খুরুমজরি,

থৌরম অসিদা শরুক য়াবীরিবা ঐহাক্কী মন্ত্রী মন্দলগী মরুপশিং, হকশেল মন্ত্রী, শ্রী মনশুখ মন্দাবিয়াজী, সেনিয়র ওফিসিএল, লৈবাক শিনবা থুংবগী সরকার অমসুং লন্নাই হোস্পিতালগী দাক্তর, হকশেল শেন্নবগা মরী লৈনবা মীওই, অতোপ্পা মীথুংলেন অমসুং ঐহাক্কী নুংশিরবা ইচিল-ইনাও অমদি ইচে-ইচলশিং।

২১শুবা চহি-চাদা মাং থানা চঙশিনবগা লোয়ননা, ঙসি অসি ভারতকী ওইনা য়াম্না মরু ওইবা নুমিৎনি। হৌখিবা চহি ৭তা, চহি ৭তগী চত্থরক্লিবা হকশেলগী ফেসিলিতীশিংবু মপাঙ্গল হাপ্পগী কেম্পেন্না ঙসিদগী অনৌবা তাঙ্কক অমদা চঙলক্লে অমসুং মসি তরাই-তরাইবা তাঙ্কক অমা নত্তে, য়াম্না তোঙানবা তাঙ্কক অমনি। ভারতকী হেল্থ ফেসিলিতীদা থোইদোক হেন্দোকপা অহোংবা পুরকপা ঙমগদবা মিসন অমা ঙসি ঐখোয়না হৌদোক্লে।

মরুপশিং,

চহি অহুমগী মমাংদা দীন দয়াল উপাধ্যায়জীগী মপোক কুমওন্দা পন্দিৎজীদা কত্থোক্তুনা ভারত পুম্বদা অয়ুশমান ভারত মিসন হৌদোকখি। ঙসিদি অয়ুশমান ভারত দিজিতেল হেল্থ মিসন্না লৈবাক শিনবা থুংবদা হৌদোকপা অসিদা ঐহাক্না হরাওবা ফাওই। মিসন অসিনা লৈবাক্কী লাইরবা কয়ানা থেংনরিবা অৱাবা কয়া অমা কোকহনবদা অচৌবা থৌদাং লৌগনি। তেক্নোলোজী শিজিন্নদুনা লৈবাক্কী অনাবা কয়াবু হোস্পিতাল লিশিং কয়াগা শম্নহনবগী থৌদাং অমা অয়ুশমান ভারতনা পাংথোক্লিবসি ঙসিদগী হেন্না মপাঙ্গল লৈদুনা অফবা তেক্নোলোজী প্লেৎফোর্ম অমা ওইরে।

মরুপশিং,

ঙসি ভারত্তা নীংথিনা লৈঙাক্নবা, লৈঙাকপগী থৌওং শেমদোক্নবা থৌওং অমা পাংথোক্লিবা অসিনা মীয়াম খুদিংদা পাঙ্গল হাপ্লি, মসি য়াম্না মশক থোকপনি। দিজিতেল ইন্দিয়া মিসন্না লৈবাক্কী অচম্বা মীয়াম্বু দিজিতেল তেক্নোলোজীগা শম্নহন্দুনা লৈবাক্কী পাঙ্গলবু হেন্না কনখৎহল্লে অমসুং আধার করোর ১৩০, মোবাইল সবস্ক্রাইবর করোর ১১৮, ইন্তর্নেৎ য়ুজর চাউরাকপা করোর ৮০, জন ধন বেঙ্ক একাউন্ত চাউরাকপা করোর ৪৩ পুম্নমক শম্নহনবা ইনফ্রাস্ত্রকচর অমত্তা মালেমদা লৈতে হায়বসি ঐখোয়না ময়েক শেংনা খঙলবনি। মসিগী দিজিতেল ইনফ্রাস্ত্রকচর অসিনা রেসন্দগী (রেসন্দগী প্রশাসন ফাওবা) হৌরগা লৈঙাকপা ফাওবদা য়াঙনা অমসুং নুং-পান ফাওনা ভারতকী মীয়াম খুদিংদা য়ৌহল্লে। য়ু.পি.আই.গী খুত্থাংদা মফম অমা হেক্তদা দিজিতেলগী খুত্থাংদা শেল পীথোক-পীশিন তৌদুনা ভারতনা মালেম শিনবা থুংবদা ইশাগী তোঙানবা শক্তাক অমা শেম্বা ঙম্লিবনি। লৈবাকসিদা ই-রুপীগী ভাউভর শিজিন্নবা হৌখিবা অসিসু য়াম্না কান্নরবা তাঙ্কক অমা হৌবনি।

