চেঞ্চেলৰ স্ক’লজ্

বন্ধুসকল,

গুটেন টেগ, নমস্কাৰ!

প্ৰথমতে, মোক আৰু মোৰ প্ৰতিনিধি দললৈ আগবঢ়োৱা উষ্ম আদৰণিৰ বাবে মই চেঞ্চেলৰ স্ক’লজক আন্তৰিক ধন্যবাদ জনাইছো। মই সুখী যে মোৰ বছৰটোৰ প্ৰথম বিদেশ ভ্ৰমণ জাৰ্মানীত অনুষ্ঠিত হৈছে। এই বছৰৰ আৰম্ভণিতে যিজন বিদেশী নেতাৰ সৈতে মোৰ প্ৰথম টেলিফোন কথোপকথন হৈছিল সেয়াও মোৰ বন্ধু চেঞ্চেলৰ স্ক’লজৰ সৈতে হৈছিল। চেঞ্চেলৰ স্ক’লজৰ বাবে, আজিৰ ভাৰত-জাৰ্মানী আইজিচি হৈছে এই বছৰ যিকোনো দেশৰ সৈতে প্ৰথম আইজিচি। ইয়ে দেখুৱায় যে ভাৰত আৰু জাৰ্মানী উভয়ে এই গুৰুত্বপূৰ্ণ অংশীদাৰীত্বক কিমান অগ্ৰাধিকাৰ দিছে। গণতন্ত্ৰ হিচাপে, ভাৰত আৰু জাৰ্মানীৰ মাজত বহুতো উমৈহতীয়া মূল্যবোধ আছে। এই অংশীদাৰী মূল্যবোধ আৰু অংশীদাৰী স্বাৰ্থৰ আধাৰত, বিগত বছৰবোৰত আমাৰ দ্বিপাক্ষিক সম্পৰ্কত উল্লেখযোগ্য অগ্ৰগতি হৈছে।

আমাৰ অন্তিম আইজিচি ২০১৯ চনত অনুষ্ঠিত হৈছিল। তেতিয়াৰ পৰা বিশ্বত গুৰুত্বপূৰ্ণ পৰিৱৰ্তন ঘটিছে। ক’ভিড-১৯ মহামাৰীয়ে বিশ্ব অৰ্থনীতিত এক ধ্বংসাত্মক প্ৰভাৱ পেলাইছে। শেহতীয়া ভূ-ৰাজনৈতিক ঘটনাই দেখুৱাইছে যে বিশ্ব শান্তি আৰু স্থিৰতা কিমান ভংগুৰ আৰু সকলো দেশ কিমান আন্তঃসংযোগিত। ইউক্ৰেইনৰ সংকটৰ আৰম্ভণিৰ পৰাই আমি তাৎক্ষণিক যুদ্ধবিৰতিৰ আহ্বান জনাইছিলো, বিবাদটো সমাধান কৰাৰ একমাত্ৰ উপায় হৈছে আলোচনা। আমি বিশ্বাস কৰোঁ যে এই যুদ্ধত কোনো বিজয়ী দল নাথাকিব, সকলোৱে ক্ষতিগ্ৰস্ত হ'ব। সেইকাৰণে আমি শান্তিৰ পক্ষত আছো। ইউক্ৰেইন সংঘৰ্ষৰ ফলত সৃষ্টি হোৱা অস্থিৰতাৰ বাবে তেলৰ মূল্য আকাশচুম্বী হৈ আছে; পৃথিৱীত খাদ্যশস্য আৰু সাৰৰ অভাৱো হৈছে। ই পৃথিৱীৰ প্ৰতিটো পৰিয়ালৰ ওপৰত বোজা বৃদ্ধি কৰিছে কিন্তু উন্নয়নশীল আৰু দৰিদ্ৰ দেশবোৰৰ ওপৰত ইয়াৰ প্ৰভাৱ আৰু অধিক গুৰুতৰ হ'ব। এই সংঘৰ্ষৰ মানৱীয় প্ৰভাৱৰ বাবে ভাৰত গভীৰভাৱে চিন্তিত। আমি আমাৰ হৈ ইউক্ৰেইনলৈ মানৱীয় সাহায্য প্ৰেৰণ কৰিছো। আমি খাদ্য ৰপ্তানি, তেল যোগান আৰু অৰ্থনৈতিক সহায়ৰ জৰিয়তে আন বন্ধুত্বপূৰ্ণ দেশসমূহকো সহায় কৰিবলৈ চেষ্টা কৰি আছো।

