনা মীয়ামগী সেবা তৌবা ওইসনু। মসিমক ভগবান স্বামিনরায়নগী পাউতাক্নি অমসুং ভারতকী মহৌশাগী মতৌনি।

ঙসি অদোম্না গুজরাতকী কাচিন কোয়া খুদিংদগী লাকপীরি, নহারোল মশিং য়াম্লবা কয়াসু ঐহাক্না উবা ফংলি, ঐহাক ইশা য়াওদুনা বদোদরাদা লৈরম্লবদি হায়না ঐহাক্না খল্লি। অদুবু খুদোংচাবা কয়া অমসুং মতমগী অকক্নবা কয়া লৈবনা লাকপদি ঙমদরে। ঐখোয়গী জিতুভাইদি মোমোন নোক্তুনা অদুমক লৈরি। মশানা তাবনি, মরমদি, ঐহাক্না হৌখিবা মতম কয়াদা বদোদরাদা লৈবগী খুদোংচাবা কয়া ফংজখি। অদুগা, বদোদরা অমসুং কাশিনা ঐহাকপু মখোয়গী এম.পি. ওইহনবা, ঐহাকপু এম.পি. ওইনবগীদমক্তা জনতা পার্তীনা তিকেৎ পীখিবা হায়বসি ঐহাক্কী লাইবক ফবনি অমসুং মসিদা ঐহাক্না নুংঙাইবা ফাওই। অদুবু, বদোদরা অমসুং কাশিনা ঐহাকপু পি.এম. ওইবগী তিকেৎ পীবিখ্রিবনি। ঐহাক্কা বদোদরাগা করি মরী লৈনবগে হায়বা অদোম্না খনবা ঙমগনি। বদোদরা পনবা মতমদা শক্নাইবা কয়াবু ঐহাক্না নীংশিংই। ঐহাক্কী কেশুভাই থক্কর, জম্নাদাস, কৃষ্ণকান্ত ভাই শাহ, ঐহাক্কী মরুপ নলীন ভাই ভত, বাবুভাই ওঝা, রমেশ ভাই গুপ্তগুম্বা শক্তম কয়া ঐহাক্না মাঙদা উদুনা লৈ। অদুগা, ঐহাক্না মতম কয়া থবক তৌবা ফংমিন্নখিবা নহারোলগী তীম্বুসু ঐহাক্না নীংশিংই। মখোয়শিং অদুসু ঙসিদি অৱাংবা থাক কয়াদা লৈনখ্রে। গুজরাতকী মতেং পাংলি। বদোদরা অসি সন্সকার নগরী হায়না মতম পুম্বদা খঙনবনি। সন্সকার হায়বসিনা বদোদরাগী শক্তাক্নি। অদুগা অসিগুম্বা সন্সকার নগরী অসিদা সন্সকারগী থৌরম পাংথোকপা হায়বসি মহৌশানা তাবনি অমসুং ঐহাক্না মতম খরগী মমাংদা বদোদরাদা ৱা ঙাঙখিবসু অদোম্না নীংশিংলমগনি। মীয়ামগী মীফম্নি অমসুং মদুদা ঐখোয়না স্তেচু ওফ য়ুনিতীগী মতাংদা হায়খিবনি। মতমদুদদি, স্তেচু ওফ য়ুনিতী অসি ৱাখল্লোন্দা খক্তমক থবক পায়খৎলিবা মতম্নি। মসি হেক লৈরকপা মতমদা, বদোদরা অসি মালেমগী পুক্নিং চিংশিনবা মফম ওইগনি হায়না ঐহাক্না হায়খিবনি। বদোদরানা স্তেচু ওফ য়ুনিতীগী বেজ ওইগনি হায়বসি ঐহাক্না চহি কয়াগী মমাংদা হায়খ্রবনি। ঙসিদি ময়াইথংবা অপুনবা গুজরাতনা তুরিজমগী মপুং ওইবা ইকোসীস্তেমগী মিৎয়েং চঙফম ওইরে। মান্নবা ওইনা, পবাগরবু নৌহৌননা শেমগৎলিবা অসিগা লোয়ননা ঐখোয়না মহাকালীগী থৌজালসু ফংলি। লাক্কদৌরিবা মতমশিংদা মহাকালীগী খুয়াখাদা ইকোক নোঞ্জবা ঐহাক্না শোইদনা লাক্কনি। অদুবু, পবাগর ওইরো, নত্ত্রগা স্তেচু ওফ য়ুনিতী ওইরো, ৱাফমশিং অসিনা বদোদরা সন্সকার নগরীগী লোংথোকপা মশা ওইরি। ইন্দস্ত্রীগী হীরমদা বদোদরাগী মতৌ অমুক য়েংসি, বদোদরাদা শাবা মেত্রো কোচশিংবু মালেমদা চলাইনরি। মসি বদোদরাগী মপাঙ্গলনি, ভারতকী মপাঙ্গলনি। হায়রিবশিং অসি হন্দক্কী দিকেদ অসিদা ওইখিবা ঙাক্তনি। ঐখোয়না তোঙানবা সেক্তর কয়াদা খোঙজেল য়াঙনা মাঙজিল থাজিল্লি। অদুবু, ঙসি ঐহাক্না নহারোলশিংগী মনাক্তা লাক্লিবা অসিদা, ঙসি ঐখোয়গী পু. স্বামীনা হায়রিবা অদুনি – মদুদি, করিগুম্বা মতমদা উন্নবদা খুদোংচাদবা লাকই, মদুদা উন্নদ্রবসু য়াই, অদুবু তৌগদবা থবক্তি অদুম্না তোকথোকপা য়ারোই হায়রিবা অদুনি। সন্ত অমদগী অসিগুম্বা ৱারোল থোক্লকপা হায়বসি য়াম্না অচম্বা ৱাফমদি নত্তে, মসিনা উন্নগনু হায়বা নত্তে। অদুবু লৈবাক্কীদমক্তা থবক তৌসি হায়না মহাত্মানা হায়বদি লৈ। নীংতম্বগী অমৃত মহোৎসব মতমসিদা করিগুম্বা মতমদা ৱাখল য়াম্না খল্লি। লৈবাক্কীদমক্তা নীংতম ইহৌদা থৱাই থাবদি ফংহৌদ্রবসু, লৈবাক্কীদমক্তা হিংবদা য়াইনা। লৈবাক্কীদমক্তা করিগুম্বা খরদি তৌগদবনি। অপীকপা থবক্তগী হৌদুনা লৈবাক্কীদমক্তা করিগুম্বা অঙম্বা পাংথোকপা য়াই। ঐহাক্না অদোমদা হায়জরবা অমসুং সন্তশিংনা চয়োল খুদিংগী ঐহাক্কী ইফমদা হংলবা, অমসুং অদুগা ঐখোয়গী অসিদা লৈরিবা হরিভক্তীশিংনা গুজরাতকী ওইরো, লৈবাক্কী ওইরো, থবক অমা তৌবা য়াগদরা? হৌজিক্কী নীংতম্বগী অমৃত মহোৎসবকী মতমসিদা ইং ২০২৩গী ওগস্ত ১৫ ফাওবগী মনুংদা মসিগী সন্সকার অসিদা লাকখিবা মীওইশিংনা মখোয়গী মরুপ-মপাং অমসুং ইমুং মনুংদা হায়নদুনা চহি অমগী মনুংসিদা শেলগী ত্রাঞ্জেক্সন অমত্তা তৌদনা দিজিতেল পেমেন্ত খক্ত পাংথোকপা য়াগদরা? দিজিতেল করেন্সী খক শিজিন্নবা, মোবাইল ফোন খক্তদগী পেমেন্ত তৌবা। মসিনা কয়া য়াম্না চাওবা ইহৌ পুরকপা ঙমগনি অদোম খনবরা? মনা-মশিং য়োনবা মীগী মনাক্তা চৎলুবা মতমদা ঐহাক্তি দিজিতেল পেমেন্ত খক তৌগনি হায়বা মতমদা মহাকসু বেঙ্কতা চত্তুনা একাউন্ত হাংলুগনি, মহাক্কী শেলসু অফবা থবক্কী শিজিন্নবা হৌরগনি। পাংথোক্কনিকো, ঐহাক্কী মরুপশিং? খুৎ অমুক্তা থাংৎপীয়ু।

