নমস্কার!

অদোম খুদিংগী মফমদা নবরাত্রী কুমহৈগী য়াইফ-পাউজেল পীজরি! ঙসিগী থৌরমসিদা ঐহাক্কা লোয়ননা শরুক য়ামিন্নরিবা গৃহ মন্ত্রী, শ্রী অমিত শাহজী, নেস্নেল হ্যুমেন রাইৎস কম্মিসনগী চেয়র্পর্সন, জস্তিস শ্রী অরুন কুমার মিশ্রাজী, হোম এফিয়র্সকী কেন্দ্রগী রাজ্য মন্ত্রী, শ্রী নিত্যানন্দ রাইজী, নেস্নেল হ্যুমেন রাইৎস কম্মিসনগী ইকায়খুম্নরবা মেম্বরশিং, স্তেত হ্যুমেন রাইৎস কম্মিসনশিংগী চেয়রপর্সন, সুপ্রীম কোর্তকী ইকায় খুম্নরবা জজশিং, য়ু.এন. এজেন্সীগী মেম্বর, মীহুৎ, সিভিল সোসাইতীশিংগা মরী লৈনবা মরুপশিং, অতোপ্পা মীথুংলেনশিং অমসুং ইচিল ইনাওশিং!!!

নেস্নেল হ্যুমেন রাইৎস কম্মিসনগী ২৮শুবা ফাউন্দেসন দেদা মীয়াম খুদিংদা ঐহাক্না থাগৎপা ফোংদোকচরি। ঐখোয়গী লৈবাক্না নীংতম্বা ফংবগী ‘অমৃত মহোৎশব’ পাংথোকপা মতমদা ঙসিগী থৌরম অসি পাংথোক্লি। ঐখোয়গী নীং-তম ইহৌ, ঐখোয়গী পুৱারী ভারতকী মীওইবগী হক অমসুং মসিগী ভেল্যুদা অচৌবা ইথিল পীরি। ঐখোয়না চহি কয়াদগী ঐখোয়গী হক্কীদমক্তা হোৎনদুনা লাক্লি। ঐখোয়না লৈবাক অমা অমসুং খুন্নাই অমা ওইনা মান্নদবা মিৎয়েং য়েংবগী মাইয়োক্তা লান্থেংনদুনা লাক্লি। মালেমগী অহানবা লাঞ্জাওনা পৃথীবিবু অৱাবা তাহনবা মতমদগী ভারতনা ‘হক অমসুং অহিংশা’গী লম্বীদা চৎসি হায়বগী ৱাফম হৌদোকখি। ঐখোয়গী নুংশিজরবা বাপুবু মীওইবগী হক অমসুং মসিগী ভেল্যুগী ভারত খক্তগী নত্তনা মালেমগী খুদম অমনি হায়না উনরি। ঐখোয়না অমৃত মহোৎশবকী খুত্থাংদা মহাক্কী ৱাখল্লোন অমসুং ভেল্যুগী থাক য়ৌনা হিংবা ঙমনবা ৱাশক লৌরিবসি তসেংনা ঐখোয়গী লাইবক ফবনি। অসিগুম্লবা ভারতকী মরু ওইরবা ৱারেপ্পু নেস্নেল হ্যুমেন রাইৎ কম্মিসন্না শৌগৎপসিদা য়াম্না নুংঙাইবা ফাওজৈ।

মরুপশিং,

ভারত অসি নীংথিরবা ৱাখল্লোন, ভেল্যু অমসুং ‘আত্মৱৎ সর্বভুতেসু’গী ৱাখল্লোন, হায়বদি মীওইবা খুদিংমক অমত্তনি খনবা, তুং ইনবা লৈবাক অমনি। মীওইবা অমসুং থৱাই পানবশিংগী মরক্তা খেন্নবা লৈতে। ঐখোয়না ৱাখল্লোন অসি ইনবা মতমদা, খেন্নবা খুদিংমক মাঙখিগনি। তোঙানবা মওং কয়া লৈজরবসু, ভারতনা ৱাখল্লোন অসিবু চহি চা কয়া হিংহন্দুনা লাক্লি। মরম অদুনা, ভারতনা মীখা পোনবগী চহি চা কয়াদগী নীংতম্বা ফংখিবা মতমদা, ঐখোয়গী সংবিধান্না মান্নবা মিৎয়েং য়েঙবা অমসুং ফন্দামেন্তেল রাইৎ চৎনগনি হায়খিববু অমত্তা ওইনা য়ানবা পুরকখি।

