ভারত ইমানা য়াইফরে

ভারত ইমানা য়াইফরে

জম্মু কশ্মিরগী লেফতেনেন্ত গবর্নর, শ্রী মনোজ সিনহাজী, কেন্দ্রগী মন্ত্রী মন্দলদা লৈরিবা ঐহাক্কী মরুপ গিরিরাজ সিংহজী, লমদম অসিগী মচারোই অমসুং ঐহাক্কী মরুপ, দাঃ জিতেন্দ্র সিংহ, শ্রী কপিল মোরেশ্বর পতেলজী, হাউস্তা লৈরিবা ঐহাক্কী মরুপ শ্রী জুগল কিশোরজী, জম্মু কশ্মির য়াওনা লৈবাক পুম্নমক্কী মরী লৈনরিবা পঞ্চায়তী রাজকী মীহুৎ অমসুং ঐহাক্কী ইচিল ইনাওশিং!

শুর্বীরে দি ইস দুগগর জম্মু-চ, তুসে সারে বহন-প্রাইএ-গী মেরা নসমস্কার! লৈবাক্কী মীয়ামদা ঙসিগী লৈবাক্কী পঞ্চায়তী রাজ নুমিৎ অসিদা পুম্নমক্কী মফমদা য়াইফ পাউজেল পীজরি!

ঙসি অসিদি জম্মু কশ্মিরগী চাউখৎ-থোরাংবু খোঙজেল হেন্না য়াঙখৎহনবগী য়াম্না চাউরবা নুমিৎ অমনি। ঐহাক্না ঙসি উরিবা মীয়ামগী সমুদ্র অসি য়াম্না পাক চাওই, য়েংঙু য়েংঙু খুদিংদা মীগী মী ঙাক্তা উরে। দিকেদ কয়াগী মতুংদা জম্মু কশ্মিরগী লমদম অসিদা ভারতকী মীয়াম্না অসুক য়াম্না থৱাই য়াওবগী মতৌ উবা ফংলি। অদোমগী নুংশিবা, অদোমগী থৱাই য়াওবা অমসুং মঙলাম, অদোমগী চাউখৎ-থৌরাংগী ৱারেপ অসিগীদমক্তা ঐহাক্না জম্মু কশ্মিরগী ইচিল ইনাওগী মফমদা য়াইফ পাউজেল পীজরি।

মরূপশিং,
লমদম অসি ঐঙোন্দা অনৌবা নত্তে, ঐহাকসু অদোমদা অনৌবা নত্তে। মফমসিগী থবক-থৌরম অমসুং ফিভমশিং ঐহাক্না নীংথিজনা খঙই। ঙসি, মফমসিদা লুপা করোর লিশিং ২০গী শেনফমগী কন্নেক্তিবিতী অমসুং ইলেক্ত্রিসিতীগা মরী লৈনবা প্রোজেক্ত কয়া শঙ্গাবগা লোয়ননা উরেপ উয়ুং তম্বসিদা ঐহাক্না য়াম্না নুংঙাইবা ফাওই। শেনফমসি জম্মু কশ্মিরগুম্বা  অপীকপা রাজ্যগী ওইনা য়াম্না চাউরবা শেনফম্নি। জম্মু কশ্মিরগী চাউখৎপগী খোঙজেল য়াঙখৎহন্নবা রাজ্যসিদা লেপ্তনা থবক চত্থরি। অসিগুম্বা থৌওংশিং অসিনা জম্মু কশ্মিরগী নহারোলশিং মশিং য়াম্বদা থবক পীগনি।

মরূপশিং,
ঙসিগী খুঙ্গংগী ইমুং কয়া অমনা মখোয়গী ময়ুমগী প্রোপর্তী কার্দসু ফংলে। মসিগী স্বমিত্বা কার্দ অসিনা খুঙ্গংশিংদা অনৌবা খুদোংচাবা কয়া পীরগনি। জন ঔশধী কেন্দ্র ১০০না জম্মু কশ্মিরগী লাইরবা অমসুং মিদ্দল ক্লাস ইমুংশিংদা হিদাক, সর্জিকেল ইক্বিপমেন্ত কয়া হোঙনা ফংহনবগী পাম্বৈ ওইরগনি। লৈবাক্না ইং ২০৭০ ফাওবদা কার্বন ন্যুত্রেল ওইহন্নবা ৱারেপ লৌরিবা অসিদা, জম্মু কশ্মিরনসু ঙসি খোঙথাং অমা পায়খৎলি। পল্লি পঞ্চায়তনা লৈবাক্কী খ্বাইদগী অহানবা কার্বন ন্যুত্রেল পঞ্চায়ত ওইনবা খোঙথাং থাংবা হৌখ্রে।

মালেমগী শক্নাইরবা মীওই কয়ানা গ্লাসগোদা পুনখি। কার্বন ন্যুত্রেলগী মতাংদা শাংলবা ৱারোল কয়া ফোংদোক্নখি, ৱাফম কয়া অমা লাউথোকখি। অদুবু গ্লাসগোগী মীফমগা মরী লৈননা, জম্মু কশ্মিরগী পীক্লবা পঞ্চায়ত, পাল্লি পঞ্চায়ত অসিদা লৈবাক্কী অহানবা কার্বন ন্যুত্রেল পঞ্চায়ত ওইহন্নবা খোংথাং থাংজিল্লিবা অসি ভারতনি। ঐহাক্না ঙসি পাল্লি খুঙ্গং অসিদা লৈবাক্কী খুঙ্গং খুদিংগী মীহুৎশিংগা উন্নবগী খুদোংচাবা ফংজরে। অসিগুম্বা চাউখৎ-থৌরাংগী থৌওং কয়া অসিগীদমক্তা ঐহাক্না জম্মু কশ্মিরবু হন্না-হন্না থাগৎচরি।

