প্রধানমন্ত্রীগী লোইশঙ
পি.এম.না গ্লোবেল পতিদার বিজিনেস সম্মিত হৌদোকখ্রে
“ঙসি ভারতকী মফমদা য়াম্না লৈরে। ঐখোয়গী ইশানা ইশাবু থাজবা অমসুং আত্মনিরভাগী ৱাখল্লোনবু হেন্না মপাঙ্গল কলহনবা তাই”
“অচমবা ইমুং অমগী নহাশিংসু ওন্ত্রপ্রিন্যুর ওইবা ঙম্নবা অমসুং ওন্ত্রপ্রিন্যুর ওইবগী মঙ মঙদুনা চাউথোকচবা ফাওহন্নবগীদমক লৈঙাক্না লেপ্পা লৈতনা হোৎনরি”
“বিজিনেস অচৌ মচা পুম্নমক্না লৈবাক চাওখৎ লমজেলদা থৌদাং য়ারি অমদি অমৃৎ কালসিদা সবকা প্রয়াসকী ৱাখল্লোন্না অনৌবা ভারতকী পাঙ্গল ওইরি”
পতিদার ফুরুপকী মফমদা কাঙলুপ শেমদুনা ফিনতেক, এন.ই.পি.নচিংবা মরুওইবা হীরমশিং থবক ওন্থোকপদা পাউতাক পীননবা অমদি মতেং পাংনবা ৱাফম থমখি
Posted On:
29 APR 2022 1:46PM by PIB Imphal
প্রধান মন্ত্রী শ্রী নরেন্দ্র মোদীনা ঙসি ভিদিও কন্ফরেন্সিংগী খুত্থাঙদা সরদারধাম্না পাঙথোকপা গ্লোবেল পতিদার বিজিনেস সম্মিৎ (জি.পি.বি.এস.) হৌদোকখ্রে। গুজরাৎকী মুখ্য মন্ত্রী শ্রী ভুপেন্দ্রভাই পতেল অমসুং কেন্দ্র মন্ত্রীশিং অমদি ইন্দস্ত্রী লুচিংবশিংসু থৌরমদুদা শরুক য়াখি।
থৌরমদুদা ৱা ঙাঙলদুনা, সুরতপু মালেমগী খ্বাইদগী খোঙজেল য়াঙনা চাওখৎলক্লিবা ময়োল্লম্নি হায়বা ৱাফম প্রধান মন্ত্রীনা থমখি। সরদার পতেলগী ৱাহৈশিং নীংশিংলদুনা প্রধান মন্ত্রীনা ঙসিদি ভারতকী মফমদা য়াম্না লৈরে হায়না হায়খি। “ঐখোয়না ঐখোয়গী ইশাবু থাজবা অমদি ঐখোয়গী আত্মনিরভরতাগী ৱাখল্লোনবু হেন্না মপাঙ্গল কলহনগদবখক্তা ঙায়রে। হায়রিবা থাজবা অসি চাওখৎ লমজেলদা পুম্নমক য়াওরবা মতমদা, পুম্নমক্না হোৎনমিন্নরবা মতমদা ফংগদৌরিবনি।”
লৈবাকসিদা ওন্ত্রপ্রিন্যুরসিপকী ৱাখল্লোন মপাঙ্গল কলহনবগী মতাঙদা অচমবা ইমুং অমগী নহাশিংসু ওন্ত্রপ্রিন্যুর ওইবা ঙম্নবা অমসুং ওন্ত্রপ্রিন্যুর ওইবগী মঙ মঙদুনা চাউথোকচবা ফাওহনগদবা ফীভম অমা লৈঙাক্কী খুজিল থৌরাং অমসুং থবক থৌরমশিংনা পুরক্নবগীদমক্তা লৈঙাক্না লেপ্পা লৈতনা হোৎনরি হায়না প্রধান মন্ত্রীনা হায়খি। মুদ্রা য়োজনানচিংবা স্কিমশিংনা অসিগুম্বা মীওইশিংদা মখোয়না মঙদা ফাওবা মঙলুদ্রিবা বিজিনেসকী লমদা খোঙ থাংজিন্নবা থৌনা হাপ্লিন হায়না প্রধান মন্ত্রীনা হায়খি। মতৌ অসুম্না স্তার্ত অপ ইন্দিয়ানা মমাঙদা ফংবা ঙমলমদবা ইনোভেসন, তেলেন্ত অমসুং য়ুনিকোর্নগী মঙলানশিং মঙফাওনহনবদা মতেং পাংলি। প্রদক্সন লিঙ্ক ইন্সেন্তিবনা মহৌশাগী সেক্তরশিংআ অনৌবা ইহুল হাপ্লি অমদি অনৌবা সেক্তরশিংদা অনৌবা খুদোংচাবশিং হাপ্লি হায়না প্রধান মন্ত্রীনা হায়খি। লাইচৎকী শিংনবশিং লৈরগসু, লৈবাকসিগী এম.