মরুপশিং,

ভারতকী দিজিতেল খোঙথাংশিংনা কোরোনাগা লান্থেংনবদসু ভারতপু য়াম্না তেংবাংখি, অনৌবা পাঙ্গল অমা হাপ্পীখি। হন্দক্কী মতাংদসু, আরোগ্যা সেতুনা কোরোনা শন্দোকপা থিংখিবা, মীয়ামদা খঙহনখিবা, ওইরিবা ফিভম খঙহনবা, মসিদসু আরোগ্যা সেতুনা য়াম্না তেংবাংখি। মীয়ামদা ভেক্সিন লেম্না ফংহনবা খোংথাংগী মখাদা ভারতনা হৌজিক ফাওবদা ভেক্সিন দোজ চাউরাকপা করোর ৯০ কাপ্পা ঙমখিবা, রেকোর্দ পুম্নমক ফংখিবা, সর্তিফিকেৎ ফংহনখিবা অসিদা Co-WINনা অচৌবা থৌদাং লৌখি। রেজিস্তর তৌবদগী হৌদুনা সর্তিফিকেৎ পীবা ফাওবগী দিজিতেল প্লেৎফোর্ম অসিগুম্না চাউবা প্লেৎফোর্ম অমত্তা মালেমগী চাউখৎলবা লৈবাক অমত্তদা লৈতে।

মরুপশিং,

কোরোনা মনুংদা তেলিমেদিসিনসু মমাংদা থোকখিদ্রিবা মওংদা পাকথোক চাউথোকখি অমসুং ই-সঞ্জিবনীগী খুত্থাংদা হৌজিক ফাওবদা রিমোৎ কন্সলতেসন চাউরাকপা করোর ১.২৫ পাংথোকখ্রে। ফেসিলিতী অসিনা অচৌবা সহরগী দাক্তরশিংনা ময়ুমদা ফমদুনা লৈবাক্কী মনুং হঞ্জিনবা মফমশিংদা লৈবা লৈবাক মচা লিশিং কয়াগা শম্নহল্লি। মমিং লৈবা দাক্তরশিংনা সেবা তৌবসু হেন্না লাইহনখি। ঐহাক্না ঙসিগী থৌরম অসিদা লৈবাক্কী দাক্তর, নর্স অমসুং মেদিকেল স্তাফশিংবু থম্মোই শেংনা থাগৎচরি। ভেক্সিন কাপ্পা ওইরো, কোরোনাগী অনাববু লাইয়েংবা ওইরো, মখোয়গী হোৎনজমন্না কোরোনাগা লান্থেংনবদা য়াম্না তেংবাংখি।

মরুপশিং,

অয়ুশমান ভারত- PM JAYনা লাইরবা মীয়ামগী অৱাবা কয়া কোকহল্লে। হৌজিক ফাওবদা লৈবাক মীয়াম করোর ২ হেনবনা য়োজনা অসিগী খুত্থাংদা লাইয়েংবগী কান্নবা ফংখ্রে অমসুং মসিগী মনুংদগী মীওই তংখায়দি ঐখোয়গী ইমা, ইচে-ইচল অমসুং ইচানুপীশিংনি। ৱাফম অসিমক্না ঐখোয়বু নুংঙাইহল্লি, পুক্নিং লৈতাহল্লি। ঐখোয় খুদিংনা ইমুংগী শেল-থুমগী মতাংদা লোইনা খঙই, শেল চঙদবা লাইয়েং লৈতবনা, লৈবাক্কী ইমা অমসুং ইচে-ইচলশিংনা মসিগী মতাংদা খ্বাইদগী হেন্না অৱাবা নঙই। ইমুংগী মরমদা, ইমুংগী চাদিংগী মতাংদা খন্দুনা ঐখোয়গী ইমা, ইচে-ইচলশিংনা মশাগী লাইয়েংবদা শেল চঙগনি হায়দুনা য়ৈথোক্তুনা মতম পুম্বদা থম্মি, অদুমক লৈথোক্তুনা থম্নবসু হোৎনৈ। হৌজিক ফরনি, হয়েং ফরনি, নোং-নিনিগী ৱানি, হিদাক অমা হেক্তা চারগা লোইরে হায়দুনা লৈ। ইমাগী পুক্নিংদি ঐখোয়না খঙলিবদুনি, মখোয়না অৱাবা খাঙজিনগনি অদুবু অতোপ্পদি অৱাবা অমত্তা তাহল্লোই।