ঐহাক্না হৌজিক ফম্বাক অসিদা কাখৎলক্ত্রিঙৈগী মমাংদা মফমসিগী পঞ্চায়তকী মীহুৎশিংগা পুন্না ফম্মিন্নখি। মখোয়গী মঙলান, মখোয়গী ৱারেপ, মখোয়গী অপাম্বশিং ঐহাক্না খঙবা ঙমখি। ঐহাক্না দিল্লীগী লাল কিলাদগী ‘সবকা প্রয়াস’কী খোল্লাও লাওই, অদুবু জম্মু কশ্মিরগী লমদম, পাল্লিগী মীয়াম্না সবকা প্রয়াস অসি করিনো হায়বা থবক্না তাকপা অসিদা ঐহাক্না য়াম্না নুংঙাইবা ফাওই। ঐহাক্না ঙসিগী থৌরম অসি মফমসিদা শীন-লাঙগনি হায়বা হেক তাবগা, সরকারগী মীওই, পুম্নমক শাগদবা কন্ত্রেক্তর কয়া লাকখি। অদুবু মফমসিদা ধাবাসু লৈতে, মীয়ামগী চান-থক্নবা মফমসু লৈতে, অদুনা মখোয়গী চান-থক্নবা করি তৌবা তাই হায়না খন্নখি হায়না মফমসিগী পঞ্চ-সর্পঞ্চনা ঐঙোন্দা পাউদমখি। মখা তারকপদা, ইমুং খুদিংদগী মশানা অঙম্বা চান-থক্নবা পোৎলম পুথোক্নরকখি, ইমুং অমনা তল ২০, অমনা ৩০ পুথোক্নখি অমসুং হৌখিবা নুমিৎ ১০নিদগী হৌনা মফমসিদা লাকখিবা মীওই খুদিংবু খুঙ্গংগী মীওইশিংনা অচা-অথক পীখি হায়না মখোয়না পাউদমখি। ‘সবকা প্রয়াস’ অসি করিনো হায়বা অদোম্না থবক্না তাক্লে। ঐহাক্না মফমসিগী ঐহাক্কী খুঙ্গংগী মীয়াম্বু থম্মোই শেংনা থাগৎপা ফোংদোকচরি।

নুংশিরবা ইচিল ইনাওশিং,

হন্দক্কী চহিগী পঞ্চায়তী রাজ দিবস অসি জম্মু কশ্মিরদা পাংথোকপা হায়বসিনা অহোংবা অমা পুরকপগী চাউরবা খুদম অমনি। জম্মু কশ্মিরদা গনতন্ত্রনা গ্রাসরুত্তা য়ৌবা ঙম্বা অসি য়াম্না চাউথোকচনীংঙাইনি হায়না ঐহাক্না লৈবাক শিনবা থুংবগী পঞ্চায়তশিংগী মফমদা হায়রি। হিন্দুস্তান্দা পঞ্চায়তী রাজকী পথাপ চৎনবা হৌখিবা, মসিগী মতাংদা ৱারী য়াম্না শাখিবা অসি চাউথোকচনীংঙাইনি অমসুং মসিদা অরানবা অমত্তা য়াওদে। অদুবু ঐখোয়না ৱাফম অমদি কাওরে। হিন্দুস্তান্দা পঞ্চায়তী রাজকী পথাপ চৎনবা হৌখ্রে, অদুবু অসুক য়াম্না ফজবা পথাপ অমা লৈরবসু জম্মু কশ্মিরগী মীয়াম্না মসিগী কান্নবা ফংদে অমসুং নীংথিনা খঙলমদে হায়বসি মীয়াম্না খঙফম থোকই হায়না ঐহাক্না খল্লি।  দিল্লীদা অদোম্না ঐহাকপু সেবা তৌবা ফংজবগী খুদোংচাবা পীবিখি অমসুং জম্মু কশ্মিরগী লমদমদা পঞ্চায়তী রাজকী পথাপ চৎনবা হৌহনখি। জম্মু কশ্মিরগী খুঙ্গংখক্তদগী মীয়ামগী মীহুৎ লিশিং ৩০ হেন্না খনখি অমসুং মখোয়না মফমসিগী নোংমগী কারবার চলাইরি। মসিদি গনতন্ত্রগী মপাঙ্গল। পঞ্চায়তী রাজকী পথাপ অহুম – গ্রাম পঞ্চায়ত, পঞ্চায়ত সমিতী অমসুং দি.দি.সি.গী মীখলনা মফমসিদা শান্তি ওইনা খ্বাইদগী অহানবা ওইনা পাংথোকখ্রে অমসুং মখোয়না খুঙ্গংগী তুংগী লাইবক লেপ্লি।

মরূপশিং,
ৱাফম অসিনা গনতন্ত্রা নত্ত্রগা চাউখৎপগী ৱারেপ লৌবগী ৱাফম ওইরো, ঙসিদি জম্মু কশ্মিরনা অনৌবা খুদম অমা উৎলে। হৌখিবা চহি ২-৩দা জম্মু কশ্মিরদা চাউখৎপগী অনৌবা ফিভম অমা লৈরে। জম্মু কশ্মিরগী মীয়ামদা মখোয়গী হক পীবা চাউরাকপা আইন ২৫০০বু চৎনহল্লমদে। ঐখোয়না জম্মু কশ্মিরগী মীয়াম্বু মপাঙ্গল হাপ্নবগীদমক্তা হায়রিবা আইনশিং চৎনহনখ্রে অমসুং মখোয়বু মপাঙ্গল লৈহনবগী থবক পায়খৎপা হৌখ্রে। মসিগী খ্বাইদগী কান্নবদি, মফমসিগী ইচে-ইচলশিংনা ফংখি, মফমসিগী ইচানুপীশিংনা ফংখি, মফমসিগী লাইরবা, দলিত, শোত্থরবা মীয়াম অমসুং তোল্ল-তারবশিংনা ফংখি।

