ইকায় খুম্ননীঙাই ওইরবশিং,

ঐহাক্না প্রসিদেন্ত রাহমোনবু অফগানিস্তানদা ওইরিবা ফিভম অসিগী মতাংদা এস.সি.ও. অমসুং সি.এস.তি.ও.গী মরক্তা অখন্নবা মীফম অসি শিনবগীদমক থাগৎপা ফোংদোক্তুনা হৌদোকচগে।

হন্দক্তা অফগানিস্তান্দা লৌখৎখিবা চাউখৎ-থৌরাং অসিনা ঐখোয়গুম্বা য়ুম্লোন্নবা লৈবাক অসিদা য়াম্না চাউনা শাফু পীগনি।

অদুনা, হিরম অসিদা মফমসিগী ওইবা মিৎয়েং চংবা অমসুং মতেং পীনবা অসি মরু য়াম্না ওইরি।

ফিভম অসিদা, ঐখোয়না ৱাফম মরিদা য়াম্না কুপ্না য়েংবা মথৌ তাই।

অহানবা ৱাফমদি অফগানিস্তানদা অহোংবা লাক্লিবা শক্তি অসি মপুং ফাদ্রি অমসুং মসি য়াশিন্নবগী মওং অমা উদ্রি। 

মসিদা অনৌবা সিস্তেম অমা য়াশিন্নবগী ৱাহং অমা থোরক্লি।

নুপী অমসুং অঙাং য়াওনা অফগান মীয়ামগী সেক্সন পুম্বগী মীহুৎশিং মরু ওইরি।

অমসুং মরম অদুনা, অসিগুম্বা অনৌবা সিস্তেম অসিগী ৱারেপ অমসুং মশক খঙবা অসি মালেমগী কাংলুপ পুন্না ৱাখল তানা লৌখৎপা অমা মথৌ তাই।

ভারতনা হিরম অসিদা য়ুনাইতেৎ নেসনগী মরুওইবা থৌদাং কয়া অমদা মতেং পীরি।

অনিশুবদা, অফগানিস্তানগী ফিভম অসিদা তং তাদবা অমসুং ফন্দামেন্তালিজম লৈরবা, মসিনা মালেম পুম্বদা তেরোরিস্ত অমসুং এক্সত্রিমিস্তকী আইদোলোজীদা পুক্নিং থৌগৎলগনি।

অতোপ্পা  এক্সত্রিমিস্তশিংগী কাংলুপসু হিংসা তৌদুনা শক্তি লৈননবা হোৎনরক্কনি।

হৌখিবা থৌদোক কয়াদা ঐখোয়গী লৈবাক পুম্বা তেরোরিজমগী ভিক্তিম ওইদুনা লাকখিবনি।  

মরম অদুনা, ঐখোয় পুন্না অফগানিস্তানগী মফম অসিদগী অতৈ অতোপ্পা লৈবাকশিংদা তেরোরিজম শন্দোক্তনবা হোৎনগদবনি। এস.সি.ও. মেম্বর লৈবাকশিংনা হিরম অসিদা য়াম্না চেকশিনবা অমসুং য়ান্নবা চৎনবী অমা শেমগৎকদবনি।

মতুংদা, মসিগী নোর্ম অসিনা মালেমগী ওইবা এন্তি-তেরর কোওপরেসন্দা তেমপ্লেৎ অমা ওইগনি।

হায়রিবা অসিনা কোদ ওফ কন্দক্ত ওইদুনা থৌওংশিং হায়বদি ঙম্খৈ লানশিনবা তেরোরিজম অমসুং তেরর ফাইনান্সিংদগী ঙাকথোক্কনি অমসুং মখোয়গী এনফোর্সমেন্তগী সিস্তেম অমা লৈগনি।

ইকায় খুম্ননীঙাই ওইরবশিং,

অহুমশুবা ৱাফম অসিনা অফগানিস্তান্দা থিংবা ঙমদনা চৎথরিবা দ্রগশিং, আইন্না য়াদবা খুলায়শিং অমসুং মী ললোনবা অসিগা মরী লৈনরি।

অফগানিস্তান্দা ফর-ফরবা খুলায় মশিং খঙদনা লৈরি।  মরম অসিদা মফম অসিদা তং-তাদবগী খুদোংথিনিঙাই য়াম্না লৈরি।

এস.সি.ও.গী আর.এ.তি..এস. মেকানিজম্না হায়রিবা থবকশিং অসি য়েংশিনবা অমসুং ই-পাউ পীবদা থৌদাং কয়া অমা লৌবা য়াই।

থা অসিগী ওইনা, ভারতনা এস.সি.ও.-আর.এ.তি.এস.গী কাউন্সিলগী চেয়র লৌরি।

মরিশুবা ৱাফম্না অফগানিস্তান্দা মীওইবগী হক খোঙ্গাওনরিবা অসিনি।

ফাইনান্সিএল অমসুং ত্রেদ ফ্লোদা অকাইবা লাকপনা অফগান মীওইশিংগী ইকোনোমীগী ওইবদা শোকপা হেনগৎলক্লি।  

মরক অসিদা, কোবিদকী লায়চৎনা মখোয়না হেন্না অৱাবা অমা মায়োক্নরি।

ভারত অসি চাউখৎ থৌরাং অমসুং মীওইবগী মতেং পীনবদা চহি কয়া অমগী অফগানিস্তানগা মরী লৈনরক্লি। ইনফ্রাস্ত্রকচরদগী হৌরগা এজুকেসনগী সেক্তর খুদিংদা, ঐখোয়না অফগানিস্তানগী মফম কয়াদা ঐখোয়গী মতেং পীরি।

ঙসিসু, ঐখোয়না অফগানগী ইচিল-ইনাওশিংদা চান-থক্নবা অমসুং হিদাক লাংথক পীনিংবা লৈরি।

ইকায় খুম্ননীঙাই ওইরবশিং,

অফগান অমসুং ভারতকী মীওইশিংনা চহি চা কয়া অমদগী অখন্নবা মরী লৈনরি।

ভারতনা অফগানগী মীয়াম্বু মতেং পীনবা মফম খুদিং অমসুং মালেম অসিনা লৌখৎলিবা খোঙথাং খুদিংদা অঙম্বা মতেং পীগনি।

থাগৎচরি!

দিসক্লেমর: মসি পি.এম.না পীবা ৱারোলগী চাওরাক্না হন্দোকপনি। অশেংবা ৱারোলদি হিন্দিদা পীখিবনি।

***