কেন্দ্রগী হকশেল সেক্রেতরী, শ্রী রাজেশ ভুশন্না সভাপতি ওইদুনা ঙসি রাজ্যশিং অমসুং য়ু.তি.শিংগা লোইননা চহি ১৫-১৮গী কাংলুপকীদমক্তা ভেক্সিনেশন কাপ্পগী থবকশিং অমসুং অশোনবা কাংলুপশিং; হেল্থকেয়র ৱার্করশিং (ঐচ.সি.দবল্যু.), ফ্রন্তলাইন ৱার্করশিং (এফ.এল.দবল্যু.), অমসুং কোমোর্বিদিতী লৈবা চহি ৬০গী মথক্কী কাংলুপশিংগীদমক্তা প্রেকোশনরী ওইবা অহুমশুবা দোজশিং কাপ্পগী মতাংদা ৱার্কশোপ অমা ভীদিও কনফরেন্স (ভি.সি.)গী খুত্থাংদা পাংথোকখি।

প্রধান মন্ত্রী, শ্রী নরেন্দ্র মোদীনা ২০২১গী দিসেম্বর ২৫দা লাওথোকখিবা অদুগী মতুং ইন্না চহি কাংলুপ ১৫-১৮ ফাওবা ভেক্সিনেশন তৌবগী  থবক অদু ২০২২গী জনুৱারিগী ৩, নিংথৌকাবা নুমিত্তগী হৌরগনি অদুগা অশোনবা কাংলুপশিংগীদমক্তা ওইবা প্রেকোশনরী ওইবা অহুমশুবা দোজ কাপ্পগী থবক্না ২০২২গী জনুৱারী ১০ নিংথৌকাবা নুমিত্তগী হৌরগনি। মসিগী মতাংদা ওইবা অকুপ্পা গাইদলাইনশিং অদু ২০২১গী দিসেম্বর ২৭তা,  হকশেল অমসুং য়াইফ য়ুম্বাল মন্ত্রালয়না থাদোকখ্রে।

চহি কাংলুপ ১৫-১৮ ফাওবগী ভেক্সিনেশন তৌবগী মতাংদা, কেন্দ্রগী হকশেলগী সেক্রেতরীনা রাজ্যশিং/য়ু.তি.শিংদা খঙহল্লকখ্রে মদুদি হায়রিবা মীশিংগী কাংলুপ অসিদা ‘কোভেক্সিন’ খক্তমক কাপকদনি অমসুং রাজ্যশিং অমসুং য়ু.তি.শিংদা ‘কোভেক্সিন’গী অহেনবা দোজশিং থারক্লগনি হায়না খঙহল্লকখ্রে। কেন্দ্র সরকারনা লাক্কদবা নুমিৎ খরনি অসিদা রাজ্যশিং অমসুং য়ু.তি.শিংদা ‘কোভেক্সিন’ সপ্লাই তৌবগী মতম অদু খঙহল্লগনি। হিদাক অসি কাপ্পা য়াবা বেনিফিসরীশিংনা ২০২২গী জানুৱারীগি ১দগী কোৱিনদা মশানা রেজিস্তর তৌবা নত্রগা জনুৱারিগী ৩দগী ভেক্সিনেশন তৌবা হৌরবা মতমদা চংদুনা রেজিস্ত্রশন তৌবগী খুদোংচাবা লৈগনি। মসিগী কাংলুপ অসিদা ২০০৭দা পোকপা নত্রগা মসিগী মমাংদা পোকপশিংনা ভেক্সিনেশন অসি তৌবা অয়াবা লৈগনি।

ভেক্সিনেশনগী মতাংদা থম্লিবা প্রোতোকোলশিং অদু চহি ১৫-১৮গী কাংলুপশিংনা ঙাক্না চৎকনি; বেনিফিসরীশিংনা পুংখাই অমা ঙাইদুনা লৈগনি, মতম অসিদা মখোয়শিং অদু এ.ই.এফ.আই.গীদমক্তা মোনিতর তৌগনি অমসুং মখোয়শিং অদু নুমিৎ ২৮গী মতুংদা খক্তমক অনিশুবা দোজ কাপ্পা য়াগনি। রাজ্যশিংদা কোবিদ ভেক্সিনেশন সেন্তর (সি.ভি.সি.)শিং খরা চহি কাংলুপ ১৫-১৮ ফাওবা খক্তগী ওইবা সি.ভি.সি.শিং ওইনা ধম্নবগী মতাংদসু খঙহনখ্রে, হায়রিবা অসি কো-ৱিনদসু উবা ফংগনি। অকক্নবা সি.ভি.সি.শিং অসিনা ভেক্সিনশিং কাপ্পা মতমদা চয়েৎনবা লৈহল্লোই। চই ১৫-১৮গী কাংলুপশিং অসি খ্ক্তা নত্তানা অতোপ্পা অএনবা কাংলুপশিংদসু ভেক্সিন কাপকদৌরিবা সি.ভি.সি.শিংনা চহি ১৫-১৮ ফাওবগী কাংলুপকীদমক্তা তোঙানবা ক্যুশিং অমসুং তোঙানবা ভেক্সিনেশন তীমশিং থম্নবা রাজ্যশিংদা খঙহল্লকখ্রে। সি.ভি.সি. অমদা তোঙান-তোঙানবা ভেক্সিনেশন তীমশিং থমগদবনি হায়না রাজ্যশিংদা খঙহল্লকখ্রে, ভেক্সিনশিং অদু চুম্না কাপ্পাদা চয়েৎনবা লৈতনবা হায়রিবা তীমশিং অসিদা তীম অমনা চহি ১৫-১৮ ফাওবগী কাংলুপকীনি অমসুং অতোপ্পা অমনা অহলশিংগীদমক্তনি।

প্রেকোসনরী দোজ অসি কাপথোকপগী মতাংদা কেন্দ্রগী হকশেলগী সেক্রেতরীনা অহানবা দোজ কাপ্লবা মতুং থা ৯ (চয়োল ৩৯) ফারবা মতুংদা বেনিফিসরী অমনা অনিশুবা দোজ অসি কাপ্পা য়াগনি হায়না অমুক্কসু পনখি। তোঙান-তোঙানবা মীদিয়া হাউসশিংনা সি.ভি.সি.দা কোমোর্বোদিতী উৎনবগীদমক দোক্তরগী সার্তিফিকেত চংগনি হায়বগী অরানবা পাউ অমা শন্দোকপগী মরমদসু মহাক্না পুক্নিং চিংশিল্লদুনা মহাক্না হায়খি মদুদি, কেন্দ্র সরকারনা করিগুম্বা মওংগী দাইরেক্সন অমত্তা  পীখিবা লৈতে অমসুং প্রেকোসনরি দোজ অসি কাপ্পা মতমদা সি.ভি.সি.দা দোক্তরগী প্রেস্ক্রিপশন নত্রগা সর্তিফিকেত অমত্তা মথৌ তাদে হায়নসু মহাক্না খংহনখ্রে। মহাক্না হায়খি কোৱিন এপনা প্রেকোসনরি দোজ অসি লৌবা য়াবা মীওই পুম্নমক্তা রিমাইন্দর মেসেজ অমা থারক্কনি অমসুং প্রেকোসনরী দোজ অসি লৌরে হায়না দিজিতেল ভেক্সিনেশন সর্তফিকেত্তসু উৎলক্কনি।

রাজ্য অমসুং য়ু.তি.শিংদা চহি ১৫-১৮ ফাওবগী কাংলুপকীদমক্তা ভেক্সিন কাপকদৌরিবা মীওইশিং অমসুং ভেক্সিনেসনগী তীম মেম্বরশিংবু নিংথিনা ওরিয়েন্তেসন পীনবা অমসুং চহি ১৫-১৮ ফাওবগী কাংলুপকী ভেক্সিনেশন তৌনবগীদমক্তা ওইবা ভেক্সিন কাপ্নবা মফমশিং অদু খঙদোক্নবা পাউতাক পীরকখ্রে। রাজ্যশিংদা কোভেক্সিন কাপকদৌরিবা মফমশিংদা মাংজৌননা মতিকচাবা থৌরাংশিং লৌখৎনবসু তকশিল্লকখ্রে। ভেক্সিন কাপ্পা মতমদা ভেক্সিন য়ানশিন্নদনবা, তোঙানবা সি.ভি.সি.শিং, ভেক্সিন কাপ্নবা তোঙানবা মফমশিং, তোঙানবা ক্যুশিং (করিগুম্বা মফম অমত্তদা অহলশিংগা ভেক্সিন অসি কাপ্পা তারবদি) অমসুং তোঙান-তোঙানবা ভেক্সিনেসন তীম শেমগদবনি। রাজ্য অমসুং য়ু.তি.শিংদা জিলা জিলাগী মতুং ইন্না কো-ৱিন এপ শিজন্নদুনা বেনিফিসরীশিংগী মশিংগী মতুং ইন্না চংগদৌরিবা ভেক্সিন দোজকী মশিংসু খংহল্লক্নবা হায়খ্রে। অসুম্না তৌবগী মরমদি চহি ১৫-১৮ ফাওবগী কাংলুপকী ভেক্সিন কাপ্পগী মফম অমসুং মতম মীচমদা খংহন্নবনি। রাজ্যশিংদা বেনিফিসরীশিং অসিগী ওক্নবা ভেক্সিন পীথরক্কনি।

মীফম অসিদা হায়রিবা রাজ্য অমসুং য়ু.তি.শিং অসিগী প্রিন্সিপাল সেক্রেতরী (হেল্থ), এদিশনেল চীফ সেক্রেতরী (হেল্থ) অমসুং স্তেত সর্বিলেন্স ওফিসরগা লোইননা দা. মনোহর অগনানি, অদিশনেল সেক্রেতরী (হেল্থ), শ্রী বিসাল চৌহান, জোইন্ত সেক্রেতরী (হেল্থ)সু শরুক য়াখি।

*****