নীংতম্বগী চহি ৭৫গী মতুংদা জম্মু কশ্মিরগী ঐহাক্কী বালমিকী খুন্নাইগী ইচিল-ইনাওশিংনা হিন্দুস্তানগী মীয়ামগা খল মান্নহল্লিবা আইনগী হক ফংবা ঙম্বসিদা ঐহাক্না ঙসি য়াম্না চাউথোকচরি। দিকেদ কয়াদগী বালমিকী খুন্নাইগী মখোঙদা য়োৎনা পুন্সিনখিবা অদু ঙসিদি থাদোক্লে, ককথৎলে। নীংতম্বা ফংলবা মতুং দিকেদ ৭কী মতুংদা মখোয়না তসেংবা নীংতম্বা ফংলে। ঙসিদি, খুন্নাই খুদিংগী মচা-মশুশিংনা মখোয়গী অপাম্বা ফংলগনি।

মতম কয়াদগী হৌনা, জম্মু কশ্মিরদা রিজর্বেসন ফংদনা লাকখিবা মরুপশিংনা হৌজিক্তি রিজর্বেসন ফংলে। ঙসি বাবা সাহেবকী থৱাইনা মফম অমা হেক্তদা লৈরবসু, মহাক্না ঐখোয় খুদিংবু য়াইফ পাউজেল পীরমগনি। অসিগুম্বা কান্নবা কয়া খঙলমদবা হিন্দুস্তানগী কাচিন অমনা মোদী সরকারনা হেক লাকপদগী বাবা সাহেবকী মঙলানবু মঙফাওনহল্লে। কেন্দ্র সরকারগী স্কিম কয়া মফমসিদা হৌজিক্তি খোঙজেল য়াঙনা পায়খৎলগনি অমসুং মসিগী কান্নবনা জম্মু কশ্মিরগী খুঙ্গংশিংনা হকথেংননা ফংগনি। এল.পি.জি. গ্যাস, মৈ, ঈশিংগী কন্নেক্সন ওইরো, স্বছ ভারত অভিয়ানগী খুত্থাংদা অমাংশঙ শাবা ওইরো, মসিগী চাউরবা কান্নবা অমা জম্মু কশ্মিরনা ফংলি।

মরূপশিং,
নীংতম্বগী অমৃত কাল, হায়বদি, লাক্কদৌরিবা চহি ২৫ অসিদা জম্মু কশ্মিরদা চাউখৎ-থৌরাংগী অনৌবা ৱারী ইরগনি। মতম খরগী মমাংদা, য়ু.এ.ই.দগী লাকপা দেলিগেসনগা ৱারী শাবগী খুদোংচাবা ফংজখি। মখোয়না জম্মু কশ্মিরগী মতাংদা থৱাই য়াম্না য়াওরি। জম্মু কশ্মিরদা নীংতম্বগী দিকেদ ৭কী মতুংদা ফাওবা শুপ্নগী লুপা করোর লিশিং ১৭খক প্রাইভেত ইনভেস্তমেন্ত ওইনা লাকখি হায়বসি অদোম্না তাবদা অঙকপা ফাওগনি। দিকেদ ৭তা লিশিগ ১৭ অদুগা মমাংগী চহি অনিগী মনুংগী মশিংনা করোর লিশিং ৩৫গী চাং য়ৌখি। মফমসিদা লুপা করোর লিশিং ৩৮ থাদনবা প্রাইভেত কম্পেনীশিং লাক্লবনি।

মরূপশিং,
ঙসিদি, কেন্দ্রদগী থারকপা শেনফম খুদিং পুকচেল শেংনা শিজিন্নরি অমসুং ইনভেস্তরশিংনা ৱাখল নুংঙাইনা শেল থাদরি। হৌজিক, মনোজ সিনহাজীনা হায়বীরিবা অদুনি, চহি অহুমগী মমাংদা মফমসিগী জিলা অমসুং রাজ্যগীদমক্তা শুপ্নগী লুপা করোর লিশিং ৫খক থাদরম্মি অমসুং মসিদা লেহ-লদাখকীসু য়াওরিবনি। রাজ্য অসি য়াম্না পীকই, মীশিং য়ামদে, অদুবু মমাংগী চহি ২দা লাকখিবা চাউখৎপগী থৌওংনা মরম ওইরগা হন্দক্কী চহিগী বজেত্তা পঞ্চায়তশিংগী মনাক্তা চাউখৎ-থৌরাংগীদমক্তা লুপা করোর লিশিং ২২ হকথেংননা লাকখি হায়না মহাক্না হায়খিবা অদুনি। অসিগুম্বা পীক্লবা রাজ্য অসিদা গ্রাসরুত থাক্কী গনতন্ত্রগী পথাপকী মখাদা চাউখৎ-থৌরাংগী থবক্কীদমক্তা লুপা করোর লিশিং ৫গা লুপা করোর লিশিং ২২গা চাংদম্নবসিদা ঐখোয়না থবক তৌই নত্ত্রগা তৌদে অমুক্তা হায়বীয়ু।

