খুরুমজরি, কেন্দ্রগী মন্ত্রী-মন্দলদা লৈমিন্নরিবা ঐহাক্কী মরুপ, শ্রী মহেন্দ্র নাথ পান্দেজী, আর.কে. সিংহজী, অতৈ মকোক থোংবা মন্ত্রীশিং, প্রোগ্রাম অসিগা মরী লৈনবা নহারোল পুম্নমক, প্রোফেস্নেলশিং, অতৈ দিগ্নিতরীশিং অমসুং ইচিল-ইনাও পুম্নমক,

কোরোনাগী মায়োক্তং শোক্নবা অচৌবা লাঞ্জাও অসিদা ঙসি মরু ওইবা কেম্পেন অমগী মথংগী তাঙ্কক্তা চংশিনবা হৌরি। কোরোনাগী অহানবা ৱেবকী মনুংদা লৈবাক অসিদা প্রোফেস্নেল লিশিং কয়ানা স্কিল দিবেলপমেন্ত কেম্পেন্দা শরুক য়াখি। খোঙথাং অসিনা লৈবাক অসিনা কোরোনা থেংনবদা চাউনা পাঙ্গল হাপখি। হৌজিক কোরোনাগী অনিশুবা ৱেবকী মতুংদা ফংখিবা এক্সপরিয়েন্সশিং অদুনা ঙসিগী প্রোগ্রাম অসিগী মপুং ওইবা য়ুম্ফম ওইখি। কোরোনাগী অনিশুবা ৱেবতা ঐখোয়না কোরোনা ভাইরসকী শক্লোন হোংবা অমসুং হঞ্জিন-হঞ্জিন হোংলকপা শক্লোন অসিনা করম্বা মখলগী শীংনবশিং ঐখোয়দা পীবগে হায়বা উবা ফংখি। ভাইরস অসি হৌজিকসু ঐখোয়গী ইরক্তা লৈরি অমসুং মসিনা লৈরিবা মখৈ ম্যুতেত তৌনবগী ওইথোকপসু অদুমক লৈরি। মরম অসিনা লায়েং, চেকশিন থৌরাং খুদিংমক্কা লোইননা তুংদা লাক্কদবা শীংনবশিং মায়োক্নবা ঙম্নবা ঐখোয়না লৈবাক অসিনা শেম-শারিবা অসি হেন্না হেনগৎহনবা মথৌ তাই। পান্দম অসিগা লোইননা ঙসি লৈবাক অসিদা ফ্রন্তলাইন কোরোনা ৱারিয়র লাখ ১ শেম-শানবা অচৌবা কেম্পেন অমা হৌদোক্লি।