মরুপশিং,

নীংতম্বা ফংলবা ফাওবদা, ভারতনা মান্নবা মিৎয়েং য়েঙবা অমসুং মীওইবগী হক্কা মরী লৈনবা হীরমশিংদা মালেমদা অনৌবা মিৎয়েং অমসুং অনৌবা মঙলান কয়া লেপ্তনা পীদুনা লাক্লি। মমাংগী দিকেদ খরদসু, মালেম্না তাঞ্জা কয়াদা ৱাখল মাঙবা অমসুং চমম্নবা কয়া থোকখি। অদুবু ভারতনা মীওইবগী হক্কী মতাংদা পুকচেল শেংনা অমসুং খোঙফম চেৎনা লৈখি। শিংনবা কয়া থেংনরবসু, ঐখোয়গী থাজবনা ভারতনা মীওইবগী হকপু খ্বাইদগী থাক ৱাংনা থমদুনা ফজবা খুন্নাই শেম্নবা লেপ্তনা হোৎনগনি।

মরুপশিং,

ঙসিদি, লৈবাক অসিনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী তঙাই ফদ্রবা মন্ত্রগা লোয়না তুংলমচত্তা চঙশিল্লি। মসিনা মীওইবগী হক শোইদনা লৈহনবগী তঙাই ফদ্রবা ইথিল অমনি। সরকারনা স্কিম অমস হৌদোক্লবা অমসুং মসিগী কান্নবনা খনগৎলবা মীওই খরা খক্তনা ফংবা মতমদা, হক্কী ওইবা শিংনবা কয়া শোইদনা থোক্লক্কনি। মরম অদুনা, ঐখোয়না মীওই খুদিংনা স্কিমগী চপ মান্নবা কান্নবা ফংবগী পান্দমদা চঙশিল্লিবনি। মীচঙ-মীখায় নাইদবা অমসুং মান্নদবা মিৎয়েং য়েংদবা অমসুং নুং-পান ফাওনা উবগী থৌওং লৈবা মতমদা, মীচম প্রজাগী হক শোইদনা ফংগনি। চহিসিগী ওগস্ত ১৫দা লৈবাক মীয়ামদা ৱাফম থম্বা মতমদা, ঐহাক্না তঙাই ফদবা ফেসিলিতীশিংবু ১০০%গী চাংদা ফংহনবদা মিৎয়েং চঙখি। মসিগী ১০০%গী চাংদা য়ৌহনবগী কেম্পেন অসিদি খ্বাইদগী মনিংদা লৈবা অমসুং মশাগী হকনি খঙজদবা মীওইশিংদসু মশাগী হক ফংহনবনি হায়না অরুন মিশ্রাজীনসু পনখ্রিবদুনি। মসিগীদমক্তা মহাক্না কনা অমত্তগী মফমদা ৱাকৎপগী মথৌ তাররোই অমসুং কম্মিসন অমত্তদা চৎলুদ্রবসু য়ারগনি। হৌজিক্তি সরকারনা লাইরবশিংগী ময়ুমদা চৎলি অমসুং খুদোংচাবা কয়া ফংহল্লি।