রতলে পাৱর প্রোজেক্ত অমসুং ক্বার পাৱর প্রোজেক্ত লোইদুনা মথৌ তৌবা হৌরকপা মতমদা জম্মু কশ্মিরদা মৈ মরাং কায়না ফংবতা নত্তনা লমদমসিগী শেল তানবগী অনৌবা সেক্তর অমা হোংদোক্লগনি খঙবদা ঐহাক্না ঙসি য়াম্না নুংঙাইবা ফাওই অমসুং মসিনা জমু কশ্মিরগী শেন্মিৎলোনবু অৱাংবা থাক অমদা পুখৎকনি। ঐহাক্কী ৱাফম অসি অমুক্তা খন্থদুনা য়েংবীয়ু, দিল্লীদগী সরকারগী ফাইল অমা থাদোরকপা মতমদা জম্মু কশ্মির য়ৌবদা চয়োল অনি অহুমদি অদুমক চঙলি। অদুনা, ঙসি কিলোৱাত ৫০০গী সোলর পাৱর প্লান্তনা শুপ্নগী চয়োল অহুমগী মনুংদা থবক তৌবা হৌবা ঙম্বসি ঐহাক্না য়াম্না নুংঙাইবা ফাওই, মসিনা মৈ পুথোকপসু হৌরে। পাল্লি খুঙ্গংগী য়ুম খুদিংদা হৌজিক সোলরগী মৈ ফংলে। মসিনা খুঙ্গং অসিগী ইনর্জী স্বরাজকী মশক নাইরবা খুদম অমা ওইরে। থবক-থৌরমগী মতাংদা অসুম্না অহোংবা পুরকপা অসিনা জম্মু কশ্মিরবু চাউখৎপগী অনৌবা থাক অমদা থম্লগনি।

মরূপশিং,
ঐহাক্না জম্মু কশ্মিরগী নহারোলশিংদা হায়নীংবদি “মরুপশিং, ঐহাক্কী ৱাফমদা থাজবা থম্বীয়ু। তম্বাক্কী নহাশিং, অদোমগী ইমা-ইপা, ইপু-ইবেন, মাম্মা-ইনেশিংনা থেংনখিবা অৱাবশিং পুম্নমক অদোম্না থেংনহল্লোই, মসি ঐহাক্কী ৱাশক্নি অমসুং থবক্না উৎকনি, ঐহাক্না মসি থাজহন্নবা মফমসিদা লাক্লিবনি” হায়বসিনি। হৌখিবা চহি ৮ অসিদা এক ভারত, শ্রেস্থ ভারতকী মন্ত্রবু মপাঙ্গল হেন্না কনখৎনহন্নবগীদমক্তা ঐখোয়গী সরকারনা অহিং নুংথিল নাইদনা থবক তৌরি। ঐহাক্না এক ভারত, শ্রেস্থ ভারতকী ৱারী শাবা মতমদা, ঐখোয়গী মিৎয়েংদি কন্নেক্তিবিতী অমসুং মান্নদবা মিৎয়েং য়েংবা মুত্থৎপদা লৈ। থম্মোই, লোল-লিচৎ নত্ত্রগা রিসোর্সকী মতাংদা খল মান্নদনা য়েংবা ওইরো, মসিবু মাঙহনবা হায়বসিদা ঐখোয়না অহেনবা মিৎয়েং চঙলি। ঐহাক্না দোগ্রাগী খুনুং ঈশৈ – মিত্থী এ দোগ্রন দি বোলী, তে খন্দ মিত্থে লোক দোরে হায়রিবসিগী মতাংদা ৱারী শাবা মতমদা অসিগুম্বা নীংথিবা, পুক্নিং হুবা ৱাখল্লোন অসিনা লৈবাকপু অমত্তা ওইহনবগী পাঙ্গল পী অমসুং লাপ্নবশিংবুসু নক্নহল্লি।

নুংশিরবা ইচিল ইনাওশিং,

ঐখোয়গী সরকারগী হোৎনজমন্দগী হৌজিক্তি বনিহল-কাজিগুন্দ তন্নেলনা জম্মু অমসুং শ্রীনগরগী অথাপ্পবু শুপ্নগী পুং ২দা তেনশিনহনখ্রে। উধমপুর-শ্রীনগর-বারামুলাবু শম্নহনগবা পুক্নিং হুনীংঙাই ওইরবা আর্ক ব্রিজসু লৈবাক অসিনা য়াম্না থুনা ফংলগনি। দিল্লী-অমৃতসর-কত্রা হাইৱেনসু দিল্লীদগী ইমা বৈশ্নোগী দর্বার ফাওবগী অথাপ্পবু য়াম্না তেনশিনহল্লগনি। অদুগা, বৈশ্নো দেবী অমসুং কন্যাকুমারীবু শুপ্নগী শোরোক অমখক্তা চৎপা য়াবগী মতমসু কুইদ্রবনি। জম্মু কশ্মির ওইরো, লেহ লদাখ ওইরো, জম্মু কশ্মিরগী মফম অয়াম্ববু থা ১২ চুপ্না লৈবাক্কা শম্নহন্নবা ঐখোয়না কন্না হোৎনরি।

ঙমখৈগী খুঙ্গংশিংগী চাউখৎ থৌরাংগীদমক্তা সরকারনা খ্বাইদগী অহানবা মিৎয়েং চঙদুনা হৌজিক থবক কন্না চত্থরি। হিন্দুস্তান পুম্বগী ঙমখৈগী খ্বাইদগী কোনবদা লৈবা খুঙ্গংগীদমক্তা ভাইব্রেন্ত ভিলেজ স্কিম অসি হন্দক্কী বজেত্তা অয়াবা পীখ্রে। মসিনা ঙমখৈদা লৈবা খুঙ্গং খুদিংদা কান্নবা পীগনি অমসুং হায়রিবা অসি ভাইব্রেন্ত ভিলেজকী মখাদগী ফংগনি। মসিগী অয়াম্বা কান্নবা অসি পঞ্জাব অমসুং জম্মু কশ্মিরনা ফংলগনি।