মরুপশিং,

অয়ুশমান ভারতকী মখাদা হৌজিক ফাওবদা লাইয়েংবগী খুদোংচাবা ফংখ্রবা, লাইয়েংগে হায়না খল্লিবশিংগী মরক্তগী মরুপ-মপাং লাখ কয়াদি হোস্পিতাল চৎপগী থৌনা ফাওবা লৈরম্বা নত্তে, ঙসি হয়েং চৎকে হায়না লৈথোক্তুনা লাকখিবা ঙাক্তনি। মখোয়না অনাবা খাঙজিন্দুনা, শেল লৈতবদগী হোস্পিতাল চৎপা ঙমদনা লৈরকপা ঙাক্তনি। মসিগী ৱাখল অসিনা ঐখোয়বু নুংদগী ৱাহন্দুনা থম্লিবনি। ঐহাক্না কোরোনা মনুংদা অয়ুশমানগী কান্নবা ফংলবা অসিগুম্বা ইমুং কয়াগা উন্নখি। অহল খরনদি, মখোয়গী মচা-মশুশিংদা অৱাবা পোৎলুম পীনিংদবদগী নাবগী ৱাফম হৌদোক্তনা লাকখি হায়বা পাউদম কয়া তম্লকখি। মশানা অনাবা খাঙগনি, ঈশ্বরনা কৌরক্লবদি থুনা নোঙ্গাখিবসু য়াই, অদুবু মচা-মশুশিংদদি শেল তোলহল্লগা চৎখিবদি পামদবনা, নাবগী ৱাফম ফোংদোক্তবনি হায়নসু তম্লকখি। অদুগা ঙসিগী থৌরম অসিদা য়াওরিবা ঐখোয় অয়াম্বনা ইশাগী ইমুংদা অমসুং অনকপদা অসিগুম্বা থৌদোক কয়া থেংনরমগনি। ঐখোয়গী মরক্তগী মীওই অয়াম্বনা মসিগী ফিভম অসি ফাওদুনা চৎখিবা কয়াসু য়াম্না য়াওরমগনি।

