গুৱাহাতিদা ভারত সরকারগী তুরিজম মন্ত্রালয়না শিনখিবা অৱাং-নোংপোক রাজ্যশিংগী তুরিজম অমসুং কল্চর মন্ত্রীশিংগী নুমিৎ নিনিগী ওইবা কনফরেন্স অদু ঙসি মাই পাক্না লোইশিনখি৷ কনফরেন্স অদু ঙরাং তুরিজম, কল্চর অমদি দোনরগী কেন্দ্রগী মন্ত্রী, শ্রী জি. কিশন রেদ্দী অমসুং অসামগী মুখ্য মন্ত্রী, শ্রী হিমন্ত বিস্বা শর্মনা হৌদোকখি৷

কল্চর অমসুং পার্লিয়ামেন্তরী এফিয়র্সকী কেন্দ্রগী রাজ্য মন্ত্রী, শ্রী আর্জুন রাম মেঘৱাল, তুরিজম অমসুং দিফেন্সকী কেন্দ্রগী রাজ্য মন্ত্রী, শ্রী অজে ভাতসু কনফরেন্স অদু হৌদোকপগী সেসনদা শরুক য়াখি৷

নুমিৎ নিনিগী কনফরেন্স অদুগী অনিশুবা নুমিৎতা ভারত সরকারগী তুরিজম মন্ত্রালয়গী সেক্রেতরী, শ্রী আর্বিন্দ সিংহনা ৱা ঙাংলদুনা, অৱাং-নোংপোক লমদম অসি চাওখৎননবগীদমক কেন্দ্র সরকারনা পাইখৎলিবা প্রোজেক্তশিং অমসুং ইনিসিয়েতিব কয়ামরোমগী মরমদা শরুক য়ারিবা মীওইশিংদা খঙহনদুনা কনফরেন্স অসি মাই পাক্না লৌইশিনখ্রে হায়না ফোংদোকখি৷ অৱাং-নোংপোক্কী রাজ্য কয়ানা তোঙান তোঙানবা অখন্নবা ইনিসিয়েতিবশিং পাইখৎখ্রে অমসুং শরুক য়ারিবা রাজ্যশিংনা এক্সপরিয়েন্সশিং সেয়র তৌরকখিবা অসি য়াম্না পুক্নিং থৌগৎনিংঙাইনি হায়না মহাক্নসু ফোংদোকখি৷

স্বাদেশ দর্শন অমসুং প্রসাদ স্কিমগী মখাদা সেঙ্কসন তৌখিবা প্রোজেক্তশিংগী প্রোগ্রেস অদু কনফরেন্স অদুগী নিনিশুবা নুমিৎতা খন্নখি৷

হিরম অসিগী মতাংদা খন্ন-নৈনরদুনা, মন্ত্রালয় অসিনা অৱাং-নোংপোক লমদমদা প্রোজেক্ত ১৬ সেঙ্কসন তৌখ্রে হায়না পল্লদুনা স্বাদেশ দর্শন স্কিমগী মখাদা, তুরিজম দিপার্তমেন্তনা থীম-বেজ তুরিস্ত সর্ক্যুইতশিংগী ইন্তিগ্রেতেদ দিভেলপমেন্তদা মীৎয়েং থম্লি হায়না এদিস্নেল দাইরেক্তর জেনেরেল, শ্রীমতি রুপিন্দর ব্রারনা ফোংদোকখি৷ মন্ত্রালয় অসিনা অৱাং-নোংপোক লমদমদা ইনফ্রাস্ত্রকচর, গ্রাউন্দ কেপাসিতী শেমগৎনবা অমসুং স্কিলশিং হৈহন্নবা অখন্নবা মীৎয়েং চংলি হায়না মহাক্না মখাতানা ফোংদোকখি৷ তুরিজম মন্ত্রালয়না তোঙান তোঙানবা স্কিমশিং অমসুং ফ্লেগশিপ ইনিসিয়েতিবশিংগী খুৎথাংদা অৱাং-নোংপোক লমদমদা ব্রান্দিং অমসুং মার্কেতিংগী ওইবা মতেংসু পীরি হায়না মহাক্না ফোংদোকখি৷

সেসন অদুদা ভারত সরকারগী তুরিজম মন্ত্রালয়গী জোইন্ত সেক্রেতরী, শ্রী রাকেশ কুমার ভর্ম অমসুং অৱাং-নোংপোক রাজ্যশিংগী অতোপ্পা দেলিগেতশিংসু শরুক য়াখি৷

*****