প্রধানমন্ত্রীগী লোইশঙ
azadi ka amrit mahotsav

প্রধান মন্ত্রীনা উত্তর প্রদেশকী উমরাহা গ্রামদা লৈবা স্বরভেদ মহামন্দির ধামদা সদগুরু সদাফালদেও ভিহঙ্গম য়োগ সনস্থানগী ৯৮শুবা কুমওন পাংথোকপগী থৌরমদা শরুক য়াখ্রে


“ঐহাক্না গীতা জয়ন্তীগী থৌরমসিদা ভগবান কৃষ্ণগী খুয়াখাদা কোক নোঞ্জদুনা লৈবাক মীয়ামদা থম্মোই শেংনা য়াইফ পাউজেল পীজরি”

“ঐহাক্না সদগুরু সদাফালদেওজীগী স্পিরিচুএল ওইবা মগুন চেনবসিদা কোক নোঞ্জরি”

“ঐখোয়গী লৈবাক্কী খুদোংচাদবা মতম লাকপা খুদিংদা মতমগী খোঙজেলদা অহোংবা পুরক্নবগীদমক্তা শাধু খরা অদুমক থোক্লকই। মালেম্না নিংতম্বগী খ্বাইদগী অথৌববু মহাত্মা হায়না কৌনরিবা অসি ভারতকীনি”

“ঐখোয়না বনারস চাউখৎপগী ৱারী শাবা মতমদা, মসিনা ভারত পুম্বা চাউখৎপগী লম্বী অমসু য়াৎলি”

“অরিবা বনারসপু তেক্ত-খায়দুনা থম্বগা লোয়ননা অনৌববু তরাম্না ওকপা থৌওংনা ভারত্তা অনৌবা মাইকৈ অমা পীরি”

“লৈবাক্কী লোকেলগী কারবার, থবক পীবগী থৌওং অমসুং পোত্থোকশিংনা অনৌবা পাঙ্গল লৈনরক্লি অমসুং লোকেল অসি গ্লোবেল ওইরক্লি”

Posted On: 14 DEC 2021 4:50PM by PIB Imphal

প্রধান মন্ত্রী, শ্রী নরেন্দ্র মোদীনা উত্তর প্রদেশকী উমরাহা গ্রামদা লৈবা স্বরভেদ মহামন্দির ধামদা সদগুরু সদাফালদেও ভিহঙ্গম য়োগ সনস্থানগী ৯৮শুবা কুমওন পাংথোকপগী মীয়ামগী থৌরমদা শরুক য়াখ্রে।

প্রধান মন্ত্রীনা মীতিন অসিদা ৱা ঙাংবদা কাশিদা ঙরাংগী নুমিত্তা মহাদেবকী খুয়াখাদা চাউরবা “ভিশ্বনাথ ধাম”বু মীয়ামদা খুৎশিন্নবগী থৌওংবু নীংশিংখি। মহাক্না হায়খি, “কাশিগী শক্তি অসি মতম কুইনদগী লৈরক্লবা অমা ওইবতা নত্তনা মসিনা অনৌবা শক্তম লৌবগী মওংসু লেপ্ত্রি”। মহাক্না গীতা জয়ন্তীগী য়াইফরবা পুংফম অসিদা ভগবান কৃষ্ণগী খুয়াখাদা কোক নোঞ্জখি। “কুরুক্ষেত্রগী লানফমদা লান্মীশিংনা অমগা অমগা থেংনখিবা ঙসিগী নুমিৎ অসিদা মীওইবা খুন্নাইনা য়োগ, স্পিরিচুএলিতী অমসুং পরামর্থকী খ্বাইদগী মতিক-মগুন লৈরবা লৌশিং ফংজখি। ঐহাক্না গীতা জয়ন্তীগী নুমিৎ অসিদা ভগবান কৃষ্ণগী খুয়াখাদা কোক নোঞ্জদুনা লৈবাক মীয়ামদা থম্মোই শেংনা য়াইফ পাউজেল পীজরি”, হায়না প্রধান মন্ত্রীনা ফোংদোকখি।

প্রধান মন্ত্রীনা সদগুরু সদাফালদেওজীগী মফমদা ইকায় খুম্নবা উৎখি। “ঐহাক্না মহাক্কী স্পিরিচুএল ওইবা মগুন চেনবসিদা কোক নোঞ্জরি। ঐহাক্না শ্রী স্বতন্ত্রদেভজী অমসুং মহারাজ অমদি শ্রী বিগ্যান্দেভজী মহারাজপু চৎনবী অসিবু হিংদুনা থম্বীবগা লোয়ননা অনৌবা মাইকৈ অমসু পীবীবগীদমক্তা ইকায় খুম্না উৎচরি”, হায়না প্রধান মন্ত্রীনা ফোংদোকখি। প্রধান মন্ত্রীনা মহাক্না ইংতম ইহৌদা তেংবাংখিববু নীংশিংখি অমসুং ভারতনা লুরবা মতমদা শাধু পুথোকপগী তৌবা ঙম্বগী মতিকপুসু নীংশিংখি। “ঐখোয়গী লৈবাক্কী খুদোংচাদবা মতম লাকপা খুদিংদা মতমগী খোঙজেলদা অহোংবা পুরক্নবগীদমক্তা শাধু খরা অদুমক থোক্লকই। মালেম্না নিংতম্বগী খ্বাইদগী অথৌববু মহাত্মা হায়না কৌনরিবা অসি ভারতকীনি”, হায়না মহাক্না মখা তাখি।