মরুপশিং,

লৈবাক্কী অচৌবা শরুক অমনা মখোয়গী তঙাই ফদবশিং ফংনবা হোৎনবদা অৱাবা ওইবা মতমদা, মখোয়না মশাগী হক অমসুং অপাম্বশিংগীদমক্তা করিগুম্বা অমা পাংথোক্নবা মতম, মপাঙ্গল অমসুং ইথিল অমত্তা লৈরোই। অদুগা, ঐহাক্না লাইরবা অমগী পুন্সিদা মুন্না য়েংবা মতমদা, মহাক্কী পুন্সিদি তঙাই ফদবনা থনবা অমসুং পুন্সিগী মিৎকুপ খুদিংমক মদুবু ফংনবা হোৎনবদা শিজিন্নবগী মতৌ উবা ফংই। হৌজিক্তসু অমিৎ ভাইনা য়াম্না কুপ্না হায়খ্রবদুনি, লাইরবা অমনা অমাংশঙ, মৈ, হকশেল অমসুং লাইয়েংবগী শিংনবগুম্বা মহাক্কী তঙাই ফদ্রবশিংগীদমক্তা লান্থেংনরিঙৈ মতমদা মহাক্কী মফমদা মহাক্কী ফংফম থোকপা হক্তি মসিনি হায়না তাক্লুবা মতমদা, মসিনা মহাক্কী তঙাই ফদবশিং পীবা ঙমগদরা হায়না হংলক্কনি। লাইরবশিংগী ফংফম থোকপা হক ফংহন্নবগীদমক্তা মহাক্কী তঙাই ফদবশিং হান্না ফংহনবগী মথৌ য়াম্না তাই। হায়রিবশিং অসি ফংহল্লবা মতুংদখক্তদা, লাইরবশিংনা মশাগী হক তানবগী থৌনা লৈরক্কনি। অদুগা তঙাই ফদবা ফংলবা তুংদা, মশাগী হক্কী মতাংদা খঙলকপা হৌই অমসুং মসিদগী মশাগী অপাম্বা অমসুং তৌনীংবগী চাঙ হেনগৎলক্কনি হায়বা ঐখোয়না নীংথিনা খঙলবদুনি। অপাম্বা য়াম্না লৈরিবমখৈ, লাইরবগী খয়াত্তগী থোক্লকপা ঙম্বগী থৌনাসু হেনগৎলক্কনি। মসিদগী হেক থোক্লক্লবা মতমদা, মহাক্না মহাক্কী মঙলান মঙফাওনবা থবক পায়খৎপা হৌরক্কনি। মরম অদুনা, লাইরবা অমগী ইমুংদা মৈ, গ্যাস অমসুং অমাংশঙ লৈরকপা মতমদা, মখোয়না ফংলিবা অসি শুপ্নগী স্কিম অমখক্তা নত্তে। স্কিমশিং অসিনা মহাক্কী অপাম্বা ফংহন্দুনা, মহাক্কী হক্কী মতাংদা খঙহল্লি অমসুং মঙলান অমসুং অপাম্বা লৈবা হৌহল্লি।

মরুপশিং,

লাইরবশিংদা ফংহল্লিবা খুদোংচাবশিং অসিনা মহাক্কী পুন্সিদা ইকায় খুম্নবগী মিৎয়েং লাকহল্লি। মতম অমদা মপান্দা থোক্তুনা অমাঙবা তৌরম্বা লাইরবা অমগী ময়ুমদা অমাংশঙ লৈহনবা মতমদা, মহাক্না ইকায় খুম্ননা হিংবগী মতৌসু ফংজরিবনি। বেঙ্কতা চৎপগী মপাঙ্গল লৈজদবা লাইরবনা মহাক্কী জন ধন একাউন্ত লৈরকপা মতমদা, মহাক্না থৌনা লৈরকই অমসুং মশাগী ইকায় খুম্নবগী চাঙ হেনগৎলকই। দেবিৎ কার্দ অমফাওবা ফংগনি থাজবা লৈরমদ্রবা লাইরবনা রুপে কার্দ ফংলকপা অমসুং মহাক্কী ফুরিৎখাওদা রুপে কার্দতা লৈরকপা মতমদা, মশাগী ইকায় খুম্নবসু হেনগৎলকই। গ্যাস কন্নেক্সনগীদমক্তা অতোপ্পগী থৌজালগী মখা পোল্লম্বা মীওইনা ময়ুমদা উজ্বালা কন্নেক্সন ফংলকপা মতমদসু চপ মান্নবা ইকায় খুম্নবা লৈরকই। চারোন-শুরোন কয়াদগী মশাগীনি হায়বা লম-থুম অমত্তা লৈজরমদবা নুপীশিংনা সরকারগী হাউজিং স্কিমগী মখাদা মশাগী মমিংদা য়ুম লৈরকপা মতমদা হায়রিবা ইমা, ইচে-ইচলশিংগী মশাদা ইকায় খুম্নবগী চাংনা থাক ৱাংনা হেনগৎলি।

মরুপশিং,

হৌখিবা চহি খরসিদসু, লৈবাক অসিনা তোঙান-তোঙানবা সেক্তরশিংনা তোঙানবা থাক্ত থেংনরম্বা অচান-মীরাই নাইবগী থৌওং লোইশিন্নবসু কন্না হোৎনরি। মুসিল নুপীশিংনা দিকেদ কয়াদগী তলাক অহুমগী মাইয়োক্তা লৈবা আইন পীবীনবা হায়জদুনা লাক্লি। ঐখোয়না মসিসু পীদুনা মুস্লিম নুপীশিংদা অনৌবা হক অমসু খুৎশিন্নখ্রে। ঐখোয়না সরকারনা মুস্লিম নুপীশিংনা হাজীগী মতাংদা লৈরম্বা মাহরমদগীসু (ইস্লামগী কাংলোনগী মতুং ইন্না, নুপী অমবু মহাক্কী মপুরোইবা নত্ত্রগা মরী-মতানা হাজী চৎপদা লোয়নগদবনি হায়বা) মনিং তমহল্লে।

