ନମସ୍କାର!

ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସ ନିମନ୍ତେ ଆପଣମାନଙ୍କୁ ସମସ୍ତଙ୍କୁ ଅନେକ ଶୁଭେଚ୍ଛା!

ବେଙ୍ଗାଲୁରୁ ସହର ଖୋଦ ଦେଶର ଯୁବ ଉତ୍ସାହର ପରିଚୟ । ବେଙ୍ଗାଲୁରୁ ହେଉଛି ପେସାଦାରମାନଙ୍କର ଗର୍ବ । ଡିଜିଟାଲ ଭାରତ ପେଣ୍ଠସ୍ଥଳ ବେଙ୍ଗାଲୁରୁରେ ଖେଲୋ ଇଣ୍ଡିଆ ଆୟୋଜନ ହେବା ନିହାତି ମହତ୍ତ୍ୱ ବହନ କରେ । ଷ୍ଟାର୍ଟ-ଅପ ଦୁନିଆରେ କ୍ରୀଡ଼ାର ଏହି ସଙ୍ଗମ ବାସ୍ତବରେ ଚମକ୍ରାର । ବେଙ୍ଗାଲୁରୁରେ ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସ ହେବା, ଏହି ସୁନ୍ଦର ସହରର ଶକ୍ତିକୁ ଆହୁରି ବଢ଼ାଇବ ଏବଂ ଦେଶର ଯୁବଗୋଷ୍ଠୀ ମଧ୍ୟ ଏଠାରୁ ନୂଆ ଶକ୍ତି ନେଇ ଫେରିବେ । ଏହି କ୍ରୀଡ଼ା ଆୟୋଜନ ନିମନ୍ତେ ମୁଁ କର୍ଣ୍ଣାଟକ ସରକାରଙ୍କୁ ଶୁଭେଚ୍ଛା ଜ୍ଞାପନ କରୁଛି । ବିଶ୍ୱ ମହାମାରୀର ତମାମ ଆହ୍ୱାନଗୁଡ଼ିକ ମଧ୍ୟରେ ଏହି ଖେଳ, ଭାରତର ଯୁବଗୋଷ୍ଠୀଙ୍କ ଦୃଢ଼ ସଂକଳ୍ପ ଓ ଉତ୍ସାହର ଉଦାହରଣ । ମୁଁ ଆପଣଙ୍କର ଏହି ପ୍ରୟାସକୁ ଓ ସାହସକୁ ଅଭିବାଦନ ଜଣାଉଛି । ଏହି ଯୁବା ଉତ୍ସାହ ଆଜି ଦେଶକୁ ପ୍ରତ୍ୟେକ କ୍ଷେତ୍ରରେ ଆଗେଇ ନେଇଯାଉଛି ।

ମୋର ଯୁବ ବନ୍ଧୁମାନେ,

ସଫଳ ହେବା ପାଇଁ ପ୍ରଥମ ମନ୍ତ୍ର ହେଉଛି-

ଗୋଷ୍ଠୀଗତ ଉତ୍ସାହ!

କ୍ରୀଡ଼ାରୁ ଆମକୁ ଏହି ଗୋଷ୍ଠୀଗତ ଉତ୍ସାହ ଶିଖିବାକୁ ମିଳିଥାଏ । ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସରେ ମଧ୍ୟ ଆପଣମାନେ ଏହାକୁ ପ୍ରତ୍ୟକ୍ଷ ଭାବେ ଅନୁଭବ କରିବେ । ଏହି ଗୋଷ୍ଠୀଗତ ଉତ୍ସାହ ବା ଟିମ୍ ସ୍ପିରିଟ ଆପଣଙ୍କୁ ଜୀବନ ଦେଖିବା ପାଇଁ ଏକ ନୂଆ ଦୃଷ୍ଟିକୋଣ ମଧ୍ୟ ପ୍ରଦାନ କରିଥାଏ ।

ଖେଳରେ ଜିତିବାର ଅର୍ଥ ହେଉଛି- ପ୍ରତି ଦିଗରେ ପ୍ରୟାସ! ୧୦୦% ସମର୍ପଣ!

