কর্নাতকাদা অনৌবা রি-হেব (রিদুসিং ইলিফেন্ত-হ্যুমেন এত্তেক য়ুজিং বীজ) প্রোজেক্ত মায় পাক্না লিংখৎখ্রবা মতুংদা খাদী অমসুং ভিলেজ ইন্দস্ত্রীজ কমিসন (কে.ভি.আই.সি.)না হৌজিক প্রোজেক্ত অসি আসমদা অমুক হন্না পাংথোকখ্রে। কে.ভি.আই.সি.গী চেয়রমেন শ্রী বিনই কুমার সক্সেননানা ইরাই নুমিৎতা শামু অমদি-মীওইবগা য়াম্না কন্না চয়েৎনরিবা আসমগী গ্বালপারা দিস্ত্রীক্তকী মোর্নোই খুঙ্গংদা রি-হেব প্রোজেক্ত হৌদোকখ্রে। প্রোজেক্ত অসি আসমদা মফম অদুগী ওইবা ফোরেস্ত দিপার্তমেন্তনা মতেং পীদুনা হৌখিবনি। শুক্লবা উমংনা কোইশিল্লিবা, আসমগী চাউরবা মফম অসিদা শামুনা লান্দারকপনা মরম ওইরদুনা ২০১৪ অমসুং ২০১৯ অনিগী মরমক্তা মীওই ৩৩২ রোমগী পুন্সি মাংখি।        

রি-হেব প্রোজেক্তকী মখাদা, শামুশিংনা মীওইবনা লৈরিবা লৈফমশিংদা মখোয়না চংলকপা থিংনবা খোই উপুশিং খিন্দুনা “বী-ফেন্সেস”শিং শেম্লী। উপুশিং অসিদা থৌরি অমা তিংলি হায়রিবা অসিনা শামুশিংনা মফম অসিদা চংলকপদা, থেংলুবা অমসুং চিংলুবা মতমদা খোই শঙ্গু অমা পাইথোরক্তুনা শামুশিং অসিবু মখা তানা চংহনবা ঙমহন্দে। হায়রিবা অসিনা শাশিং অসিদা অশোকপা অমত্তা য়াওহন্দনা শেল তিংদনা শা-অমসুং মীওইবগী মরক্তা লৈরিবা চয়েৎনবা অসি হনথহনবনি। শামুশিং অসি খোইদা য়াম্না তাথি হায়না সাইন্তিফিক ওইবা রেকোর্দ লৈরি। শামুশিংনা মখোয়গী মনাতোনগী য়াম্না থোৎপা মফম অমসুং মমিৎতা চিক্লক্কনি হায়বগী অকিবসু লৈজৈ। খোই শঙ্গুনা ঙংবা তাবা হৈনদবা মরম্না মখোয়না হন্দুনা চৎখিনবগী মচা অমা ওইহল্লি।    

শামুশিং তান্নবা মোর্নোই অমসুং দাহিকাতা খুঙ্গংদা চয়োল অমগী মনুংদা খোই থন্না য়াওরবা উপু ৩৩০ থম্লগনি। হায়রিবা খোই উপু অসি লৌমী ৩৩দা পীখ্রে অমসুং শামুনা শোকহল্লবা খুঙ্গং অসিগী ইমুংশিংগী নহাশিংদা তাকপি-তম্বিখ্রে। খুঙ্গং অসিদা চহি অমদা থা ৯দগীনা ১০ ফাওবা নুমিৎ খুদিংগী ওইনা শামুনা মহৈ মরোং মাংহনবগী রিপোর্ত লৈরি। হৌখিবা চহি কয়া অমদগী মফম অসিদা শামুনা খুঙ্গং অসিদা শামুনা থোকহনবা অকাই অতোই কয়ানা মখোয়গী লৌফমদা লৌ উদনা লাক্লি। খুঙ্গংশিং অসিদা শামুনা য়াম্না পাম্বা ফৌ, লিতচী  অমসুং থৈবোং মরাং কাইনা হৌরি। খোইনা শামুদা পীবা শাফু অমসুং মখোয়গী মওং মতৌ য়েংনবা মফম খরদা হায় রিজোলুসন, নুমিদাংগী ভিজন কেমরাসু খিল্লি।  

কে.ভি.আই.সি.গী চেয়রমেন হায়খি রি-হেব প্রোজেক্ত অসিনা আসমদা য়াম্না তোইনা থোক্লিবা মীওইবা শামু মরক্তা লৈরিবা চয়েৎনবা অসিগী লেঙদ্রবা পাম্বৈ অমগী খুদম ওইরগনি। “রি-হেব প্রোজেক্ত অসি কর্নাতকাদা য়াম্না চাউনা মায় পাক্লি অমসুং মসি আসমদা হেন্না ফবা তেক্নোলোজী অমগা লোয়ননা হৌদোকপনি। ঐহাক্না চাউনা আসা থম্লি মদুদি প্রোজেক্ত অসিনা লাক্কদৌরিবা থা খর অসিদা শামুনা লান্দারকপা অসি লাকশিনবা ঙম্লগনি অমসং খুঞ্জাশিংনা মখোয়গী ফার্মদা হন্না চৎতুনা লৌ উবা য়ারগনী। মসিগী মথক্তা কে.ভি.আই.সি.না মখোয়দা য়েন্থোক্লিবা খোই উপু অসিনা লৌমীশিংনা খোইহী লোক্তুনা অহেনবা ইনকম তানবা ঙম্লগনি।    

মরুওইনা, রি-হেব প্রোজেক্ত অসি কে.ভি.আই.সি.গী নেস্নেল হনী মিসনগী সব-মিসন অমনি। হনী মিসন অসিনা খোইহী মশিং, খোইহী পুথোকপা অমসুং বীকিপরশিংগী ইনকম হেনগৎননবা ওইবনা  রি-হেব প্রোজেক্তনা শামুগী লান্দারকপা থেংননবা ওইনা খোই উপুনা শম্বল ওইনা শিজিন্নবনি।   

ভারত্তা চাওরাক্না মীওই ৫০০রোম শামুনা লান্দারকপনা মরম ওইদুনা মপুন্সি মাংলি। হায়রিবা অসি লৈবাক অসিদা কৈনা হাৎপদগী চাওরাক্না শরুক ১০ লোম হেল্লি। ২০১৫দগী ২০২০ফাওবদা, চাওরাক্না মীওই ২৫০০ রোম শামুনা মরম ওইদুনা মপুন্সি মাংখ্রে। মসিগী ওন্নবদা, চাওরাক্না শরুক মঙাগী মনুংদা অমা হায়বদি চাওরাক্না শামু ৫০০ রোম হৌখিবা চহি মঙা অসিদা হন্দুনা হাৎখি। 

মমাংদা, শামু তান্নবা সরকারনা কোম তৌদুনা অমসুং শম্বল খাদুনা লুপা কোতি কয়া অমা চাদিং তৌখি। অমসুং মসিদা পুন্সি মাংখ্রবশিংগী কম্পেন্সেসন পীননবা লুপা কোতি চাম্মা চাদিং তৌখি। মসিগী কোম অমসুং য়োৎলি তারাশিং অসিনা শামু মচা কয়া অমা অশি-অনা থোকহন্দুনা ৱাখল্লোন অসি অরেম্বদা তাখি।

****