ভারত্তা তশেংবা ফাইনান্সিএল ইক্লুজনগী খোঙচৎ অসি ইং কুমজা ২০১৪দা প্রধান মন্ত্রী জন ধন য়োজনা (পি.এম.জে.দি.ৱাই.) অমসুং অতৈ মরী লৈনবা স্কীমশিং হৌদোকখিবা মতমদগী হৌখি, হায়না স্তেৎ বেঙ্ক ওফ ইন্দিয়া, গুৱাহাতিগী দি.জি.এম. ওইরিবা শ্রী সুশান্তা কুমার সাহোনা প্রধান মন্ত্রী জন ধন য়োজনা হৌদোকখিবগী চহি ৭ শুরকপগী কুমওন পালন তৌবা ওইনা পাঙথোকখিবা ৱেবিনার অমদা ৱা ঙাংবদা ফোঙদোখি। ৱেবিনার অসি ঙসি প্রেস ইনফোর্মেসন ব্যুরো, গুৱাহাতিনা শিনখিবনি।

ফাইনান্সিএল ইনক্লুজনগী মতাংদা ৱা ঙাংলদুনা শ্রী সাহোনা হায়খি ফাইনান্সিএল ইনক্লুজন্না ক্রেদিত, ইনভেস্তমেন্ত, ইন্সুরেন্স অমসুং পেন্সনগা মরী লৈনরিবা তোঙান-তোঙানবা ফাইনান্সিএল প্রদক্তশিংগী খুত্থাংদা শেন্মীৎলোনগী ফীভমদা শোত্থরবা খুন্নাই অসিগী কাংলুপতা থাজবা য়াবা মপুং ওইনা ফাইনান্সিএল সোল্যুসন পীরি। মহাক্না হায় অসামদা পি.এম.জে.দি.ৱাই. স্কীমগী মখাদা রেকোর্দ ওইনা বেঙ্ক একাউন্ত মশিং য়াম্না হাংখি। ২০২১গী জুন ফাওবদা, রাজ্য অসিদা য়ুমথোং লাখ ৫০ লৈবদা পি.এম.জে.দি.ৱাই.গী একাউন্ত করোর ১ লাখ ৯০ হাংখি হায়না মহাক্না ফোঙদোকখি। মহাক্কী ৱারোল পীবদা পি.এম. জীবন জ্যোতি বীমা য়োজনা অমসুং অতল য়োজনা পেন্সনগুম্বা অতৈ স্কীমশিংসু মাই পাকপগী মতাংদা মহাক্না পাউদমখি।

ফাইনান্সিএল ইনক্লুজন প্রোগ্রাম অসিনা খ্বাইদগী শোত্থরিবা মীওই কাংলুপতা য়ৌহন্নবা অমসুং খোঙথাং অসি মাইপাকপা ঙম্নবগীদমক্তা অফবা মওংদা প্রোগ্রাম অসিদা তোঙান-তোঙানবা জিলা অমসুং ব্লোক লেবেলদা মথৌ তৌরিবা সরকারগী ফঙ্কসনরীশিং অমসুং এন.জি.ও.শিং অসিগুম্বা স্তেকহোল্দর পুম্নমক্তা শরুক য়ান্নবা শ্রী সাহোনা ফোঙদোকখি।

ৱেবিনার অসিদা ৱা ঙাংলদুনা স্তেৎ বেঙ্ক ওফ ইন্দিয়া, এল.ঐচ.এম., কোলকাতাগী দি.জি.এম. শ্রীমতি কুহু গঙ্গুলিনা ঙসি ফাওবদা সিক্কিমদা জন ধন একাউন্ত লিশিং ৮৬ হাংখ্রে হায়না ফোঙদোকখি। মসিবু অচৌবা মাইপাকপা অমনি হায়না ফোঙদোক্লদুনা মহাক্না জন ধন য়োজনা অসিনা মীওই কাংলুপ পুম্নমক্তা কান্নবা ফংহনদুনা অরাপ্পা অমসুং চিংনুং মনুংদা লৈবা মফমশিংদা কান্নবা ফংহনবা ঙমখ্রে হায়না ফোঙদোকখি।

সিক্কিম সেন্ত্রেল য়ুনিভর্সিতীগী কম্মর্সকী ঐচ.ও.দি. ওইরিবা প্রোফেসর এস.এস. মহাপত্রানা পি.এম.জে.দি.ৱাই.গী মতাংদা খন্ননা পল্লদুনা লৈবাক অসিগী ফাইনান্সিএল ইনক্লুজন অমসুং শেন্মীৎলোনগী চাউখৎ-থৌরাংগী মতাংদা ৱা ঙাংখি। মহাক্না হায়খি অতেনবা চহি তরেৎকী মতমগী মনুংদা ভারত্তা অহোংবা কয়া উবা ফংখি অমসুং ফাইনান্সিএল ইনক্লুজন ইকোসিস্তেম অসি হেন্না মপাঙ্গল কনখৎখি অমসুং হৌজিক্তি মসিনা লায়রবশিংগী খ্বাইদগী লায়রবদা ফাইনান্সিএল সর্ভিসশিং ফংহনবা ঙম্লে। কোবিদ-১৯ মনুংদা আত্মনির্ভর পেকেজনা মীয়ামদা জন ধন অসি য়াইফ-থৌরাংগী স্কীম পুম্নমক্কী চেনেল অমা ওইনা উহনখি হায়না শ্রী মহাপত্রানা মখা তাখি।

দাইনিক পুর্ভোদৈগী ইদিতর, শ্রী রভি শঙ্কর রভিনা পি.এম.জে.দি.ৱাই.না মরম ওইদুনা ঐখোয়গী লৈবাক্তা লৈরিবা শোত্থরবা কাংলুপকী মীওইশিংনা বেঙ্ক একাউন্ত অমা হাংবদা হৌজিক্তি অৱাবা ওইদ্রে হায়না মহাক্কী ৱাখল্লোন ফোঙদোকখি। স্কীম অসিগী মখাদা সরকারনা বেঙ্কশিংদা একাউন্তশিং হাংবদা অৱাবা মায়োক্নরম্বশিং অদুদা খুদোংচাবা পীখি।

পি.আই.বি.গী মেদিয়া অমসুং কম্ম্যুনিকেসন ওফিসর, শ্রী গোপাজিৎ দাসনা তারম্না ওকপগী ৱারোল পীখি অমসুং ৱেবিনার অসি পি.আই.বি., গুৱাহাতিগী মেদিয়া অমসুং কম্ম্যুনিকেসন ওফিসর,শ্রীমতি সুচারিতা সাহোনা মোদরেৎ তৌখি। ঙসিগী ৱেবিনার অদুদা অৱাং-নোংপোক থংবা লমদমদগী, প্রেস ইনফোর্মেসন ব্যুরো অমসুং রিজনেল আউতরীচ ব্যুরোগী ফিল্দ ওফিসশিংগী পার্তিসিপেন্তশিংনা শরুক য়াখি।

****