মরুপশিং,

ভারতকী নুপীশিংনা নীংতম্বা ফংলবা দিকেদ কয়া ফাওবদা খুদোংচাদবা কয়া থেংনরম্মি। মখোয়বু সেক্তর কয়াদা চঙবা থিংদুনা মান্নদবা মিৎয়েং য়েঙবগী থৌওং কয়া লৈরম্মি। ঙসিদি, সেক্তর কয়া অমা নুপীশিংগীদমক্তা হাংদোক্লে, মখোয়না নোংমদা পুং ২৪ থবক শুবদা তেক্ত-কায়দনবা শিনলে। অতোপ্পা চাউখৎলবা লৈবাক কয়ানা পাংথোকপদা লুনা থোক্লিবসিদা ভারতনদি থবক তৌবী নুপীশিংদা চয়োল ২৬কী চাবোকপগী ছুতী পীরে।

মরুপশিং,

নুপী অমনা চয়োল ২৬কী ছুতী ফংলকপা মতমদা মসিনা পোকপা নৌরিবা অঙাং অসিগী হক ঙাক-শেনবগী ফিভম অমসু ওইরে। মহাক্না মমাগা লৈমিন্নবা ফংবগী হক লৈ অমসুং মদুসু হৌজিক্তি মহাক্না ফংলে। হায়রিবশিং অসি হৌজিক ফাওবদা ঐখোয়গী আইনগী লাইরিকশিংদা পল্লমদ্রিবা ফাওবা য়াই।

মরুপশিং,

মমাংগী চহি খরসিদা, ঐখোয়গী ইচানুপীশিংবু ঙাক-শেনবগী খোঙথাং কয়া অমসু পায়খৎখ্রে। নুপীশিংদা মফম অমত্তদা মেদিকেলগী তেংবাং, পুলিসকী ঙাক-শেনবা, আইনগী তেংবাং অমসুং মতম খরা লৈনবা মফম পীবা ৱান স্তোপ সেন্তর কয়া অমা লৈবাক্কী জিলা ৭০০ হেনবদা হৌজিক চলায়বা হৌরে। নুপীগী মাইয়োক্তা চত্থবা ক্রাইমগী মাইয়োক্তা অথুবা মতমদা ৱায়েন্নবা ফাস্ত ত্রেক কোর্ত ৬৫০ হেনবসু লৈবাক্কী মফম শিনবা থুংবদা লিংখৎলে। রেপকুম্বা মথোং হুক্ত্রবা ক্রাইমগীদমকা শিবা চৈরাক পীবগী ৱায়েল অমসু লৈরে। মেদিকেল তর্মিনেসন ওফ প্রেগনেন্সী এক্ত এমেন্দ তৌদুনা অঙাং য়ৈথবগী মতাংদা নুপীশিংদা মনিং তমহল্লে। আইন্না য়াবা অমসুং তেক্ত কায়দবা অঙাং য়ৈথবগী থৌওং লৈদুনা, নুপীশিংগী অৱাবা কয়া হন্থরে অমসুং মখোয়দা তাথী-তাওই তৌবদগীসু মনিং তমহল্লে। অঙাংদা চত্থবা ক্রাইমশিং য়েংশিন্নবা আইনশিংসু হেন্না মপাঙ্গল লৈহল্লে অমসুং মসিগীদমক্তা ফাস্ত ত্রেক কোর্ত কয়াসু লিংখৎলে।

