নহারোলশিংগী থঔরম অমসুং শান্ন-খোৎনবগী কেন্দ্র মন্ত্রী শ্রী কিরন রিজিজুনা নই দিল্লীদা পাঙথোকপা ওলিম্পিক দেগী থৌরমদা তোকিয়ো ২০২০ ওলিম্পিক গেম্সতা শরুক য়াগদবা ভারতকী ওলিম্পিক তীমগী ওফিসিএল থিম ঈশৈ ফোঙদোকখ্রে‍। থৌরমদুদা ভারত লৈঙাক্কী শান্ন-খোৎনবা মন্ত্রালয়গী সেক্রেতরী শ্রী রবী মিত্তল, আই.ও.এ. প্রেসিদেন্ত শ্রী নরিন্দর বত্রা অমসুং সেক্রেতরী-জেনেরেল শ্রী রজীব মেহতা অমদি দি.জি. এস.এ.আই. শ্রী সন্দিপ প্রধান অমসুং অতৈ থৌমীশিংসু শরুক য়াখি‍। ঈশৈ অদু মমীং লৈরবা শৈশকপা মোহিত চৌহান্না কম্পোজ তৌদুনা শকপনি অদুগা মহাক্কী লোয়নবী মিসেস প্রাথনা গাহিলোতেনা ময়েক ইবনি‍।

https://static.pib.gov.in/WriteReadData/userfiles/2021-06-24%20sports.mp4

থীম ঈশৈ অদু ফোঙদোক্লদুনা কেন্দ্রগী শান্ন-খোৎনবগী মন্ত্রী শ্রী কিরন রিজিজুনা হায়খিবদা, “লৈবাক পুম্বা অমত্তা ওইনা পুনশিন্নদুনা তোকিয়ো ওলিম্পিক্সতা শরুক য়াগদৌরিবা ভারতকী শান্নরোয়শিংবু শৌগৎমিন্নবা অমদি পুক্নিং থৌগৎমিন্নবা হায়বসি প্রধান মন্ত্রী শ্রী নরেন্দ্র মোদীগী মঙলান্নি‍। ওফিসিএল থীম ঈশৈ ঙসি ফোঙদোক্লিবসি মায়কৈ অদুদা চঙশিন্নবা খোঙথাঙ অমনি‍। মোহিত চৌহান্না কম্পোজ তৌরগা শক্লিবা পাঙ্গল হাপকদবা ঈশৈ অসিনা লৈবাকসিগী মিংচৎ খ্বাইদগী ৱাংবা থাক্তা পুরক্নবগী শান্নরোয় খুদিংমক্কী ইথিলশিং কোনশিল্লি‍। শান্ন-খোৎনবগী মন্ত্রালয়না ওলিম্পিক্কী মতাঙদা কুইজ, সেল্ফি পোইন্ত, দিবেত অমসুং খন্ন-নৈনবনচিংবা থৌওং কয়াগী খুত্থাঙদা লৈবাক শিনবা থুংনা #Cheer4India কেম্পেন হৌদোক্লে‍। ঐনা ভারত মচা খুদিংমক থোরক্তুনা ভারতকী মকোক থোংবা শান্নরোয়শিংনা ভারতকী মিংচৎ পুরক্নবা মখোয়গী ঙমজবী থাদুনা হোৎনরিবসিদা পুক্নিং থৌগৎনবা ইহৌ অসিদা শরুক য়ানবা ৱাফম থমজরি‍।”

আই.ও.এ. প্রেসিদেন্ত দোক্তর নরিন্দর ধ্রুব বত্রানা হায়খিবদা, “থিম ঈশৈ অসি হৌদোকপগা লোয়ননা ঐনা ঐখোয়গী শান্নরোয় খুদিংমক্তা থমজনিংবদি মসি শুপ্নতগী পুক্নিং থৌগৎনবা ঈশৈ অমখক্তা নত্তে‍। মসি নখোয়গীদমক্তা থৌনিরিবা মীওই বিলিয়ন ১.৪গী খোন্থাঙনি, অমদি নখোয়না নখোয়গী খ্বাইদগী ফবা মওং উত্থোক্তুনা ইরৈবাক্কী মিংচৎ পুরক্কনি হায়না ঐনা চেৎনা থাজৈ‍।”

ঈশৈ ফোঙবগী থৌরমদুগী থাগৎ ৱারোল পীরদুনা আই.ও.এ. সেক্রেতরী জেনেরেল মিস্তর রাজীব মেহতানা ফোঙোকখিবদা, “থীম ঈশৈ অসি য়াম্না পুক্নিং থৌগৎনিংঙাই ওই অমদি মসিনা শান্নরোয়শিংগী পুক্নিংদা গেম্স অসিদা হেন্না কন্নে হোৎননিংবগী ইথিল অমদি পাঙ্গল হাপকনি হায়না ঐনা থাজৈ‍। আই.ও.এ.গী মায়কৈদগী ঐনা মোহিত চৌহানবু তোকিয়ো গেম্সতা ভারতকী মহুৎ শিন্দুনা চৎলুগদৌরিবা ভারতকী কন্তিঞ্জেন্তশিংগীদমক পুক্নিং হুনা ফজরবা ঈশৈ অসিবু কম্পোজ তৌবিবগীদমক্তা থাগৎপা ফোঙদোকচরি‍।” হৌজিক ফাওবদা মশান্না তরামঙাদা শান্নরোয় কয়ানা ওলিম্পিক্স অসিদা শরুক য়াবা য়ারে অমদি অহেনবা শান্নরোয়শিংসু মখা তানা য়াওশিল্লকখিগনি হায়না ঐনা থাজৈ‍। মেদল তেল্লীগী মতাঙদসু ঐখোয়না মশিং য়াম্না পুরকপা ঙমগনি হায়না থাজরি, হায়না মিস্তর মেহতানা মখা তাখি‍।

ভারতকী শান্নরোয় খুদিংদা অমদি তোকিয়োদা চৎকদৌরিবা ভারতকী কন্তিঞ্জেন্তকী মেম্বর খুদিংমক্তা মখোয়না তোকিয়োগী ওলিম্পিক ভিলেজতা আইসোলেসন্দা লৈবা মতমদা মখোয়গী পুক্নিং ৱাখল ফনা থম্বদা মতেং ওইননবা হকচাংদা শিবা য়াবা মেদিতেসনগী খুৎলায় পীননবা আই.ও.এ.গা হান্নগী ভারতকী বেদমিন্তন শান্নরোয় অমদি ভারতকী বেদমিন্তন তীমগী চীফ নেসনেল কোচ ওইইরিবা পুল্লেলা গোপিচান্দ অমসুং “ধ্যানা’ স্পোর্তসকা খোঙবু ওইদুনা চৎমিন্নরি হায়নসু মিস্তর মেহতানা লাউথোকখি‍।

*******