2022ರ ಜನವರಿ 25ರಂದು 12ನೇ ರಾಷ್ಟ್ರೀಯ ಮತದಾರರ ದಿನವನ್ನು ದೇಶಾದ್ಯಂತ ಆಚರಿಸಲಾಯಿತು. ನವದೆಹಲಿಯಲ್ಲಿ ನಡೆದ ಪ್ರಧಾನ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಭಾರತದ ಉಪರಾಷ್ಟ್ರಪತಿ ಶ್ರೀ ಎಂ. ವೆಂಕಯ್ಯ ನಾಯ್ಡು ಅವರು ವರ್ಚುವಲ್ ಮೂಲಕ  ಸಂದೇಶವನ್ನು ನೀಡಿದರು. ತಮ್ಮ ಸಂದೇಶದಲ್ಲಿ ಅವರು, ಮತದಾನದ ಪ್ರಮಾಣ ಸುಧಾರಿಸಲು ಮತ್ತು ಚುನಾವಣಾ ಪ್ರಕ್ರಿಯೆಯಲ್ಲಿ ಸಮಗ್ರತೆಯನ್ನು ಹೆಚ್ಚಿಸಲು ಚುನಾವಣಾ ಆಯೋಗವು ನಿರಂತರವಾಗಿ ಮಾಡುತ್ತಿರುವ ಪ್ರಯತ್ನಗಳನ್ನು ಶ್ಲಾಘಿಸಿದರು. ಕಳೆದ ಚುನಾವಣೆಯಲ್ಲಿ ಪ್ರಶಂಸನೀಯ ಸಾಧನೆ ತೋರಿ ಇಂದು ಪ್ರಶಸ್ತಿಗೆ ಪಡೆಯುತ್ತಿರುವವರನ್ನು ಅವರು ಅಭಿನಂದಿಸಿದರು. ಮಾಜಿ ಮುಖ್ಯ ಚುನಾವಣಾ ಆಯುಕ್ತರಾದ ಶ್ರೀ ನವೀನ್ ಚಾವ್ಲಾ ಮತ್ತು ಶ್ರೀ ಸುನಿಲ್ ಅರೋರಾ, ಮಾನ್ಯತೆ ಪಡೆದ ರಾಜಕೀಯ ಪಕ್ಷಗಳಾದ ಎಐಟಿಸಿ, ಬಿಎಸ್.ಪಿ, ಬಿಜೆಪಿ, ಸಿ.ಪಿ.ಐ., ಐ.ಎನ್.ಸಿ., ರಾಷ್ಟ್ರೀಯ ಪೀಪಲ್ಸ್ ಪಾರ್ಟಿಯ ಹಿರಿಯ ಪ್ರತಿನಿಧಿಗಳು; ರಾಷ್ಟ್ರೀಯ ಹೆಗ್ಗುರುತಾಗಿರುವವರು ಮತ್ತು ಇಸಿಐನ ಅತ್ಯುತ್ತಮ ಚುನಾವಣಾ ರೂಢಿಗಳ ಪ್ರಶಸ್ತಿಗೆ ಭಾಜನರಾದವರು ಇಂದಿನ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.