ଆପଣମାନଙ୍କ ମଧ୍ୟରୁ ହିଁ ଅନେକ ଖେଳାଳି ବାହାରିବେ, ଯେଉଁମାନେ ଆଗକୁ ରାଜ୍ୟ ସ୍ତରରେ ଖେଳିବେ । ଆପଣମାନଙ୍କ ମଧ୍ୟରୁ ଅନେକ ଯୁବକଯୁବତୀ ଆଗକୁ ଅନ୍ତର୍ଜାତୀୟ ସ୍ତରରେ ଦେଶକୁ ପ୍ରତିନିଧିତ୍ୱ କରିବେ । କ୍ରୀଡ଼ା କ୍ଷେତ୍ରରେ ଆପଣଙ୍କର ଏହି ଅନୁଭୂତି ଆପଣଙ୍କୁ ଜୀବନର ପ୍ରତ୍ୟେକ କ୍ଷେତ୍ରରେ ସହାୟକ ହେବ । କ୍ରୀଡ଼ା କ୍ଷେତ୍ର ହେଉଛି ବାସ୍ତବ ଅର୍ଥରେ ଜୀବନର ପ୍ରକୃତ ସମର୍ଥନ ବ୍ୟବସ୍ଥା । ଯେଉଁ ଶକ୍ତି, ଯେଉଁ ଶିକ୍ଷା ଆପଣଙ୍କୁ କ୍ରୀଡ଼ାରେ ଆଗକୁ ନେଇଯାଇଥାଏ, ସେହି ଆପଣଙ୍କୁ ଜୀବନରେ ମଧ୍ୟ ଆଗକୁ ନେଇଯାଏ । କ୍ରୀଡ଼ା ଓ ଜୀବନ, ଉଭୟରେ ଉତ୍ସାହର ମହତ୍ତ୍ୱ ରହିଛି । କ୍ରୀଡ଼ା ଓ ଜୀବନ, ଉଭୟରେ ଯେଉଁମାନେ ଆହ୍ୱାନଗୁଡ଼ିକୁ ଆପଣାଇ ନେଇଥାନ୍ତି, ସେମାନେ ବିଜେତା ହୋଇଥାନ୍ତି । କ୍ରୀଡ଼ା ଓ ଜୀବନ, ଉଭୟରେ ପରାଜୟ ମଧ୍ୟ ବିଜୟ ହୋଇଥାଏ, ପରାଜୟ ମଧ୍ୟ ଶିକ୍ଷା ଦେଇଥାଏ । କ୍ରୀଡ଼ା ଓ ଜୀବନ, ଉଭୟରେ ସଚ୍ଚୋଟତା ଆପଣଙ୍କୁ ସବୁଠୁ ଆଗକୁ ନେଇଯାଇଥାଏ । କ୍ରୀଡ଼ା ଓ ଜୀବନ, ଉଭୟରେ ପ୍ରତି ମୁହୂର୍ତ୍ତର ମହତ୍ତ୍ୱ ରହିଛି । ବର୍ତ୍ତମାନର ମୁହୂର୍ତ୍ତ ଅଧିକ ମହତ୍ତ୍ୱ ରଖିଥାଏ । ଏହି ମୁହୂର୍ତ୍ତରେ ବଞ୍ଚିବା, ଏହି ମୁହୂର୍ତ୍ତରେ କିଛି କରିବା ବିଶେଷ ମହତ୍ତ୍ୱ ବହନ କରିଥାଏ ।

ବିଜୟରେ ନମ୍ରତା ରଖିବା ଏବଂ ପରାଜୟରୁ ଶିଖିବାର କଳା, ଜୀବନର ପ୍ରଗତିରେ ସବୁଠୁ ମୂଲ୍ୟବାନ ଅଂଶ ହୋଇଥାଏ ଏବଂ ଏହାକୁ ଆମେ ଖେଳ ପଡ଼ିଆରେ ଖେଳି ଖେଳି ଶିଖି ନେଇଥାଉ । ଖେଳରେ ଯେତେବେଳେ ଶରୀର ସାରା ଶକ୍ତି ଭରିଯାଏ, ଖେଳାଳିର କାର୍ଯ୍ୟ ଅତ୍ୟନ୍ତ ତୀବ୍ର ହୋଇଥାଏ । ସେହି ସମୟରେ ଜଣେ ଭଲ ଖେଳାଳି ଶାନ୍ତ ଓ ଧୈର୍ଯ୍ୟପୂର୍ଣ୍ଣ ଭାବେ ଖେଳିଥାନ୍ତି । ଜୀବନ ବଞ୍ଚିବାରେ ମଧ୍ୟ ଏହା ଏକ ବଡ଼ କଳା ।

ବନ୍ଧୁଗଣ, ଆପଣମାନେ ନୂଆ ଭାରତର ଯୁବଗୋଷ୍ଠୀ । ଆପଣମାନେ ମଧ୍ୟ ‘ଏକ ଭାରତ ଶ୍ରେଷ୍ଠ ଭାରତ’ର ଧ୍ୱଜାବାହକ । ଆପଣମାନଙ୍କ ଯୁବସୁଲଭ ଚିନ୍ତନ ଓ ଆପଣଙ୍କ ଯୁବସୁଲଭ କାର୍ଯ୍ୟ ଆଜି ଦେଶରେ ନୀତି ନିର୍ଦ୍ଧାରଣ କରୁଛି । ଆଜି ଯୁବକଯୁବତୀମାନେ ଫିଟନେସକୁ ଦେଶର ବିକାଶ ମନ୍ତ୍ର ବନାଇଛନ୍ତି । ଆଜି ସେମାନେ କ୍ରୀଡ଼ାର ପୁରୁଣା ଭାବନାକୁ ବନ୍ଧନରୁ ମୁକ୍ତ କରିଦେଇଛନ୍ତି ।

