উপ রাস্ত্রপতি, শ্রী এম. ভেঙ্কায়া নাইদুনা ঙসি জেনেরেল ওইনা মেদিকেল কাংলুপ অমসুং ইন্দিয়ন মেদিকেল এসোসিএসন্দনা মপুং ওইনা কোবিদ-১৯গী মায়োক্তা ভেক্সিন কাপ্পবগী মরুওইবগী মতাংদা মীয়ামদা অখন্নবা পাউজেল পীনবা তকশিনখ্রে।

কর্নাতকাগী সরকারনা গীব ইন্দিয়া ফাউন্দেসনগা খুৎশম্নদুনা সস্তেনেবল গোল কোওর্দিনেসন সেন্তরগী খোঙথাং অমা ওইনা ‘ভেক্সিনেৎ ইন্দিয়া প্রোগ্রাম’ হৌদোক্লদুনা, উপ রাস্ত্রপতিনা হায় মদুদি, মফম খরদা ভেক্সিন কাপ্পদা চিংনবা উবা ফংই। হৌজিক ফাওবা চিংনবা লৈরিবা মখোয়দা নিংথিনা তাকপি-তম্বিবা অমসুং পাউজেল কয়া পীবগী মথৌ তারি।

কোবিদ ভেক্সিনেসন অসি ‘জন-অন্দোলন’ হায়না ওন্থোক্নবা হায়রদুনা, শ্রী নাইদুনা মীয়ামগী ওইবা মীহুৎশিংদা মখোয়গী কন্সতিতুয়েন্সীদা মীয়াম্বু শোইদনা ভেক্সিন কাপথোকহন্নবা হায়খ্রে। মহাক্না পাউমীশিংদা মীয়াম্না ভেক্সিন্দা চিংনবা লৈরিবা অসি নিংথিনা তাকপিবা অমা মথৌ তাই হায়না তকশিনখি। “অরানবা থাজবশিং লৌথোক্তুনা চপ চাবা পাউ পীনবা,” হায়না মরুওইবা পীখি।

ভেক্সিনেসন অসিনা কোবিদ-১৯ ঙাকথোক্নবা খ্বায়দগী ফবা চুঙ্গোইনি হায়রদুনা, উপ রাস্ত্রপতিনা হায় মদুদি মসিনা হোস্পিতাল চৎপা হন্থহনবদা মতেং ওইগনি অমসুং লায়না অসিনা য়াম্না শাথিনা নাহনবদগী হন্থহনগনি। “অতোপ্পা ৱাহৈ অমদা, ভাইরস অসিনা চংলবা ফাওবদা লায়না অসি ময়াই চমগনি”, হায়না মহাক্না মখা তাখি।

লৈবাক অসিদা কোবিদতগী ফগৎলকপগী চাং অসি চাদা ৯৭.৬ য়ৌরিবা অসি পল্লদুনা, মহাক্না চেকশিন্নবা হায়খি ““ঐখোয় হৌজিকসু অৱাফমদগী থোক্লক্ত্রি অমসুং মীপুম খুদিংমক কোবিদকা মরী লৈনবা প্রোতোকোলশিং অমসুং প্রিক্বেসনশিং পুম্বা মখা তানা চৎথবা মথৌ তারি”।

কোরোনাভাইরসকী লান্থেংনবা অসি মীয়ামগী মতেং য়াওদনা মায় পাকপা ঙম্লোই হায়না মরুওইবা পীদুনা, শ্রী নাইদুনা মীয়াম্বু মাস্ক উপ্পা, তোইনা খুৎ-শা হাম্বা, মী অমগা অমগগী মরক্তা থাপ্না লৈনবা আপিল তৌখি। মহাক্না নহারোলশিংদা জঙ্ক ওইবা চিঞ্জাক চাদনবা অমসুং ঐখোয়গী হকচাং অমসুং অইং অশাগা চুনবা নিংথিনা থোং-থাক্লবা ভারতকী ওইবা চাক-এঞ্ছাং চা-থক্নবা আপিল তৌখি।

