নহারোল অমসুং শান্ন-খোৎনবগী মন্ত্রালয়
প্রধান মন্ত্রী শ্রী নরেন্দ্র মোদীনা হয়েং ভর্চুএলগী খুত্থাংদা ২৫শুবা নেস্নেল য়ুথ ফেস্তিবেল হৌদোক্কনি
নেস্নেল য়ুথ ফেস্তিবেলনা নেস্নেল ইন্তিগ্রেসনবু মপাঙ্গল হাপ্পদা নত্তনা নহাশিংগী মরক্তা জাত-বিজাত খায়দনা নুংশী চান্ননা লৈমিন্নবগী ইথিল অমসু শন্দোকই
Posted On:
11 JAN 2022 4:08PM by PIB Imphal
মরু ওইবা ৱাফমশিং:
- য়ুথ এফিয়র্স বিভাগকী সেক্রেতরীনা ভর্চুএলগী খুত্থাংদা ২৫শুবা নেস্নেল য়ুথ ফেস্তিবেলগী মতাংদা মীদিয়াদা ৱাফম থমখ্রে
প্রধান মন্ত্রী শ্রী নরেন্দ্র মোদীনা জনুৱারী ১২, ২০২২গী অয়ুক্কী পুং ১১ তাবা মতমদা পুদুচেরীদা পাংথোক্কদবা ২৫শুবা নেস্নেল য়ুথ ফেস্তিবেলবু ভর্চুএল কনফরেন্সিংগী খুত্থাংদা হৌদোক্কনি। জনুৱারী ১২ অসি শক্নাইরবা ফিলোজোফর অমসুং থিঙ্কর, স্বামী বিবেকানন্দগী মপোক কুমওন তাবগা লোয়ননা চহি খুদিংগী ওইনা লৈবাক্কী নহারোলশিংগী নুমিৎ হায়না পালন তৌই। ঐখোয়না স্বামী বিবেকানন্দগী মপোক কুমওন পাংথোকপগা লোয়ননা, মহাক্কী পাউতাক অমসুং মহাক্না নহাশিংদা থম্বা থাজশিংবু মতম্না পুরকপা অহোংবগা লোয়ননা ভারত্তা হৌজিক ফাওবা তাবা অমসুং উবা ফংলি। নেস্নেল য়ুথ ফেস্তিবেল ২০২২গী মতাংদা মীদিয়াদা ভর্চুএলগী খুত্থাংদা ৱাফম থম্লদুনা, য়ুথ এফিয়র্সকী সেক্রেতরী, শ্রীমতি উশা শর্মনা ফেস্তিবেল অসিনা ভারতকী নহাশিংগী ৱাখলগী মওং-মতৌ শেমদুনা লৈবাক শেমগৎ-শাগৎপগী অপুনবা পাঙ্গল অমা ওইহন্নবা পান্দম থম্লি হায়না ফোংদোকখি।
শ্রীমতি উশা শর্মনা হায়খিবদা হৌজিক ওইরক্লিবা কোবিদ-১৯গী ফিভম অসি য়েংলদুনা হন্দক্কী চহিসিগী ওইনদি ফেস্তিবেল অসি জনুৱারী ১২-১৩, ২০২২দা ভর্চুএলগী খুত্থাংদা পাংথোক্নবা লেপখি হায়খি। থৌরম হৌদোক্লবা মতুংদা ঐখোয়গী পাক চাউরবা লম্মিৎ-তুম্মিৎকী অশেংবা মতিক্কী কান্নবা লৌবা ঙমহন্নবা নহাশিংবু লৈবাক শেম্বগী থবক পাংথোকহন্নীংবগী ইথিল ফাওহনবা, অমত্তা ওইহনবা অমসুং মথৌ পাংথোকহনবগী পান্দমগা লোয়নবা নেস্নেল য়ুথ সম্মিৎনা তুং ইনগনি। নহাশিংনা সম্মিৎ অসিগী মনুংদা তোঙানবা হীরম কয়া অমগা লোয়ননা অকোয়বগী ফিভম, অইং-অশা হোংবগী শিংনবা, এস.দি.জি.না পুরকপা গ্রোথ, তেক্নোলোজী, ওন্তোপ্রিনর্শিপ অমসুং ইন্নোভেসন, ইরমদমগী অমসুং অরিবা লৌশিং, লৈবাক্কী মওং-মতৌ (লিচৎ-শাজৎ), লৈবাক শেমগৎপগী থৌওংগী মতাংদা মশাগী ৱাখল্লোন ফোংদোকপগী খুদোংচাবা ফংগনি। “ফেস্তিবেল অসিদা শরুক য়ারিবশিংনা মসিগী মনুংদা ওরোভিল শক্তম, পুদুচেরীগী ইম্মর্সিব সিতী এক্সপেরিএন্স, লৈবাক খুদিংগী মফম-মফমগী নাৎকী মশান্না অমসুং ফোল্ক দান্সনচিংবা কয়াগী থৌওং উবা ফংগনি। ফেস্তিবেল অসিগী অতোপ্পা থৌওংশিংগী মনুংদা লাইব ম্যুজিকেল পর্ফোরমেন্স, ওরোভিল অমসুং ওর্ত ওফ লিবিংগী ইন্সত্রক্তরশিংনা উৎপা ইন্তররেক্তিব য়োগ সেসন্সু য়াওগনি”, হায়না য়ুথ এফিয়র্স সেক্রেতরীনা মখা তানা ফোংদোকখি।
সেক্রেতরীনা ভর্চুএল ফেস্তিবেল অসিদা লৈবাক শিনবা থুংবগী মশিং য়াম্বা মীয়াম্না শরুক য়াবগী ফিভম উবা ফংগনি হায়না ফোংদোকখি। শ্রীমতি শর্মনা নেস্নেল য়ুথ ফেস্তিবেল অসি অসিগুম্বা থৌরমশিংগী মরক্তা খ্বাইদগী চাউবা থৌরম অমনি অমসুং য়ুথ এফিয়র্স অমসুং স্পোর্ত মন্ত্রালয়না লৈবাক্কী নহাশিংবু অমত্তা ওইনা পুরক্তুনা তোঙানবা হীরমশিংদা লৈরিবা মখোয়গী হৈ-শিংববু উৎথোকপা ঙম্নবা খুদোংচাবা পীনবা হোৎনবগী প্লেৎফোর্ম অমা পীবগী পান্দমগা লোয়ননা ফেস্তিবেল অসি পাংথোক্তুনা লাক্লি হায়না পাউদমখি। ঐখোয়না লৈবাক্কী নীংতম্বগী চহি ৭৫ শুরকপগী নীংতম্বগী অমৃত মহোৎসব পাংথোক্লিবা অসিদা নহাশিং অসি লৈবাক্কী মীশিংগী খ্বাইদগী মরু ওইবা অমসুং মতিক লৈবা কাঙলুপ অমনি হায়বা নীংশিংবসু য়াম্না মরু ওই হায়না শ্রীমতি শর্মনা মখা তাখি। নেস্নেল য়ুথ ফেস্তিবেলনা নেস্নেল ইন্তিগ্রেসনবু মপাঙ্গল হাপ্পদা নত্তনা নহাশিংগী মরক্তা জাত-বিজাত খায়দনা নুংশী চান্ননা লৈমিন্নবগী ইথিল অমসু শন্দোকই। “ফেস্তিবেল অসিনা অপিকপা ভারত অমা শেমগত্তুনা নহাশিংনা ফোর্মেল অমসুং ইনফোর্মেল ওইবা অকোয়বগী ফিভম অমদা মখোয়গী খুন্নাই অমসুং নাৎকী তোপ-তোপ্পা মগুনগী মতাংদা খন্ন-নৈনবা অমসুং ৱাখল্লোন লান্নবগী এরেনা অমসু পীরি। অসিগুম্বা তোঙান-তোঙানবা সোসিও-কলচরেলগী থৌওংশিংগী অপুনবা অকোয়বগী ফিভম অমা লৈবসিনা এক ভারত, শ্রেস্থ ভারত শেম্লিবনি”, হায়না সেক্রেতরীনা মখা তাখি।
শ্রী ঔরোবিন্দো অমসুং মহাকবী সুব্রমনিয়া ভারতীনা ভারতকী নীংতম ইহৌদা তেংবাংলম্বা অমসুং মখোয়না মখোয়গী লিতরেচরগী থবকশিংগী খুত্থাংদা লৈবাক মীয়ামগী মরক্তা নেস্নেলিজমগী ইথিল অমা মায় পাক্না লৈহল্লম্বগী থৌওংবু ইকায় খুম্নবা উৎপা ওইনা ২৫শুবা নেস্নেল য়ুথ ফেস্তিবেল অসি শ্রী ঔরোবিন্দো অমসুং মহাকবী সুব্রমনিয়া ভারতী অনিমক্কী ৱাখল্লোন্না থৌজাল্লবা পুদুচেরীদা পাংথোক্লিবনি। প্রধান মন্ত্রীনা থৌরম অসিগী মনুংদা “মেরে সপনো কা ভারত” অমসুং “ভারতকী নীংতম ইহৌগী শকখঙবীদ্রবা অথৌবশিং”গী মতাংদা খনগৎলবা এসেশিং লান্থোক্কনি। মসিগী এসেশিং অসি হায়রিবা হীরম অনিসিগী মতাংদা নহা লাখ ১ হেনবনা থাজিল্লকপশিংদগী খনগৎপনি।
পি.এম.না পাংথোক্কদবা থৌরম হৌদোকপগী অকুপ্পা মরোলগীদমক্তা মসিদা ক্লিক তৌবীয়ু
https://pib.gov.in/PressReleasePage.aspx?PRID=1788871
******
(Release ID: 1789187)
Visitor Counter : 202