ନୂଆ ଶିକ୍ଷା ନୀତିରେ କ୍ରୀଡ଼ା ଉପରେ ଗୁରୁତ୍ୱ ହେଉ ଅଥବା ଆଧୁନିକ କ୍ରୀଡ଼ା ଭିତ୍ତିଭୂମି ସୃଷ୍ଟି, ଖେଳାଳିଙ୍କ ମନୋନୟନରେ ସ୍ୱଚ୍ଛତା ହେଉ, ଅଥବା କ୍ରୀଡ଼ାରେ ଆଧୁନିକ ପ୍ରଯୁକ୍ତିର ବର୍ଦ୍ଧିତ ବ୍ୟବହାର, ଏହା ହେଉଛି ନୂଆ ଭାରତର ପରିଚୟ ।

ଭାରତର ଯୁବକଯୁବତୀଙ୍କ ଆକାଂକ୍ଷା, ସେମାନଙ୍କ ଆଶା, ନୂଆ ଭାରତ ନିର୍ମାଣର ଆଧାର ପାଲଟୁଛି । ଏବେ ଦେଶରେ ନୂଆ କ୍ରୀଡ଼ା ବିଜ୍ଞାନ କେନ୍ଦ୍ର ପ୍ରତିଷ୍ଠା ହେଉଛି । ଏବେ ଦେଶରେ ଉତ୍ସର୍ଗୀକୃତ କ୍ରୀଡ଼ା ବିଶ୍ୱବିଦ୍ୟାଳୟ ନିର୍ମାଣ କରାଯାଉଛି । ଏହା ଆପଣମାନଙ୍କର ସୁବିଧା ପାଇଁ ଏବଂ ଆପଣଙ୍କ ସ୍ୱପ୍ନଗୁଡ଼ିକୁ ପୂରଣ କରିବା ଲାଗି ଉଦ୍ଦିଷ୍ଟ ।

ବନ୍ଧୁଗଣ,

କ୍ରୀଡ଼ାର ଶକ୍ତି, ଦେଶର ଶକ୍ତି ବୃଦ୍ଧି କରିଥାଏ । କ୍ରୀଡ଼ାରେ ପରିଚୟ, ଦେଶର ପରିଚୟକୁ ବୃଦ୍ଧି କରିଥାଏ । ଆଜି ବି ମୋର ମନେଅଛି, ଯେତେବେଳେ ମୁଁ ଟୋକିଓ ଅଲିମ୍ପିକ୍ସରୁ ଫେରିଥିବା କ୍ରୀଡ଼ାବିତମାନଙ୍କୁ ସାକ୍ଷାତ କରିଥିଲି । ସେମାନଙ୍କ ମୁହଁରେ ନିଜ ବିଜୟଠାରୁ ଅଧିକ ଦେଶ ପାଇଁ ଜିତିବାର ଗର୍ବ ରହିଥିଲା । ଦେଶ ପାଇଁ ବିଜୟରୁ ମିଳୁଥିବା ଖୁସିର କୌଣସି ତୁଳନା ନାହିଁ ।

ଆଜି ଆପଣମାନେ କେବଳ ନିଜ ପାଇଁ କିମ୍ବା ନିଜ ପରିବାର ଲାଗି ଖେଳୁନାହାନ୍ତି । ଏହା ୟୁନିଭର୍ସିଟି ଗେମ୍ସ ହେଲେ ମଧ୍ୟ ଆପଣମାନେ ଦେଶ ପାଇଁ ଖେଳୁଛନ୍ତି ବୋଲି ଭାବିନେବାକୁ ହେବ । ଦେଶ ପାଇଁ ଆପଣ ନିଜ ଭିତରେ ଏକ ଉତ୍ତମ ଖେଳାଳି ପସ୍ତୁତ କରୁଛନ୍ତି । ଏହି ଉତ୍ସାହ ଆପଣମାନଙ୍କୁ ଆଗକୁ ନେଇଯିବ । ଏହି ଭାବନା ଆପଣମାନଙ୍କୁ ମଇଦାନରେ ଜିତାଇବ ଏବଂ ପଦକ ପ୍ରଦାନ କରିବ ।

ମୋର ପୂର୍ଣ୍ଣ ବିଶ୍ୱାସ, ଆପଣମାନେ, ମୋର ଯୁବା ସାଥୀ ଖୁବ ଖେଳିବେ, ଖୁବ ଉନ୍ନତି କରିବେ!

ଏହି ବିଶ୍ୱାସ ସହିତ, ସାରା ଦେଶରୁ ଆସିଥିବା ମୋର ସମସ୍ତ ଯୁବା ବନ୍ଧୁମାନଙ୍କୁ ମୁଁ ଆଉଥରେ ହାର୍ଦ୍ଦିକ ଶୁଭେଚ୍ଛା ଜ୍ଞାପନ କରୁଛି! ଧନ୍ୟବାଦ!

SR