মরূপশিং,
ঙসিদি, জম্মু কশ্মিরনা সবকা সাথ, সবকা বিকাসকী মশক নাইবা খুদম অমা ওইরক্লি। রাজ্যসিদা অফবা অমসুং মতমগা চুনবা হোস্পিতাল লৈনবা, ত্রান্সপোর্তকী অনৌবা পথাপ ওইরো, অ ৱাংবা থাক্কী মহৈ তম্ফমশঙ ওইরো, মফমসিগী নহাশিংগী খল্লবা মতুংদা মরী লৈনবা স্কিম চলায়বা হৌরে। চাউখৎপা অমসুং থাজবা হেনগৎলক্লিবা ফিভম অসিগী মরক্তা জম্মু কশ্মিরদা তুরিজম চাউখৎপা হৌরক্লে। মথংগী জুন-জুলাই ফাওবগী ওইনা মফমসিগী তুরিস্তকী মফম অয়াম্বা লোইনা বুক তৌনখ্রে হায়না ঐহাক্না খঙবা ঙম্লে, মফম ফংবদা ৱারে হায়না ঐহাক্কী ইফমদা পাউদম্লক্লি। মমাংগী চহি কয়াদগী লাকলুদ্রবা তুরিস্তশিংনা হৌখিবা থা খরদা লোইনা লাক্নবা হৌনখ্রে।

মরূপশিং,
নীংতম্বগী অমৃতকী মতম অসি ভারতকী সনাগী য়ুগ ওইরগনি। মসিগী ৱারেপ অসি মীয়াম্না হোৎনবদগী ফংগনি। হায়রিবা থৌওং অসিদা গনতন্ত্রগী খ্বাইদগী গ্রাসরুত য়ুনিৎ ওইরিবা, গ্রাম পঞ্চায়ত অমসুং অদোমগী থৌদাং য়াম্না মরু ওই। পঞ্চায়তকী অসিগুম্বা থৌদাংশিংবু শকখঙদুনা নীংতম্বগী অমৃত মহোৎসবকী মতমসিদা ঐখোয়না অমৃত সরোবরগী খোঙথাংসু হৌদোক্লে। লাক্কদৌরিবা চহি ১গী মনুংদা, মথং চহিগী ওগস্ত ১৫ ফাওবদা জিলা খুদিংদা য়ামদ্রবদা অমৃত সরোবর ৭৫ শেম্নবা হোৎনগদবনি।

অসিগুম্বা সরোবরশিংগী মনাক নকপদা নীম, পীপল, বর্গদনচিংবা পাম্বী কয়া অথৌবশিংগী মমিংদা থানবা ঐখোয়না হোৎনগদবনি। অদুগা, অমৃত সরোবরগী থবক হৌবা মতমগা মসিগী উরেপ উয়ুং অসি নীংতম ইহৌগী অথৌবা অমগী ইমুং মনুংগী মীওইনা তৌহন্নবা ঐখোয়না কাওরোইদবনি। অমসুং, নীংতম্বগীদমক্তা ঐখোয়না অমৃত সরোবরগী খোঙথাং অসিবু য়াম্না চাউথোকচনীংঙাই ওইবা থৌওং ওইহনগদবনি।

নুংশিরবা ইচিল ইনাওশিং,

হৌখিবা চহিশিংদা পঞ্চায়তশিংবু নুং পান্না ফাওনা উবা হেলহন্নবা, হক হেন্না পীনবা অমসুং তেক্নোলোজীগা হেন্না শম্নহন্নবা হোৎনদুনা লাক্লি। ই-গ্রাম স্বরাজ খোঙথাংগী মতেংনা পঞ্চায়তকা মরী লৈনবা প্লান্নিংদগী হৌরগা পেমেন্ত তৌবগী খুদোংচাবা ফাওবা ফংহল্লি। পঞ্চায়ত্তা করি থবক পায়খৎলি, মদুগী স্তেতস করিনো, বজেত কয়া য়াম্না চাদিং তৌখ্রে হায়বা মীচম মীয়াম্না মখোয়গী মোবাইল ফোন্দগী হৌজিক খঙবা য়ারে। পঞ্চায়তনা ফংলিবা ফন্দশিংবু ওনলাইন্দা ওদিত তৌনবা খুদোংচাবা লৈরে। সিতিজন্স চার্তর কেম্পেনগী খুত্থাংদা বর্থ সর্তিফিকেত, লুহোংবগী সর্তিফিকেত, লন-থুমগা মরী লৈনবা তোঙানবা খুদোংচাবা কয়াগী ৱারোইশিন খুদিংবু পঞ্চায়তকী থাক মক্তদা লোইশিনবা ঙম্নবা রাজ্য অমসুং পঞ্চায়তশিংগী খুক্নিং থৌগৎলি। স্বামিত্ব য়োজনা লাকপদগী প্রোপর্তী তেক্স এসেসমেন্ত তৌবদা পঞ্চায়তশিংগী অরাইবা ওইরে। মসিগী খুদোংচাবশিং হৌজিক গ্রাম পঞ্চায়তশিংনা ফংলি।