প্রধান মন্ত্রীনা কাশিগী মতিক-মগুন অমসুং মরু ওইবগী মতাংদা শন্দোক্না পাউদমখি। মহাক্না হায়খিবদা  বনারসকুম্বা শহরশিংনা লুরবা তাঞ্জা ফাওবদা ভারতকী আর্ত, ওন্তোপ্রিনর্শিপকী শক্তাক্কী হৌরকফমবু নীংথিনা ঙাক শেন্দুনা থমখি হায়খি। “মরু অমা লৈবা মতমদা, মদুদগী উজাও হৌরকই। মরম অদুনা, ঐখোয়না ঙসি বনারসকী চাউখৎপগী ৱারী শাবা মতমদা, মসিনা ভারত পুম্বা চাউখৎপগী লম্বী অমসু য়াৎলিবনি”, হায়না মহাক্না মখা তাখি।

নুমিৎ নিনিগী কাশি খোঙচত্তা লৈরিবা প্রধান মন্ত্রীনা ঙরাং অহিংদা শহরসিদা পায়খৎলিবা চাউখৎ-থৌরাংগী মরু ওইবা থবক কয়া য়েংশিনখি। বনারসকী চাউখৎ-থৌরাংগী পায়খৎলিবা থবকশিংদা মহাক্না লেপ্তনা য়ারিবা মরু ওইবা থৌদাংশিংগী মতাংদা মহাক্না মীয়ামদা অমুক হন্না নীংশিংহনখি। “ঐহাক্না খুদোংচাবা হেক ফংবগা, ঙরাং অহিংগী পুং ১২গী মতুংদা, ঐহাক্কী কাশিদা পাংথোক্লিবা অমসুং পাংথোকপা লোইখ্রবা থবক-থৌরমশিং য়েংশিনবা চৎখি”, হায়না মহাক্না হায়খি। গরোলিয়াগী মফমদা মশক ফজহনবগী পাংথোক্লিবা থবকশিং অসি পুক্নিং শুমহৎপা মওং অমা ওইরক্লে হায়না মহাক্না হায়খি। “ঐহাক্না মফমদুগী মীয়াম কয়া অমগা ৱারী শাখি। ঐহাক্না মন্দুৱাদিদা লৈবা বনারস রেলৱে স্তেসন্সু য়েংলে। স্তেসন অসি য়াম্না নীংথিজনা শেমদোক্লম্লে। অরিবা বনারসপু তেক্ত-খায়দুনা থম্বগা লোয়ননা অনৌববু তরাম্না ওকপা থৌওংনা ভারত্তা অনৌবা মাইকৈ অমা পীরি”, হায়না প্রধান মন্ত্রীনা ফোংদোকখি।

সদগুরুনা নিংতম ইহৌগী মনুংদা পীরম্বা স্বদেশিগী মন্ত্রবু নীংশিংলদুনা, লৈবাক অসিনা “মরোমদোম লেপচবা ঙম্বা ভারত ওইহন্নবা খোঙথাং” পায়খৎপা হৌরে হায়না প্রধান মন্ত্রীনা ঙসি মান্নবা ইথিলগা লোয়ননা হায়খি। “ঙসিদি, লৈবাক্কী লোকেলগী কারবার, থবক পীবগী থৌওং অমসুং পোত্থোকশিংনা অনৌবা পাঙ্গল লৈনরক্লি অমসুং লোকেল অসি গ্লোবেল ওইরক্লি”, হায়না মহাক্না মখা তাখি।

প্রধান মন্ত্রীনা মহাক্কী ৱাফমদা ‘সবকা প্রয়াস’কী ইথিলগা লোয়ননা চৎলদুনা মীয়াম্নসু মান্নবা ৱারেপ অসি লৌমিন্নরসি হায়না ফোংদোকখি। মসিগী ৱারেপ অসিদি সদগুরুজীগী ৱারেপশিংবু মপুং ফাহনবা ঙম্বা ওইগদবনি অমসুং মসিদা লৈবাক্কী অপাম্বশিংসু মনুং চলহনগদবনি হায়না মহাক্না হায়খি। ৱারেপশিং অসিদি পাংথোকপগী খোঙজেল থুনবা অমসুং মথংগী চহি অনিগী মনুংদা অমত্তা ওইনা মঙফাওনবা ঙমহন্নবা শাফু পীগদবা অমা ওইবা য়াই। প্রধান মন্ত্রীনা হায়খিবদা, অহানবা ৱারেপ অসিদি ইচানুপীশিংবু মহৈ তম্বীদুনা মখোয়গী মরক্তা স্কিল লৈহনবগী ওইগদবনি। “মশাগী ইমুং-মনুংগা লোয়ননা, খুন্নাইদা থৌদাং লৌবা ঙমগদবা মীওইশিংনা লাইরবা ইচানুপী অমা নত্ত্রগা অনিগী স্কিল লৈহনবগী থৌদাংসু লৌগদবনি”, হায়না মহাক্না তকশিনখি। মহাক্না হায়খিবদা, অতোপ্পা ৱারেপ অসিনা ঈশিং মাঙহন্দনবগী ওইবা য়াই। “ঐখোয়না ঐখোয়গী তুরেল, গঙ্গাজী অমসুং ঈশিং থোকফম খুদিংমক লু-নান্না থমগদবনি”, হায়না প্রধান মন্ত্রীনা লোইশিনখি।

*****



(Release ID: 1781446) Visitor Counter : 90