ಮುಖ್ಯ ಚುನಾವಣಾ ಆಯುಕ್ತ ಶ್ರೀ ಸುಶೀಲ್ ಚಂದ್ರ ಅವರು ಚುನಾವಣೆಗಳನ್ನು ಹೆಚ್ಚು ಸಮಗ್ರ, ಪ್ರವೇಶಾರ್ಹ ಮತ್ತು ಪಾಲ್ಗೊಳ್ಳುವಂತೆ ಮಾಡುವ ಆಯೋಗದ ನಿರ್ಧಾರವನ್ನು ಪುನರುಚ್ಚರಿಸಿದರು.  ಈ ವರ್ಷದ ರಾಷ್ಟ್ರೀಯ ಮತದಾರರ ದಿನದ ವಿಷಯವನ್ನು ನಿರ್ದಿಷ್ಟವಾಗಿ ಅದಕ್ಕೆ ಅನುಗುಣವಾಗಿ ಆಯ್ಕೆ ಮಾಡಲಾಗಿದೆ ಎಂದು ಅವರು ಹೇಳಿದರು. ಇಸಿಐ ಎರಡು ದಿಕ್ಕುಗಳಲ್ಲಿ ಅದ್ಭುತ ಪ್ರಯತ್ನಗಳನ್ನು ಮಾಡಿದೆ, ಒಂದು ಮತದಾರರ ನೋಂದಣಿಯನ್ನು ಹೆಚ್ಚಿಸುವುದು ಮತ್ತು ಸುಗಮಗೊಳಿಸುವುದು ಮತ್ತು ಎರಡನೆಯದು ಮತದಾನ ಕೇಂದ್ರಗಳನ್ನು ಹೆಚ್ಚು ಅನುಕೂಲಕರ,  ಆರಾಮದಾಯಕ ಮತ್ತು ಪ್ರವೇಶಾರ್ಹವಾಗಿಸುವುದು ಎಂದು ಶ್ರೀ ಚಂದ್ರ ಹೇಳಿದರು. ಇಸಿಐ ಸುಸ್ಥಿರ ಪ್ರಯತ್ನಗಳನ್ನು ಮಾಡಿದೆ ಮತ್ತು ಹಿರಿಯ ನಾಗರಿಕರು ಮತ್ತು ವಿಕಲಾಂಗಚೇತನರ ಪಾಲ್ಗೊಳ್ಳುವಿಕೆಯನ್ನು ಸಶಕ್ತಗೊಳಿಸಲು ಮತ್ತು ಸುಗಮಗೊಳಿಸಲು ಆ ಹೆಚ್ಚುವರಿ ದೂರ ಸಾಗಿದೆ ಎಂದು ಅವರು ಹೇಳಿದರು. ಆಯೋಗವು ಅಂಚೆ ಮತಪತ್ರದ ಆಯ್ಕೆಯನ್ನು ನೀಡುವ ಮೂಲಕ ಮತ ಚಲಾಯಿಸಲು ಮತದಾನ ಕೇಂದ್ರಕ್ಕೆ ಹೋಗಲು ಸಾಧ್ಯವಾಗದವರ ಮನೆ ಬಾಗಿಲಿಗೆ ಮತಗಟ್ಟೆಯನ್ನು ತಂದಿದೆ ಎಂದು ಅವರು ಹೇಳಿದರು. ಸಾಂಕ್ರಾಮಿಕ ರೋಗದ ಸವಾಲಿನ ಸಮಯದಲ್ಲಿ ತಮ್ಮ ಕರ್ತವ್ಯಗಳನ್ನು ನಿರ್ವಹಿಸಿದ ಎಲ್ಲಾ ಕ್ಷೇತ್ರ ಕಾರ್ಯಕರ್ತರು, ಬೂತ್ ಮಟ್ಟದ ಅಧಿಕಾರಿಗಳು, ಭದ್ರತಾ ಸಿಬ್ಬಂದಿ ಮತ್ತು ಸಿಎಪಿಎಫ್ ಸದಸ್ಯರ ಬಗ್ಗೆ ಸಿಇಸಿ ಮೆಚ್ಚುಗೆ ವ್ಯಕ್ತಪಡಿಸಿದರು ಮತ್ತು ಚುನಾವಣೆಗಳನ್ನು ಯಾವುದೇ ರೀತಿಯಲ್ಲೂ ತೊಂದರೆಗೊಳಗಾಗಲು ಬಿಡುವುದಿಲ್ಲ ಎಂದರು.

