ଦେଶରେ ଯେଉଁ ୧୦ଟି ରାଜ୍ୟରେ ଏବେ କରୋନା ସଂକ୍ରମଣ ସ୍ଥିତି ଅଧିକ ରହିଛି ତାହାର ସମୀକ୍ଷା କେନ୍ଦ୍ର ସ୍ୱାସ୍ଥ୍ୟ ସଚିବ ଶ୍ରୀ ରାଜେଶ ଭୂଷଣଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ଆଜି କରାଯାଇଛି । ସେହି ରାଜ୍ୟଗୁଡିକ ହେଲା ଓଡିଶା, କର୍ଣ୍ଣାଟକ, ମହାରାଷ୍ଟ୍ର, ତାମିଲନାଡୁ, କେରଳ, ଆସାମ, ମିଜୋରାମ, ମେଘାଳୟ, ଆନ୍ଧ୍ରପ୍ରଦେଶ ଓ ମଣିପୁର । ଏସବୁ ରାଜ୍ୟରେ କରୋନା ସଂକ୍ରମଣକୁ ରୋକିବା ଏବଂ ସ୍ଥିତିକୁ ତଦାରଖ କରିବା ପାଇଁ ସମ୍ପୃକ୍ତ ରାଜ୍ୟ ସରକାର ଯେଉଁସବୁ ପଦକ୍ଷେପ ନେଇଛନ୍ତି ଏହି ବୈଠକରେ ତାହାର ସମୀକ୍ଷା କରାଯାଇଥିଲା । ଏହି ଦଶଟି ରାଜ୍ୟରେ ସଂକ୍ରମଣ ବଢୁଛି ଅଥବା ନୂଆ ରୋଗୀଙ୍କ ସଂଖ୍ୟା ବୃଦ୍ଧି ପାଉଥିବା ଜଣାପଡିଛି ।

ଏହି ସମୀକ୍ଷା ବୈଠକରେ ଆଇଇସିଏମ୍‌ଆର୍‌ର ମହାନିର୍ଦ୍ଦେଶକ ତଥା ଡିଏମ୍‌ଆର୍ ସଚିବ ଡକ୍ଟର ବଳରାମ ଭାର୍ଗବ ମଧ୍ୟ ଉପସ୍ଥିତ ଥିଲେ । ସମ୍ପୃକ୍ତ ରାଜ୍ୟର ତଦାରଖକାରୀ ଅଧିକାର ଓ ବିଶିଷ୍ଟ ସ୍ୱାସ୍ଥ୍ୟ ଅଧିକାରୀଗଣ ଏଥିରେ ଭାଗ ନେଇଥିଲେ ।

ବୈଠକରେ କେନ୍ଦ୍ର ସ୍ୱାସ୍ଥ୍ୟ ସଚିବ ସମ୍ପୃକ୍ତ ରାଜ୍ୟଗୁଡିକରେ କରୋନାର ମୁକାବିଲା ପାଇଁ ନିମ୍ନଲିଖିତ ବିଷୟଗୁଡିକ ଉପରେ ଗୁରୁତ୍ୱ ଦେଇଥିଲେ । ସେଗୁଡିକ ହେଲା: 

 ୧) ସମ୍ପୃକ୍ତ ରାଜ୍ୟଗୁଡିକର ଯେଉଁସବୁ ଜିଲ୍ଲାରେ ଗତ କେତେସପ୍ତାହ ଧରି ସଂକ୍ରମଣହାର ୧୦ଶତାଂଶରୁ ଅଧିକ ରହିଛି, ସେଠାରେ ନିୟନ୍ତ୍ରଣ ଓ ନିରାକରଣ ବ୍ୟବସ୍ଥାକୁ କଡାକଡି ପାଳନ କରାଯିବ । ସେଥିପାଇଁ ଭିଡ / ଗହଳି ଏଡାଇବା, ଲୋକଙ୍କ ଅବାଧ ଆତଯାତକୁ ରୋକିବା ସହିତ କରୋନା ନିୟମ ପାଳନରେ କୌଣସି ଢିଲା ଦିଆଯିବ ନାହିଁ ।

