প্রধানমন্ত্রীগী লোইশঙ

ভারতকী স্পোর্তসকী পুৱারীদা তোকিও পেরালিম্পিক্সনা মতম চুপ্পদা অখন্নবা মফম অমা কনদুনা লৈহৌরগনি: পি.এম.

ভারতনা মেদলশিং মশিং য়াম্না লৌরকখিবা অসিনা ঐখোয়গী থমোয়বু হরাও-নুংঙাইবনা থলহনখি: পি.এম.

পি.এম.না জপানগী সরকার অমসুং মীয়াম্না পীখিবা থোইদোক-হেন্দোক্তা হোস্পিতেলিতীগীদমক্তা মখোয়বু থাগৎপা ফোঙদোকখ্রে

Posted On: 05 SEP 2021 4:38PM by PIB Imphal

প্রধান মন্ত্রী, শ্রী নরেন্দ্র মোদীনা ভারতকী স্পোর্তসকী পুৱারীদা তোকিও পেরালিম্পিক্সনা মতম চুপ্পদা অখন্নবা মফম অমা কনদুনা লৈহৌরগনি হায়না ফোঙদোকখ্রে। ঐখোয়গী কন্তিঞ্জেন্তগী মেম্বর খুদিংমক চেম্পিয়ন ওইরি অমসুং ইথিল ফাওহন্নবগী হৌরকফম অমা ওইরি হায়না মহাক্না হায়খ্রে।

প্রধান মন্ত্রীনা ঐখোয়গী শান্নরোয়শিংগী কোচশিং, সপ্পোর্ত স্তাফ অমসুং ইমুং-মনুংশিংনা শান্নরোয়শিংদা লেপ্তনা শৌগৎখিবগীদমক থাগৎপা ফোঙদোকখ্রে। মহাক্না জপানগী মীয়ামবু, অখন্ননা তোকিও অমসুং জপানগী সরকারবু মখোয়না পীখিবা থোইদোক-হেন্দোকপা হোস্পিতেলিতী, অপীকপা হীরমশিংদা মীৎয়েং চংবীখিবা অমসুং খ্বাইদগী মথৌ তারিবা অখাং কনবা অমসুং অমত্তা ওইবগী পাউজেল অসি ওলিম্পিক্সকী খুদাংদা শন্দোকখিবা অসিগীদমক থাগৎপা ফোঙদোকখ্রে।

মথং-মথং তৌখিবা ত্বিতশিংদা প্রধান মন্ত্রীনা হায়খি;

“ভারতকী স্পোর্তসকী পুৱারীদা, তোকিও #Paralympicsনা মতম চুপ্পগী ওইনা অখন্নবা মফম অমা কনদুনা লৈহৌরগনি। গেম্স অসি ভারত মচা খুদিংমক্কী ৱাখল্দা কাওঙমদনা লৈহৌরগনি অমসুং তুংদা হৌরক্কদবা শান্নরোয়শিংগী মীরোলশিংনা স্পোর্তস শান্নবা ইথিল পীরগনি। ঐখোয়গী কন্তিঞ্জেন্তগী মেম্বর খুদিংমক চেম্পিয়ন অমনি অমসুং ইথিল পোকহন্নবগী হৌরকফমনি।

ভারতনা মেদলশিং মশিং য়াম্না লৌরকখিবা অসিনা ঐখোয়গী থমোয়বু হরাও-নুংঙাইবনা থলহনখি। ঐখোয়গী শান্নরোয়শিংগী কোচশিং, সপ্পোর্ত স্তাফ অমসুং ইমুং-মনুংশিংনা শান্নরোয়শিংদা লেপ্তনা শৌগৎখিবগীদমক থাগৎচরি। ঐখোয়গী মাইপাকপশিং অসিনা য়ুম্ফম ওইদুনা স্পোর্তসতা হেন্না শরুক য়াবা ঙমগনি হায়না ঐখোয়না থাজবা থম্লি।

ঐহাক্না মমাংদা হায়খিবা অদুগুম্না জপানগী মীয়ামবু, অখন্ননা তোকিও অমসুং জপানগী সরকারবু মখোয়না পীখিবা থোইদোক-হেন্দোকপা হোস্পিতেলিতী, অপীকপা হীরমশিংদা মীৎয়েং চংবীখিবা অমসুং খ্বাইদগী মথৌ তারিবা অখাং কনবা অমসুং অমত্তা ওইবগী পাউজেল অসি ওলিম্পিক্সকী খুদাংদা শন্দোকখিবা অসিগীদমক থাগৎফম থোকই।”

***



(Release ID: 1752340) Visitor Counter : 52