ಕೇಂದ್ರ ಕಾನೂನು ಮತ್ತು ನ್ಯಾಯ ಸಚಿವ ಶ್ರೀ ಕಿರೆಣ್ ರಿಜಿಜು ಅವರು ಗೌರವ ಅತಿಥಿಯಾಗಿ ಈ  ಸಂದರ್ಭದಲ್ಲಿ ಉಪಸ್ಥಿತರಿದ್ದರು.   ಪ್ರತಿಯೊಬ್ಬ ಮತದಾರರೂ ತಮ್ಮ ಮತದಾನದ ಹಕ್ಕನ್ನು ಗೌರವಿಸಬೇಕು ಮತ್ತು ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವದಲ್ಲಿ ಮತದಾರರಾಗಿರುವುದು ಒಂದು ಸುಯೋಗ ಎಂಬುದನ್ನು ಅರಿತುಕೊಳ್ಳಬೇಕು ಎಂದು ಶ್ರೀ ರಿಜಿಜು ಹೇಳಿದರು. ಯಶಸ್ವಿ ಪ್ರಜಾಪ್ರಭುತ್ವದ ಬುನಾದಿಯನ್ನು ಉತ್ತಮ ಚುನಾವಣಾ ಪ್ರಕ್ರಿಯೆಗಳ ಮೇಲೆ ಹಾಕಲಾಗಿದೆ ಎಂದು ಅವರು ಹೇಳಿದರು. ಅವರು ಇತ್ತೀಚಿನ ಚುನಾವಣಾ ಸುಧಾರಣೆಗಳನ್ನು ಎತ್ತಿ ತೋರಿಸಿದರು, ಇದು ಈಗ ವರ್ಷಕ್ಕೆ ನಾಲ್ಕು ಬಾರಿ ಯುವ ಅರ್ಹ ನಾಗರಿಕರಿಗೆ ನೋಂದಣಿಯನ್ನು ಸುಗಮಗೊಳಿಸುತ್ತದೆ ಎಂದರು.  ಸಾಂವಿಧಾನಿಕ ಪ್ರಾಧಿಕಾರಗಳ ಸ್ವಾತಂತ್ರ್ಯದ ಅಗತ್ಯವನ್ನು ಗುರುತಿಸಿದ ಕೇಂದ್ರ ಸಚಿವರು, ತಮ್ಮ ಸ್ವಾತಂತ್ರ್ಯಕ್ಕೆ ಧಕ್ಕೆಯಾಗದಂತೆ ಸಂಘಟಿತ ಕಾರ್ಯನಿರ್ವಹಣೆಯ ಅಗತ್ಯವನ್ನು ಒತ್ತಿ ಹೇಳಿದರು.  ಚುನಾವಣಾ ಕರ್ತವ್ಯಗಳನ್ನು ನಿರ್ವಹಿಸುವಾಗ ಪ್ರಾಣ ತ್ಯಾಗ ಮಾಡುವ ಮತಗಟ್ಟೆ ಸಿಬ್ಬಂದಿಯನ್ನು ಗೌರವಿಸಲು ಇಸಿಐ ಮರಣೋತ್ತರ ಪ್ರಶಸ್ತಿಗಳನ್ನು ನೀಡಲು ಪ್ರಾರಂಭಿಸಬಹುದು ಎಂದು ಶ್ರೀ ರಿಜಿಜು ಸಲಹೆ ನೀಡಿದರು.