୨) ଏସବୁ ରାଜ୍ୟରେ ୮୦ଭାଗରୁ ଅଧିକ ସଂକ୍ରମିତଙ୍କୁ ନିଜ ଘରେ  ଏକାନ୍ତ ବାସରେ ରଖାଯାଇଥିବା ଜଣାପଡିଛି । ଯେଉଁମାନେ ନିଜ ଘରେ ରହି ଚିକିତ୍ସିତ ହେଉଛନ୍ତି ସେମାନଙ୍କର ଚିକିତ୍ସା ଓ ସ୍ୱାସ୍ଥ୍ୟାବସ୍ଥା ପ୍ରତି ଅଧିକ ସତର୍କ ଦୃଷ୍ଟି ଦେବାକୁ ହେବ । କୌଣସି ପରିସ୍ଥିତିରେ ସେମାନେ ଅନ୍ୟମାନଙ୍କ ସହିତ ଯେପରି ନ ମିଶନ୍ତି, ସେଥିପ୍ରତି ସତର୍କ ଦୃଷ୍ଟି ଦେବାକୁ ପଡିବ । ଆଖାପାଖ ଅଂଚଳ, ନିଜ ଗାଁ, ପଡା, ୱାର୍ଡ ଓ ଗୋଷ୍ଠୀରେ ସଂକ୍ରମିତ ଯେପରି ନ ବୁଲନ୍ତି ତାହା ଉପରେ ତୀକ୍ଷ୍‌ଣ ଦୃଷ୍ଟି ରଖାଯିବ ।

୩) ଯେଉଁମାନେ ଘରେ ଏକାନ୍ତ ବାସରେ ଚିକିତ୍ସିତ ସେମାନଙ୍କ ସ୍ୱାସ୍ଥ୍ୟ ଉପରେ ସତର୍କ ଦୃଷ୍ଟି ରଖିବାକୁ ପଡିବ । ଯଦି କାହାର ଅବସ୍ଥା ବିଗିଡିଗଲା, ତାଙ୍କୁ ତୁରନ୍ତ ହସ୍‌ପିଟାଲରେ ଭର୍ତ୍ତି କରିବାର ବ୍ୟବସ୍ଥା ହେବ । ଉତ୍ତମ ସ୍ୱାସ୍ଥ୍ୟସେବା ଯୋଗାଇବାରେ କୌଣସି ତ୍ରୁଟି ଯେପରି ନ ରହେ ତାହାକୁ ସୁନିଶ୍ଚିତ କରିବାକୁ ପଡିବ । ସଂକ୍ରମଣ ଅଧିକ ଥିବା ରାଜ୍ୟଗୁଡିକରେ କୋଭିଡ ହସ୍‌ପିଟାଲ ପରିଚାଳନା ଉପରେ ଅଧିକ ଗୁରୁତ୍ୱ ଦେବାକୁ ହେବ ।

୪) ଯେଉଁ ଜିଲ୍ଳାରେ ସଂକ୍ରମଣ ହାର ୧୦ଶତାଂଶରୁ କମ୍ ସେଠାରେ ଟିକାକରଣ ଓ ଟେଷ୍ଟିଂ ପ୍ରକ୍ରିୟାକୁ ତ୍ୱରାନ୍ୱିତ କରାଯିବ । ସେହିଭଳି ଯେଉଁ ସବୁ ଜିଲ୍ଲାରେ ସଂକ୍ରମଣ ପ୍ରବଣ ଲୋକଙ୍କ ସଂଖ୍ୟା ଅଧିକ ସେଠାରେ ମଧ୍ୟ ଟିକାକରଣ ଓ ଟେଷ୍ଟିଂ ପ୍ରକ୍ରିୟାକୁ ଗୁରୁତ୍ୱ ଦେବାକୁ ପଡିବ । ଏସବୁ ଜିଲ୍ଳାରେ ଟିକାକରଣ ଓ ଚିକିତ୍ସା ବ୍ୟବସ୍ଥା ସମ୍ପର୍କରେ କେନ୍ଦ୍ର ସରକାରଙ୍କୁ ଆଗୁଆ ୧୫ଦିନିଆ ସମ୍ଭାବ୍ୟ କାର୍ଯ୍ୟକ୍ରମର ରିପୋର୍ଟ ସମ୍ପୃକ୍ତ ରାଜ୍ୟମାନେ ପଠାଇବେ । ସେହି ରିପୋର୍ଟ ଅନୁସାରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଅପେକ୍ଷା ଟିକା ଓ ଅନ୍ୟାନ୍ୟ ସହାୟତା ଯୋଗାଇବେ । ଆବଶ୍ୟକତା ଅନୁସାରେ ଏସବୁ ରାଜ୍ୟମାନଙ୍କୁ ସ୍ୱାଭାବିକ ଟିକା ଯୋଗାଣ ବାହାରେ ଅତିରିକ୍ତ ଟିକା ଅନୁସାରେ ଯୋଗାଇ ଦିଆଯିବ ।