এস.এম.ই. সেক্তরনা খোঙলৈ থুনা মাঙদা চঙশিল্লি। চাউরবা শেলগী ঙাক্লৌগা লোয়ননা সেক্তর অসিদা থবক তৌরিবা মীওই কয়াগী শিনফমবু ঙাকথোকখি অমদি হৌজিক্তি সেক্তর অসিনা থবক পীবগী অনৌবা মফম কয়া শেমগৎলি। পি.এম.-স্বানিধি স্কিম্না স্ত্রীৎ ভেন্দরশিংদা ফোর্মেল বেঙ্কিং অমসুং ফাইনান্সকী ফীভম ফংহন্দুনা মখোয়বু চাওখৎ ৱারীদা পুনশিনহল্লি। স্কিম অসি হন্দক্তা দিসেম্বর ২০২৪ ফাওবা শাংদোকখ্রে, হায়না মহাক্না পাউদমখি।
বিজিনেস অচৌ মচা পুম্নমক্না লৈবাক চাওখৎ লমজেলদা থৌদাং য়ারি অমদি অমৃৎ কালসিদা সবকা প্রয়াসকী ৱাখল্লোন্না অনৌবা ভারতকী পাঙ্গল ওইরি হায়না প্রধান মন্ত্রীনা হায়খি। হায়রিবা ৱাফম অসিবু চহি অসিগী মীফম অসিনা মচা খায়না খন্নরিবসিদা মহাক্না নুংঙাইবা ফোঙদোকখি।
গুজরাতিকী মতাঙদা লাক্লদুনা প্রধান মন্ত্রীনা ফুরুপ অদুগী খঙ-হৈরবা অমসুং নহাশিংগী কাঙলুপ শেমদুনা লৈবাক্কী ইন্তরেস্তা থবক তৌনবা, ৱাখল্লোন, মালেমগী অফবা থৌওং অমসুং লৈঙাক্কী খুজিল থৌরাংশিংগী মরমদা দোকুমেন্ত তৌশিন্নবা অমদি মখোয়গী নৈনবগী মহৈবু লৌশিন্নবা ৱাফম থমখি। ফিনতেক, স্কিল দেভেলপমেন্ত, ফাইনান্সিএল ইনক্লুজননচিংবা হীরমশিংগী মতাঙদা লৈঙাক্তা অমদি একাদমিয়াদা পায়খৎপা য়াবা থৌরাংশিংগী মতাঙদা সজেসন পীননবা লৌখৎপা য়াই। মতৌ অসুম্না নেস্নেল এজুকেসন পোলিসীসু মপুং ফানা খ্বাইদগী ফবা মওংদা পায়খৎনবা অমদি থাক খুদিংদা কান্নবা থবক পায়খৎপা য়াবা ৱাফমশিং সজেস্ত তৌরক্নবা লৌখৎপা য়াই।
লৌউ শিংউগী থৌওং মতমগা চুনহন্নবা অমদি লম অসিদা শেল থাদবা য়াবা পাম্বৈশিং মীফম অসিদা থিনবা প্রধান মন্ত্রীনা হায়খি। গুজরাতকী মফমশিংবু লৌউ-শিংউগী অনৌবা পাম্বৈ অমসুং অনৌবা মহৈ মরোংশিং শীজিন্নবগী মতাঙদা নৈননবা কাঙবু শেম্নবা ৱাফমসু মহাক্না হৌদোকখি। গুজরাতকী লৌমীশিংগী শেন্মিৎলোনগী ফীভমদা অহোংবা পুরকখিবা চহি কয়াগী মমাঙগী গুজরাতকী দেরী মুভমেন্ত হৌদোকখিবগী ৱাফমবু মহাক্না খুদম ওইনা পনখি। ঐখোয়না এগ্রো-বেজ ইন্দস্ত্রী য়োকখৎনবা লম্বী থিবা মথৌ তাই হায়না মহাক্না হায়খি। অসিগুম্বা থৌরাংশিংনা অচাথাউ পুশিল্লকপা হন্থহনবদা মতেং ওইগদবা অমদি ফুদ-প্রোসেসিং ইন্দস্ত্রীগী ওইথোকপা য়াবশিংগী মতাঙদা মহাক্না ফোঙদোকখি। নৌনা মচিন তুমখৎলক্লিবা এফ.