মরুপশিং,

হৌজিকপুদি কোরোনাগী মতম ওইরে। অদুবু মমাংদা ঐহাক্না লৈবাক্কী মফম কয়াদা চৎপদা অয়ুশমান ভারতকী কান্নবা ফংবা বেনিফিশরীশিংগা শোইদনা উন্ননবা হোৎনৈ। ঐহাক্না মখোয়গী উন্নৈ, ৱারী শানৈ। মখোয়গী অৱাবা, মখোয়না থেংনরকপা কয়া তাই অমসুং মখোয়গী ফীদবেক কয়া লৌই। মসিগী মতাংদা মীদিয়াদা পাউ কয়াদি ফোংনদে অদুবু মসিদি ঐহাক্না তৌদবা য়াদবা থবক্নি খন্দুনা পাংথোক্তুনা লাকখি। অয়ুশমান ভারতকী য়াম্লবা বেনিফিশরী কয়াগা ঐহাক্না হকথেংননা থেংনদুনা ৱারী শাখ্রে। মতম কয়া অনাবা খাঙলবা তুংদা নুং লৌথোকপগী ওপরেসন তৌখিবী অহল ওইরবী ইমাবু ঐহাক্না করম্না কাওদোইনো, কিদনীগী লাইনা নাদুনা অৱাবা ময়াম খাঙলক্লবা নহাদুবু করম্না কাওগনি। মীওই খরনা মখোঙ নাই, খরনা শরু নাই, মখোয়গী মাইথোংশিংদু ঐহাক্না কৈদৌনুংদা কাওবা ঙম্মোই। ঙসিদি, অয়ূশমান ভারতনা অসিগুম্বা মীওই কয়াগী উপাই অমা ওইরি। ঙৈহাক্কী মমাংদা উৎখিবা ফিল্ম অদুদা লোঞ্চ তৌখিবা তেবল বুক অদুদা ইমা অমসুং ইচে-ইচলশিংগী ৱাখল্লোনশিংবু কুপ্না উৎখি। হৌখিবা চহি ৩দা সরকারনা কায়থখিবা লুপা করোর লিশিং কয়ানা ইমুং লাখ কয়াবু লাইরবগী খয়াত্তগী কনখি। কনা অমত্তনা লাইরনা লৈবা অমত্তা পাম্বা নত্তে, শুবা নোম্বা কন্দুনা লাইরবগী খয়াত্তগী থোক্লক্নবা হোৎনরি, নুংঙিবা পুন্সি মহিং হিংনবা হোৎনদুনা লৈনরি। হয়েং-হংচিত্তা ঙাইরে ৱাগদবা, নুংঙাইরক্লগনি খল্লম্বদু ইমুংদা খঙহৌদবা অনাবা লাকপদগী নিংবা কায়বনা কোংগাইনি। অদুগা, তুং চহি ৫-১০ খুদক্তা তুং হন্দুনা হান্নগুম্না লাইরবগী পুন্সিদা অদুমক তাশিনখিবা ঙাক্তনি। অনাবা য়াওবনা ইমুং পুম্নমকপু লাইরবগী খয়াত্তা অমুক্কা পুরকখিবা ঙাক্তনি। মরম অদুনা, অয়ুশমান ভারতকী মতেংনা, হেল্থকেয়রগা মরী লৈনবা ৱারোইশিন পুম্নমক সরকারনা অদোমগীদমক্তা পুদুনা লাক্লি, মসি লৈবাক্কী ঙসি অমসুং হয়েংগী চাউরবা অমসুং কান্নরবা ইনভেস্তমেন্ত অমনি।

ইচিল ইনাওশিং,

অয়ুশমান ভারত-দিজিতেল মিসন্না পুন্সি মহিং নুংঙাইহনবদা নত্তনা হোস্পিতালগী থবকশিংসু লায়থোকহল্লগনি। হৌজিক্কী ওইনদি, হোস্পিতালদা শিজিন্নরিবা তেক্নোলোজী অসি হোস্পিতালদুদা নত্ত্রগা গ্রুপ অমখক্কী ওইনা লৈ। অনৌবা হোস্পিতাল নত্ত্রগা অনৌবা শহরদা অনাবনা চৎপা মতমদা মহাক্না হান্নগী থবক্তুমক হন্না মাইয়োক্নৈ। দিজিতেল হেল্থ রেকোর্দ লৈতবা মতমদা মহাক্না ফাইলশিংদু চহি চুপ্পা পুদুনা চৎলি। অথু-অনাগী মতমদা মসিগী থবকসি ওইথোকপা য়াদবা তাঞ্জা লাকই। মসিনা মরম ওইদুনা, দাক্তর অমসুং অনাবনা মতম কয়া মাঙনৈ। খুদোংচাদবা হেনগৎলকই অমসুং লাইয়েংবগী শেলসু হেনগৎলকই। মীওই কয়ানা হোস্পিতাল চৎপা মতমদা মেদিকেল রেকোর্দ লোয়ননদনা চৎপসি ঐখোয়না য়াম্না তোইনা উই। অসিগুম্বা তাঞ্জাদা দাক্তরগা তান্নবা, তেস্ত তৌবা খুদিংমক অমুক হন্না পাংথোক্নৈ, পুম্নমক মকোক্তগী হৌই। মেদিকেল হিস্তরী লৈতবনা মতম য়াম্না মাঙনৈ অমসুং শেল তিংবসু হেনগৎলি অমসুং করিগুম্বা মতমদা ওন্ন-তৈননা লাইয়েংবসু য়াওই। মসিদগী খুঙ্গংদা লৈবা মীওইনা অয়াম্বা অৱাবা নঙনৈ। মসিগী মথক্তা, পাও-চেশিংদা দাক্তরগী এদভর্তিজমেন্ত হাপ্নদি নত্তে। দাক্তর অমা ফবা-ফত্তবদি চিনহাইদা চৎপা ঙাক্তনি। করম্বা দাক্তরনা ফৈ, কনানা করম্বা হীরমগী দাক্তরনো, কনাগী মনাক্তা চৎপনা ফগনি, অনকপদা কনা লৈ, য়াম্না থুনা য়ৌগদবনা করম্বনো, কনাগী মরক্তা ফেসিলিতী শুনা লৈ হায়বসি চৎলুবা মীগি চিনহাইদা খঙবা ঙাক্তনি। অসিগুম্বা খুদোংচাদবা কয়া কোকহনবদা অয়ুশমান ভারত দিজিতেল মিসন্না চাউরবা থৌদাং য়াগনি।