ಚುನಾವಣಾ ಆಯುಕ್ತ ಶ್ರೀ ರಾಜೀವ್ ಕುಮಾರ್ ಅವರು ತಮ್ಮ ಹೇಳಿಕೆಯಲ್ಲಿ ಪ್ರಜಾಪ್ರಭುತ್ವ ಮತ್ತು ಪ್ರಜಾಪ್ರಭುತ್ವ ಆಚರಣೆಗಳ ಸಂಪ್ರದಾಯವು ಭಾರತದಲ್ಲಿ ಆಳವಾಗಿ ಬೇರೂರಿದೆ ಎಂದು ಉಲ್ಲೇಖಿಸಿದರು. ಭಾರತದ ಸಂವಿಧಾನವನ್ನು ಅಂಗೀಕರಿಸಿದ  ಒಂದು ದಿನ ಮೊದಲು ಭಾರತ ಚುನಾವಣಾ ಆಯೋಗವನ್ನು  ಸಾಂವಿಧಾನಿಕ ಸಂಸ್ಥೆಯಾಗಿ ರಚಿಸುವ ಮಹತ್ವದ ಬೆಳವಣಿಗೆಯು ಪ್ರಜಾಪ್ರಭುತ್ವದ ಸ್ಫೂರ್ತಿಗೆ ನಮ್ಮ ದೇಶದ ನಿರ್ಮಾತೃಗಳ ಬದ್ಧತೆಯನ್ನು ನೆನಪಿಸುತ್ತದೆ ಮತ್ತು ಅದರ ನಾಗರಿಕರ ಸಂಕಲ್ಪವನ್ನು ಆಚರಿಸುತ್ತದೆ ಎಂದು ಅವರು ಹೇಳಿದರು. ಎಲ್ಲಾ ಅಭ್ಯರ್ಥಿಗಳು ಮತ್ತು ರಾಜಕೀಯ ಪಕ್ಷಗಳಿಗೆ ಒಂದು ಸಮಾನ ಅವಕಾಶ ಒದಗಿಸಲು ಇಸಿಐ ಬದ್ಧವಾಗಿದೆ, ಇದರಿಂದ ಮತದಾರರು ಭಯ ಅಥವಾ ಅನುರಾಗವಿಲ್ಲದೆ ಭಾಗವಹಿಸಬಹುದು ಎಂದು ಶ್ರೀ ಕುಮಾರ್ ಪುನರುಚ್ಚರಿಸಿದರು. ಭಾರತದ ಚುನಾವಣಾ ಆಯೋಗವು ವಾಸ್ತವೀಕರಣದ ವಿವಿಧ ಹಂತಗಳಲ್ಲಿ ಹಲವಾರು ಸುಧಾರಣಾ ಯೋಜನೆಗಳನ್ನು ಹೊಂದಿರುವುದರಿಂದ, ವಿಶೇಷವಾಗಿ ಚುನಾವಣಾ ಪ್ರಕ್ರಿಯೆಗಳಾದ್ಯಂತ ಮಾಹಿತಿ ತಂತ್ರಜ್ಞಾನದ ಹೆಚ್ಚಿನ ಬಳಕೆಯ ಮತ್ತು ಮತದಾರರ ಕಲ್ಯಾಣದ ಮೂಲಕ ಚುನಾವಣೆಗಳ ಭವಿಷ್ಯವು ನಿಜವಾಗಿಯೂ ಕ್ರಿಯಾತ್ಮಕ ಸಾಧ್ಯತೆಗಳಿಂದ ಕೂಡಿದೆ, ಎಂದು ಅವರು ಹೇಳಿದರು.

ಚುನಾವಣಾ ಆಯುಕ್ತ ಶ್ರೀ ಅನುಪ್ ಚಂದ್ರ ಪಾಂಡೆ ಅವರು 12ನೇ ರಾಷ್ಟ್ರೀಯ ಮತದಾರರ ದಿನದ ರಾಷ್ಟ್ರೀಯ ಆಚರಣೆಗೆ ಗಣ್ಯರು ಮತ್ತು ಪ್ರಶಸ್ತಿ ವಿಜೇತರನ್ನು ಸ್ವಾಗತಿಸಿದರು. ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವದಲ್ಲಿ ಮುಕ್ತ, ನ್ಯಾಯಸಮ್ಮತ, ಸಹಭಾಗಿತ್ವ, ಒಳಗೊಳ್ಳುವ ಮತ್ತು ಪ್ರವೇಶಾರ್ಹವಾದ ಚುನಾವಣೆಗಳನ್ನು ಖಚಿತಪಡಿಸಿಕೊಳ್ಳುವ ಪ್ರಯತ್ನದಲ್ಲಿ ಭಾರತದ ಚುನಾವಣಾ ಆಯೋಗವು ಅವಿರತವಾಗಿ ಶ್ರಮಿಸುತ್ತದೆ. ಪ್ರತಿ ವರ್ಷ ರಾಷ್ಟ್ರೀಯ ಮತದಾರರ ದಿನದ ಆಚರಣೆಗಳು ಯಾವುದೇ ಮತದಾರನನ್ನು ಹಿಂದೆ ಬೀಳುವಂತೆ ಮಾಡಬಾರದು ಎಂಬ ತತ್ವದ ಆಧಾರದ ಮೇಲೆ ಆಯೋಗದ ಸಾಂವಿಧಾನಿಕ ಬಾಧ್ಯತೆಯನ್ನು ನಮಗೆ ನೆನಪಿಸುತ್ತದೆ ಎಂದು ಅವರು ಹೇಳಿದರು. ಎನ್.ವಿಡಿ 2022 ಭಾರತದಲ್ಲಿನ 7೦ ಯಶಸ್ವಿ ವರ್ಷಗಳ ಚುನಾವಣೆಗಳನ್ನು ಸೂಚಿಸುತ್ತದೆ ಎಂದು ಅವರು ಹೇಳಿದರು.

