হকশেল অমসুং য়াইফ-য়ুম্বাল মন্ত্রালয়
azadi ka amrit mahotsav

স্তেত ১৯দা চত্থরিবা কোবিদ-১৯ ভেক্সিনেসনগী খোঙজেল কেন্দ্রগী হকশেল মন্ত্রীনা য়েংশিনখ্রে

দোজ করোর ১০০গী পান্দম ফংননবা স্তেতশিংদা হায়খ্রে

নীংথিনা চৎন-কাঙলোন চৎনহন্দুনা কোবিদ-১৯ সেফ কুমহৈ হরাও পাঙথোকপদা মীৎয়েঙ চঙনবা ৱাফম থমখি

Posted On: 09 OCT 2021 3:33PM by PIB Imphal

হকশেল অমসুং য়াইফ য়ুম্বালগী কেন্দ্র মন্ত্রী দোক্তর মনসুখ মন্দাবিয়ানা ঙসি অচৌবা স্তেত পুম্নমক্কী প্রিন্সিপাল সেক্রেতরীশিং অমসুং মিসন দাইরেক্তরশিংগা (নেসনেল হেল্থ মিসন) ৱারী ৱাতায় শানদুনা হায়রিবা স্তেতশিং অদুদা কোবিদ-১৯ ভেক্সিনেসনগী লৈরিবা খোঙজেলশিং য়েংশিনখ্রে‍। ভারতকী কোবিদ-১৯ ভেক্সিনেসনগী খোঙচত্তা মাঙদা তাদুনা লৈরিবা পন্দোল অসি ভেক্সিন দোজ করোর ১০০ কাপথোকপা লোইশিনবা অসিনি হায়না মহাক্না ফোঙদোকখি‍। ভারতনা হৌজিক ফাওবদা ভেক্সিন দোজ করোর ৯৪ কাপখ্রে‍।

অফ-নুংঙাই, হরাউ-তয়ামবা অমদি মী য়াম্না পুনবনা মশক ওইরিবা কুমহৈশিং অসি কোবিদকী চৎন-পথাপশিংগী মতুং ইন্না পাঙথোকত্রবদি কোবিদ-১৯ লাকশিনবগী থৌরাংশিং অসি পুমচাই চাইহনগদৌরিবনি হায়না দোক্তর মন্দাবিয়ানা ফোঙদোকখি‍। “মমায় অনি লোংবা পাম্বৈদি কোবিদকী চৎন-পথাপশিং চেকশিন্না ইনবা অমদি ভেক্সিনেসনগী খোঙজেল য়াঙখৎহনবনি,” হায়না মহাক্না হায়খি‍। ভেক্সিনগী ১বা দোজ কাপথোকখিবা মীওইশিংদা কোবিদ-১৯গী শাথিবা লাইওং উৎলক্তবগী চাংনা ৯৬% ওই হায়বা এক্সপরিমেন্তগী মহৈশিং পল্লদুনা ভেক্সিনগী দোজ অনিমক কাপথোক্লবা মীওইশিংদনা ফীভম অসি ৯৮% ফাওবা হেনগৎলকই হায়বা ৱাফম মহাক্না মখা তাখি‍।

স্তেতশিংদা ভেক্সিন দোজ করোর ৮ হেন্না লৈরি হায়বা ৱাফম পল্লদুনা স্তেতশিংনা মখোয়গী ভেক্সিনেসনগী খোঙজেল হেনগৎহনবদা লৈরিবা অপনবশিংগী মরমদা অমদি পান্দম থম্লিবা মীশিংদা ভেক্সিন য়ৌরবা মশিংগী মরমদা মহাক্না হংখি‍। স্তেত কয়া অমদি ময়োল্লমগী মফমশিংদা সেচুরেসন কভরেজ য়ৌশিল্লক্লে অমদি ময়োল্লমশিংগী চাইদুনা লৈরিবা মীয়ামদসু ভেক্সিন ফংহল্লি হায়বা ৱাফম থম্নরকখি‍। মতৌ অসুম্না মতম অমদি থবক য়াম্না চঙবা য়ুম য়ুমদা চঙদুনা ভেক্সিন কাপথোকপগী মনুং হঞ্জিনবা মফমশিংদা পায়খত্তুনা মফমশিং অসিদা অহানবা দোজকী ভেক্সিন কাপ্পা লোইশিল্লক্কদৌরে হায়বা ৱাফমশিংসু থম্নখি‍। মাস ভেক্সিনেসন দ্রাইভ পায়খৎলিবা উত্তর প্রদেশকুম্বা স্তেতশিংনা ফোঙদোরকপদা কোভেক্সিন মশিং অকক্ননা পীরকপা অমদি হায়রিবা ভেক্সিন অসিগী দোজশিংগী মরক্তা মতম হেন্না তেনবনা খোঙজেল য়াঙহনবা ঙমদে হায়বা ৱাফমশিং থম্লকখি‍।