পঞ্চায়তশিংদা ত্রেনিং পীনবা মতমগা চুনবা তেক্কনোলোজী শিজিন্নবগী অনৌবা আইন অমগী নুমিৎ খরনিগী মমাংদা অয়াবা পীখ্রে। খুঙ্গংশিংদা তঙাই ফদবা খুদোংচাবশিং ফংহন্নবা পঞ্চায়তশিংগী নবনির্মানগী ৱারেপ লৌবগা লোয়ননা হন্দক্কী থাগী ১১দগী ১৭ ফাওবদা আইকোনিক ওইরবা চয়োলগী পালন তৌখি। খুঙ্গংগী মীওই অমসুং ইমুং খুদিংদা মহৈ-মশিং, হকশেলগা মরী লৈনবা খুদোংচাবা খুদিংমক ফংহনবা হায়বসি সরকারগী অপাম্বনি। খুঙ্গং চাউখৎপগা মরী লৈনবা প্রোজেক্ত প্লান তৌবা অমসুং মসিবু থবক ওইনা পাংথোকপদবা পঞ্চায়তনা অহেনবা থৌদাং লৌহন্নবা সরকারনা কন্না হোৎনরি। মসিনা লৈবাক্কী অপাম্বশিং ফংহনবদা পঞ্চায়তনা মরু ওইবা পাম্বৈ অমা ওইরক্কনি।

মরূপশিং,
পঞ্চায়তশিংদা অহেনবা ওথোরিতী খুৎশিন্নবগী পান্দমদি মখোয়বু পাঙ্গল হাপ্পগী ময়োল ওইবা মফম অমা তসেংনা ওইহনবনি। পঞ্চায়তকী হেনগৎলক্লিবা মপাঙ্গল, মখোয়না ফংবা শেলনা খুঙ্গংশিংদা অনৌবা শক্তি পীহনবা হায়বা অসিদসু মিৎয়েং চঙলি। পঞ্চায়তী রাজ পথাপ অসিদা নুপীশিংনা শরুক য়াবগী চাং হেনগৎহন্নবা ঐখোয়গী সরকারনা কন্না হোৎনরি।

ভারতকী ইচে-ইচলশিংনা করি পাংথোকপা ঙম্মি? ভারতনা হৌজিক্কী কোরোনাগী মতমসিদা থেংনখিবা থৌওং কয়ানা মালেমদা অচৌবা পারা কয়া তম্বীখি। আশা-আঙ্গনৱারী থৌমীশিংনা ত্রেকিংদগী হৌদুনা তীকা কাপ্পা ফাওবা, অপীকপ-অপীকপা থবক কয়া পাংথোক্তুনা কোরোনাগী মাইয়োক্তা থেংনবা লানফমদা অহেনবা মপাঙ্গল হাপ্পগী থবক ঐখোয়গী ইচানুপীশিংনা পাংথোকখি, ঐখোয়গী ইমা-ইচলশিংনা পাংথোকখি।

খুঙ্গংগী হকশেল অমসুং মচি ওইবা চিঞ্জাক ফংহনবগা মরী লৈনবা নেতৱর্ক কয়ানা নুপীগী শক্তিদগী মশাগী ইনর্জী ফংজখি। নুপীগী সেল্ফ হেল্প গ্রুপশিংনা পুন্সি মহিংগী অনৌবা মাইকৈ তাক্লি, মীয়ামদা খঙহনবগী থৌওংদা অনৌবা ইনোৎ হাপ্লি। ঈশিংগা মরী লৈনবা খুদোংচাবা, হর ঘর জল খোঙথাংগী মতাংদা নুপীশিংগী থৌদাং য়াৎখিবশিংবু পঞ্চায়তশিংনা অথুবা মতমদা থবক ওইনা পায়খৎপা হায়বসি য়াম্না তঙাই ফদবা ৱাফম অমনি।

লৈবাক শিনবা থুংবদা পানি কম্মিতী লাখ ৩ হৌজিক ফাওবদা শেমখ্রে হায়না ঐহাক্কী ইফমদা পাউদমলকখ্রে। হায়রিবা কম্মিতীশিং অসিদা নুপীনা ৫০%গী চাংদা শরুক য়াবা হায়বসি তঙ্গাই ফদবনি, অদুগা খুন্নাইগী শোত্থরবা কাঙলুপকী মীওইনা ২৫%গী চাংদা শরুক য়াগদবনি। মসি ইনবা হায়বসি য়াম্না তঙাই ফদবনি। খুঙ্গংশিংদা হৌজিক তোতি ঈশিংদি ফংলে, অদুবু মসিগী শেংবগী চাং ওনবা, লেপ্তনা পীবগী থৌওংশিং পাংথোক্নবগীদমক্তা নুপীশিংদা ত্রেনিং পীবগী থবকসু লৈবাক শিনবা থুংবদা পায়খৎলি। মসিদা ঐহাক্না খোঙেজল খরগা হেন্না য়াঙখৎহন্নীংই। হৌজিক ফাওবগী ওইনা, নুপী লাখ ৭ হেনবদা ত্রেনিং পীখ্রে। মসিগী মশিং অসিবুসু হেনগৎহনগদবনি, খোঙজেলসু হেন্না য়াঙখৎহনগদবনি। অসিগুম্বা খুদোংচাবা হৌজিক ফাওবা লৈত্রিবা মফমদা অথুবা মতমদা লৈহন্নবা ঐহাক্না ঙসি পঞ্চায়তশিংগী মফমদা থম্লি।

ঐহাক্না গুজরাত্তা মতম শাংনা মুখ্য মন্ত্রী ওইখিবদা এক্সপেরিএন্স কয়া থেংনখি। ঐহাক্না ঈশিংগা মরী লৈনবা খুদোংচাবশিংগী থৌদাং নুপীশিংদা শিন্নখিবা মতমদা মখোয়না নীংথিজনা পাংথোকখি। ঈশিংগী অৱাবা করিনো হায়বসি মখোয়দগী হেন্না কনানসু খঙলোই, মরম অদুনা মসিগী থবক অসিদি মখোয়না থৌদাং মশক খঙনা অমসুং মওং-মরিল চুম্না পাংথোক্লিবনি। অদুনা ঐহাক্কী অসিগুম্বা এক্সপেরিএন্স অসিদা য়ুম্ফম ওইরগা হায়রিবনি। থবকশিং অসিদা য়ারিবমখৈ নুপী মশিং য়াম্না শরুক য়াহনবা, ত্রেনিং পীবা অমসুং থাজবা থম্বনা ঈশিংগী শিংনবগী ৱারোইশিন য়াম্না অথুবা মতমদা পুরকপা ঙমগনি। ঐহাক্কী ৱাফম অসি থাজবীয়ু, ঐখোয়গী ইমা-ইবেন, ইচে-ইচলশিংদা থাজবা থমসি। খুঙ্গংগী থাক খুদিংদা নুপীশিংনা শরুক য়াবগী চাং ঐখোয়না হেনগৎহনগদবনি, মখোয়বু মবুক্নিং থৌগৎকদবনি।

