ভারতকী রাস্ত্রপতি অমসুং আর্ম্দ ফোর্সকী সুপ্রীম কম্মান্দর, শ্রী রাম নাথ কোবিন্দনা শরুক য়াদুনা নই দিল্লীগী ময়াই চবুক্তা লৈরিবা পুৱারী ওইরবা বিজয় চোক্তা জনুৱারী ২৯, ২০২২দা পাংথোক্কদবা হন্দক্কী চহিগী ‘বিতিং দি রিত্রীত সেরেমোনী’ অসিগী মরু ওইবা থৌরম অমদি দ্রোনশিংনা উৎকদবা অনৌবা মখলগী কুমহৈনা ওইরগনি। খ্বাইদগী অহানবা অমা ওইনা, হায়রিবা কুমহৈ অসি ‘নীংতম্বগী অমৃত মহোৎসব’ হায়না মিংথোন্দুনা পাংথোক্লিবা নীংতম্বগী চহি ৭৫ মপুং ফারকপগী নুংঙাইবা ফোংদোক্লিবা অসিগী শরুক অমা ওইগনি। ‘মেক ইন ইন্দিয়া’ খোঙথাংগী মখাদা ৱাখল্লোন পুথোক্লিবা, দিজাইন অমসুং কোরিওগ্রাফ তৌরিবা কুমহৈ অসিবু থৌরম অসিদা শরুক য়াগদবা অতোপ্পা মীথুংলেনশিংগী মনুং চনবশিং, প্রধান মন্ত্রী, শ্রী নরেন্দ্র মোদী অমসুং ঙাক-শেল মন্ত্রী, শ্রী রাজনাথ সিংহনা মিৎয়েং তাগনি।

ভারতকী তোঙানবা মচলগা লোয়নবা মার্সিএল ম্যুজিকেল ত্যুন্না হন্দক্কী চহিগী থৌরম অসিগী মরু ওইবা মচল ওইগনি। ইন্দিয়ন আর্মী, নেভী, এয়রফোর্স অমসুং স্নেত্রেল আর্ম্দ পুলিস ফোর্স (সি.এ.পি.এফ.)কী বেন্দশিংবু খোঙবা নুঙাইরবা ম্যুজিক্না থৌরম অসিদা তিল্লিবা ভাবোকশিংগী মপুক্নিং ফাজিনগনি। এন্ত্রী বেন্দ অসিনা ‘ভীর সৈনিক’কী ত্যুন খোঙবা মাসদ বেন্দনা ওইগনি। মসিগী মতুংদা পাইপ অমসুং দ্রম বেন্দ, সি.এ.পি.এফ. বেন্দ, এয়র ফোর্স বেন্দ, নেভেল বেন্দ, আর্মী মিলিতরী বেন্দ অমসুং মাস্‌দ বেন্দনা মতুং ইনগনি। থৌরম অসিগী প্রিন্সিপাল কন্দক্তরনা কম্মান্দর বিজয় চার্লস দি’ক্রুজনা ওইগনি।

 ‘নীংত্মবগী অমৃত মহোৎসব’কী নুংঙাইবা ফোংদোক্নবগীদমক্তা অনৌবা ত্যুন কয়া হন্দক্কী থৌরম অসিদা হাপচিনখ্রে। মখোয়শিংগী মনুং চনবশিংদি ‘কেরলা’, ‘হিন্দ কি সেনা’ অমসুং ‘এ মেরে ৱতন কে লোগো’নি। খ্বাইদগী মমিং চৎপা ত্যুন, ‘সারে জহান সে অচ্ছা’গা লোয়ননা থৌরম অসি লোইশিনগনি।

দ্রোন শো অসি স্তার্ত-অপ, ‘বোতলেব দাইনামিক্স’না শীন লাঙবনি অমসুং ইন্দিয়ন ইন্সতিত্যুৎ ওফ তেক্নোলোজী (আই.আই.তি.) দিল্লী অমসুং দিপার্তমেন্ত ওফ সাইন্স এন্দ তেক্নোলোজীনা শৌগৎপনি। শো অসি মিনিত ১০ শাংগনি অমসুং মসিদা লমদমসিগী তেক্নোলোজী শিজিন্নদুনা শাবা চাউরাকপা দ্রোন ১০০০ য়াওগনি। দ্রোন শো অসিগী মনুংদা উৎলিবা শক্তমগা মরী লৈননা চুনহল্লবা বেকগ্রাউন্দ ম্যুজিক খোংগনি।

থৌরম অসিগী অতোপ্পা শক্তম অমনা নীংতম্বগী চহি ৭৫ নীংশিংবা ওইনা পাংথোকপা প্রোজেক্সন মেপ্পিংনা ওইগনি। চাউরাক্না মিনিত ৩-৪ শাংবা শো অসিনা থৌরম লোইদ্রিঙৈগী মমাংদা নোর্থ অমসুং সাউথ ব্লোক্কী ফক্লাংশিংদা কাপকনি।

গনতন্ত্রা দিবস নুমিৎকী পেরেদতা তৌখিবগা মান্ননা, ‘বিতিং দি রিত্রীত’ থৌরমগী ইনভিতেসন কার্দসু কোবিদ-১৯গী মতমগা মরী লৈনবা ইকো-ফ্রেনলী ওইনা শেম শাবনি। কার্দশিং অসি হিদাক পাম্বী ওইরিবা, অশ্বগন্ধাগী মরুদা এলো ভেরা অমসুং অমলা চাইশিন্দুনা শাবনি। চহি লিরবা হিদাক্কী কান্নবশিং লৌনবগীদমক্তা কার্দশিং অসিদা য়াওরিবা মরুশিং অসি মীয়াম্না মখোয়গী ময়ুমগী থানবা পুক্নিংসু থৌগৎলি।

‘বিতিং দি রিত্রীত’ হায়বসি লান্মীশিংনা নুমিৎ তারকপা মতমদা লানফমদগী হল্লক্তুনা পোত্থাবগী চহি-চা শুরবা চৎনবগীগী মতুং ইনবনি। বেঙ্গুন খোংবা মীওইনা হল্লো হায়না হেক খোংবগা, লান্মীশিংনা লান শোক্নবা লেপ্নৈ, মশাগী থাং তেন হাপচিন্নোই অমসুং লানফমদগী হন্দোক্নৈ। মরম অসিদগী রিত্রীত অসি পাংথোক্লিঙৈদা লেপ্তুনা লৈবগী চৎনবী অসি ঙসি ফাওবদা ইল্লি। রিত্রীত মনুংদা মচু অমসুং স্তেন্দর্দতি থমজিন্নৈ অমসুং ফিরালশিংসু তংখায় চিংথনৈ।

দ্রম থিনবগী মখোলনা শহর অমসুং শহর মচাশিংদা লৈরম্বা লান্মীশিংবু মখোয় মখোয়গী ক্বার্তরদা অখন্নবা মতমগী মনুংদা য়ৌরক্নবা কৌশিন্নৈ। মসিগুম্বা মিলিতরীগী চৎনবীশিংদা য়ুম্ফম ওইদুনা, ‘বিতিং দি রিত্রীত’ থৌরম্না থায়না হৌখিবা মতমগী থৌদোকশিংবু অমুক্কা হন্না নীংশিংহল্লি।

*****