মরুপশিং,

অয়ুশমান ভারত – দিজিতেল মিসন্না হৌজিক্তি লৈবাক্কী হোস্পিতাল খুদিংগী দিজিতেল হেল্থ সোল্যুসনশিংবু অমগা-অমগগী মরক্তা শম্নরগনি। মসিগী মখাদা লৈবাক মীয়াম খুদিংনা দিজিতেল হেল্থ আই.দি. অমমম ফংগনি অমসুং মখোয়গী হকশেলগী রেকোর্দশিং অসিসু দিজিতেল ওইনা তেক্ত-কায়দনা থম্লগনি। দিজিতেল হেল্থ আই.দি. লৈবনা অনাবা মশানা অমসুং দাক্তরনা হংলকপা মতমদা হান্নগী অরিবা রেকোর্দ য়েংজবা য়ারগনি। মসিদা নত্তনা, দাক্তর, নর্স, পেরামেদিক্কুম্বা মরুপ-মপাংশিংগী রেজিস্ত্রেসনসু তৌগনি। লৈবাক্কী হোস্পিতাল, ক্লিনিক, হিদাক য়োনবা দুকান খুদিংসু মসিদা রেজিস্তর তৌগনি। মসিনা হায়বদি, দিজিতেল মিসন অসি হকশেলগা মরী লৈনবা স্তেক-হোলদর পুম্নমক্কী মফম অমদা পুনবা অমত্তা ঙাইরবা প্লেৎফোর্ম অমনি।

মরুপশিং,

মিসন অসিনা খ্বাইদগী হেন্না কান্নবা পীগদবসি লাইরবা অমসুং মিদ্দল ক্লাস মীওইশিংনি। শোইদবা খুদোংচাবা অমদি, অনাবা অমনা মহাক্কী লোল ঙাংবা, মহাক্কী লাইনাগী মতাংদা নীংথিনা খঙবা লৈবাক্কী মফম অমা হেক্তদা লৈবা অপাম্বা দাক্তর থিবদা অরাইবা ওইগনি। মসিদগী অনাবা অমনা লৈবাক্কী মফম অমা হেক্তদা লৈবা স্পেসিএলিস্ত অমগা পাউ ফাওনবদা লায়না থোক্কনি। দাক্তর থিবতা নত্তনা, মমুৎ তানা তেস্ত তৌনবা লেব অমসুং হিদাক য়োনফম মশক খঙদোকপদসু য়াম্না লায়না থোক্লগনি।

মরুপশিং,

মসিগী মতমগা চান্নবা প্লেৎফোর্ম অসিদগী লাইয়েংবা অমসুং হেল্থ পোলিসী শেম্বগা মরী লৈনবা ইকোসীস্তেম্না কান্নবা পীবা হান্নদগী য়াম্না হেল্লগনি। দাক্তর অমসুং হোস্পিতালশিংনা প্লেৎফোর্ম অসি শিজিন্নদুনা মশাগী সর্ভিসশিংবু লৈবাক্কী মনুং হঞ্জিনবা মফম খুদিংদা য়ৌহনবদা লায়রগনি। কান্নবা অমসুং থাজবা য়াবা দেতানা তেংবাংদুনা লাইয়েংবগী থৌওং হেন্না ফগৎহন্দুনা মীওই কয়াগী পুন্সি কনবসু ঙম্লগনি।

