ইকায় খুম্ননীংঙাই ওইরবশিং,

খুরুমজরি !

অহানবমক্তাদা, ঐহাক্না রাস্ত্রপতি রাহমোনবু এস.সি.ও. কাউন্সিলগী মাই পাক্লবা প্রসিদেন্সীগীদমক্তা থাগৎপা ফোংদোকচরি। তাজিক রাস্ত্রপতি অসিনা শিংননীংঙাই ওইরবা মালেমগী অমসুং লমদমসিগী অকোয়বগী ফিভমদা লুপ অসিবু নীংথিজনা শেন্নবীরি। তাজিকিস্তানগী নীং-তম্বগী হন্দক্কী ৩০শুবা চহি অসিদা, ঐহাক্না ভারতকী মহুৎ শিন্দুনা তাজিক ইচিল ইনাওশিং অমসুং রাস্ত্রপতি রাহমোনগী মফমদা থম্মোই শেংনা থাগৎপা অমসুং য়াইফ পাউজেল পীজরি।

ইকায় খুম্ননীংঙাই ওইরবশিং,

হন্দক্কী চহিসিদা ঐখোয়না এস.সি.ও.গী ২০শুবা কুমওনসু পাংথোক্লি। অসিগুম্লবা য়াইফরবা পুংফম অসিদা অনৌবা মরুপশিংনা ঐখোয়গী মরক্তা তিল্লকপা অসি য়াম্না নুংঙাইরবা ৱাফম অমনি। ঐহাক্না ইরানবু এস.সি.ও.গী অনৌবা মেম্বর অমা ওইনা তরাম্না ওকচরি। ঐহাক্না অনৌবা দাইলোগ পার্তনর- সাউদি অরাবিয়া, ইজিপ্ত অমসুং কতারবুসু তরাম্না ওকচরি। এস.সি.ও.না পাকথোক চাউথোকপা অসিনা ঐখোয়গী লুপকী ইথিল শন্দোকপা হেনবগী ফিভম্বু মীয়ামদা উৎলি। এস.সি.ও.না অনৌবা মেম্বর অমসুং দাইলোগ পার্তনর য়াওরকপগা লোয়ননা মপাঙ্গল লৈবা অমসুং মীয়াম্না থাজবা হেনগৎলক্লগনি।

ইকায় খুম্ননীংঙাই ওইরবশিং,

এস.সি.ও.গী ২০শুবা মপোক কুমওন অসি এস.সি.ও.গী তুংগী খনবগী চানরবা পুংফম অমসু ওইরি। হীরম অসিগী মতাংদা থেংনরিবা খ্বাইদগী চাউবা শিংনবশিংদি তংদু লৈতানা লৈবা, ঙাক-শেল অমসুং থাজবা ৱাৎপগী থৌওংশিংগা মরী লৈনৈ অমসুং অসিগুম্বা পামদবা থৌদোকশিংগী খ্বাইদগী মরু ওইবা মরমদি রেদিকেলাইজেসন তৌবা হেনগৎলকপনি হায়না ঐহাক্না থাজৈ। অফগানিস্তান্দা হৌজিক থোক্লিবা থৌদোকশিং অসিনা ৱাফম অসিবু হেন্না ময়েক শেংহল্লে। হীরম অসিগী মতাংদা এস.সি.ও.না খোংথাং খরা লৌখৎফম থোকই।

ঐখোয়না পুৱারীদা য়েংলুরগদি, ময়াই থংবা এসিয়াগী লমদম অসি কা হেন্না হকচিন্দবা, প্রোগ্রেসিব কলচর অমসুং ভেল্যুগী তুংফম্নি হায়বা উগনি। সুফিগুম্বা নাৎ অসি চহি চা কয়াদগী মফম অসিদগী চাউখত্তুনা লমদমসিদা অমসুং মালেম পুম্বদা শন্দোক্লিবনি। মসিগী মমি অসি লমদমসিগী নাৎকী হেরিতেজতা ঙসিসু উবা ফংলি। ময়াই থংবা এসিয়াগী অসিগুম্লবা পুৱারী ওইরবা হেরিতেজতা য়ুম্ফম ওইদুনা, এস.সি.ও.না রেদিকেলাইজেসন অমসুং এক্সত্রিমিজম থেংননবা অমত্তা ওইবা থৌওং অমা শেম্বগী তঙাই ফদবা লৈ।