মরুপশিং,

লাইচৎ অসিনা মালেমগী লৈবাক, ইন্সতিত্যুসন, খুন্নাই, ইমুং-মনুং অমসুং মীওইবা খুদিংমক্কী পাঙ্গল চাংয়েং হঞ্জিন-হঞ্জিন তৌখি। মসিগা লোইননা মসিনা ঐখোয়দা সাইন্স, সরকার, খুন্নাই, ইন্সতিত্যুসন নত্ত্রগা মীওইশিংদা ঐখোয়গী মতিক-ময়াইশিং অদু হেনগৎহন্নবা মীৎনা শিংনা লৈহনখি। পি.পি.ই. কিৎশিং, তেস্তিং ইন্ফস্ত্রকচরদগী হৌরগা কোবিদ কিয়র অমসুং লায়েংগা মরী লৈনবা অতৈ মেদিকেল ইনফ্রাস্ত্রকচরগী অচৌবা নেৎৱর্ক ঙসি ভারত্তা শেমগৎখি, মসিগী থবক অসি হৌজিকসু চত্থরি অমসুং হোৎনরিবা অসিগী ফলশিংনি ঐখোয়না ফংলিবা অসি। ঙসি লৈবাক্কী অৱাপ্পা মফমশিংদা লৈবা হোস্পিতালশিংদা ভেন্তিলেতরশিং অমসুং ওক্সিজেন কন্সেন্ত্রেতরশিং ফংহন্নবা খোঙজেল য়াংনা হোৎনরি। লানগুম্না খোঙজেল য়াংনা ওক্সিজেন প্লান্ত ১৫০০ হেন্না লিংখৎলি অমসুং ভারতকী জিলা খুদিংমক্তা য়ৌহন্নবা অকনবা মওংদা হোৎনরি। হোৎনরিবা পুম্নমক অসিগী মরক্তা স্কিল লৈবা মেনপাৱরগী অচৌবা পুল অমা লৈবা, পুল অদুদা অনৌবা মীওইশিং লেপ্তনা হাপচিনবা চপ মান্ননা মরু ওই। মসি য়েংলগা কোরোনাগী মায়োক্তা লান্থেংননবা হৌজিক লৈরিবা ফোর্সতা মতেং পীনবা লৈবাক অসিগী চাউরাক্না নহা লাখ ১ ত্রেন তৌনবা পান্দম থমখি। কোর্স অসি থা অনি-অহুমদা লোইশিনগনি, মরম অসিনা হায়রিবা মীওইশিং অসি খুদক্তা থবক তৌবা য়ারগনি অমসুং ত্রেন তৌরবা এসিস্তেন্ত অমা ওইনা হৌজিক লৈরিবা সিস্তেম অসিদা মতেং য়াম্না ওইরগনি, মখোয়না অৱাবগী পোৎলুম অদু খরা মখৈদি কোকহল্লগনি। লৈবাক অসিগী মকোক থোংবা এক্সপর্তশিংনা রাজ্যশিং অমসুং য়ুনিয়ন তেরিতোরীশিংগী দিমান্দশিংগী মতুং ইন্না ক্রাশ কোর্স অসি দিজাইন তৌখি। ঙসি অনৌবা কস্তমাইজ কোর্স ৬ হৌদোকখি। নর্সিংগা মরী লৈনবা থবক, হোম কিয়র, ক্রিতিকেল কিয়রদা মতেং পাংবা, সেম্পল কল্লেক্সন, মেদিকেল তেক্নিসিয়ন, অনৌ-অনৌবা ইক্বিমেন্তগী ত্রেনিং, হায়রিবশিং অসিগীদমক্তা নহাশিংবু তাকপী-তম্বীরি। মসিদা নৌনা স্কিলিং তৌবা লোইননা অসিগুম্বা মখলগী থবক্তা ত্রেনিং তৌখ্রবশিংদা অপস্কিলিং তৌবা য়াওগনি। কেম্পেন অসিনা কোবিদ থেংনরিবা ঐখোয়গী হেল্থ সেক্তরগী ফ্রন্তলাইন ফোর্সতা অনৌবা ইনর্জ পীরগনি অমসুং ঐখোয়গী নহারোলদা থবক্কী খুদোংচাবশিংসু পীরগনি।