ইচিল ইনাওশিং,

লৈবাক অসিদা হেল্থ সর্ভিস্পু লাইহনবা অমসুং মীওই খুদিংনা খুদোংচাবা লৌবা ঙমহন্নবা কেম্পেন অমা হৌরে অমসুং থৌওং অসি মমাংগী চহি ৬-৭তগী চত্থরক্লিবা খোঙথাংগী শরুক অমনি। চহি খরা অসিদা হকশেলগা মরী লৈনবা ৱারোল কয়া অমদা ভারতনা অহোংবা পুরকপা ঙম্লে। ভারত্তা হৌজিক পুম্নমক পুন্সিনবা, পুম্নমক্না শরুক য়াগদবা হেল্থ মোদেল অমদা থবক চত্থরি। লাইনা ঙাকথোকপা, হায়বদি প্রিবেন্তিব হেল্থকেয়র, লাইয়েংবদা শেল চঙহন্দবা অমসুং মীপুম খুদিংনা খুদোংচাবা ফংবা য়াবা মখলগী মোদেল অমা। হায়রিবা থৌরাং অসি লাইরবা শিংদা মরু ওইনা কান্নবা পীনবগীদমক্তা হৌদোকপনি। লৈবাক অসিগী হেল্থ ইনফ্রা চাউখৎনবা অমসুং লাইয়েংবগী হেন্না কান্নবা খুদোংচাবশিংবু লৈবাক্কী মফম খুদিংদা ফংহন্নবা অনৌবা হেল্থ পোলিসী অমসু শেম্লি। লৈবাক অসিদা এ.আই.আই.এম.এস. অমসুং মতমগা চান্নবা অতোপ্পা হেল্থ ইন্সতিত্যুসন কয়া অমগী পাক চাউরবা নেৎৱর্ক অমা শাগৎপগা লোয়ননা লোক সভা কন্সতিত্বেন্সী অহুম খুদিংদা মেদিকেল কোলেজ অমা শাগৎপগী থবকসু চত্থরিবনি।

মরুপশিং,

ভারত্তা হকশেলগী খুদোংচাবশিং হেন্না ফগৎহন্নবগীদমক্তা য়াম্না মরি ওইরিবা অসিদি খুঙ্গংদা ফংলিবা মরী লৈনবা খুদোংচাবশিংদা অহোংবা পুরকপনি। খুঙ্গংশিংগী প্রাইমরী হেল্থ সেন্তর নেৎৱর্ক অমসুং ৱেলনেস সেন্তরশিংসু মপাঙ্গল কনখৎহল্লি। অসিগুম্বা সেন্তর লিশিং ৮০ হেনবনা থবক তৌবা হৌখ্রে। মসিগী সেন্তরশিং অসিদা রুতিন চেক-অপ অমসুং তীকা থাবদগী হৌদুনা অরুবা লাইনাগী হৌরকপগী তেস্ত তৌবা অমসুং অতোপ্পা হীরম কয়াগী তেস্ত তৌবগী খুদোংচাবশিং লৈরে। থৌরাং অসিগী পান্দমদি সেন্তরশিং অসিগী খুত্থাংদা মীয়ামদা মরী লৈনবা ই-পাও খহেন্না ঙহনবা অমসুং অরুবা লাইনাশিংবু মতম লৈরিঙৈদা মাংজৌননা খঙদোকপনি।

মরুপশিং,

কোরোনাগুম্বা মালেমগী লাইচৎকী মতমসিদা, মেদিকেল ইনফ্রাস্ত্রকচর শেমগৎ-শাগৎপদা অহেনবা মিৎয়েং চঙলি। লৈবাক্কী জিলাগী হোস্পিতালশিংদা ক্রিতিকেল কেয়র ব্লোক্কী ইনফ্রাস্ত্রকচর শেম-শারি। অঙাংশিং লাইয়েংনবা জিলা অমসুং ব্লোক্কী হোস্পিতালশিংদা অফবা ফেসিলিতী কয়া শেমলি। জিলাগী থাক্তা লৈবা হোস্পিতালশিংদা মশাগী ওক্সীজেন প্লান্তশিংসু শেমগৎলি।

