نئی دہلی،  2 ستمبر 2021،    اسٹیٹ بینک آف انڈیا ، گوہاٹی کے ڈی جی ایم جناب سشانت کمار ساہوکے مطابق  بھارت میں مالیاتی شمولیت  کے حقیقی سفر کا آغاز 2014 میں اس وقت ہوا جب پردھان منتری جن دھن یوجنا  (پی ایم جے ڈی وائی)  اور دیگر متعلقہ اسکیمیں شروع کی گئیں۔ انہوں نے یہ بات پردھان منتری جن دھن یوجنا کے آغاز کی ساتویں سالگرہ پر منعقدہ ایک وبینار سے خطاب کرتے ہوئے  کہی۔ اس ویبینار کا انعقاد آج پریس انفارمیشن بیورو نے  کیا تھا۔

مالیاتی شمولیت کا ذکر کرتے ہوئے جناب ساہو نے کہا کہ  مالیاتی شمولیت  خصوصی طور پر  قرض، سرمایہ کاری، بیمہ اور پنشن سے متعلق مختلف  مالیاتی  اسکیموں کے ذریعہ  معاشرے کے  معاشی طور پر کمزور طبقے کو  قابل اعتماد  مالیاتی حل فراہم کراتی ہے۔انہوں نے بتایا کہ آسام میں پی ایم جے ڈی وائی اسکیم کے تحت  ریکارڈ تعداد میں بینک کھاتے کھولے گئے۔ جون 2021 تک  پچاس لاکھ  گھروں  نے ریاست میں  ایک کروڑ 90 لاکھ پی ایم جے ڈی وائی کھاتے کھلوائے۔ انہوں نے اپنے خطاب میں دیگر اسکیموں مثلاً  پی ایم جیون جیوتی بیمہ  اور اٹل پنشن یوجنا کی کامیابی کے بارے میں بھی بتایا۔

جناب ساہو نے  مختلف اضلاع اور بلاک کی سطح کے تمام متعلقین مثلاً سرکاری افسروں اور این جی اوز سے درخواست کی کہ وہ اس پروگرام میں اچھے طریقے سے شرکت کریں تاکہ  مالیاتی شمولیت کا پروگرام  عوام کے سب سے نچلے طبقے تک پہنچ سکے اور  یہ تحریک کامیاب ہوسکے۔

اسٹیٹ بینک آف انڈیا، ایل ایچ ایم، کولکاتا کی ڈی جی ایم  محترمہ کوہو گانگولی نے ویبینار سے خطاب کرتے ہوئے  بتایا کہ  سکم میں اب تک  86000 جن دھن کھاتے کھولے گئے ہیں۔ اس کو ایک بڑی کامیابی قرار دیتے ہوئے انہوں نے کہا کہ  جن دھن یوجنا کے فائدے  دور دراز کے علاقوں اور پہاڑی علاقوں تک پہنچے ہیں جس سے  عوام کے تمام طبقات کو فائدہ پہنچا ہے۔

سکم سینٹرل یونیورسٹی میں  کامرس کے محکمے کے سربراہ پروفیسر ایس ایس مہا پاترا  نے  پی ایم جے ڈی وائی  کے ضمن میں  ملک  میں مالیاتی شمولیت اور  اقتصادی ترقی  کے بارے میں بتایا ۔ انہوں نے کہا کہ  سات سال کی چھوٹی سی مدت میں  بھارت میں بہت سی تبدیلیاں ہوئی ہیں  اور مالیاتی شمولیت کا ایکو سسٹم  مستحکم ہوا ہے اور اب  یہ غریب سے غریب آدمی تک  مالیاتی  خدمات فراہم کرانے کی صلاحیت رکھتا ہے۔ جناب مہا پاترا نے مزید کہا کہ  کووڈ ۔ 19 کے دوران  آتم نربھر پیکیج کی وجہ سے   تمام بہبودی اسکیموں کے لئے  لوگوں نے  جن دھن کو ایک  چینل کے طور پر دیکھا۔

 دینک پورودے  کے ایڈیٹر جناب روی شنکر روی نے اپنی رائے کا اظہار کرتے ہوئے کہا کہ پی ایم جے ڈی وائی کی وجہ سے ہمارے ملک میں  اب  بالکل نچلی سطح کی آبادی کے لئے بھی  بینک کھاتہ کھلوانا مشکل نہیں رہا ہے ۔ اس اسکیم کے تحت حکومت نے  ایسے لوگوں کو   بینک تک رسائی  فراہم کرائی ہے جن کے لئے بینک کھاتے کھولنا مشکل رہا ہے۔

پی آئی بی کے میڈیا اینڈ کمیونی کیشن افسر  جناب گوپا جیت داس نے  استقبالیہ خطبہ دیا اور  ویبینار کی نظامت   پی آئی بی گوہاٹی کی میڈیا  اینڈ کمیونی کیشن آفیسر محترمہ سوچیرا ساہو نے کی۔ آج اس ویبینار میں  شمال مشرقی خطے  سے  پریس انفارمیشن بیورو کے  فیلڈ آفیسز اور  رینجل آؤٹ ریچ بیورو کے شرکا نے  حصہ لیا۔

۔۔۔۔۔۔۔۔۔۔۔

ش ح۔ا گ۔ن ا۔

U-8578