স্তেতশিংগা ৱা তানরবা মতুংদা মন্ত্রীনা স্তেত পুম্নমক্তা নুমিৎ খরনিসিদা করোর ১০০গী পান্দম ফংবা ঙম্নবা লেমহৌরিবা দোজ করোর ৬ অসি থুনা কাপথোক্নবা মখোয়গী খোঙজেল য়াঙখৎহন্নবা ৱাফম থমখি‍।

কেন্দ্রগী হকশেল সেক্রেতরী শ্রী রাজেস ভুশন্না স্তেত হেল্থ এদমিনিস্ত্রেতর খুদিংমক্তা কুমহৈ হরাউ মনুংদা কোবিদ-১৯ শন্দোরকপা থিংননবগীদমক কোবিদ এপ্রোপ্রিএত বিহেবিয়র (সি.এ.বি.) চপ চানা চৎনহন্নবা ৱাফম থমখি‍। সেপ্তেম্বর ২১, ২০২১দা মন্ত্রালয়না পীখিবা ফাওনচেদা স্তেত/য়ু.তি.শিংনা ইনগদবা মচা খায়বা এস.ও.পি. নীংথিনা ইনবা মথৌ তাই হায়না মহাক্না মখা তাখি‍।

মখাদা পীরিবা চৎন-কাঙলোনশিং স্তেতশিংদা খঙহনখ্রে অমদি মীফমদুদসু অমুক হন্না খঙহনখি:

  • কন্তেনমেন্ত জোন ওইনা লাউথোক্লবা মফমশিং অমদি পোজিতিবিতী রেত ৫% হেন্না লৈবা দিস্ত্রিক্তশিংদা মীয়াম পুনবা য়ারোই‍।
  • পোজিতিবিতী রেত ৫%গী মখাদা লৈবা দিস্ত্রিক্তশিংদা (লোকেল কন্তেক্সকী মতুং ইন্না) হান্না অয়াবা লৌরগা অমদি মীশিং অকক্নবা চাংদা মী পুনবা য়াগনি‍।
  • চয়োলগী কেস পোজিতিবিতীদা য়ুম্ফম ওইরগা কোমথোকপা অমদি অথিংবা থমগদবনি‍।
  • অঙনবা চেকশিন খুদমশিং খঙদোক্নবা স্তেতশিংনা দিস্ত্রক্ত খুদিংমক্তা নুমিৎ খুদিংগী কেস ত্রেজেক্তরী কুপ্না য়েংশিনগদবনি অমদি ফীভমগী মতুং ইন্না অথিংবা থম্নবা অমদি কোবিদকা চুনবা লীচৎ ঙাকহন্নবা থৌরাং লৌখৎকদবনি‍।
  • মীয়াম চত্থোক চৎশিন তৌদুনা অমগা অমগা পুন্দনবা কন্না হায়গদবনি‍।
  • “ওনলাইন দর্শন” অমসুং ভর্চুএল ওইনা পাঙথোকপগী থৌওংশিং পুক্নিং থৌগৎকদবনি‍।
  • মীতম মৈ থাবা, দুর্গা পুজা পন্দল, “দান্দিয়া”, “গরবস” অমসুং “ছত পুজা”নচিংবা লাইনিংগী থৌরম খুদিংমক মমীংতগী ওইনা পাঙথোক্কদবনি‍।
  • মীয়াম পুনবা/খোঙচৎশিংদা য়াওগদবা মীশিং রিগুলেত তৌগদবনি‍।
  • লাই খুরুমফম মফমশিংদা চঙফম অমদি থোকফম তোখাইনা থমগদবনি অমদি লাই খুরুমবগী ফক পুনশিনবা, “প্রসাদ” কৎপা, ঈরু-ঈশেং খিকপনচিংবা থৌওংশিং তৌরোইদবনি‍।

মীফম অদুনা স্তেতশিংদা ফংহনখ্রবা ইমর্জেন্সী কোবিদ রেসপোন্স পেকেজ (ই.সি.আর.পি.) ২গী শেলথুমগী মচাকশিং থুনা শীজিন্নবা হৌনবা ৱাফমসু খন্নখি‍।

অন্ধ্র প্রদেশ, অসাম, বিহার, ছত্তিসগর, গুজরাত, হরিয়ানা, ঝার্খন্দ, কর্নাতকা, কেরলা, মধ্য প্রদেশল মহারাস্ত্র, ওরিসা, পঞ্জাব, রাজস্থান, তামিল নাদু, তেলঙ্গনা, উত্তরাখন্দ, উত্তর প্রদেশ অমসুং ৱেস্ত বেঙ্গলনা মীফম অদুদা শরুক য়াখি‍।

****



(Release ID: 1762491) Visitor Counter : 105