মরুপশিং,

ভারতকী হেল্থ সেক্তরদা অহোংবা পুরক্নবগীদমক্তা মেদিকেল এজুকেসন্দা অহোংবা পুরকপগী য়াম্না তঙাই ফদবা লৈ। মমাংগী মতমগা চাংদম্নবদা, চহি ৭-৮ অসিদা ভারত্তা মশিং য়াম্লবা দাক্তর অমসুং পেরামেদিকেল মেনপাৱর কয়া পুথোকপা ঙম্লে। মেনপাৱরখক নত্তনা, হেল্থকা মরী লৈনবা মতমগা চান্নবা তেক্নোলোজী, বাইওতেক্নোলোজীগা মরী লৈনবা রিসর্চ, হিদাক অমসুং থৌওংশিংদা মরোমদোম লেপচবা ঙম্বগী মতাংদা থবক কয়া মিসন মোদতা পায়খৎলি। কোরোনাগী ভেক্সিন পুথোকপদা ভারতনা উৎখ্রিবা তৌবা ঙম্বগী মতিক অসিনা ঐখোয় পুম্নমকপু চাউথোকচহল্লি। হেল্থকী খুৎলায় অমসুং হিদাশিং শাবগী রো মেতরিএলগী পি.এল.আই. স্কিম্না হীরম অসিদা মরোমদোম লেপচবা ঙমহনবদা অহেনবা পাঙ্গলসু হাপ্লি।

মরুপশিং,

অফবা মেদিকেল পথাপকা লোয়ননা, লাইরবা অমসুং মিদ্দল ক্লাসশিংদা হিদাক লাংথক্তা শেল য়াম্না চঙহন্দবা অসিসু য়াম্না মরু ওইবনি। মরম অদুনা, কেন্দ্র সরকারনা তঙাই ফদবা হিদাক-লাংথক, দাইলাইসিসকুম্বা অতোপ্পা সেবা কয়াসু য়াম্না হোংহল্লে। ভারত্তা শাবা মালেমগী খ্বাইদগী ফবা জেনেরিক হিদাক শিজিন্নবা অমসুং লাইয়েংবদা মখোয়বু খ্বাইদগী হেন্না শিজিন্নবদা ইন্সেন্তিব পীবসু হৌরে। জন ঔশধি কেন্দ্র লিশিং ৮ হেনবনা লাইরবা অসুং মিদ্দল ক্লাস ইমুংশিংগী অৱাবা য়াম্না কোকহল্লে। মফমশিংসিদগী তোয়না হিদাক লৌবা অনাবা খরগা ঐহাক্না ৱারী শাবা ফংলে অমসুং ইমুং খরগী মীওইদি মশাগী চহি অমসুং লাইনানা মরম ওইরগা নুংতিগী হিদাক চাই হায়বসু ঐহাক্না উবা ফংলে। অসিগুম্বা জন ঔশধি কেন্দ্রনা মরম ওইদুনা, মিদ্দল ক্লাস ইমুং কয়া অমদি থা অমদি শেল য়াম্না তিংবদগী কোক্লে অমসুং ইমুং অয়াম্বনা থাদা লুপা লিশিং ২দগী ১৫ ফাওবা কনবা ঙম্নরি।

মরুপশিং,

তান য়াম্না চান্নবা অমনা, ঙসিগী থৌরম অসি মালেমগী তুরিজম নুমিত্তা শিন-লাঙলিবা অসিনি। হেল্থ কেয়র থৌরমগা তুরিজমগা করি মরী লৈনবগে হায়না মীওই খরনদি খনলমগনি। অদুবু মখোয় অনিগী মরক্তা য়াম্না চেৎপা মরী লৈনৈ। ঐখোয়গী সেল্থ ইনফ্রাস্ত্রকচর অসি মপাঙ্গল লৈহল্লবা অমসুং পুন্সিল্লবনিনা, মসিনা তুরিজম সেক্তরবুসু ফগৎহল্লে। লমকোইবা অমনা লাইয়েংবগী খুদোংচাবা নীংথি নুংঙাইনা লৈতবা মফমদা কোইবা চৎনীংগদরা? অদুগা কোরোনা লৈবদগিদি, ৱাফন অসি হেন্না খন্থনীংঙাই ওইরে। ভেক্সিনেসন মশিং য়াম্না লৈবা মফমদা চৎপদা মীয়াম্না শোই-ঙাম্বা কয়া থোক্লোই অমসুং তেক্ত-কায়দবা ওইগনি হায়না খনগনি। ঐখোয়গী লৈবাক্কী ওইনা হিমাচল, উত্তরাখন্দ, গোৱা, সিক্কিম অসি ঐখোয়গী তুরিজমগী মমিং লৈবা মফম্নি অমসুং মফমশিং অসিগা লোয়ননা অন্দমান নিকোবার ইথত্তা ভেক্সিনেসন মশিং য়াম্না পাংথোক্নবা অহেনবা মিৎয়েং চঙলি, মসিগী মরমদি লমকোইবশিংগী ৱাখলদা থাজবা পোকহন্নবনি। লাক্কদৌরিবা চহিশিংদা, থৌরাংশিং অসি হেন্না কনখৎলক্কনি। হেল্থ ইনফ্রা ফবা মফম খুদিংদা, তুরিজমগী খুদোংচাবসু হেন্না লৈগনি। মসিনা হায়বদি, হোস্পিতাল অমসুং হোপ্সিতালিতীনা খুৎশম্নরগা চৎকনি হায়বনি।