নুংশিরবা ইচিল ইনাওশিং,

ভারতকী গ্রাম পঞ্চায়তশিংগী ওইনা ফন্দ অমসুং রেভেন্যুগী লোকেল মোদেল অমা লৈবগী তঙাই ফদবা লৈ। পঞ্চায়তকী রিসোর্সশিংবু কম্মর্সিএল ওইনা করম্না শিজিন্নবা য়াগনি হায়বগী মতাংদা ঐখোয়না শোইদনা হোৎনগদবনি। খুদম ওইনা হায়রবদা, ফত্ত-হৌদীদগী লন ওন্থোকপা, গোবর্ধন য়োজনা নত্ত্রগা নেচরেল ফার্মিংগী স্কিম। অসিগুম্বা পোৎলমশিং অসিদগী লন তানবা য়াবগী খুদোংচাবা হেনগৎলক্কনি, অনৌ-অনৌবা ফন্দ শেম্বা য়াগনি। বাইওগ্যাস, বিও সি.এন.জি., ওর্গানিক ওইবা হারগুম্বগী অপীকপ-অপীকপা প্লান্ত লিংখৎপা য়াই, মসিদগী খুঙ্গংগী শেন্থোক হেনগৎহনবা য়াগনি অমসুং ঐখোয়না মসিগীদমক্তা হোৎনগদবনি। মসিগীদমক্তা ফত্ত-হৌদীশিংবু নীংথিজনা শেন্নবগী মথৌ তাই।

ঙসি, ঐহাক্না খুঙ্গংগী মীয়াম, পঞ্চায়তকী মীয়ামদা হায়নীংবদি, অতোপ্পা এন.জি.ও.শিংগা খুৎশম্নদুনা, লুপ কয়াগা তেংবাংনদুনা অদোম্না থৌরাং য়াৎপগী মথৌ তারে, অনৌবা রিসোর্স শেম্বগী মথৌ তারে। মসিদা নত্তনা, ঐখোয়গী লৈবাক্কী রাজ্য অয়াম্বদা নুপী মীহুৎকী চাং অসি ৫০% ওই। রাজ্য খরদনা ৩৩%দগী হেল্লি। ইমুংদগী থোকপা ফত্ত-হৌদী, অচোৎপা নত্ত্রগা অকংবা ওইরো, মসিবু তোঙান্না খাইদোকপীয়ু অমসুং মসি য়ুমদা অদুমক তৌবগী হৈনবী থম্বীয়ু। ফত্ত-হৌদীশিং অসিনা অদোমগী সনাগুম্বা শিজিন্নবা য়ারক্কনি। ঐগী ৱাফমসি থাজবীয়ু। অসিগুম্বা খোঙথাং অসিবু খুঙ্গংগী থাক্তা ঐহাক্না পাংথোক্কনি অমসুং মসিদা লৈবাক্কী পঞ্চায়তশিংনা ঐহাক্কী মতেং পাংবীয়ু হায়জনীংই।

মরূপশিং,
 

ঈশিংগা হকথেংননা মরী লৈনরিবসি ঐখোয়গী লবুক্নি, লবুক্কা ঈশিংগী শেংবগী চাংগসু অমুক মরী লৈনৈ। ঐখোয়না লবুক্তা চায়রিবা কেমিকেল অমসুং মসিনা লৈহাওদা শোকহল্লিবা কয়া অসিনা ঐখোয়গী লৈহাও ফজনা মাঙহল্লে। অদুগা ঈশিং, নোংগী ঈশিংনা লৈহাওদা তাশিনবা মতমদা মদুসু কেমিকেলগা য়ানশিন্নখি। মসিগী ঈশিং অসি ঐখোয়গী শা-শলশিংনা থক্লি, ঐখোয়গী অঙাংশিংনা থক্লি। লাইনা থোকহন্নবা ঐখোয় ইশানা শীঞ্জরি, মরম অদুনা ঐখোয়না ইমা লৈহাওবু কেমিকেলদগী মনীং তমহনবা তাই, কেমিকেল হারদগী মনীং তমহনবা তাই। মসিনা মরম ওইদুনা, নেচরেল ফার্মিংদা মাইকৈদা ঐখোয়গী খুঙ্গং, লৌমীশিংনা চৎলবদি মীওইবা খুন্নাই পুম্বদা কান্নবা ফংগনি। ঐখোয়না গ্রাম পঞ্চায়তকী থাক্তা নেচরেল ফার্মিংবু করম্না পুক্নিং থৌগৎকনি হায়বগী মতাংদা ঐখোয়না নীংথিজনা হোৎনবগী মথৌ তারে।