୫) ଗତ ଦୁଇମାସ ଧରି କେନ୍ଦ୍ର ସରକାର ରାଜ୍ୟମାନଙ୍କୁ ଅକ୍ସିଜେନ କନ୍‌ସେନଟ୍ରେଟର, ଅକ୍ସିଜେନ ସିଲିଣ୍ଡର ଓ ପିଏସ୍‌ଏ ପ୍ଲାଣ୍ଟ ଆଦି ଯୋଗାଇ ଆସୁଛନ୍ତି । ଏହା ସହିତ ସରକାରୀ ହସ୍‌ପିଟାଲରେ ପିଏସଏ ପ୍ଲାଣ୍ଟ ବସାଇବାକୁ ରାଜ୍ୟ ସରକାରମାନେ ନିଜସ୍ୱ ସମ୍ବଳ ବିନିଯୋଗ କରୁଛନ୍ତି । ଘରୋଇ ହସପିଟାଲରେ ପିଏସ୍‌ଏ ପ୍ଲାଣ୍ଟମାନ ପ୍ରତିଷ୍ଠା କରିବାକୁ ଆବଶ୍ୟକ ନିର୍ଦ୍ଦେଶାବଳୀ ଦେବାକୁ ରାଜ୍ୟମାନଙ୍କୁ ପରାମର୍ଶ ଦିଆଯାଇଛି । କ୍ଲିନିକାଲ ପ୍ରତିଷ୍ଠାନ ଆଇନ ବଳରେ ଏହି ନିର୍ଦ୍ଦେଶ ଜାରି କରିବାକୁ କୁହାଯାଇଛି । ଯେଉଁ ସବୁ ରାଜ୍ୟ ସରକାର ଏଥିପାଇଁ ନିର୍ଦ୍ଦେଶାନାମା ଜାରି କରିସାରିଛନ୍ତି , ତାହା ପାଳିତ ହେଉଛି କି ନାହିଁ ସେକଥା ଦେଖିବାକୁ କୁହାଯାଇଛି  ।

            ବୈଠକରେ ଆଇସିଏମ୍‌ଆରର ମହାନିର୍ଦ୍ଦେଶକ କହିଥିଲେ ଯେ ଏବେ ଦେଶରେ ଦୈନିକ ସଂକ୍ରମଣ ପ୍ରାୟ ୪୦ହଜାର ରହୁଛି ।  ସେଥିରୁ ଦେଶର ୪୬ଟି ଜିଲ୍ଲାରେ ଏହି ସଂକ୍ରମଣ ହାର ୧୦ଶତାଂଶରୁ ଅଧିକ । ଏହାଛଡା ୫୩ଟି ଜିଲ୍ଲାରେ ସଂକ୍ରମଣ ହାର ୫ରୁ ୧୦% ମଧ୍ୟରେ ରହିଛି । ତେଣୁ ସମ୍ପୃକ୍ତ ରାଜ୍ୟ ସରକାରମାନେ ଟେଷ୍ଟିଂ ସୁବିଧାକୁ ଅଧିକ ବଢାଇବାର ଆବଶ୍ୟକତା ରହିଛି । ସବୁ ରାଜ୍ୟଙ୍କୁ ନିଜର ରାଜ୍ୟସ୍ତରୀୟ ସେରୋ ସର୍ଭେ ଜିଲ୍ଲାୱାରୀ କରିବାକୁ ପରାମର୍ଶ ଦିଆଯାଇଛି । ଜାତୀୟସ୍ତରରେ ଯେଉଁ ସେରୋସର୍ଭେ କରାଯାଉଛି ସେଥିରେ ରାଜ୍ୟ ରାଜ୍ୟ ମଧ୍ୟରେ ତଥ୍ୟର ତାରତମ୍ୟ ରହୁଥିବାରୁ ସବୁ ରାଜ୍ୟ ନିଜର ସେରୋ ସର୍ଭେ କରିବାକୁ କୁହାଯାଇଛି । ଏହି ସର୍ଭେ ଆଇସିଏମ୍‌ଆର ସହଯୋଗରେ ଆବଶ୍ୟକ ମାର୍ଗଦର୍ଶିକା ଅନୁସାରେ କରିବାକୁ ପଡିବ ।

ଏହା ବ୍ୟତୀତ ୬୦+ ଏବଂ ୪୫ରୁ ୬୦ବର୍ଷ ବୟସ ବର୍ଗର ଲୋକେ କରୋନାରେ ଅଧିକ ୮୦% ମରୁଥିବାରୁ ଏହି ବର୍ଗର ଲୋକଙ୍କ ଟିକାଦାନ ପ୍ରକ୍ରିୟାକୁ ଅଧିକ ଗୁରୁତ୍ୱ ଦେବାକୁ ରାଜ୍ୟମାନଙ୍କୁ କୁହାଯାଇଛି । ଅନାବଶ୍ୟକ ଯାତ୍ରା, ଭିଡ, ଜନଗହଳି ଆଦିକୁ ଯଥାସମ୍ଭବ ରୋକିବାକୁ ଡାକ୍ତର ଭାର୍ଗବ ରାଜ୍ୟମାନଙ୍କୁ ପରାମର୍ଶ ଦେଇଛନ୍ତି ।