মরুপশিং,

কোরোনাগী মতমনা স্কিল, রি-স্কিল অমসুং অপ-স্কিলগী মন্ত্র অসি কয়াম মরু ওইবা হায়বা অমুক হন্না উৎখ্রে। হেল্থ সেক্তরদা লৈরিবা মীওইশিং অসি স্কিল লৈবতা নত্তনা মখোয়না কোরোনা লাকশিন্নবগী মরমদা অনৌবা কয়া অমা হৈজিনখি। হায়বদি মওং অমদা মখোয়না মশাবু রি-স্কিল তৌখি। মসিগা লোইননা মখোয়দা হান্ননা লৈরবা স্কিল অদুসু হেনগৎহনখি। অহোংবা নাইবা ফীভমশিংগী মতুং ইন্না ইশাগী স্কিল অপগ্রেদ তৌবা নত্ত্রগা ভেল্যু এদিসন তৌবা অসি অপ-স্কিলিংনি অমসুং মসি তানফম অসিদা মথৌ তাই অমসুং পুন্সিগী হীরম খুদিংমক্তা তেক্নোলোজী য়াওরক্লিবা খোঙজেল অসিদা লেপ্তনা দাইনামিক সিস্তেম অপ-স্কিলিং তৌবা তঙাই ফদবা ওইরক্লি। স্কিল, রি-স্কিল অমসুং অপ-স্কিলগী কান্নবা অসি খঙলগা লৈবাক অসিআ স্কিল ইন্দিয়া মিসন হৌদোকখি। অহানবা ওইনা  তোখাইবা স্কিল দিবেলপমেন্ত মন্ত্রালয় শেম্বা, লৈবাক শিনবা থুংনা প্রধান মন্ত্রী কৌশল বিকাস কেন্দ্র হাংদোকপা, আই.তি.আই.শিংগী মশিং হেনগৎহনবা, মখোয়দা অনৌবা সীৎ লাখ কয়া হাপচিনবা হায়রিবশিং অসিদা থবক লেপ্তনা পাইখৎখি। ঙসি স্কিল ইন্দিয়া মিসন্না লৈবাক অসিগী নহারোল করোর কয়াদা চহি খুদিংগী ঙসি ঐখোয়দা মথৌ তাবা ত্রেনিং পীবদা য়াম্না চাউনা মতেং পাংলি। কোরোনাগী মতম অসিদা স্কিল দিবেলপমেন্তগী কেম্পেন্না লৈবাক অসোদা চাউনা পাঙ্গল হাপখি হায়বা অসি লৈবাক অসিদা কয়া খন্ন-নৈনদে। হৌখিবা চহিদগী ঐখোয়গী মাংদা কোরোনানা পীবা থেংনবশিং থেংনবদা স্কিল দিবেলপমেন্ত মন্ত্রালয়না লৈবাক অসিগী হেল্থ ৱর্কর লাখ কয়া ত্রেন তৌবদা মরুওইবা থৌদাং অমা লৌখি।দিমান্দ দ্রিবন স্কিল সেৎশিং শেম্নবগী ৱাখল্লোন্দা শেমখিবা মন্ত্রালয় অসিনা ঙসি হেন্না খোঙজেল য়াংনা থবক তৌরি।

মরুপশিং,

ঐখোয়গী লৈবাক্কী মীশিং অসি য়েংলগা হেল্থ সেক্তরদা দোক্তরশিং, নর্সশিং অমসুং পেরামেদিক্সকা মরী লৈনবা স্পেসিএলাইজ সর্ভিসশিং হেনগৎহনবা মথৌ তাই। মসিগী মতাংদা হৌখিবা চহি ৭ অসিদা মীৎয়েং থম্বা এপ্রোচকা লোইননা থবক হৌখি। হৌখিবা চহি ৭ অসিদা অনৌবা এম্স, অনৌবা মেদিকেল কোলেজশিং অমসুং অনৌবা নর্সিং কোলেজশিং শানবা চাউনা মীৎয়েং চংখি। মখোয়শিংগী মনুংদা অয়াম্বদি হৌজিক চল্লাইবা হৌরে। মসিগা মান্ননা মেদিকেল এজুকেসন অমসুং মরী লৈনবা ইন্সতিত্যুতনশিংবু রিফোর্মশিং অসিনা থৌগৎলি। ঙসি, হেল্থ প্রোফেস্নেলশিং শেম্নবা পাইখৎখিবগী থবক্কী খোঙজেল অসি মমাংদা অমুক্তা থবক তৌখিদ্রি।

মরুপশিং,

ঙসিগী থৌরম অসিদা ঐহাক্না ঐখোয়গী হেল্থ সেক্তরগী য়াম্না পাঙ্গল লৈবা য়ুম্বী অমগী মতাংদা শোইদনা ৱারী শাবা পাম্মি। অয়াম্বা মতমদা ঐখোয়গী মরুপশিং অসিগী মরমদা ৱারী কয়া শাবিদে। মরুপশিং অসি – ঐখোয়গী আশা-এ.এন.এম-অঙ্গনৱাদি অমসুং খুঙ্গং-খুঙ্গংদা দিস্পেন্সরীশিংদা মথৌ তৌরিবা ঐখোয়গী হেল্থ ৱর্করশিংনি। ঐখোয়গী মরুপশিংনা মালেমগী খ্বাইদগী অচৌবা বেক্সিনেন কেম্পেন অসিদা মতেং পাংদুনা লাইনা ঙাকথোকপদা মরু ওইবা থৌদাং অমা লৌরি। নোংজু-নুংশাগী ফীভমশিং, জিওগ্রাফিকেলগী ওইবা ফীভমশিংনা চাউনা অপনবা পীরবসু ঐখোয়গী মরুপশিং অসিদা ইরৈবাকচা খুদিংমক শাফনা থম্নবা অয়ুক-নুংমিদাং খাক্তনা হোৎনখি। খুঙ্গংদা লৈবা মনুং হঞ্জিনবা মফমশিং অমসুং চীংশিং অমদি ত্রাইবেলগী মফমসিংদা মরুপশিং অসিনা লাইনা শন্দোকপা থিংনবগী বেক্সিনেসন কেম্পেন মাই পাক্না পাঙথোক্লিবা অসিদা লৌরিবা থৌদাং অসি য়াম্না চাউই। জুন ২১দগী লৈবাক অসিদা চাউথোক্কদবা বেক্সিনেসন কেম্পেন অসিদা মরুপশিং অসিনা পাঙ্গল হাপ্পী অমসুং চাউনা ইনর্জী পীরি। ঙসি ঐহাক্না মখোয়বু মীমাং থোক্না থাগৎলি, ঐখোয়গী মরুপ পুম্নমকপু ঐহাক্না থাগৎপা ফোঙদোকচরি।