মরুপশিং,

হন্দক্তা পাংথোকখিবা পেরালিম্পক্সতসু ঐখোয়গী দিব্যাং ইচিল-ইনাওশিংগী মতিক কয়া ঐখোয়না উবা ফংলে। মমাংগী চহিশিংদা, দিব্যাংশিংবু মপাঙ্গল হাপ্নবা অমসুং অখন্নবা খুদোংচাবা কয়াসু মখোয়দা ফংহন্নবা আইন কয়া অমা শেমখ্রে। লৈবাক শিনবা থুংবদা মখোয়না শিজিন্নবা য়ানবগীদমক্তা বিলদিং লিশিং কয়া অমা শাবা, পব্লিক বস অমসুং রেলৱেদা খুদোংচাবা লৈহনবা, দিব্যাং ফ্রেনলী ৱেবসাইৎ ৭০০ শাবা অমসুং অখন্নবা কোইন অমসুং করেন্সী মখোয়গীদমক্তা শাবনচিংবা অনৌবা থবক-থৌরম কয়া মখোয়গীদমক্তা পাংথোকখ্রে। ঐখোয়গী দিব্যাং ইচিল-ইনাওশিংনা করেন্সী নোত অমবু শোক্তুনা মদুগী ভেল্যু হায়বা ঙম্মি হায়বসি মীওই মশিং য়াম্বনা খঙলমদবা য়াই। চহি কয়া অসিদা, মখোয়গী মহৈ-মশিং তম্বা, স্কিল অমসুং ইস্তিত্যুসন অমদি অখন্নবা কোর্স কয়াদা মখোয়গীদমক্তা মিৎয়েং চঙবা থৌওং কয়া পায়খৎলি। ঐখোয়গী লৈবাক্কী লোল অমসুং দাইলেক্ত কয়া লৈ অমসুং হায়রিবশিং অসি ঐখোয়গী সাইনেজশিংদা মমি তাবা ফংবনি। খোঞ্জেল তাবদা খুদোংচাদবা লৈবা ঐখোয়গী দিব্যাং ইচিল-ইনাওশিংনা গুজরাত, মহারাস্ত্রা, গোৱা অমসুং তমিল নাদুগী তোঙানবা লোলশিংগী সাইনেজতা খুদোংচাদবা কয়া থেংনবা ঐহাক্না উরে। মসিগী ৱারোইশিন পুরক্নবগীদমক্তা, ঐখোয়না লেজিস্লেসনগী খুত্থাংদা মান্নবা সাইনেজকী পোলিসী অমা শেম্লে। ঐখোয়গী লৈবাক্কী দিব্যাং অঙাংশিংনা ই-লর্নিংগা মরী লৈনজবা ঙম্নবগীদমক্তা মখোয়গীদমক্তা লৈবাক্কী সাইন লেংগ্বেজকী অহানবা দিক্সনরী অমসুং ওদিও বুক লাখ কয়া অমা ফংহল্লে। মান্নবা থৌওং অমা ওইনা, ত্রান্সজেন্দর পর্সন (প্রোতেক্সন ওফ রাইত) এক্ত অসিসু ত্রান্সজেন্দর মীওইশিংদা মান্নবা ফেসিলতী অমসুং খুদোংচাবা ফংহন্নবা চৎনহনখ্রে। নোমাদিক অমসুং সেমি-নোমাদিক খুন্নাইগীদমক্তা ৱেলফিয়র বোর্দসু শেম্লে। পন্দুনা লৈবা কেস কয়া লোক অদালৎকী খুত্থাংদা লোইশিনবগী থৌওংনা কোর্তশিংদা লৈবা কেস মশিং হন্থহনবগা লোয়ননা লৈবাক মীয়ামদসু য়াম্না চাউনা তেংবাংলি। থৌওংশিং অসিনা খুন্নাইদা মান্নদবা মিৎয়েং য়েংবগী থৌওং লোইশিনবদা চাউরবা থৌদাং য়ারি।

মরুপশিং,

চহি-চা অসিগী চাউরবা অৱাবা ওইদুনা মালেমগী চাউখৎলবা লৈবাক কয়াবুসু অৱাবা তাহনবা কোরোনাগী চাউরবা লাইচৎ ভারতনসু থেংনরি। মীশিং য়াম্বা লৈবাক্তা অসিগুম্বা থৌদোক থোকপা মতমদা খুন্নাইদা চাউরবা অৱাবা কয়া তাহল্লি হায়বসি ঐখোয়না মমাংদা থেংনখিবশিংদগী খঙবা ঙম্লে। অদুবু ভারতনা মসিগী মীয়ামগী হক্কীদমক্তা পায়খৎখিবা থৌওং কয়ানা হান্না খন্নরম্বা ৱাফম কয়া লাল্লি তাকখি। অসিগুম্লবা লুরবা তাঞ্জা অসিদা, ভারতনা লাইরবা মীওই অমত্তা চরা হেলহনখিদে। চাউখৎপা লৈবাক কয়ানা য়াম্না লুনা থোক্লি, অদুবু ভারতনা মসিগী মীওই মিলিয়ন ৮০০দা ঙসিসু হৱাই-চেংৱাই পীরি। ভারতনা লাইরবা, কনা-লৈজদ্রবা, অহল-লমশিংদা কোরোনাগী মনুংদা মখোয়গী একাউন্ততা হকথেংননা শেল থাজিন্দুনা তেংবাংলি। মাইগ্রেন্ত শিন্মীশিংগীদমক্তা ‘ৱান নেসন, ৱান রাসন কার্দ’কী খুদোংচাবা ফংহন্দুনা মখোয়না লৈবাক্কী মফম কয়াদা চৎপদা রাসনগী দুকান থীবগী অৱাবা লৈহন্দ্রি।