ভারত অমসুং SCOগী মেম্বর লৈবাক অয়াম্বদা, ইস্লামগা মরী লৈনবা কা হেন্না হকচিন্দবা, খাঙবা কনবা অমসুং পুম্নমক্না শরুক য়াবা ইন্সতিত্যুসন অমসুং চৎনবী লৈ। SCOনা মখোয়গী মরকসিদা অকনবা নেৎৱর্ক অমা শেমগৎনবা হোৎনগদবনি। মতাং অসিদা, ঐহাকনা SCO-RATS মেকানিজম্না পাংথোক্লিবা কান্নরবা থবকশংবু থাগৎলি। ঐখোয়না ঐখোয়গী এস.সি.ও. পার্তনরশিংনা ভারতকী SCO-RATS প্রসিদেন্সীগীদমক্তা শেমগৎলিবা থবক থৌরম কয়াগী কেলন্দরশিংদা থৱাই য়াওনা শরুক য়াগনি হায়বগী থাজবা থম্লি।

ইকায় খুম্ননীংঙাই ওইরবশিং,

রেদিকেলাইজেসনগা লান্থেংনবা অসি লমদমসিগী ঙাক-শেল অমসুং ঐখোয় মশেলগী মরক্তা লৈরিবা থাজনবগীদমক্তা তঙাই ফদবতা নত্তনা, ঐখোয়গী তুংগী চারোল-শুরোনগী অফবা মতম অমা শেম্বগী ওইনসু য়াম্না তঙাই ফদে। চাউখৎপা মালেম অসিগা চাংদম্নবা ঙম্নবগীদমক্তা, ঐখোয়গী লমদম অসিসু হৌগৎলক্লিবা তেক্নোলোজীগী শরুক অমা ওইবা তাবনি। মসিগীদমক্তা ঐখোয়না ঐখোয়গী হৈ-শিংলবা নহাশিংবুসু সাইন্স অমসুং কাংলোন চুম্না ৱাখল খনবগী মাইকৈদা পুক্নিং থৌগৎপা তাবনি।

অসিগুম্বা ৱাখল্লোন অমসুং অনৌবা পাংথোকপগী ইথিলবু ঐখোয়গী নহা ওইরিবা ওন্তোপ্রিনর্শিং অমসুং স্তার্ত-অপশিংবু শম্নহন্দুনা খুমাং চাউশিলহনবা ঙমগনি। অসিগুম্বা থৌওং অসিগা লোয়ননা, ভারতনা মমাংগী চহিদা অহানবা এস.সি.ও. স্তার্ত-অপ ফোরম অমসুং নহা ওইরিবা সাইন্তিস্তশিংগী কনফরেন্স অমা শিন লাঙখি। মমাংগী চহি কয়াদসু, ভারতনা মশাগী চাউখৎপগী খোঙচত্তা তেক্নোলোজীবু মাই পাক্না শিজিন্নখি। 

শেল থুমগী থৌওংশিংবু মীয়াম খুদিংনা শরুক য়াবা হেনগৎহন্নবগীদমক্তা য়ু.পি.আই. অমসুং রুপে কার্দকুম্বা তেক্নোলোজী ওইরো, কোবিদকা লান্থেংনবদা ঐখোয়গী কোৱিনগুম্বা দিজিতেল প্লেৎফোর্ম ওইরো, পুম্নমক অসিবু ঐখোয়না অতোপ্পা লৈবাকশিংগসু শিজিন্নমিন্নরি। ঐখোয়না অসিগুম্বা ওপন সোর্স তেক্নোলোজীশিংবু ঐখোয়গী এস.সি.ও. খোঙলোইশিংগা শিজিন্নমিন্নবা অমসুং মসিগীদমক্তা কেপাসিতী বিলদিংগী থৌওং শিনবদা নুংঙাইবা পোকই।

ইকায় খুম্ননীংঙাই ওইরবশিং,
 

মিনরেলগী লন-থুম নত্ত্রগা ইন্ত্রা-এস.সি.ও. ত্রেদ ওইরো, লমদম অসিগী পাক চাউরবা তৌবা ঙম্বগী মতিকশিং অসি রেদিকেলাইজেসন অমসুং ইন্সেক্যুরিতীনা মরম ওইদুনা শিজিন্নবা ঙমদনা লৈরি। মসিগী মপুং ফাবা কান্নবা লৌগে হায়রবদি, ঐখোয়না ঐখোয় মশেলগী পাউ-ফাওনবা অমসুং শম্নবগী হীরমদা মিৎয়েং চঙবা তাবনি। পুৱারীগী মতমদা, ময়াই থংবা এসিয়াগী থৌদাংদি চাউরবা লমদম অনিগী চাউরবা কৈথেলগী মরক্তা শম্ননবা থোং অমা ওইদুনা লাক্লিবনি। মসিনা লমদম অসিগী নুংঙাই য়াইফবগী য়ুম্ফম অমা ওইদুনসু লাক্লি। ভারতনা ময়াই থংবা এসিয়াগা শম্নবা হেনগৎহন্নবা খোঙফম চেৎলি।