উপ রাস্ত্রপতিনা হায়খি লায়চৎ অসিনা অহানবদা সহরদগী খুঙ্গং ফাওবদা লৈরিবা হেলথ ইনফ্রাস্ত্রকচরগী অহোবা অসি মেনশিন্নবা মিৎয়েং অমা থম্নবগী তঙাইফদবা পুরক্লি। হায়রিবা অসিদা শোৎথরবা অমসুং মনুং চংশিন্না লৈরিবা মফমশিংদা পুক্নিং চংবগী মরুওইবা পীরদুনা মহাক্না লনাইগী সেক্তরশিংদা হেলথ ইনফ্রাস্ত্রকচর হেনগৎনবা সরকারনা হোৎনরিবা অসিদা খুৎশম্ননা চৎমিন্নবা কন্না তকশিনখি।

মতমগা ইরোইননা খুমাং চাউশিল্লিবা অমসুং হেন্না ফবা মেদিকেলগী খুদোংচাবা লৈরিবা লৈবাকশিং ফাওবনা কোবিদ-১৯গী ক্রাইসিস অসি লাকশিনবা ঙমদ্রি হায়বা পল্লদুনা, উপ রাস্ত্রপতিনা হায়খি মদুদি ভারত সরকার, রাজ্য সরকার অমসুং য়ুনিয়ন তেরিতোরিশিংনা লৈবাক অসি কোবিদ-১৯ খরমখৈদি লাকশিনবা ঙম্লি।

ভারত সরকার অমসুং রাজ্য পুম্বনা কন্না হোৎনদুনা কোবিদ-১৯গী মায়োক্তা তিকা কাপথোক্নবা কন্না হোৎনরিবা অসিদা থাগৎপা ফোংদোক্লদুনা, লৈবাক অসিগী ওইনা হৌজিক ফাওবদা ভেক্সিন দোজ কোতি ৫৮ কাপথোকখিবা অসিদা নুঙাইবা ফোংদোকখি।

মহাক্না গিব ইন্দিয়া ফাউন্দেসনবু সরকারগী মতেং পাংবগীদমক থাগৎপা ফোংদোকখি।

কর্নাতকাগী গবর্নর, শ্রী থৱার্চান্দ গেহলোৎ, কর্নাতকাগী মুখ্য মন্ত্রী, শ্রী বসাবরাজ বোম্মাই, কর্নাতকাগী মন্ত্রী, দাঃ কে. সুধাকর অমসুং শ্রী মুনিরথনা, পার্লিয়ামেন্তকী মেম্বর, শ্রী পি.সি. মোহন, এদ্দিসনেল চীফ সেক্রেতরী, দাঃ শালিনি রাজনীশ অমসুং গিব ইন্দিয়া ফাউন্দেসনগী ফাউন্দর, শ্রী অতুল সতিজানা থৌরম অসিদা শরুক য়াখি।

মপুং ফাবা ৱারোল মখাদা পীরি

“ঐহাক্না কর্নাতকা সরকারগী, প্লানিং দিপার্তমেন্তগা গিব ইন্দিয়া ফাউন্দেসনগা লোয়ননা লৌখৎপা খোঙথাং অমা ওইরিবা ‘ভেক্সিনেৎ ইন্দিয়া প্রোগ্রাম’, অসিনা লৈবাক অসিদা লৈরিবা লায়রবা অসি মুথৎনবগী পান্দমদা মীওই অমা ওইনা অমসুং ওর্গানাইজনশিংনা ফন্দ দোনেৎ তৌবা ঙমহনবা অসিদা য়াম্না নুঙাইজৈ।