ಈ ಸಂದರ್ಭದಲ್ಲಿ, ಆಯೋಗವು ವಿವಿಧ ಕ್ಷೇತ್ರಗಳಲ್ಲಿ ಚುನಾವಣೆಗಳನ್ನು ನಡೆಸುವಲ್ಲಿ ಅತ್ಯುತ್ತಮ ಸಾಧನೆ ಮಾಡಿದ ಅಧಿಕಾರಿಗಳಿಗೆ ಅತ್ಯುತ್ತಮ ಚುನಾವಣಾ ರೂಢಿಗಾಗಿ ರಾಷ್ಟ್ರೀಯ ಪ್ರಶಸ್ತಿಗಳನ್ನು ಪ್ರದಾನ ಮಾಡಿತು. ಇದಲ್ಲದೆ, ಮತದಾರರ ಜಾಗೃತಿ ಮತ್ತು ಪ್ರಚಾರ ಕ್ಷೇತ್ರದಲ್ಲಿ ಅತ್ಯುತ್ತಮ ಕೊಡುಗೆ ನೀಡಿದ ಸರ್ಕಾರಿ ಇಲಾಖೆಗಳು ಮತ್ತು ಮಾಧ್ಯಮ ಸಂಸ್ಥೆಗಳಿಗೆ ಪ್ರಶಸ್ತಿಗಳನ್ನು ನೀಡಲಾಯಿತು.

ರಾಷ್ಟ್ರೀಯ ಮತದಾರರ ದಿನದ ಬ್ರೋಷರ್ ಗಾಗಿ ಲಿಂಕ್ ಡೌನ್ ಲೋಡ್ ಮಾಡಿ: https://eci.gov.in/files/file/13975-12th-national-voters-day-best-electoral-practices-awards-2021-2022/

ಭಾರತೀಯ ಚುನಾವಣಾ ಆಯೋಗವು 'ಲೀಪ್ ಆಫ್ ಫೇತ್: ಜರ್ನಿ ಆಫ್ ಇಂಡಿಯನ್ ಎಲೆಕ್ಷನ್ಸ್' (ನಂಬಿಕೆಯ ದಾಪುಗಾಲು: ಭಾರತೀಯ ಚುನಾವಣೆಯ ಪಯಣ) ಎಂಬ ಕೃತಿ ಬಿಡುಗಡೆಮಾಡಿತು. ಈ ಪುಸ್ತಕವು ಭಾರತದ ಚುನಾವಣಾ ಇತಿಹಾಸವನ್ನು ಮತ್ತು ಹತ್ತೊಂಬತ್ತನೇ ಶತಮಾನದಿಂದ ಇಪ್ಪತ್ತೊಂದನೇ ಶತಮಾನದವರೆಗೆ ವಿಕಸನಗೊಂಡಂತೆ ಭಾರತದಲ್ಲಿ ಪ್ರಾತಿನಿಧಿಕ ಮತ್ತು ಚುನಾವಣಾ ತತ್ವಗಳ ಬೆಳವಣಿಗೆಯನ್ನು ವಿವರಿಸುತ್ತದೆ. ಈ ಪುಸ್ತಕವು ಚುನಾವಣೆಗಳನ್ನು ಜನಾದೇಶವನ್ನು ವಾಸ್ತವವಾಗಿ ಪ್ರತಿಬಿಂಬಿಸುವ ಭಾರತದ ಚುನಾವಣಾ ಆಯೋಗದ ನಿರಂತರ ಪ್ರಯತ್ನಗಳ ಮೇಲೆ ಕೇಂದ್ರೀಕರಿಸುತ್ತದೆ.