মরুপশিং,

জুন ২১দগী হৌগদৌরিবা বেক্সিনেসন কেম্পেন অসিগা মরী লৈনবা গাইদলাইন ময়াম অমা থোকখ্রে। হৌজিক্তি চহি ৪৫গী মথক্কী মীওইশিংনা ফংলিবা বেক্সিনেসনগী খুদোংচাবা অসি চহি ৪৫গী মখাদা লৈবা মীওইশিংনসু চপ মান্ননা ফংলগনি। কেন্দ্র সরকার অসি কোরোনাগী প্রোতোকল ঙাক্না প্রজা খুদিংমক্তা বেক্সিন ‘লেম্না’ পীনবা হোৎনরি। ঐখোয়না কোরোনাগী প্রোতোকলসু ঙাক্না চৎপা তাই। মাস্ক উপ্পা অমসুং গজ অনিগী অরাপ্পা থম্বা অসি য়াম্না মরুওই। অরোইবদা ঐহাক্না ক্রাশ কোর্স য়াওরিবা নহারোল পুম্নমক্তা য়াইফ-পাউজেল পীজরি। নখোয়গী অনৌবা স্কিল অসিনা ইরৈবাকচাশিংগী থৱায় কনবদা লেপ্তনা কান্নবা ওইরগনি অমসুং অদোমগী পুন্সিদা লাকপা অনৌবা অওনবা অসিদা চাউনা অপেনবা পোক্লগনি মরমদি অদোমনা পুন্সিগী অহানবা ওইনা থবক তৌবা হৌবা মতমদা অদোমনা মীওইবগী পুন্সি কনবা য়াওরগনি। মীওইবগী পুন্সি কনবা য়াওরগনি। হৌখিবা চহি অমা মখাই অসিদা অয়ুক-নুমিদাং খক্তনা মথৌ তৌরিবা ঐখোয়গী দোক্তরশিং, ঐখোয়গী নর্সশিংনা পোৎলুম পুদুনা লাকখি, নখোয় লাকপনা মখোয়দা মতেং ওইরগনি। মখোয়দা অনৌবা থৌনা অমা হাপ্লগনি। মরম অসিনা ক্রাশ কোর্স অসিনা নখোয়গী পুন্সিদা অনৌবা খুদোংচাবা অমা ওইনা লাক্লি। মীয়ামগী য়াইফনবা মীওইবা জাতিগী সেবা তৌনবগী অখন্নবা খুদোংচাবা অমা অদোমনা ফংলি। মসিগী শেংলবা থবক অসিগীদমক, মীওইবা জাতিগী শেবা তৌনবগীদমক ঈশ্বরনা অদোমদা পাঙ্গল হাপ্পা ওইরসনু। নখোয়না য়াম্না থুনা ক্রাশ কোর্স অসিগী লম খুদিংমক হৈজিনগদবনি। ইশাবু অফবা মীওই অমা ওইনবা হোৎনবীয়ু। মীওইবা খুদিংমক্কী পুন্সি কনদা মথৌ তাবা স্কিল অদু অদোমদা লৈবা ওইরসনু। মসিগীদমক ঐহাক্কী মাইকৈদগী য়াইফ-পাউজেল পীজরি।

হন্না-হন্না থাগৎচরি!

*****