ଏହି ବୈଠକରେ ଅତ୍ୟଧିକ ସଂକ୍ରମିତ ଜିଲ୍ଲାଗୁଡିକର ତଥ୍ୟାବଳୀ ଉପସ୍ଥାପିତ କରାଯାଇଥିଲା । ଏଥିରେ ଟିକା ଦେଇଥିବା ଲୋକଙ୍କ ସଂଖ୍ୟା, ଭେଣ୍ଟିଲେଟରଗୁଡିକ ସ୍ଥିତି, ପିଏସ୍‌ଏ ପ୍ଲାଣ୍ଟ, ଅକ୍ସିଜେନ ସିଲିଣ୍ଡର ଓ କନସେନଟ୍ରେଟର ଆଦି ବିଷୟରେ ତଥ୍ୟ ଉପସ୍ଥାପିତ ହୋଇଥିଲା । ଆନ୍ତର୍ଜାତିକ ଯାତ୍ରୀଙ୍କ ସ୍କ୍ରିନିଂ ପାଇଁ ‘ଇନ୍‌ସାକଗ୍‌’ ଲାବରେଟେରୀ ନେଟୱାର୍କ ବ୍ୟବହାର କରିବାକୁ ରାଜ୍ୟମାନଙ୍କୁ ପରାମର୍ଶ ଦିଆଯାଇଛି । ବାହାର ଦେଶରୁ ନୂଆ ପ୍ରକାରର ଭୂତାଣୁ ଯେପରି ଭାରତରେ ପ୍ରବେଶ ନ କରେ  ସେଥିପାଇଁ ତଦାରଖ ବ୍ୟବସ୍ଥାକୁ ସୁଦୃଢ କରିବାକୁ ରାଜ୍ୟମାନଙ୍କୁ କୁହାଯାଇଛି ।

ଏହା ବ୍ୟତୀତ ରାଜ୍ୟମାନଙ୍କୁ ନିମ୍ନ ପଦକ୍ଷେପମାନ ନେବାକୁ ପରାମର୍ଶ ଦିଆଯାଇଛି ।

ସେଗୁଡିକ ହେଲା -

• କଣ୍ଟଣ୍ଟେମେଣ୍ଟ ବ୍ୟବସ୍ଥାକୁ ବ୍ୟାପକ କରି କ୍ଲଷ୍ଟର ଭିତ୍ତିକ ତଦାରଖ ପ୍ରକ୍ରିୟା ତ୍ୱରାନ୍ୱିତ କରି ନୂଆ ସଂକ୍ରମଣ ରୋକିବାକୁ ହେବ ।
• ସଂକ୍ରମଣ ଘଟଣା ଏବଂ ସଂକ୍ରମିତଙ୍କ ସଂସ୍ପର୍ଶରେ ଆସିଥିବା ଲୋକଙ୍କ ତଥ୍ୟକୁ ନେଇ କଣ୍ଟଣ୍ଟେମେଣ୍ଟ ଜୋନର ସୀମା ସରହଦ ନିର୍ଦ୍ଧାରିତ ହେବ ।
• ଇସିଆର୍‌ପି-11 ର କାର୍ଯ୍ୟକାରିତା ପାଇଁ ନିୟମିତ ସମୀକ୍ଷା କରି ସ୍ୱାସ୍ଥ୍ୟ ଭିତ୍ତିଭୂମିକୁ ମଜବୁତ କରିବାକୁ ପଡିବ । ଗ୍ରାମାଞ୍ଚଳ ଓ ଶିଶୁ ସ୍ୱାସ୍ଥ୍ୟ କ୍ଷେତ୍ରରେ ଆବଶ୍ୟକ ଚିକିତ୍ସା ସୁବିଧା ପ୍ରତି ଧ୍ୟାନ ଦେବାକୁ ହେବ ।
• ସବୁ ରାଜ୍ୟକୁ ଆଇସିଏମ୍‌ଆର୍ ନିର୍ଦ୍ଦେଶାବଳୀ ଅନୁସାରେ କୋଭିଡ ମୃତକଙ୍କ ସଂଖ୍ୟା ଗଣନା କରିବାକୁ ପଡିବ ।

*****

TM / SLP