ইচিল ইনাওশিং,

মীওইবগী অনিঙবা-অপাম্বা অমসুং ৱাখল্লোনবু অহেনবা মিৎয়েং থমদুনা মীপুম খুদিংবু অমত্তা ওইনা য়েংবগী থৌওংনা লৈবাক্কী অপিকপা লৌমীশিংদা মপাঙ্গল য়াম্না হাপ্লি। ঙসিদি, লৈবাক্কী লৌমীশিংনা থর্দ পার্তীদগী লোন লৌবগী মথৌ তাদ্রে, মখোয়গীদমক্তা কিসান সম্মান নিধী, মরৈ-মরোংগী ইন্স্যুরেন্স স্কিম অমসুং কৈথেলশিংগা মখোয়গা শম্নহন্নবা পোলিসী, লৈরে। মসিনা মরম ওইদুনা, লৈবাক্কী লৌমীশিংনা অৱা-অনা মরক্তা ফাওবা হান্নদগী হেনবা চাংদা মহৈ-মরোং পুথোকপা ঙম্লে অমসুং পুথোক্লি। জম্মু অমসুং কশমির অমদি অৱাং-নোংপোক লমদমগী খুদম্না ইমাংদা লৈরে। ঙসিদি, মফমশিং অসিদসু চাউখৎপা থৌওংশিং য়ৌরে। লমদমসিগী পুন্সি মহিং ফগৎহন্নবা থবক থৌরম কয়া নীংথিজনা পায়খৎলি। অসিগুম্বা হোৎনবগী থৌওংনা মীওইবগী হকপুসু মান্ননা মপাঙ্গল হাপ্লি।

মরুপশিং,

ঙসি ঐহাক্না অদোমগা তান্ননীংবা মীওইবগী হক্কী অখন্নবা হীরম অমসু লৈ। চহি খরা অসিদা, মীওই খরনা মীওইবগী হক্কী ৱাহন্থোকপু মশাগী অপাম্বা য়েংদুনা হন্দোকপা হৌরক্লি। মীওই খরনা থৌদোক খরদা মীওইবগী হক খোঙ্গোইনৈ অদুগা মান্নবা থৌদোক খরদনা করিসু কায়দে হায়বগী মিৎয়েং য়েংলি। অসিগুম্বা ৱাখল্লোন অসিনা মীওইবগী হক্তা য়াম্না শোকহল্লি। কান্নবা অমসুং মাঙজবগী ফিভম খন্দুনা রাজনীতিগী মিৎয়েংগী খুত্থাংদগী য়েংলকপা মতমদা মীওইবগী হক অসিদা য়াম্না অকায়বা পী। অসিগুম্বা থৌওংনা গনতন্ত্রগী ৱাহন্থোক্তসু মান্নবা অকায়বা পী। মখোয় মশাগী খনগৎলবা থৌওং খরগী খুত্থাংদা মীওইবগী হক খোঙ্গোইনৈ হায়বগী মিংদা লৈবাক্কী মিংচৎ শোকহন্নবা হোৎনবগী থৌওং খরসু ঐখোয়না উবা ফংই। লৈবাক্না অসিগুম্বা মীওইদগী চেকশিনবগী মথৌ তাই।