কংফালগী লম্না কোইশিনবা ময়াই থংবা এসিয়ানা ভারতকী চাউরবা কৈথেলগা শম্নদুনা খুদোংচাবা কয়া ফংবা য়াগনি হায়না ঐখোয়না থাজৈ। অদুবু, ঐখোয় মশেলগী মরক্তা থাজবা ৱাৎপনা, শম্নবগী খুদোংচাবা কয়াদি লৌনদনা লাক্লি। ঐখোয়না ইরানগী চাবাহর হিথাংফমদা শেল থাদবা অমসুং ইন্তর্নেস্নেল নোর্থ-সাউথ কোরিদোরগীদমক্তা ঐখোয়না কন্না হোৎনরিবা অসি হায়রিবা অচুম্বা ৱাফমশিং অসিনা ইথিল পীবনি।

ইকায় খুম্ননীংঙাই ওইরবশিং,

অমগা অমগা শম্নবগী থৌওং অসি মাইকৈ অমক্তনা হোৎনরগা ওইথোক্কদবা নত্তে। অসিগুম্বা শম্নবগী থবকশিং অসিদি তাথোক তাশিন তৌমিন্নবা, নুং-পান ফাওনা উবা অমসুং শরুক য়ামিন্নদুনা ঐখোয় মশেলগী মরক্তা থাজবা হেনগৎহন্দুনা ওইথোক্কদবনি। হীরম অসিগী মতাংদদি, লমদম অমগী অপুনবগী শক্তম্বু ইকায় খুম্নবা অসি য়াম্না তঙাই ফদবনি। ৱাখল্লোনশিং অসিদা য়ুম্ফম ওইদুনা, এস.সি.ও.না লমদম অসিগী মরক্তা পাও ফাওনবগী ফিভম লৈহন্নবগীদমক্তা, চুনবা কাঙলোন অমা শেমগদবনি।

পুম্নমক অসি পাংথোক্লবা মতুংদা, ঐখোয়না লমদম অসিদা নাৎকী ওইনা শম্নরম্বা অদু অমুক হন্না পুরকপা ঙমগনি অমসুং মদুগী মতুংদতা কন্নেক্তিভিতী প্রোজেক্তশিংনা ঐখোয়গী মরক্তা লৈরিবা অরাপ্পবু হেনগৎহনবগী মহুত্তা ঐখোয়বু হেন্না নকশিন্নহনবগী থৌওং ওইথোক্কনি। মসিবু ওইথোকহন্নবগীদমক্তা, ভারতকী মাইকৈদগী পাংথোকপা য়াবা থবক খুদিংমক তৌনবা ঐখয়না শেম শাদুনা লৈরি।

ইকায় খুম্ননীংঙাই ওইরবশিং,

এস.সি.ও.না মাই পাকপগী মরমশিংগী মরক্তা অমা ওইরিবদি, মসিনা লমদম অসিগী তঙাই ফদবশিংদা অহেনবা মিৎয়েং চঙবা অসিনি। ঐহাক্না রেদিকেলাইজেসন, কন্নেক্তিভিতী অমসুং মীয়ামগী মরক্তা লৈনবা মরীগী মতাংদা ফোংদোক্লিবা ঐহাক্কী অনীঙবা অসিনা এস.সি.ও.গী থৌদাংশিংবু মপাঙ্গল হেন্না লৈহনগনি। ঐহাক্না লোইশিন্দ্রিঙৈদা, ঐখোয়গী হোস্ত, রাস্ত্রপতি রাহমোনবু অমুক্কা হন্না থাগৎচরি।

মসিগী হাইব্রিদ ফোর্মেৎ অসিগী শিংনবশিং অসি লৈদুনসু, মহাক্না সম্মিৎ অসিবু মাই পাক্না শিন-লাঙদুনা মাই পাকহল্লি। ঐহাক্না উজবেকিস্তানবু মথংগী এস.সি.ও. চেয়র্মেন ওইনা য়াইফ পাউজেল পীরি অমসুং ভারতকী তেংবাং মপুং ফানা লৈগনি হায়বগী থাজবা পীজরি।

থাগৎচরি!

দিস্ক্লেমরঃ ৱারোল অসি পি.এম.না হিন্দিদা ঙাংখিবা ৱারোলগী চাউরাকপা পাউদম অমনি। অশেংবা ৱারোলদি হিন্দিদা ঙাংবনি।

***