অদোম্না খঙবিরিবা অদুম্না, ভারত সরকার, রাজ্য সরকার অমসুং য়ুনিয়ন তেরিতোরিশিংনা লোয়ননা স্তেকহোল্দর, মরুওইনা হেলথকেয়র পর্সোনেল অমসুং সাইন্তিস্তশিংনা লৈবাক অসি কোবিদ-১৯ খরমখৈদি লাকশিনবা ঙম্লি। লাইবক থিবদি, হৌজিক ফাওবদা মীওই লাখ ৪.৩গী পুন্সি লায়চৎ অসিনা শোকহনখ্রে।

লায়চৎ অসিনা হেক থোক্লপকদগী মসিনা মালেম অসিবু নিক্লি। মতমগা ইরোইননা খুমাং চাউশিল্লিবা অমসুং হেন্না ফবা মেদিকেলগী খুদোংচাবা লৈরিবা লৈবাকশিং ফাওবনা কোবিদ-১৯গী ক্রাইসিস অসি লাকশিনবা ঙমদ্রি। মসিনা মালেমদা ইকোনেমী, পুন্সি অমসুং পুন্সি মহিংদা য়াম্না শাথিনা শোকহল্লি।

লায়চৎ অসিবু অঙম্বা উপায় পুথোক্তুনা লান্থেংনরবসু, তঙাইফদবা ভেক্সিন দোজ কাপথোকপিবা, মাস্ক উপ্পা, তোইনা খুৎ-শা হাম্বা, মী অমগা অমগগী মরক্তা থাপ্না লৈনবা অমসুং লু-নান্না লৈবা অসিনা ঐখোয় পুম্বগী তঙাইফদনা তৌগদবা ওইরি।

অশেংবা ভারতকী তীমগী ওইবা ইথিলদা, ভারত সরকার অমসুং রাজ্য পুম্বনা কন্না হোৎনদুনা কোবিদ-১৯গী মায়োক্তা তিকা কাপথোক্নবা কন্না হোৎনরি। লৈবাক অসিগী ওইনা হৌজিক ফাওবদা ভেক্সিন দোজ কোতি ৫৮ কাপথোকখিবা অমসুং মীওই কোতি ১৩ মপুং ফানা কাপথোকপা অসিদা নুঙাইবা ফাওজৈ। ‘গিবইন্দা’ গুম্বা ওর্গানাইজেসন্না সরকার অসিনা হোৎনরিবা অসিদা মতেং পাংবিরককিদমক থাগৎপা ফোংদোকচরি।  

হৌজিক ফাওবদা তিকা থাখিবা অসি থাগৎনিঙাই ওইরবসু, ঐখোয়না ভেক্সিনেসনগী খোঙজেল অসি য়াংখৎহনবা মথৌ তারি। অঙাংশিংগী ভেক্সিনশিং পাইপলাইন্দা লৈরে তাবদা য়াম্না নুঙাইজৈ। মশীং য়াম্লবা অহল্লোলশিংনা অহানবা অমসুং অনিশুবা দোজ কাপখ্রে, ঐখোয়না হৌজিক কোবিদ-১৯ লাকশিনবদা খ্বায়দগী ফবা মফমদা লৈরে।

নুংশিজরবা ইচিল-ইনাওশিং,

ভেক্সিনেসন অসিনা কোবিদ-১৯ লান্থেংনবদা খ্বায়দগী ফবা চুঙ্গোইনি হায়বা হৌজিক ঐখোয়না খঙলে। মসিনা লায়না অসি মপুং ফানা ঙাকথোকপা ঙমদ্রবসু, ভেক্সিনেসন অসিনা হোস্পিতালদা য়ৌবা অমসুং য়াম্না কন্না নাবদগী কনবা ঙমগনি। অতোপ্পা ৱাহৈ অমদা, ভাইরস অসিনা চংলবসু য়াম্না কন্না নাহল্লোই।