ಮತ್ತೊಂದು ಪ್ರಕಟಣೆ 'ಮತ ಚಲಾಯಿಸಲು ಪ್ರತಿಜ್ಞೆ ಮಾಡುವುದು - ಭಾರತದಲ್ಲಿ ರಾಷ್ಟ್ರೀಯ ಮತದಾರರ ದಿನದ ದಶಕದ ಪಯಣ' ಸಹ ಬಿಡುಗಡೆ ಮಾಡಲಾಯಿತು. ಈ ಪುಸ್ತಕವು ವಜ್ರ ಮಹೋತ್ಸವ ಆಚರಣೆಯಿಂದ ಇಸಿಐ ರಾಷ್ಟ್ರೀಯ ಮತದಾರರ ದಿನದ ಆಚರಣೆಯ ಪಯಣವನ್ನು ಪ್ರಸ್ತುತಪಡಿಸುತ್ತದೆ. ಈ ಸಂದರ್ಭವನ್ನು ಮುಖ್ಯ ಅತಿಥಿಗಳಾಗಿ  ಗಣ್ಯರು ಮಾಡಿದ ಭಾಷಣಗಳು, ಮುಖ್ಯ ಚುನಾವಣಾ ಆಯುಕ್ತರ ಭಾಷಣಗಳು, ಸಂದೇಶಗಳು, ಕಾರ್ಯಕ್ರಮ ಪೂರ್ವ ವರದಿಗಳು, ಪತ್ರಿಕಾ ಟಿಪ್ಪಣಿ ಮತ್ತು ರಾಷ್ಟ್ರೀಯ ಪ್ರಶಸ್ತಿ ವಿಜೇತರ ಭಾಷಣಗಳು ಇದರಲ್ಲಿ ಸೇರಿವೆ. ಇ-ಪುಸ್ತಕದ ಲಿಂಕ್: https://eci.gov.in/files/file/13976-pledging-to-vote-a-decadal-journey-of-the-national-voters%E2%80%99-day-in-india/

2022ರ ವಿಧಾನಸಭಾ ಚುನಾವಣೆಗಳಿಗೆ ಸೃಜನಶೀಲ ಅಭಿವ್ಯಕ್ತಿಯ ಮೂಲಕ ಪ್ರತಿ ಮತದ ಮಹತ್ವವನ್ನು ಪುನರುಚ್ಚರಿಸಲು ರಾಷ್ಟ್ರೀಯ ಮತದಾರರ ಜಾಗೃತಿ ಸ್ಪರ್ಧೆ- 'ನನ್ನ ಮತ ನನ್ನ ಭವಿಷ್ಯ- ಒಂದು ಮತದ ಶಕ್ತಿ' ಎಂಬ ಸ್ಪರ್ಧೆಯನ್ನು ಸಹ ಪ್ರಾರಂಭಿಸಲಾಯಿತು. ಹಾಡು, ಘೋಷಣೆ, ರಸಪ್ರಶ್ನೆ, ವೀಡಿಯೊ ನಿರ್ಮಾಣ ಮತ್ತು ಬಿತ್ತಿಪತ್ರ ವಿನ್ಯಾಸದಂತಹ ಹಲವಾರು ವಿಭಾಗಗಳೊಂದಿಗೆ, ಸ್ಪರ್ಧೆಯು ಎಲ್ಲರಿಗೂ ಮುಕ್ತವಾಗಿರುತ್ತದೆ ಮತ್ತು ಸ್ಪರ್ಧಿಗಳು 15 ಮಾರ್ಚ್ 2022 ರವರೆಗೆ ತಮ್ಮ ಪ್ರವೇಶಗಳನ್ನು ಕಳುಹಿಸಲು ಸಾಧ್ಯವಿರುತ್ತದೆ. ವಿಜೇತರಿಗೆ ರೋಮಾಂಚಕ ನಗದು ಬಹುಮಾನಗಳು ಮತ್ತು ಪ್ರಮಾಣಪತ್ರಗಳನ್ನು ನೀಡಲಾಗುವುದು. ಹೆಚ್ಚಿನ ಮಾಹಿತಿಗಾಗಿ, ಭೇಟಿ ನೀಡಿ: https://ecisveep.nic.in/contest/

ಆಯೋಗದ ವಿವಿಧ ಉಪಕ್ರಮಗಳ ಕುರಿತ ಬಹು ಮಾಧ್ಯಮ ಪ್ರದರ್ಶನವನ್ನು ಸಹ ಸಮಾರಂಭದಲ್ಲಿ ಪ್ರದರ್ಶಿಸಲಾಯಿತು. ಈ ಪ್ರದರ್ಶನವು ಇತ್ತೀಚಿನ ಚುನಾವಣಾ ಸುಧಾರಣೆಗಳು, ಇವಿಎಂ-ವಿವಿಪ್ಯಾಟ್ ಕುರಿತ ಮಾಹಿತಿ, ಅಂತಾರಾಷ್ಟ್ರೀಯ ಅನುಭವಗಳು, ಜ್ಞಾನಹಂಚಿಕೆ  ಮತ್ತು ಚುನಾವಣೆಗಳನ್ನು ಹೆಚ್ಚು ಸಮಗ್ರ, ಪ್ರವೇಶಾರ್ಹ, ಪಾಲ್ಗೊಳ್ಳುವ ಮತ್ತು ಕೋವಿಡ್ ಸುರಕ್ಷತೆಗಾಗಿ ಕೈಗೊಂಡ ಇಸಿಐನ ಉಪಕ್ರಮಗಳನ್ನು ಪ್ರದರ್ಶಿಸಿತು. ಮಾಹಿತಿಯುತ ಮತ್ತು ಜಾಗರೂಕ ಮತದಾರನಿಗೆ ಕೆವೈಸಿ ಆ್ಯಪ್, ಸಿ-ವಿಜಿಲ್ ಆ್ಯಪ್ ಮುಂತಾದ ವಿವಿಧ ಐಟಿ ಉಪಕ್ರಮಗಳನ್ನು ಸಹ ಪ್ರದರ್ಶಿಸಲಾಯಿತು. 

ಸಮಾರಂಭದಲ್ಲಿ, ದೆಹಲಿಯಿಂದ ಹೊಸದಾಗಿ ಸೇರ್ಪಡೆಗೊಂಡ ಐದು ಮತದಾರರನ್ನು ಸನ್ಮಾನಿಸಲಾಯಿತು ಮತ್ತು ಅವರ ಭಾವಚಿತ್ರ ಸಹಿತ ಮತದಾರರ ಗುರುತಿನ ಚೀಟಿಯನ್ನು (ಎಪಿಕ್) ಹಸ್ತಾಂತರಿಸಲಾಯಿತು.

1950ರಲ್ಲಿ ಈ ದಿನದಂದು ಸ್ಥಾಪನೆಯಾದ ಭಾರತದ ಚುನಾವಣಾ ಆಯೋಗದ ಸ್ಥಾಪನಾ ದಿನದ ಅಂಗವಾಗಿ 2011 ರಿಂದ ಪ್ರತಿ ವರ್ಷ ಜನವರಿ 25 ರಂದು ದೇಶಾದ್ಯಂತ ರಾಷ್ಟ್ರೀಯ ಮತದಾರರ ದಿನವನ್ನು ಆಚರಿಸಲಾಗುತ್ತಿದೆ. ಪ್ರಜಾಪ್ರಭುತ್ವದಲ್ಲಿ ಪ್ರತಿ ಮತದ ಪ್ರಾಮುಖ್ಯವನ್ನು ಎತ್ತಿ ತೋರಿಸುವುದಾಗಿದೆ; ಹೊಸ ಮತದಾರರ ದಾಖಲಾತಿಯನ್ನು ಪ್ರೋತ್ಸಾಹಿಸಿ, ಸುಗಮಗೊಳಿಸಿ  ಮತ್ತು ಗರಿಷ್ಠಗೊಳಿಸುವ  ಮತ್ತು ಮತದಾರರ ಪಾಲ್ಗೊಳ್ಳುವಿಕೆಯನ್ನು ಹೆಚ್ಚಿಸುವುದು ರಾಷ್ಟ್ರೀಯ ಮತದಾರ ದಿನದ ಆಚರಣೆಯ ಮುಖ್ಯ ಉದ್ದೇಶವಾಗಿದೆ.

***