নুংশিরবা ইচিল ইনাওশিং,

নেচরেল ফার্মিং করিগুম্বা কান্নবা খ্বাইদগী হেন্না পীবা ওইরবদি, মসি ঐখোয়গী অপীকপা লৌশিংদা ওইগনি। মখোয়গী মীশিংনা লৈবাক অসিদা ৮০%দগী হেল্লি। শেল য়াম্না চঙদনা কান্নবা হেন্না ফংলবদি, মসিনা অপীকপা লৌমীশিংবু পুক্নিং য়াম্না থৌগৎকনি। মমাংগী চহিশিংদা কেন্দ্র সরকারনা শেমখিবা কাঙলোনশিংনা ঐখোয়গী অসিগুম্বা অপীকপা লৌমীশিংদা কান্নবা পীরি। কিসান রেলগী মখাদা অপীকপা লৌমীশিংগী মহৈ-মরোং লৈবাকশিনবা থুংবগী কৈথেলদা অহোঙবা মমলদা য়ৌরি। এফ.পি.ও., হায়বদি ফারমর্স প্রদ্যুসর ওর্গনাইজেসন শেম্বদগী অপীকপা লৌমীশিংদা মপাঙ্গল হাপ্লি। হন্দক্কী চহিদা ভারতনা মীরমদা মহৈ-মরোং থাদোকপদা রিকোর্দ থমখি। মসিগী চাউরবা কান্নবা অসি ঐখোয়গী অপীকপা লৌমীশিংনা ফংনখি।

মরূপশিং,
গ্রাম পঞ্চায়তনা মীয়াম পুম্ববু শরুক য়াহন্দুনা থবক অমসু পাংথোকফম থোকই। মেলন্যুত্রিসন, এনিমিয়াদগী লৈবাকপু কন্নবা কেন্দ্র সরকারনা পায়খৎলিবা থৌদাং অসিগী মতাংদা মীচম মীয়াম খুদিংদা খঙহনবগী মথৌ তাই। সরকারগী মাইকৈদগী চলায়বা স্কিমশিংনা চেং পীরিবা খুদিংমকপু হৌজিক ফোর্তিফাই তৌরি, তঙাই ফদবা মচি হাপ্লি। অসিগুম্লবা ফোর্তিফাই তৌরবা চেংশিং অসি হকচাংদা কয়া য়াম্না কান্নবগে হায়বগী মতাংদা মীয়ামদা খঙহনবা হায়বসি ঐখোয় পুম্নমক্কী থৌদাংনি। নীংতম্বগী অমৃত মহোৎসব অসিদা ঐখয়গী ইচে-ইচল, অঙাংশিংবু মেলন্যুত্রিসন, এনেমিয়াদগী কন্নবা ঐখোয়না ৱারেপ লৌগদবনি অমসুং অপাম্বা পান্দম ফংদ্রিবা ফাওবা, মীওইবা খুন্নাই তেংবাংবগী অসিগুম্বা থবক অসি ঐখোয়না মখা চত্থদুনা লৈগদবনি অমসুং মেলন্যুত্রিসনবু ঐখোয়গী লৈবাক অসিদগী তান্থোক্কদবনি।

ভারতকী চাউখৎপদি ভোকেল ফোর লোকেলগী মন্ত্রদা লৈরবনি। ভারতকী গনতন্ত্রগী চাউখৎপগী মপাঙ্গলসু লোকেল গবর্নেন্সতা লৈ। অদোমগী থবক্কী মিৎয়েং অসি লোকেল ওইজরবসু, মসিগী তসেংবা কান্নবদি মালেমদা পীগনি। লোকেলগী অসিগুম্বা পাঙ্গল অসি ঐখোয়না শকখঙগদবনি। অদোম্না ইশাগী পঞ্চায়ত্তা পাংথোকপা থবক খুদিংদা লৈবাক্কী মিংচৎ হেন্না ফজহনবা, লৈবাক্কী খুঙ্গংশিং মপাঙ্গল লৈরকপা, মসিনি ঐহাক্না ঙসিগী পঞ্চায়তী রাজ নুমিৎ অসিদা মীয়ামদগী থাজবা থম্লিবা।

ঐহাক্না জম্মু কশ্মিরগী চাউখৎ-থৌরাংগী থবক কয়া অসিগীদমক্তা অমুক্কা হন্না থাগৎচরি।  অমসুং লৈবাক শিনবা থুংবদা লৈরিবা মীয়ামগী মীহুৎ লাখ কয়াগী মফমদা পঞ্চায়ত অইরো, পার্লিয়ামেন্ত ওইরো, থবক অমত্তা অপীকপা নত্তে হায়জনীংই। পঞ্চায়ত্তা ফমদুনা ঐহাক্কী লৈবাকপু মাং থানা পুগনি হায়বা ৱারেপকা লোয়ননা পঞ্চায়তনা তুংলমচত্তা খোঙদারবদি লৈবাক চাউখৎপদা থেংথররোই। অদুগা, পঞ্চায়তকী থাক্তা মীয়াম্না খনগৎলবা মীহুৎশিংগী থৱাই য়াওবগী মতৌ ঐহাক্না উবা ফংলি, মখোয়গী মঙলনা উবা ফংলি, ৱারেপ উবা ফংলি। ঐখোয়গী পঞ্চায়তী রাজকী পথাপ অসিনা ভারতপু চাউখৎপগী অনৌবা থাক্তা পুবগী মপাঙ্গল লৈবা পাম্বৈ ওইগনি হায়বগী ঐহাক্না থাজবা থম্লি। অসিগুম্লবা থাজবা অমসুং য়াইফ পাউজেল কয়াগা লোয়ননা ঐহাক্না অদোম খুদিংবু অমুক্কা হন্না থাগৎচরি।

ঐহাক্কী লোয়ননা ইশাগী খুৎ অনিমক থাংগত্তুনা অমুক্তা লাওমিন্নসি –

ভারত ইমানা য়াইফরে,

ভারত ইমানা য়াইফরে

হন্না-হন্না থাগৎচরি!

*****