মরুপশিং,

ঙসিগী মালেমগী ওইবা মীওইবগী হক হায়না খন্নরকপা মতমদা, খ্বাইদগী মরু ওইবদা লৈরিবসি মীওই অমগী হক অদুবুনি, মসি ওইফমসু থোকই। মসিদি ঐখোয়গী চহি-চা কয়া লিরবা স্ক্রিপচরশিংদসু ইদুনা লৈরম্লবনি। “আত্মনঃ প্রতি কুলানি পরেশাম ন সমাচোরত। অদোমগী মফমদা অকায়বা পীরকপা য়াই খনবা মীওইগা ৱারী শাগনু। মসিনা হায়বদি, মীওইবগী হক হায়বসি হক্কা মরী লৈনবতা নত্তনা ঐখোয়গী তৌফম থোকপা ইথৌনি হায়বনি। ঐখোয়না অতোপ্পগীতা নত্তনা ঐখোয় ইশাগী হক্কী মতাংদা খনগদবনি, মীওই খুদিংদা চপ মান্নবা মিৎয়েং থমগদবনি। খুন্নাইদা অসিগুম্বা ৱাখল্লোন লৈরবা মতমদা, মীওইবগী হক হায়বসিনা খুন্নাইগী ভেল্যুগী য়ুম্বী অদুমক ওইরক্কনি। হক অমসুং ইথৌদাং অসিদা য়ুম্ফম ওইদুনা মীওইবনা চাউখৎপা অমসুং মীওইবগী মশাগী ইকায় খুম্নজবা ঙাকপা ঙম্মি। হক অসি মরু ওইরবদি, মসিগা চপ মান্ননা থৌদাংসু মরু ওই। হীরম অসিদা মতম অমত্তদা মিৎয়েং চঙগদবনি, তোঙান-তোঙান্নবা চঙগদবা নত্তে। থৌদাংদা মিৎয়েং হেন্না চঙলকপা মতমদা ফংফম থোকপা হকসু অদুমক ফংই হায়বসি ঐখোয়না থেংনদুনা লাক্লবনি। মরম অদুনা, মশাগী হক করিনো খঙবা ভারত মচা খুদিংমক্না মশাগী মথৌসু পুকচেল শেংনা পাংথোক্কদবনি। ঐখোয়না মসি পাংথোকপা ঙম্নবগীদমক্তা লেপ্তনা হোৎনদুনা অমসুং মসিদা পুক্নিং চঙবগী মথৌ তাই।

মরুপশিং,

ঐখোয়গী ভারতকী চৎনবীনা মহৌশা অমসুং অকোয়বগী ফিভম্বু ঙাক-শেন্দুনা থমগদবনি হায়না তম্বী। পাম্বীশিংদা লাইগী গুন চেল্লি হায়না খল্লিবসি ঐখোয়গী নাৎনা ঐখোয়দা তাকপী তম্বীদুনা লাক্লবা ৱাফম্নি। মরম অদুনা, ঐখোয়না হৌজিক্কী মতমগী খনবগা লোয়ননা তুংগীসু খনগদবনি। ঐখোয়না তুংদা হৌরক্কদবা চারোন-শুরোনশিংগী হক্কী মতাংদা মালেমদা চেকশিনবগী ৱাফম কয়া তত্তনা থমদুনা লাক্লি। ইন্তর্নেস্নেল সোলর এলাইএন্স, রিন্যুএবল ইনর্জীগীদমক্তা থম্লিবা ভারতকী  পান্দম, হাইদ্রোজেন মিসন ওইরো, ভারতনা সস্তেনেবল লাইফ অমসুং ইকো-ফ্রেনলী গ্রোথকী হীরমদা লেপ্তনা চঙশিল্লি। মীওইবগী হক্কী মতাংদা থবক তৌরিবা ঐখোয়গী অখঙ-অহৈ অমসুং সিভিল সোসাইতীগী মীওই খুদিংনা মাইকৈ অসিদা পায়খৎলিবা মখোয়গী খোঙথাংশিংবু হেনগৎনবা ঐহাক্না হায়জনীংই। অদোমগী থবক থৌরমশিংনা মীয়ামদা মখোয়গী হক্কা লোয়ননা মথৌগী ৱাখল্লোন্দা ইথিল পীগদৌরিবনি। য়াইফ পাউজেল অসিগা লোয়ননা ঐহাক্না মতাং অসিদা লোইশিঞ্জরগে। অদোম্বু য়াম্না থাগৎচরি!

দিস্ক্লেমরঃ ৱারোল অসি প্রধান মন্ত্রীনা থমখিবা ৱাফমগী চাউরাকপা খরনি। অশেংবা ৱারোলদি হিন্দিদা থম্বীখিবনি।

****