আজি ভাৰত-জাৰ্মানীৰ অংশীদাৰীত্বই ইয়াৰ ষষ্ঠ আইজিচিৰ পৰা এক নতুন দিশ লাভ কৰিছে। এই আইজিচিয়ে শক্তি আৰু পৰিৱেশ দুয়োক্ষেত্ৰতে আমাৰ সহযোগিতাক গুৰুত্বপূৰ্ণ নিৰ্দেশনা প্ৰদান কৰিছে। মই নিশ্চিত যে আজি গ্ৰহণ কৰা সিদ্ধান্তই আমাৰ অঞ্চল আৰু বিশ্বৰ ভৱিষ্যতৰ ওপৰত ইতিবাচক প্ৰভাৱ পেলাব। আজি আমি সেউজ আৰু বহনক্ষম উন্নয়নৰ ক্ষেত্ৰত ভাৰত-জাৰ্মানী অংশীদাৰীত্বৰ কাম কৰি আছো৷ ভাৰতে বিশ্বক দেখুৱাইছে যে গ্লাছগোত জলবায়ুৰ উচ্চাকাংক্ষা বৃদ্ধি কৰি সেউজীয়া আৰু বহনক্ষম বিকাশ আমাৰ বাবে বিশ্বাসৰ এক ভেঁটি৷ এই নতুন অংশীদাৰীত্বৰ অধীনত, জাৰ্মানীয়ে ২০৩০ চনৰ ভিতৰত ১০ বিলিয়ন ইউৰোৰ অতিৰিক্ত উন্নয়ন সহায়ৰ সৈতে ভাৰতৰ সেউজ বিকাশ পৰিকল্পনাক সমৰ্থন কৰাৰ সিদ্ধান্ত লৈছে। ইয়াৰ বাবে মই জাৰ্মানী আৰু চেঞ্চেলৰ স্ক’লজক ধন্যবাদ জনাইছো।

আমাৰ পৰিপূৰক শক্তিৰ কথা বিবেচনা কৰি, আমি সেউজীয়া হাইড্ৰজেন টাস্ক ফ'ৰ্চ এটা সৃষ্টি কৰাৰ সিদ্ধান্ত লৈছো। এইটো দুয়োখন দেশতে সেউজীয়া হাইড্ৰ’জেন আন্তঃগাঁথনি বৃদ্ধিত অতি উপযোগী হ'ব। ভাৰত আৰু জাৰ্মানী দুয়োৰে আন দেশত উন্নয়ন সহযোগিতাৰ দীৰ্ঘ অভিজ্ঞতা আছে। আজি আমি ত্ৰিপাক্ষিক সহযোগিতাৰ জৰিয়তে আমাৰ অভিজ্ঞতাসমূহ একত্ৰিত কৰি তৃতীয় দেশসমূহত যৌথ প্ৰকল্পৰ কাম কৰাৰ সিদ্ধান্ত লৈছো। আমাৰ সহযোগিতাই উন্নয়নশীল বিশ্বৰ বাবে স্বচ্ছ আৰু বহনক্ষম উন্নয়ন মূলক প্ৰকল্পৰ বিকল্প প্ৰদান কৰিব।

বন্ধুসকল,

ক’ভিডৰ পিছৰ যুগত, ভাৰতে অন্যান্য বৰ্ধিত অৰ্থনীতিৰ তুলনাত দ্ৰুততম বিকাশ দেখিছে। আমি নিশ্চিত যে ভাৰত বিশ্বব্যাপী পুনৰুদ্ধাৰৰ এক গুৰুত্বপূৰ্ণ স্তম্ভ হ'ব। শেহতীয়াকৈ, আমি অতি কম সময়ৰ ভিতৰতে ইউ.এ.ই. আৰু অষ্ট্ৰেলিয়াৰ সৈতে বাণিজ্যিক চুক্তি স্বাক্ষৰ কৰিছো। আমি, আনকি ইউৰোপীয় ইউনিয়নৰ সৈতেও, এফটিএ আলোচনাত আগতীয়া প্ৰগতিৰ বাবে প্ৰতিশ্ৰুতিবদ্ধ। ভাৰতৰ দক্ষ শ্ৰমিক আৰু পেছাদাৰীসকলে বহুতো দেশৰ অৰ্থনীতিক লাভান্বিত কৰিছে। মই নিশ্চিত যে ভাৰত আৰু জাৰ্মানীৰ মাজত ব্যাপক প্ৰব্ৰজন আৰু গতিশীলতা অংশীদাৰীত্ব চুক্তিয়ে দুয়োখন দেশক সহায় কৰিব।

এই সন্মিলন আৰু আপোনাৰ পদক্ষেপৰ বাবে মই আপোনালোকক আকৌ এবাৰ অশেষ ধন্যবাদ জনাইছো।

***

DS/AK/MANN