অতোপ্পা থবক অমগা লৈরি। নীংতম্বগী অমৃত মহোৎসবকী মতমসিদা য়ামদ্রবদা পুং ৭৫দি লৈবাক্কীদমক্তা থবক তৌবা য়াগনি। লু-নানবগী, মেলন্যুত্রিসন লৈহন্দনবা, সিঙ্গল য়ুজ প্লাস্তিক শিজিন্নবা থিংবগী মতাংদা খোঙথাং খরা পায়খৎপা য়াই। অসিগুম্বা থৌওং অসিবু মীয়াম্না শুপ্নগী পুং ৭৫গী পাংথোকপীয়ু। য়াম্নসু হাইরোই। ঐহাক্না হৌজিক লু-নানবগী মতাংদা ৱারী শাবা মতমসিদা, বদোদরাগী ৱারী শাবসিদা, বদোদরা অমসুং কাশিগা ঐহাক্কী তোঙানবা মরী লৈবা নীংশিংলকই। কাশি নীংশিংবা হায়বসি মহৌশানা তাবনি। ঐহাক্না লু-নানবগী খোঙথাং পায়খৎপা অসিদা কাশিদা নাগালেন্দগী নুপীমচা তিমসুতলা ইমসোংনা মতম খরগী মমাংদা মফমসিদা লাইরিক তম্বা লাকখিবনি। মহাক্না কাশিদা লৈবদা নুংঙাইবা ফাওরক্লে। মহাক্না কাশিদা মতম শাংনা লৈখি। মহাক্তি নাগালেন্দগী খৃস্তিয়নগী লাইনীংদা থাজবী মীওইনি। অদুবু লু-নানবগী মতাংদা লাকপদদি, মহাক্না কাশিগী ঘাত শেংবা হৌরকখি। অতোপ্পা নহাশিংনা মহাক্কী তেংবাংবা তপ্না-তপ্না হৌরকখি। লাইরিক লাইশু হৈবা, জিন্স শেৎপা ইচানুপা-ইচানুপীশিংনা অসুক য়াম্না কন্না হোৎনবগী থৌওংবু মীয়াম্না য়েংবা লাক্নখি। কাশি পুম্বনা মহাক্কী তেংবাংখি। নাগালেন্দগী নুপীমচা অমনা কাশি শেংবা মতমদা মসিনা ইথিল কয়া য়াম্না পীরগনি হায়বা অদোম অমুক্তা খন্থবীয়ু। ঐখোয়না লু-নানবগীদমক্তা লুচিংফম থোকই হায়না পু. গ্যনাজীবন স্বামীনা হায়বীখ্রে, ঐখোয়না মসিবু ইথৌদাংনি খন্না চৎকদবনি। লৈবাক পুম্নমক্না অসুম্না খনগদবনি, ঐহাক্তি ঈশিং কনবা পাম্মি খনবা য়াই, মদুদসু লৈবাক নীংবা য়াওরি। ঐহাক্না ইলেক্ত্রিসিতী লিক্না শিজিন্নবা য়াই, মসিদসু লৈবাক নীংবা য়াওরি। নীংতম্বগী অমৃত মহোৎসবকী মতমসিদা এল.ই.দি. বল্ব থান্দবা ঐখোয়গী হরিভক্তিগী ইমুং অমত্তা লৈহনগুমসি। ঐখোয়গী গুজরাত্তা জন ঔশধী কেন্দ্র কয়া অমা মফম কয়া লৈরি। ইমুং খুদিংদা দাইবিতিজ নাবা মীওই অমা শোইদনা লৈরমগনি, মহাক্কীদমক্তা ইমুং অদুনা থা খুদিংগী লুপা লিশিং ১০০০, ১২০০ নত্ত্রগা ১৫০০গী চঙলমগনি। অসুক য়াম্বা শেনফম্বু ইমুং অমনা থা খুদিংগী করম্না পুথোকপা ঙমগনি। জন ঔশধী