মরুপশিং,

ঙসিদি, মালেম্না ভারতকী দাক্তর অমসুং হেল্থ সীস্তেমদা থাজবা থম্লি। মালেমদা ঐখোয়গী লৈবাক্কী দাক্তরশিংনা মমিং অমসুং ইজৎ য়াম্না তাল্লে, ভারতকী মিংবু থাক ৱাংনা থম্লে। মালেমগী মীওই অমদা হেক হংবদা, মখোয়না ঐহাক্কী দাক্তর ওইবা ভারত মচা ইমান্নবা অমা লৈ হায়রক্কনি, মসিনা তাকপদি ভারত অমসুং দাক্তরগা মরী য়াম্না লৈনৈ হায়বনি। ভারত্তা মতিক চাবা ইনফ্রাস্ত্রকচর লৈরবদি, হকশেলগীদমক্তা ভারত্তা লাকপা মী মশিং অসি হেনগৎলকপা নত্তনা অতোপা ওইথোকপা য়াবা ৱাফম অমত্তা লৈতে। ইনফ্রাস্ত্রকচর মতিক চানা লৈত্রবা ফাওবদা, ভারত্তা লাইয়েংবা লাকপগী মশিং ৱাত্তে অমসুং করিগুম্বা মতমদা পুক্নিং নুংশিবা ৱারী কয়া তাবসু ফঙই। য়ুম্লোন্নবা লৈবাক্কী অঙাশিংশিংনা ভারত্তা লাকপা খুদিং, মশা মউ ফরগা হনখিবা ঙাক্তনি।

মরুপশিং,

ঐখোয়গী তীকা থাবগী প্রোগ্রাম, Co-Win তেক্নোলোজী প্লেৎফোর্ম অমসুং ঐখোয়গী ফার্মা সেক্তরনা ভারতকী মিংচৎপু থাক ৱাংনা পুখৎলে। অয়ুশমান ভারত দিজিতেল মিসন্না অনৌবা তেক্নোলোজী পুথোকপা মতমদা, মালেমগী লৈবাক অমা হেক্তগী অনাবনা ভারতকী দাক্তরশিংগা তান্নবা, লাইয়েংবা, মখোয়গী রিপোর্ত থারক্তুনা য়েংহনদুনা পাউতাক লৌবদা য়াম্না লাইহল্লগনি। শম্না হায়রবদা, মসিনা তুরিজমদা অফবা চৈথেং পীগনি হায়বনি।

মরুপশিং,

নীংতম্বগী হরাওবা ফোংদোকপগা লোয়ননা, হকশেল ফবা ভারত অমগী লম্বীনা ভারতকী অনিংবা অপাম্বা ফংবগী য়াম্না চাউবা খোঙথাং অমা ওইগনি। মসিগীদমক্তা ঐখোয় পুম্নমক্না ঐখোয়না হোৎনরিবসি লেপ্তবা তাই। মেদিকেল হীরমগা মরী লৈনবা ঐখোয়গী দাক্তর, নর্স, পেরামেদিক, মেদিকেল ইন্সতিত্যুসনশিংনা মসিগী পথাপ অসিবু নীংথিজনা শিজিন্নগনি হায়বগী ঐহাক্না থাজবা থম্মি। ঐহাক্না লৈবাক পুম্ববু অয়ুশমান ভারত – দিজিতেল মিসনগী য়াইফ পাউজেল পীজরি!!

মীয়াম্বু অমুক্কা হন্না থাগৎচরি!!!

*****