কোরোনাভাইরসকী লায়চৎ অসিনা হিরম খুদিংদা মমাংদা অমুক্তা থোকখিদ্রিবা ফিভম অমা ওইহল্লি হায়বা ঐখোয়না নিংশিংগদবনি। ঐখোয় হৌজিক অৱাফমদগী নান্থোক্ত্রী অমসুং ঐখোয় পুম্বনা কোবিদকা মরী লৈনবা প্রোতোকোল অমসুং লৌখৎফম থোকপা লৌখৎখিগদবনি।

লৈবাক অসিদা ফখিবগী চাং অসি চাদা ৯৭.৬য়ৌখিবা অসিদা খর শাফরে অমসুং থা খরগী মমাংদা ওইখিবা নাখিবা অমসুং অশি-অনাগী পাউ হন্থরক্লি। অদুবু, হৌজিক লায়থোকপা য়াদ্রি। ঐখোয়না চেকশিনবা অসি হন্থবা য়াদ্রি। অদুগা, মফম খরদা তিকা থাবা অসিদা চিংনবা খর লৈরি হায়বা অসিমদি উবা ফংলে। হায়রিবা চিংনরিবা মখোয় অসি নিংথিনা তাকপিদুনা অমসুং পাউজেল কয়া অমা পীবিদুনা তিকা থাবা অসি মরুওই হায়বা খঙহনগদবনি। য়ুনিভর্সেল ভেক্সিনেসন অমসুং কোবিদকা চুনবা চৎপনা লায়চৎ অসিবু লান্থেংনবদা য়াম্না মরু ওই হায়বসি নিংশিংবিগদবনি।

মেদিকেল কাংলুপ অমসুং মপুং ওইনা ইন্দিয়ন মেদিকেল এসোসিএসন্দনা কোবিদ-১৯গী মায়োক্তা ভেক্সিন কাপ্পবগী মরুওইবগী মতাংদা মীয়ামদা অখন্নবা পাউজেল পীনবা ঐহাক্না হায়জরি। মেদিয়াশিংসু মীয়াম্বু নিংথিনা তাকপি-তম্বিদুনা ভেক্সিন অসি অকাইবা করি অমত্তা লৈতে হায়বা খঙহনগদবনি। অচুম্বা পাউ পীদুনা অরানবা ৱাখলশিং থাদোকহনগদবনি।

হান্না পনখিবা অদুম্না, লায়চৎ অসিনা অহানবদা সহরদগী খুঙ্গং ফাওবদা লৈরিবা হেলথ ইনফ্রাস্ত্রকচরগী অহোবা অসি মেনশিন্নবা মিৎয়েং অমা থম্নবগী তঙাইফদবা পুরক্লি। হায়রিবা অসিদা শোৎথরবা অমসুং মনুং চংশিন্না লৈরিবা মফমশিংদা পুক্নিং চংবগী মরুওইরি। লনাইগী সেক্তরশিংদা হেলথ ইনফ্রাস্ত্রকচর হেনগৎনবা সরকারনা হোৎনরিবা অসিদা খুৎশম্ননা চৎমিন্নবা হায়জরি।

ঐহাক্না ঐখোয়গী সাইন্তিস্ত, ফার্মা কম্পনীশিং, এন্ত্রেপ্রিন্যুরশিং, দোক্তরশিং অমসুং ভেক্সিন অসি পুথোকপদা ফাস্ত ত্রেক্কিংদা ওতোরিতী ওইরিবশিংদা হরাওবা ফোংদোকচরি, অমদি পি.পি.ই. সেনিতাইজর, ফেসিএল মাস্ক অমসুং অতৈ মচাকশিং অসি আত্মানির্ভর ভারতকী অশেংবা ইথিলনি।

সমাজ অসিদা লৈরিবা তোল্ল-তারবশিংদা কোবিদ-১৯গী ভেক্সিন অসি ফংহন্নবা হোৎনবদা ‘গিব ইন্দিয়া’গা খুৎশম্নরিবা দোনর অমসুং ওর্গানাইজেসনশিংবু ঐহাক্না অমুক্কা হন্না থাগৎচবা ফোংদোকচরি।

*****