কেন্দ্রদগী লৈরবদি মসি শুপ্নগী ১০০-১৫০ খক চঙগনি। ঐহাক্কী নহারোল মরূপশিং, মোদীনা মসিগী থবক অসি পাংথোকখ্রে, সরকারনা অসিগুম্বা থৌওং পাংথোক্লে। অদুবু ঐখোয়গী লায়রবা অমসুং মিদ্দল ক্লাসকী মীওইশিংনা জন ঔশধী কেন্দ্র হাংলে খঙদ্রি। মফমসিদা মখোয়বু পুবীয়ু, হিদাক হোঙনা লৈহল্লু, মখোয়না অদোমদা থৌজাল পীগনি। মসিদগী হেনবা সন্সকার করি লৈরিবগে? মসিদি ঐখোয়না নীংথিনা পাংথোকপা য়াবা থবক্নি। মসিদা লৈবাক নীংবগী মতৌনা পীক থন্না য়াওরি। ঐখোয়গী পুন্সিগী মনুংদা অতোপ্পগী কান্নবা লৈনবা, নক্নবা মীওইগী কান্নবা লৈনবা, ঐখোয়গী লাইরবশিংগী অঙাংশিংবু মেলন্যুত্রিসন্দগী করম্না কনগনি হায়বা খনবা য়াই। মখোয়বু মেলন্যুত্রিসন্দগী কনবা ঙম্লবদি, লৈবাক্কী অঙাং মশা ফগনি, মদু ওইরবদি লৈবাক চাউখৎকনি। ঐখোয়না অসুম্না খনগদবনি। গুজরাত্তা নেচরেল ফার্মিংগী খোঙজং লাকপসিদা ঐহাক্না নুংঙাইবা ফাওই। ঐখোয়না ইমা ভারত, ধর্তি মাতা হায়রি, হায়কো? ইমা ভারত অসি ঐখোয়গী ধর্তি মাতানি। মসিগীদমক্তা ঐখোয়না ৱাফম থোকই। মসিবু কেমিকেল, ফর্তিলাইজরদগী করম্না কনগনি খনগদবনি। মসিগী ৱারোইশিন্দি নেচরেল ফার্মিংনি। গুজরাত্তা হৌজিক নেচরেল ফার্মিংগী ইহৌ লাক্লি। লৌউ-শিংউগা মরী লৈনদুনা লাকপা নহারোল কয়া অমসু য়াওরি। ঐখোয়না হরিভক্ত ওইরবদি, স্বামীনরায়নগী সেবাদা লৈরবদি, ঐখোয়গী ইমুং, ইশাগী লবুক্তা কেমিকেল অমত্তা শিজিন্নরোই হায়বা ৱারেপ লৌবা য়াই। নেচরেল ফার্মিং খক তৌগনি হায়না লেপসি। মসি ধর্তি ইমাগী সেবানি, মসিমক্নি ভারত ইমাগী সেবা।

মরূপশিং,

সন্সকারনা ঐখোয়গী পুন্সিগী লিচৎ-শাজৎকা মরী লৈননা লৈবা হায়বসি ঐহাক্কী অপাম্বনি। ৱাহৈ খক্তদা সন্সকার লৈবনা য়াদে। সন্সকার হায়বসি ৱারেপ ওইগদবনি। সন্সকারনা মায় পাকপগী পাম্বৈ ওইগদবনি। ঙসিগী শিবির অসিদা ফংলিবা ৱাখল্লোনগা লোয়ননা অতোপ্পা মফমদা চৎপা খুদিংদা, অমৃত মহোৎসবকী ভারত অমসুং লৈবাক মীয়াম করোর কয়াগী থৌজাল পুদুনা চৎকনি।

অদোম খুদিংগা ৱারী শাবগী খুদোংচাবা ফংলে, অদোম খুদিংবু থাগৎচরি।

ইকায় খুম্নরবা সন্তশিংবু ঐহাক্না নোলুকচরি। জয় স্বামীনরায়ন।

*****