পি.ও.শিং অমসুং হায়রিবা লূপশিং অসি থোরকপগা লোয়ননা খুদোংচাবা কয়া থোরক্লিবশিং য়েংননবা মহাক্ন তিল্লিবা মীয়ামদা হায়খি। প্রধান মন্ত্রীনা মহৌশাগী লৌউ পথাপকী লমদসু থবক পায়খৎনবা ৱাফম থমখি। লৌফমদা লেমদুনা লৈরিবা মফমশিংদা সোলার পেনেল খিনবগী ওইথোকপা য়াবা ফীভমগী মতাঙদা প্রধান মন্ত্রী মোদীনা ৱাফম কয়া থমখি। হন্দক্তা হৌদোকখিবা অমৃৎ সরোবর অভিয়ান্দা লৌবা য়াবা থৌদাং লৌনবগীদমক্তসু মহাক্না হায়খি। হন্দক্তা পাঙথোকখিবা অয়ুর্বেদ সম্মিকী মতাঙদা ঙাঙলদুনা, প্রধান মন্ত্রীনা হর্বল অমসুং অয়ুস সেক্তরতা লৈরিবা অনৌবা খুদোংচাবশিং য়েংশিন্নবা ৱাফমসু থমখি।
প্রধান মন্ত্রীনা শেলথুমগী তাইবংগী অনৌবা মাইওন অমা পুরক্নবা ৱাফম থমখি। ইন্দস্ত্রীশিং অচৌবা ময়োল্লমগী মহুত্তা অপীকপা ময়োল্লমশিংদা লৈহনবা য়াই হায়বা ৱাফমসিদা মহাক্না পুক্নিং চিংশিনখি। খুঙ্গঙদা ইন্দস্ত্রিগী থবক থৌরমশিং পায়খৎলিবা জ্যোতিগ্রাম য়োজনাবু খুদম ওইনা মহাক্না পীখি। অসিগুম্বা থবকশিং ময়োল্লম অপীকপশিংদা পায়খৎপা য়াই হায়না মহাক্না হায়খি।
পতিদার ফুরুপকী খুন্নাই-শেন্মিৎলোন চাওখৎপগী লমদা ইনোৎ হাপ্নবগীদমক সরদারধাম্না ‘মিসন ২০২৬’কী মখাদা জি.পি.বি.এস. পাঙথোকপনি। মীফম অসি চহি অনি খুদিংগী পাঙথোকপনি। অহানবা মীফম অনিদি গান্ধিনগরদা ২০১৮ অমসুং ২০২০দা পাঙথোকখি, অদুগা হৌজিক্কী মীফম অসিনা সুরত্তা পাঙথোক্লি। জি.পি.বি.এস. ২০২২গী মরুওইবা থীমদি “আত্মনিরভর কম্ম্যুনিতীদগী আত্মিরভর গুজরাত অমসুং ভারত” হায়বসিনি। মীফম অসিনা ফুরুপ অসিগী অপীকপা, ময়ায় ওইরপ চাউবা অমদি অচৌবা এন্তরপ্রাইজশিং পুনশিন্ননবা; অনৌবা ওন্ত্রপ্রিন্যুরশিং মখোঙ শোমবিদুনা ঙাক্লৌ পীননবা অমসুং মহৈ মশিং হৈরবা নহাশিংদা ত্রেনিং অমসুং থবক পীননবা পান্দম থম্লি। এপ্রিল ২৯দগী মে ১ ফাওবা পাঙথোক্কদৌরিবা নুমিৎ হুম্নিগী সম্মিৎ অসিনা লৈঙাক্কী ইন্দস্ত্রিগী পোলিসী, এম.এস.এম.ই., স্তার্ত-অপ, ইনোভেসন অমসুং অতৈ হীরম কয়া কোনশিল্লি।
****
(Release ID: 1821250)
Visitor Counter : 80
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam