প্রধানমন্ত্রীগী লোইশঙ
প্রধান মন্ত্রীনা কানপুর মেত্রো প্রোজেক্ত শঙ্গাবদা থমখিবা ৱারোল
Posted On:
28 DEC 2021 5:07PM by PIB Imphal
ভারত ইমানা য়াইফরে! ভারত ইমানা য়াইফরে! উত্তর প্রদেশকী মীয়াম্না পাম্নরবা মুখ্য মন্ত্রী, য়োগী অদিত্যনাথজী, কেন্দ্রগী মন্ত্রী মন্দলগী ঐহাক্কী মরুপ, হর্দীপ সিংহ পুরি, মফমসিগী হান্নগী মুখ্য মন্ত্রী, শ্রী কেশব প্রাসদ মোর্য়াজী, সাধবী নিরঞ্জন জ্যোতীজী, ভানুপ্রতাপ বর্মাজী, য়ু.পি.গী সরকারগী মন্ত্রী, শ্রী সতিশ মহানাজী, নিলীমা কতিয়ারজী, রনবেন্দ্র প্রতাপজী, লখন সিংহজী, অজিৎ পালজী, লেংবিরক্লিবা এম.পি. অমসুং এম.এল.এ.শিং, মীয়ামগী অতোপ্পা মীহুৎশিং অমসুং ঐহাক্কী নুংশিরবা মরুপ, ইচিল ইনাওশিং! ঋশি মুনিশিংগী লাইনীংফম, নিংতম ইহৌগী লান্মী অমসুং য়াওল্লোইশিংদা ইথিল পীবিবা, নিংতম্বা ভারতকী ইন্দস্ত্রীগী মপাঙ্গল হাপ্লিবা কানপুরবু ঐহাক্না খুরুমজরি। দীন দয়াল উপাধ্যায়, অতল বিহারী ভাজপায় অমসুং সুন্দর সিংহ ভন্দারীগুম্বা মিৎয়েং শাল্লবা লুচিংবশিংবু শেম্বীখিবদা অচৌবা থৌদাং লৌবীখিবা অসি কানপুর শহর অসিননি। অদুগা ঙসি অসি কানপুর খক্তনা হরাও নুংঙাইবা নত্তে, বরুন দেবতাজীবুসু হরাও নুংঙাইবা অসিদা শরুক য়ানীংলিবনি।
মরুপশিং,
কানপুরগী মীয়ামগী হৈনবী অমসুং অপাম্বা, কানপুরিয়া মওং, মখোয়গী মবুক-মপাও ফবা অসিগা চাংদম্ননীংঙাই অমত্তা লৈতে। থগগুগী লদুসিদা করি ইরিবগে? হোইনে, থগগুগী লদুসিদা করি ইরিবগে? থোইদোকপা করিমত্তা লৈতে, থোইদোকপা করিমত্তা লৈতে, অদোম্না হায়দুনা লাক্লিবশিং অদুমক তৌবীয়ু। অদুগা ঐহাক্না হায়নীংবা অমা লৈ, অদুগা ঐহাকপু হায়জৌ হায়রগদি, মীওই খুদিংনা নুংশিবা অমসুং ওইজবা ফংবা অসি কানপুরখক্তদনি। মরুপশিং, ঐহাক্কী লুপকী থবক্কীদমক্তা অদোমগী মরক্তা লাক্কদবা লৈরবদি ঐহাক্না ৱাফম অমা তোয়না তাবা ফংজৈ। ঝরে রহো কলত্তর গঞ্জ !!! ঝরে রহো কলত্তর গঞ্জ !!! হৌজিক্কী চারোন-শুরোন্না কাওখ্রে হায়না অদোম্নদি হায়রি।
মরুপশিং,
ঙসি অসি লৈবাকপোকপা নুমিৎনি অমসুং পঙ্কি ৱালে হনুমাঞ্জিগী থৌজালদগী য়ু.পি.গী চাউখৎ-থৌরাংদা অনৌবা তাঙ্কক অমা ঙসিদগী হৌনা হাপ্লবনি। ঙসিদি, কানপুরনা মেত্রো কন্নেক্তিবিতী ফংলে। লোয়ন-লোয়ননা, বিনা রাফাইনরীসু ঙসিদগী কানপুরগা শম্নরে। মসিদগী কানপুরগা লোয়ননা য়ু.পি.গী জিলা কয়া অমনা পেত্রোলিয়ম প্রদক্তশিং ঙসিদগী অমসুং লায়না ফংলগনি। প্রোজেক্ত অনি অসিগীদমক্তা অদোম খুদিং অমসুং উত্তর প্রদেশ পুম্বদা থাগৎচরি। ঐহাক্না অদোমগী মরক্তা লাক্ত্রিঙৈদা আই.আই.তি. কানপুরদা ঐহাক্কী থৌরম অমা য়াওখি। ঐহাক্না কানপুরগী মীয়াম্না মেত্রো ইহান হান্না তোংদুনা চৎপদা নুংঙাইবা ফাওবদু উজনীংখি। অদুনা ঐহাক্না মেত্রোদা ওইনা লাক্কে হায়না লেপখি। মসি ঐহাক্কী য়াম্না নীংশিংনিংঙাই ওইরবা থৌদোক অমা ওইরগনি।
মরুপশিং,
মমাংগী মতমদা য়ু.পি.গী সরকার পায়রম্বশিংনা মতমগী মরু ওইবা খঙলমদ্রে। ২১শুবা চহি-চাগী মতমসিদা য়ু.পি.না খোঙজেল য়াঙনা চাউখৎপগী খোঙচৎ চৎলমগদবা, মদুগী তাঙলবা মতমদু মখোয়না মাঙহল্লম্লে। মখোয়না মরু ওইনা খনবশিংদা য়ু.পি.না চাউখৎপসি য়াওরমদ্রে, মখোয়না য়ু.পি.গী মীয়ামদা মরু ওইবা অমত্তা পীরমদ্রে। উত্তর প্রদেশকী ঙসিগী দবল ইঞ্জিন সরকার অসিনা মমাংদা মাঙখ্রবা মতম মেনখৎনবা হোৎনরি। মখোয়না শরুক অনি হেন্না য়াঙবা খোঙজেলদা থবক পায়খৎলি। য়ু.পি.দা ঙসিদি খ্বাইদগী চাউবা ইন্তর্নেস্নেল এয়রপোর্ত শারি। ঙসিদি, লৈবাক্কী খ্বাইদগী শাংবা এক্সপ্রেসৱে য়ু.পি.দা শারি। ঙসিদি, লৈবাক্কী খ্বাইদগী অহানবা রেপিদ ত্রাঞ্জিৎ সীস্তেম য়ু.পি.দা শারি। দেদিকেতেদ ফ্রৈত কোরিদোরগী হবসু উত্তর প্রদেশনা ওইরগনি। আইন্না য়াদবা খুৎলায় পায়বশিংগীদমক্তা শকখঙনরম্বা য়ু.পি. অসি ঙসিদি অসি লৈবাকপু ঙাক-শেন্নবা অমসুং তেক্ত-কায়হন্দনবা দিফেন্স কোরিদোর ওইনবা শেম্লি। মরুপশিং, মরম অদুনা য়ু.পি. মীয়াম্না “খেন্নবসি ময়েক শেংলে” হায়রিবনি। খেন্নবা অসি স্কিম অমসুং প্রোজেক্তখক্তমক্কী নত্তে, থবক থৌবগী থৌওংদনি। দবল ইঞ্জিন সরকারনা হৌদোকখিবা থবকশিংবু লোইশিন্নবগীদমক্তা ঐখোয়না অহিং-নুংথিল নাইদনা হোৎনৈ। কানপুর মেত্রো হৌদোকপগী থবক অসি ঐখোয়গী সরকারনা হৌদোকখি, অদুগা ঐখোয়গী সরকারমক্না শঙ্গারিবসিনি। ঐখোয়গী সরকারনা পুর্বাঞ্চল এক্সপ্রেসৱেগী উরেপ উয়ুং তমখি, ঐখোয়না সরকারনা মসিগী থবক লোইশিনখি। দিল্লী-মীরৎ এক্সপ্রেসৱে উরেপ উয়ুং ঐখোয়গী সরকারনা তমখি, অদুগা মসিবু লোইশিন্দুনা মীয়ামদা শিন্নবগী থবকসু ঐখোয়গী সরকারনা পাংথোকখি। ঐহাক্না অদোমগী মফমদা অসিগুম্বা প্রোজেক্ত কয়াগী মমিং হায়বা ঙমগনি। নোংপোক ওইরো, নোংচুপ ওইরো, নত্ত্রগা ঐখোয়গী মফম, য়ু.পি. অসি ওইরো, ঐখোয়না প্রোজেক্ত খুদিংমক মতম চানা লোইশিন্নবা কন্না হোৎনরি। মসি য়াম্না মরু ওইবগী মরমদি, প্রোজেক্ত অমনা মতম চানা লোইশিনবা মতমদা লৈবাক্কী শেল অচুম্বা মওংদা শিজিন্নগনি অমসুং মসিনা লৈবাক্কী মীয়ামদা কান্নবা য়াম্না পীগনি। ঐঙোন্দা অদোম্না অমুক্তা হায়বীয়ু, কানপুরনা ত্রাফিক জামগী মতাংদা চহি কয়াদগী খুদোংচাদবা কয়া থেংনদুনা লাক্লি। মসিনা মরম ওইরগা অদোমগী মতম কয়া অমা মাঙখ্রে, শেল কয়া অমা তিংখ্রে। অদুগা, ঙসি অহানবা ফেজকী কিমি. ৯গী লাইন চেনবা হৌবসিনা হায়রিবা খুদোংচাদবা কয়া অমা মাঙখিবগী অহানবা খোঙথাং থাংলবনি। কোরোনানা থোকহনবা শিংনবা কয়া অমা লৈজরবসু, সেক্সন অসি চহি ২গী মনুংদা থবক হৌবা অসি মশানা য়াম্না শিংথানীংঙাই ওইরবা ৱাফম্নি।
মরুপশিং,
নিংতম্লবা মতুং, দিকেদ কয়া ফাওবদা ঐখোয়গী লৈবাক্কী ৱাখল্লোন অমা লৈরম্মি। অনৌবা থবক খুদিংমক অফবা ওইগনি, অদুগা মদু অচৌবা শহর ৪-৫দা ওইগনি। লৈবাক্কী মেত্রো শহর নত্তবা শহরশিংদি মখোয়গী হান্নগী ফিভমদা অদুমক থাদোক্তুনা থম্বীরে। হায়রিবা শহরসিদা লৈরিবা মীওইশিংগী মপাঙ্গল য়াম্না লৈ, মখোয়দসু খুদোংচাবা ফংহনবসি য়াম্না মরু ওই, মসি মমাংগী সরকার পায়রম্বশিংনা খঙবা ঙমখিদ্রে। শহরশিং অসিগী অনিঙবা-অপাম্বা, শহরসিদা লৈরিবা মীওইশিংগী অপাম্বশিংবু মমাংগী সরকারদা লৈরম্বা মীওইশিংনা অমুক্তা ফাওবা খনবীরমদে। খৎনবা হৌগদবগী ঙাইরিবা মীওইশিং অসিদা চাউখৎপা পুরক্কে হায়বগী ৱাখল কৈদৌনুংদা লৈখিদে। ঐখোয়গী সরকারনা হৌজিক্তি লৈবাক্কী অসিগুম্লবা শহরশিং চাউখৎহন্নবা অহেনবা মিৎয়েং চঙলি। শহরশিং অসিগী কন্নেক্তিবিতী ফগৎহন্নবা, মহৈ তম্বগী অফবা ইন্সতিত্যুসন লৈহন্নবা, মৈগী অৱাবা লৈহন্দনবা, ঈশিংগী অৱাৎপা লৈহন্দনবা, সিৱেজ সীস্তেম্বু মতমগা চুনবা ওইহন্নবা, ময়াম অসিদা ঐখোয়না থবক চত্থরি। অদুগা, ঐহাক্না মেত্রোগী ৱারী শারবসু, ঙসি কানপুর মেত্রোগী অহানবা তাঙ্কক শঙ্গারিবা অসিনি। আগ্রা অমসুং মেরথ মেত্রোগী থবকসু য়াম্না কন্না চত্থরি। অতোপ্পা শহরশিংদা মেত্রো লৈহনবগী মতাংদসু খন্নরি। লখনৌ, নোইদা অমসুং ঘাজিয়াবাদ মেত্রোসু লেপ্তনা পাকথোক চাউথোক্লি। য়ু.পি. মেত্রোদা পায়খৎলিবা থবক্কী খোঙজেল অসিদি য়াম্না শিংথানীংঙাইনি।
মরুপশিং,
ঐহাক মশিং খরা হায়গে। মসিদা মুন্না তাশিনবীয়ু। ৱাখল চঙনা তাবীগনিকো? হায়জরগে, তাবীয়ু। উত্তর প্রদেশতা চেল্লম্বা মেত্রোগী অশাংবা অসি ইং ২০১৪গী মমাংদা শুপ্নগী কিমি. ৯খক ওইরম্মি। মেত্রোগী অশাংবনা ইং ২০১৪দগী ২০১৭ ফাওবদা অপুনবা কিমি. ১৮ হেনগৎখি। করিগুম্বা ঐখোয়না ঙসি শঙ্গারিবা কানপুর মেত্রোগী অশাঙবসি ঙসি তিন্সিল্লবদি, উত্তর প্রদেশকী মেত্রো লম্বীগী অশাঙবনা হৌজিক্তি কিমি. ৯০ হেল্লে। মমাংগে সরকারনা করম্না থবক তৌরম্মি, অদুগা ঙসিগী য়োগীজীগী সরকারনা করম্না থবক তৌই। খেন্নবা অসি ময়েক শেংলবরা?
মরুপশিং,
ইং ২০১৪গী মমাংদা, লৈবাক পুম্বগী ওইনা শুপ্নগী শহর ৫খক্তা মেত্রো লৈরম্মি। হায়বদি, মেত্রো রেল অসি মেত্রো শহর কৌনবা শহর খক্তদা লৈরম্মি হায়বনি। ঙসিদি, য়ু.পি.গী শহর ৫দা মেত্রো লৈরে। ঙসিদি লৈবাক্কী শহর ২৭তা মেত্রো চেলহন্নবা থবক চত্থরি। মেত্রো শহর খক্তদা লৈরম্বা মেত্রোগী খুদোংচাবশিংবু শহরশিং অসিদা লৈরিবা লাইরবা, মিদ্দল ক্লাস ইমুংশিংদা ফংহল্লি। শহর মচাগী লাইরবশিংগী পুন্সিগী থাক ৱাংখৎনবা ঐখোয়না থবকশিং অসি হোৎনরিবনি, মসিনা মরম ওইরগা তাইয়র ২, তাইয়র ৩ শহরগী নহাশিংগী মশাদা থাজবগী চাং হেনগৎহল্লি। য়ু.পি.দা দবল ইঞ্জিন সরকার লৈরবা তুংদা হীরম অসি য়াঙনা চাউখৎলক্লি।
মরুপশিং,
লৈবাক নত্ত্রগা রাজ্য অমা হেক্তা ওইরো, চাউখৎপগী খল মান্নদনা কৈদৌনুংদা মখা তানা চত্থবা য়ারোই। ঐখোয়গী লৈবাক অসিদা দিকেদ কয়াদগী মফম শরুক অমা চাউখৎপা মতমদা, অমনা অদুম লৈহৌবগী থৌওং লৈদুনা লাক্লি। রাজ্য অমসুং খুন্নাইগী থাক্তা অসিগুম্বা খেন্নবা লৈহন্দবা হায়বসি য়াম্না মরু ওই। মরম অদুনা, ঐখোয়গী সরকারনা সবকা সাথ, সবকা বিকাসকী মন্ত্রদা থবক পায়খৎলিবনি। খুন্নাইগী কাঙলুপ খুদিং, দলিত, শোত্থরবা, মনুং-হঞ্জিনবা, ত্রাইবেল খুদিংদা ঐখোয়গী সরকারগী স্কিমগী কান্নবা চপ মান্ননা ফংহল্লি। ঐখোয়না মখোয়গুম্বা হান্না য়েংবীরমদ্রবা অমসুং করি ৱাৎলি হায়বা হ্ণগবীরমদ্রবা মীওইশিংদা অহেনবা মিৎয়েং চঙলি।
মরুপশিং,
শহরদা লৈবা লাইরবশিংবু মমাংগী সরকারনা উশিন্নরমদে। ঙসিদি, মখোয়গুম্বা শহরগী লাইরবশিংগীদমক্তা ঐখোয়গী সরকারনা অহানবা ওইনা থম্মোই শেংনা থবক তৌরি। ঐহাক খুদম অমা পীজগে। ইং ২০১৭কী চহি ১০গী মমাংগী মতমশিংদা, য়ু.পি.গী শহরগী লাইরবশিংগীদমক্তা শুপ্নগী পক্কা য়ুম লাখ অনি মখায়খক শাবা ঙমখি। য়ু.পি. সরকারনা হৌখিবা চহি মরি মখায়দা মীওইশিং অসিগীদমক্তা য়ুম লাখ ১৭ হেন্না শাবগী অয়াবা পীখি। মসিগী মনুংদা, য়ুম লাখ ৯গা লিশিং ৫০ শাবা লোইরে অমসুং লেমহৌরিবশিংসু য়াম্না কন্না শাবগী থবক চত্থরি।
ইচিল ইনাওশিং,
ঐখোয়গী খুঙ্গংশিংদগী মরুপ কয়া অমা শহরদা থবক তৌবা চৎনৈ। মখোয়শিং অসিদগী অয়াম্বা মীওইনা শহরদা লম্বীদা পোৎ য়োনবা, থেলা চিংবগী থবক তৌদুনা পুন্সি লেন্নৈ। ঐখোয়গী সরকারনা ঙসিদি অহানবা ওইনা মখোয়গীদমক্তা মীচঙ চঙলি। মখোয়দা বেঙ্কতগী লোন লায়না ফংহল্লি, মখোয়দা দিজিতেল ত্রাঞ্জেক্সন তৌহন্নবগীদমক্তা ঐখোয়গী সরকারনা থবক কয়া অমা পায়খৎলি। কানপুরদা লৈবা লম্বীদা পোৎ য়োনবা কয়া অমনা পি.এম. স্বনিধী য়োজনাগী কান্নবা ফংলে। য়ু.পি.দা স্বনিধী য়োজনাগী খুত্থাংদা অসিগুম্বা মরুপ লাখ ৭ হেনবগী মফমদা লুপা করোর ৭০০ হেন্না পীখ্রবনি।
ইচিল ইনাওশিং,
লৈবাক মীয়ামগী অপাম্বা খঙবা, মখোয়গী সেবা তৌবা অসি ঐখোয় খুদিংগী ইথৌনি। য়ু.পি.গী দবল ইঞ্জিন সরকার অসিনা রাজ্যগী তঙাই ফদবশিংবু খঙদুনা মশক থোকপা থবক কয়া পাংথোক্লি। উত্তর প্রদেশকী ইমুং করোর কয়াদা তোতি পাইপ্তগী ঈশিং য়ৌরমদে। ঙসিদি, ঐখোয়না হর ঘর জল মিসনগী খুত্থাংদা য়ু.পি.গী য়ুম্থোং খুদিংদা অশেংবা ঈশিং য়ৌহনবগী থবক চত্থরি। লাইচৎ মনুং অসিদসু, সরকারনা রাজ্যসিগী নাগ্রিক করোর ১৫ হেনবদা লেম্না রেসন পীখি।
মরুপশিং,
মমাংগী সরকার পায়রম্বশিংনা চহি ৫গী লোত্তরী ফাওবগী ৱাখল্লোনগা লোয়ননা থবক তৌরম্মি, ঙম্লিবমখৈ য়ু.পি.দগী লৌহৌরো, হুরানহৌরো খন্নরম্মি। য়ু.পি.দা হৌদোকখিবা প্রোজেক্ত কয়াদগী মখোয়না করোর লিশিং কয়া হৈনথোকপগী মতাংদা অদোম্না লোয়না উরবদুনি। মখোয়শিং অসিনা য়ু.পি.গীদমক্তা অচৌবা পান্দম থমদুনা অমসুং মিৎয়েং শান্না কৈদৌনুংদা থবক তৌখিদে। মখোয়না য়ু.পি.গী মীয়ামদা পাউখুম পীগদবনি হায়বসি কৈদৌনুংদা খনখিদে। ঙসিদি, দবল ইঞ্জিন সরকার অসিনা থম্মোই শেংনা, মীয়াম্না থাজহন্নবা হোৎনদুনা য়ু.পি.বু চাউখৎপগী অনৌবা অমসুং অৱাংবা থাক্তা পুনবা থবক পায়খৎলি। দবল ইঞ্জিন সরকার অসিনা অচৌবা পান্দম থমদুনা করম্না ফংবা ঙমগনি হায়বা খঙই। য়ু.পি.দা মৈ ফংবগী মতাংদগী মৈখু থাদোকপা হন্থবা ফাওবগী মতাংদা অসুক য়াম্না অহোংবা লাক্কনি হায়বসি কনানবু খনবগে? মৈ মুৎলিবা করিগীনো হায়বা মখোয়শিংনা কৈদৌনুংদা খনখীদে। মতম শাংনা মৈ মুৎকদবনি হায়না মখোয়না খল্লি। থংনবগীসু মৈ মুৎপরা মুত্তবরা য়েংবতদা মখোয়গী অপেনবা ওইরম্মি।
মরুপশিং,
সিসামাউগুম্বা গঙ্গাদা চেন্থবা চাউরবা অমসুং ঈরৈ কনবা নালা অসি নোংমদি থিংখিগনি হায়বা কনানা খল্লুবগে? অদুবু, ঐখোয়গী দবল ইঞ্জিন সরকারনা মসি পাংথোকখি। বি.পি.সি.এল.গী পঙ্কি কানপুর দীপোগী কেপাসিতীবু শরুক ৪ হেন্না হনগৎহনবদগী কানপুরদা কান্নবা য়াম্না ফংলগনি
ইচিল ইনাওশিং,
কন্নেক্তিবিতী অমসুং কম্ম্যুনিকেসনগা মরী লৈনবা ইনফ্রাস্ত্রকচরগা লোয়ননা গ্যাস অমসুং পেত্রোলিয়ম পাইপলাইন ইনফ্রাস্ত্রকচরদা থবক পায়খৎলিবশিং অসিদগী য়ু.পি.দা কান্নবা য়াম্না ফংগনি। লৈবাক অসিদা ইং ২০১৪দা এল.পি.জি. কন্নেক্সন শুপ্নগী করোর ১৪খক লৈরম্মি। হৌজিক্তি, মসিগী মশিংনা করোর ৩০ হেল্লে। উত্তর প্রদেশ খক্তদা, ইমুং করোর ১.৬০দা অনৌবা এল.পি.জি. কন্নেক্সন পীখি। পাইপ গ্যাস কন্নেক্সনসু মমাংগী চহি ৭তা শরুক ৯গী চাংদা হেনগৎখি। মমাংগী চহিশিংদা পেত্রোলিয়ম নেতৱর্কপু হান্না তৌখিদ্রিবা মওংদা পাকথোক-চাউথোকখিবদগী হায়রিবা খুদোংচাবশিং অসি ওইথোকপা ঙম্লিবনি। বিনা পঙ্কি মলতিপ্রদক্ত পাইপলাইন্না মসিগী নেতৱর্ক অসিবু হেন্না মপাঙ্গল লৈহনগনি। কানপুরগা লোয়ননা য়ু.পি.গী জিলা কয়া অমনা হৌজিক্তি পেত্রোল-দিজলগুম্বা পোত্থোকশিংগীদমক্তা বিনা পঙ্কি রিফাইনরীদগী লাকপা ত্রকশিংগী মখা পোল্লরোই। মসিনা য়ু.পি.গী চাউখৎপগী ইঞ্জিন্না অরেপ্পা লৈতনা শক্তি অমসুং পাঙ্গল ফংলগনি।
মরুপশিং,
রাজ্য অমদা ইনভেস্তমেন্ত তৌনবগীদমক্তা আইনগী কাংলোন নীংথিজনা লৈবনা ইন্দস্ত্রীশিংনা চাউখৎপা ঙমগনি। য়ু.পি.দা লৈরম্বা মমাংগী সরকারনা মাফিয়া কলচরগী অচৌবা উপাল থারম্বনা মদুগী উরুমদা ইন্দস্ত্রী খুদিংমক মাঙ-তাক্নখি। হৌজিক্তি য়োগিজীগী সরকারনা লো অমসুং ওর্দর অমুক্কা হন্না পুরক্লে। মরম অদুনা হৌজিক্তি য়ু.পি.দা ইনভেস্তমেন্ত চঙলকপসু হেনগৎলে অমসুং অরানবা তৌবশিংসু মখোয়গী বেলশিং মশা মথন্তনা ককলকপদগী জেলদা অমুক চঙনখ্রে। দবল ইঞ্জিন সরকার অসিনা হৌজিক ইন্দস্ত্রী কলচরবু য়ু.পি.দা অমুক হন্না খুমাং চাউশিনহল্লগনি। মফমসিদা, হায়বদি কানপুরদা, মেগা লেদর ক্লস্তরগী অয়াবা পীখ্রে। মফমসিগী নহাশিংগী স্কিল হেনগৎহন্নবগীদমক্তা ফজলগঞ্জতা তেক্নোলোজী সেন্তর অমসু লিংখৎখ্রে। দিফেন্স কোরিদোর ওইরো, নত্ত্রগা জিলা অমা, পোত্থোক অমগী স্কিম ওইরো, ঐখোয়গী কানপুরগী ওন্তোপ্রিনর্শিংনা মসিদগী কান্নবা কয়া অমা ফংলি।
মরুপশিং,
কেন্দ্র সরকারগী মাইকৈদগীসু পুন্সি মহিং লাইথোকহন্নবা থবক লেপ্তনা পায়খৎলি। অনৌবা য়ুনিৎকী কোর্পোরেত তেক্সতা ১৫% ফাওবা হন্থবা, জি.এস.তি. রেত হন্থবা, কান্নদবা আইন কয়া মুত্থৎপা, ফেসলেস এসেসমেন্ত তৌবা, অসি হীরম অসিদা পায়খৎখিবা খোঙথাং কয়া অমনি। অনৌবা লম কয়া চাউখৎহন্নবগীদমক্তা সরকারনা প্রদক্সন লিঙ্ক ইন্সেন্তিব পীবসু হৌখ্রে। ঐখোয়গী কার্বার তৌবা মরুপশিংদা অপনবা-অয়েৎপা কয়া পীরম্বা কম্পেনী লোগী কাঙলোন কয়া অমসু সরকারনা দি-ক্রিমিনেলাইজ তৌখ্রে।
ইচিল ইনাওশিং,
শেনিমৎলোনগী থৌশিল-থৌরাংনা শেঞ্জা থুমজা ওইবা, খুৎকন-পাঙ্গনবশিংবু য়োকখৎপা পার্তীশিং অসিনা উত্তর প্রদেশপু চাউখৎহনবা ঙম্লোই। মরম অদুনা, খুন্নাইগী মপাঙ্গল কনখৎহনবা থবকশিংদা মখোয়না খোঙ্কাপ খুদিংগী নুংঙাইতবা থেংনৈ। অদুনা, নুপীবু থাক মান্ননা পুখৎপগী থবকশিংদা ফাওবা মখোয়না য়েৎলিবনি। তলাক অহুমগী মাইয়োক্তা লৈবা অকনবা আইন পুরকপা ওইরো, নত্ত্রগা নুপা অমসুং নুপীগী লুহোংবগী চহি মান্নহনবা ওইরো, মখোয়না য়েত্তুনদা লাক্লি। হোই, মখোয়না য়োগিজীগী থবকশিং উবদা ঐখোয়না মসি তৌরম্বনি, মদু হৌদোক্লম্বনি হায়না তোয়না হাই। অদুগা, নুমিৎ খরনিগী মমাংদা শেলগী বোক্স কয়া কয়া ফাগৎখ্রিবা অদুসু মখোয়না তৌরম্বনি হায়গদৌরিবরা হায়না ঐহাক্না খল্লম্লিবনি।
মরুপশিং,
অদোম কানপুরগী মীওইশিংদি কারবার নীংথিনা খঙবা ঙাক্তনি। ইং ২০১৭কী মমাংদা মখোয়না য়ু.পি.বু শেঞ্জা-থুমজানা থনহল্লম্লিবা অদু হৌজিক্তি মপান থোরক্তুনা মীয়াম খুদিংনা খঙনরে। হৌজিক্তি মখোয় মচিন খুম্মগা ফমখ্রে, ক্রেদিৎ লৌনবা চোংথোরক্ত্রে। লৈবাক মীয়াম্না উখ্রিবা শেল মপৈ অদু মখোয়গী থবক্নি, মখোয়গী অশেংবা মশক্নি। য়ু.পি.গী মীয়াম্না পুম্নমক উরি, খঙলি। মরম অদুনা মখোয়না য়ু.পি.বু চাউখৎহনবশিংগী মাইকৈদা লেপ্লি, য়ু.পি.বু অনৌবা অৱাংবা থাক্তা পুখৎপশিংগীদমক্তা লেপ্লি। ইচিল ইনাওশিং, ঙসি, অসুক য়াম্না চাউরবা খুদোলপোৎপু অদোমগী মফমদা শিন্নবা মতমদা য়াম্না তোঙানবা হরাওবা অমা ফাওই, ঙসি ওইরিবা মওং, ঙসিগী কাওররোইদবা মিৎকুপ অসিদা ঐহাক্না খ্বাই পুম্নমকপু থাগৎপা ফোংদোক্লি। য়াম্না থাগৎচরি!!! ভারত ইমানা য়াইফরে, ভারত ইমানা য়াইফরে!!! মীয়াম্বু অমুক্কা অদুক্কী মতিক থাগৎচরি।
***
(Release ID: 1785937)
Visitor Counter : 144
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam