কেন্দ্রগী মন্ত্রী-মন্দলদা ঐহাক্কা লৈমিন্নরিবা শ্রী নিতিন গদকরীজী, নরেন্দ্র সিংহ তোমরজী, প্রকাশ জাবদেকরজী, পীয়ুশ গৌয়লজী, ধর্মেন্দ্র প্রধানজী, গুজরাতকী খেরাগী এম.পি. দেবুসিঙ্গ জেসিঙ্গভাই চৌহানজী, য়ু.পি.গী হরদোইগী এম.পি. ভাই জয় প্রকাশ রাৱতজী, পুনেগী মেয়র মুরলীধর মহোল জী, পিম্পরী চিঞ্চৱত ম্যুনিসিপাল কোর্পোরেসনগী মেয়র ইচল উশাজী, থৌরম অসিদা শরুক য়ারিবা অতৈ দিগ্নিতরীশিং অমসুং ঐহাক্কী নুংশিরবা ইচিল-ইনাওশিং,

ঐখোয়গী লৌমী মরূপশিংগা ঐহাক্না ৱারী শাবা মতমদা মখোয়না করম্না বাইও-ফ্যুলগা মরী লৈনবা সিস্তেমশিং অদু অরাইবা মওংদা শিজিন্নৈ অমসুং ৱাফম অদু নীংথিজনা পাউদম্লকখি। মখোয়দা কন্ফিদেন্সসু উবা ফংখি। ক্লিন ইনর্জীগী লৈবাক অসিদা চত্থরিবা অচৌবা কেম্পেন অসিগী অচৌবা কান্নবা অদু লৈবাক অসিগী এগ্রিকলচর সেক্তরনা ফংবা হায়বা অসি মহৌশানি। ঙসি মালেমগী অকোইবগী ফীভম কনবা নুমিৎ অসিদা ভারতনা অচৌবা খোঙথাং অমা পাইখৎলে। ঙসি ঐহাক্না ইথানোল সেক্তরগী চাউখৎ-থৌরাংগী অকুপ্পা ৱারোল য়াওবা রোদমেপ অমা ফোঙবগী খুদোংচাবা ফংলি। লৈবাক শিনবা থুংনা ইথানোল পুথোকপা অমদি য়েন্থোকপগা মরী লৈনবা মরু ওইবা ই-১০০ পাইলৎ প্রোজেক্তসু পুনেদা লোঞ্চ তৌখ্রে। ঐহাক্না পুনেগী মীয়ামদা নুংঙাইবা ফোঙদোকচরি। পুনেগী মেয়রদসু নুংঙাইবা ফোঙদোকচরি। ঐখোয়না ঐখোয়গী পন্দমশিংবু মতম চানা ফংবা ঙম্নবা য়াইফ-মঙ্গোল পীজরি।

মরূপশিং,

করিগুম্বা অদোমনা কুপ্না য়েংলবদি ঙসিদগী চহো ৭-৮গী মমাংদা লৈবাক অসিদা ইথানোলগী মরমদা খন্ন-নৈনবা অসি য়াম্না তাংনা থোকলমখি।  মসিগী মরমদা মীওই অমত্তনা পনলমদে। করিগুম্বা পনবা তারবদু মদু রুতিনদা লাকপদা শানবা নত্তনা মসিগী মরমদা খন্নদে। অদুবু হৌজিক্তি ইথানোল অসি ২১শুবা চহিচাগী ভারতকী খ্বাইদগী হান্না মিৎয়েং চঙগদবা মরু ওইবা হীরম অমা ওইরে। থানোলদা মিৎয়েং চঙলিবা অসিনা অকোয়বগা লোইননা লৌমীশিংগী পুন্সিদা অফবা শাফু অমা পীবা ঙম্লে। ঙসি ঐখোয়না ২০২৫ ফাওবদা পেত্রোলদা ইথানোল চাদা ২০ ব্লেন্দিং তৌনবগী পান্দম থুংহন্নবা ফিরেপ লৌরে। অহানবদা পান্দম অসি থম্বা মতমদা মসি ঐখোয়না  ২০৩০ ফাওবগী মনুংদা ফংবা হায়না ৱারেপ লৌরম্বনি অদুবু মতম খরা অসিদা মাই পাক্লবগী মওং, মীয়ামগী মতেং ফংলকপা, মীয়ামনা ভাব তারকপা অমদি মীপুম খুদিংমক্না মসিগী মরু ওইবা খঙবা হৌরকপা অসিনা মরম ওইরগা হৌজিক্তি ঐখোয়না ২০৩০দা তৌবা পাম্লম্বা অদু চহি ৫ ঙনখৎতুনা ২০২৫তা পাঙথোক্নবা ৱারেপ লৌরে। চহি ৫ ঙনখৎনা।

মরূপশিং,

অচৌবা ৱারেপ অসি লৌবগী থৌনা অসি লৈবাক অসিনা হৌখিবা চহি ৭তা ফংবা ঙমখিবা পান্দমশিং, লৈবাক অসিনা হোৎনখিবা অমসুং মদুদগী ফংলকপা মাই পাকপা অদুনা মরম ওইরগা ঙসি ঐহাক্না ৱারেপ অসি লৌবা ঙমজখিবনি। ২০১৪ ফাওবদা, চাংচত্তা পাবদা, ভারত্তা ইথানোলগী ব্লেন্দিংগী চাং অসি চাদা ১.৫ খক্তমক ঙম্লম্বনি, অদুবু ঙসিদি চাদা ৮.৫গী চাং য়ৌবা ঙম্লে। ২০১৩-১৪দা লৈবাক অসিদা ইথানোল লিতর চাউরাকপা করোর ৩৮ লৈখি অমসুং হৌজিক্তি চাং অসি হেনগত্তুনা লিতর করোর ৩২০ হেন্না য়ৌবা ঙম্লে। হায়বদি ইথানোল লৈবগী চাং অসি শরুক ৮ গী ময়াদা হেন্না লৈরে। মমাং চহি খক্তদা ওইল মার্কেতি কম্পনীশিংনা লুপা করোর ২১,০০০গী ইথানোল লৈখি। লুপা করোর ২১,০০০ চাদিং তৌখিবা অসিগী চাউরবা শরুক অমনা লৈবাক অসিগী চুগী লৌমীশিংগী ফুরিৎ খাওদা চংখি। মরু ওইনা ঐখোয়গী চুগী লৌমীশিংনা মসিদগী চাউনা কান্নবা ফংখি। ২০২৫ ফাওবদা ইথানোলগী চাদা ২০ পেত্রোলদা ব্লেন্দিং তৌবা মতমদা, লৌমীশিংনা ওইল কম্পনীশিংদগী কয়াম য়াম্বা শেনফম ফংবা ঙমগনি হায়বা ৱাখলদা খনবীয়ু। মসিদা চিনী হেন্না পুথোকপগা মরী লৈনবা শীংনবশিংনা করিগুম্বা মতমদা পোত্থোক হেন্না পুথোকহল্লি মসিনা মরম ওইদুনা মালেমদা মসিবু লৈবীনবা মী লৈরক্তে, লৈবাক অসিদা মমল হন্থরকই। অমসুং হেন্না চাউবা শীংনবা অমা থোরকই, মসি কদায়দা থম্বা হায়বা অসিসু খুদোংচাদবা অমা ওইরকই। অসিগুম্বা শীংনবা পুম্নমক অসি হন্থহন্নবা অমসুং মসিগী কান্নবা অসি চুগী লৌমীশিংদা হকথেংননা মরী লৈনখি। মসিগী কান্নবা কয়া ফংলগনি।

মরূপশিং,                                   

অনৌবা ৱাখল্লোন, অনৌবা থৌওংদগী পাঙ্গল ফংগদৌরিবনি। সরকারনা ৱাখল্লোন অসিগা লোইননা হীরম খুদিংদা পোলিসীগী ৱারেপ কয়া লৌরি। ঙসিদি, লৈবাক অসিদা ইথানোল পুথোকপা অমসুং লৈবা ঙম্নবগীদমক্তা তঙাই ফদবা ইনফ্রাস্ত্রকচর শেম্বগী মতাংদা অহেনবা মিৎয়েং  চঙলি। হৌজিক ফাওবদা ইথানোল পুথোকপগী য়ুনিৎ অয়াম্বদি চিনি য়াম্না পুথোকপা ঙম্বা রাজ্য ৪-৫ খক্তদা তুংশিন্দুনা লৈ। মসি লৈবাক শিনবা থুংনা শন্দোক্নবা পত্থ-পুমথরবা চেং-হৱাই অদুবু শিজিন্নদুনা ফুদ গ্রেন্দা য়ুম্ফম ওইবা দিস্তিলরী কয়া অমা শেমগৎপা হৌরে। লৌউ-শিংউগী অরেম-অখাকশিংদগী ইথানোল পুথোক্নবগীদমক্তা মতমগা চানবা তেক্নোলোজীদা য়ুম্ফম ওইবা প্লান্ত কয়া অমা লৈবাক অসিদা শাবগী থবক পায়খৎলি।

মরূপশিং,

অইং অশাগী খল হোংলকপগী খুদোংথিবা অসি লাকশিন্নবা মালেমদা হোৎনরিবশিং অসিদা ভারতনা আশা অমা ওইনা থোরক্লি। ঙসি ভারতনা মীওইবা খুন্নাই অসিগী য়াইফনবা থাজবা য়াবা খোঙলোই অমা ওইনা মশক তাকপা ঙমজরে। মালেমনা ভারত অসি মীশিং য়াম্বনা মরম ওইরগা অইং অশাগী খল হোংলকপগী খুদোংথিবা অসি মসিদগী হৌরক্কনি হায়না মতম অমদা উরমখি। অদুবু ঙসিদি ফীভম অদু ওইদ্রে, ঙসিদি ঐখোয়গী লৈবাক অসি ক্লাইমেৎ জস্তিসকী লুচিংবা অমা ওইনা খুদোংথিবা অসিগী ময়োক্তা শক্তি লৈরবা অমা ওইনা থোরক্লি। নুমিৎ অমা, মালেম অমা, গ্রীদ অমগী মঙলানবু মঙফাওনহনগদবা ইন্তরনেসনেল সোলার এলাইএন্স ওইরবসু, নৎত্রগা কোএলিসন ফোর দিজাস্তর রেজিলিএন্ত ইন্ফ্রাস্ত্রকচরগী ৱাফম ওইরবসু, ভারতনা চাউরবা মালেমগী ওইবা মঙলান অমগা লোয়ননা মাঙদা চঙশিল্লি। ক্লাইমেৎ চেঞ্জ পর্ফোর্মেন্স ইন্দেক্সতা ভারত অসি মকোক থোংবা মালেমগী মরু ওইবা লৈবাক ১০গী মনুংদা মফম কনবা ঙম্লে।

মরূপশিং

অইং অশাগী খল হোংলকপনা মরম ওইরগা মাংদা তারিবা শিংনবশিং অসি ভারতনা মুন্না খঙই অমদি ইচং থৌনা থবক পাইখৎলি। ঐখোয়না নাকল অমদা গ্লোবেল সাউথতা ইনর্জী জস্তিসকী থৱায় য়াওনা হোৎনরি অমসুং গ্লোবেল নোর্থতা থৌদাংশিং লৌরি নাকল অমরোমদনা ঐখোয়গী থৌদাং অদু লুম্না লৌবগা লোইননা থবক পাঙথোক্লি। ভারতনা ইনর্জী ত্রাঞ্জিসনগী লম্বেল অমা খল্লি মসিদা ঐখোয়গী পোলিসীশিং অমসুং ৱারেপশিংদা চপ মান্ননা হর্দ অমসুং সোফ কম্পোনেন্তশিং অসিসু মরু ওইরি। করিগুম্বা ঐহাক্না হর্দ কম্পোনেন্তশিংগী মতাংদা হায়রবদি ভারতনা অচৌ-অচৌবা পান্দমশিং শেম-শাবা তাই, মখোয়বু ইমপ্লিমেন্ত তৌনবা অমুক্তা পাঙথোকখিদ্রিবা খোঙজেলদা থবক পাইখৎপা তাই মরমদি মালেম অসিনা ঐখোয়দা কুপ্না য়েংলি। চহী ৬-৭সিদা রিন্যুএবল ইনর্জীগী লমদা ঐখোয়গী কেপাসিতী চাদা ২৫০দগী হেন্না ৱাংখৎলক্লি। ইন্সতোল তৌরবা রিন্যুএবল ইনর্জী কেপাসিতীগী লমদা ভারতনা ঙসি মালেমগী মকোক থোংবা লৈবাক ৫গী মনুংদা চল্লে। মসিদসু নুমিৎকী ইনর্জীগী কেপাসিতীসু হৌখিবা চহী ৬সিদা চাউরাক্না চাদা ১৫গী চাংদা হেনগৎলে। ঙসি ভারতনা মালেমগী খ্বাইদগী চাউবা সোলর অমসুং ৱিন্দগী হাইব্রিদ ইনর্জী গুজরাতকী কচ্ছতা শারি, অমরোমদা ভারতনা গীগাৱাত ১৪গী অরিবা কোইল প্লান্ত অদুসু থিংজিনখ্রে। লৈবাক অসিনা সোফ এপ্রোচ অমগা লোইননা পুৱারী ওইরবা খোঙথাংশিংসু লৌখৎখ্রে। ঙসি লৈবাক অসিগী মীচম প্রজাশিংনা প্রো-এনভাইরনমেন্ত কেম্পেনদা য়াওশিনখ্রে অমসুং মখোয়না মসিবু লমজিংলি। 

ঐখোয়না সিঙ্গল য়ুজ প্লাস্তিক্কী মতাংদা করম্না এৱের্নেস পীখি হায়বা উরে। মীয়াম্নসু মখোয়না অঙম্বা মওংদা খজিক ওইরবসু হোৎনরি। অদুবু অহেনবা কয়া তৌবদি মথৌ তারি। অদুবু তানফম অদু য়ৌরে অমসুং হোৎনবা হৌখ্রে। ঐখোয়গী সমুদ্র তোর্বান নালহল্লিবা অসি য়েংঙু, নহারোলশিংনা মসিগী থৌরাং পাইখৎলি। স্বচ্ছ ভারতকুম্বা কেম্পেন অমদা লৈবাক অসিগী মীচম প্রজাশিংনা থৌদাং লৌরি অমসুং মসিবু ঙসি ঐহাক্কী লৈবাকচাশিংনা লুচিংলি। লৈবাক অসিদা এল.ই.দি. বল্ব করোর ৩৭ হেনবা অমসুং ইনর্জী ইফিসিএন্ত ফেন লাখ ২৩ হেন্না মীয়ামদা পীখিবা কান্নবশিং অমসুং অকোইবগী ফীভম ঙাকশেনবগী থবক পাইখৎখিবা অদু মীয়াম্না তোয়না খন্ন-নৈনবগী হৈনবী অদু থাদোকখ্রে। অদুবু মসি য়াম্না মরু ওইবা ৱাফম অমা ওইনা লৌবা মথৌ তাই। মসিগা মান্নবা ওইনা, মমাংদা শিঙ শিজিন্নদুনা চাক থোংদুনা মৈখু মরক্তা লৈরম্বা অদু ইমুং করোর কয়াদা উজ্বালা স্কিমগী মখাদা গ্যাস কন্নেক্সন লেম্না পীদুনা, সৌভাগ্যা স্কিমগী মখাদা মৈ ফংহনদুনা মখোয়না শিঙ শিজিন্নবা য়াম্না চাউনা হন্থরে। পোল্ল্যুসন হন্থহনবতা নত্তনা হকশেলগী লমদা চাউনা মতেং পাংলি অমসুং ঐখোয়গী ইমাশিং অমসুং অঙাংশিংগী হকশেল অমদি অকোয়বগী ফীভম ঙাক-শেনবগী থৌওংসু য়াম্না মতেং পাংলি। অদুবু মসিগী মতাংদসু য়াম্না খন্ন-নৈনদে। ভারতনা খোঙথাংশিং অসি লৌখৎতুনা কার্বোন দাইওক্সাইদ তন করোর হেন্না হন্থহনদুনা অইং-অশাগী খলদা হোংলকপা হন্থহন্নবা মাইকৈদা ভারতনা লুচিংবা ওইরি। মসিগা মান্নবা মওংদা ইনর্জী ইফিসিয়েন্ত পম্প লাখ ৩দগী হেনবগী খুত্থাংদা লৈবাক অসিনা কার্বোন দাইওক্সাইদ তন করোর কয়া নুংশিৎতা পুনশিনখিদনবা ঙাকথোক্লি।

 মরূপশিং,

ঙসি ভারতনা অকোয়ববু ঙাক শেন্নবগীদমক্তা চাউখৎপা থৌরাংগী থবক্তা অপনবা পীবগী মথৌ তাদে হায়বা ৱাফম্বু মালেমদা খুদম ওইনা তাক্লি। শেন্মিৎলোন অমসুং অকোয়বগী ফীভম অনিমক পুন্না চৎমিন্নবা য়াই, মাংদা চঙশিনমিন্নবা য়াই হায়বা লম্বীসি ভারতনা খল্লি। শেন্মিৎলোনগী মপাঙ্গল কনখৎহনবগা লোইননা, ঐখোয়গী উমং অসিসু হৌখিবা চহি খরদা স্ক্বের কিলোমীতর লিশিং ১৫ হেনগৎলে। হৌখিবা চহি খরা অসিদা, ঐখোয়গী লৈবাক্কী কৈগী মশিংসু শরুক অনি হেনগৎলে অমসুং কৈশালগী মশিংসু চাউরাক্না চাদা ৬০গী চাংদা হেনগৎলে। পুম্নমক অসিগী চৈরক অসিদা পেঞ্চ নেসনল পার্ক্কী ৱাইল্দলাইফ ফ্রেন্দলী কোরিদোর অসিসু ঙসি খন্ন-নৈন্নবা হীরম অমা ওইরক্লে।

মরূপশিং,

প্রধান মন্ত্রীনা অশেংবা অমসুং অফবা ইনর্জীগী পথাপ, রেজিলিএন্ত অর্বান ইনফ্রাস্ত্রকচর অমসুং থৌরাং য়াৎলবা ইকো-রেস্তোরেসনগী থৌওংশিং অসি আত্মানির্ভর ভারত কেম্পেনগী য়াম্না মরু ওইবা শরুক অমনি। মদু গ্রীন কভর তৌবা হায়ৱে-এক্সপ্রেসৱে ওইরবসু, সোলর পাৱরনা চল্লাইবা মেত্রো ওইরসু, ইলেক্ত্রিক গারীশিংদা মীৎয়েং চংবা ওইরবসু নত্ত্রগা হাইদ্রো-পাৱর গারীশিংগা মরী লৈনবা রিসর্চ পুক্নিং থৌগৎপা ওইরসু খোঙথাং পুম্নমক মচা খাইনা য়াৎথোক্লবা লালোং অমগা লোইননা পাইখৎলি। অকোয়বগা মরী লৈনবা খোঙথাং কয়া পায়খৎপনা মরম ওইদুনা লৈবাক অসিদা শেল থাদবগী অনৌবা খুদোংচাবা কয়া লৈরক্লি অমসুং নহাশিংসু থবক ফংনরি।

মরূপশিং,

মহৌশানা ইয়র পোল্ল্যুসন অসি ইন্দস্ত্রীগী খুত্থাংদা শন্দোকই হায়না থাজনৈ। অদুবু তশেংবদি ত্রান্সপোর্তেসন, শেংদবা ফ্যুলশিং, দিজল জেনরেতরশিং অসিগুম্বা হীরম কয়ানা মওং অমদা নত্ত্রগা অমদা ইয়র পোল্ল্যুসন অসি থোকহল্লি। মরম অসিনা ভারতনা নেস্নেল ক্লিন এয়র প্লানগী খুত্থাংদা হীরম পুম্নমক পুন্সিনবা খোঙথাং কয়া অমগা লোইননা এয়র পোল্ল্যুসন থিংনবগীদমক্তা কন্না হোৎনরি। ঈশিং লম্বী অমসুং মল্তি-মোদেল কন্নেক্তিভিতীগী মতাংদা পা‌ইখৎলিবা থবকশিং অসিনা গ্রীন ত্রান্সপোর্তকী মিসনবু মপাঙ্গল হেন্না কনখৎহনবতা নত্তনা লৈবাক অসিগী লোজিস্তিক্সকী পথাপ্পুসু হেন্না ফগৎহল্লগনি। লৈবাক অসিগী জিলা কয়াদা সি.এন.জি.দা য়ুম্ফম ওইবা ইনফ্রাস্ত্রকচর শেমগৎপা ওইরবসু, ফাস্ততেগকুম্বা অনৌবা পথাপ ওইরবসু, মসিনা পোল্ল্যুসন হন্থহনবদা চাউনা মতেং ওইগনি। ঙসিদি, লৈবাক অসিগী মেত্রো রেলগী সর্ভিসশিংসু শহর ৫দগী ১৮দা হেনগৎলে অমসুং মসিনা মশাগী গারী শিজিন্নবগী চাংসু য়াম্না হন্থহল্লে।

মরূপশিং,

ঙসিদি, লৈবাক্কী রেলৱে নেৎৱর্ক্কী চাউরবা শরুক অমদি মৈনা চলায়রে। লৈবাক্কী এয়র্পোর্তশিংসু, য়াম্না অথুবা খোঙজেলদা, সোলার ইনর্জীদগী পুথোকপা মৈ শিজিন্নহল্লি। ২০১৪গী মমাংদা, এয়র্পোর্ত ৭ খক্তদা সোলার পাৱর ফেসিলিতী লৈরম্মি, অদুবু ঙসিদি, মসিগী মশিং অসি হেনগত্তুনা ৫০গী মথক্তা লৈরে। মসিনা ইনর্জী নীংথিজনা শিজিন্নবা হেনগৎহন্নবা এয়র্পোর্ত ৮০ হেনবদা এল.ই.দি. লাইৎশিং ইনস্তোল তৌবগী থবক লোইখ্রে। তুংলমচৎকীদমক শেম শাবগা মরী লৈনবা অতোপপা খুদম অমা ঐহাক্না অদোমদা হায়জগে।

গুজরাতকী স্তেচ্যু ওফ য়ুনিতীদা মালেমগী খ্বাইদগী ৱাংবা সরদার বল্লভ ভাইগী মীতম শাখি। স্তেচ্যু ওফ য়ুনিতী লৈরিবা ফজরবা কেবারিয়াগী সহর অসিবু ইলেক্ত্রিক গারীগী শহর অমা ওইহন্নবা চত্থরি। লাক্কদৌরিবা মতমশিংদা, কেবারিয়াদা  বেত্তরীনা চেনবা বস, চকা অনি পানবা গারী, চকা মরি পানবা গারী খক্তমক চেল্লগনি। মসিগীদমক  তঙাই ফদবা ইনফ্রাস্ত্রকচরশিংসু ফংহনবগী থবক পাইখৎলগনি।

মরূপশিং,

ৱাতর সাইক্ল অসিসু অইং-অশাগী খল কাইথরকপগা হকথেংননা মরী লৈনৈ। করিগুম্বা ৱাতর সাইক্লগী খলদা কায়থরকপা তারবদি মদুনা ৱাতর সেক্যুরিতীদা হকথেংননা অকায়বা লাকই। মমাংদা অমুক্তা তৌখিদ্রিবা মওংদা লৈবাক অসিদা ৱাতর সেক্যুরিতীগী মতাংদা থবক কয়া পাইখৎলে। ঈশিং তুংফম শেমগৎপদগী হৌদুনা ঈশিং হৌরকফম য়োকখৎপগী থবক কয়া অমসু লৈবাক অসিদা জল জীবন মিসনগী খুত্থাংদা পাংথোক্লি। অমসুং ঐহা্না নখোয়দা করিগুম্বা খরা নীংশিংজগে মদুদি জল জীবন মিসনদা হন্দক্তি প্রোগ্রাম অমা পাইখৎলি। মসিদা ঐহাক্না লৈবাক অসিগী প্রজাশিংগী মতেং মথৌ তাই। মদুদি নোংগী ঈশিং য়োকশিনবা, কেৎচ দি রেন ৱাতর, নোংগী ঈশিং মাংহনদবা, য়োকশিনবা অসিনি।

ইচিল-ইনাওশা

চাউরাক্না দিকেদ ৭রোম অসিদা লৈবাক অসিগী খুঙ্গংগী য়ুমথোং করোর ৩ রোমদা পাইপকী খুত্থাংদা ঈশিং য়ৌহনবা ঙমখ্রে অমরোমদা চহি অসি খক্তগী মনুংদা য়ুমথোং করোর ৪০ হেনবদা তোতি ঈশিং য়ৌহনখ্রে। নাকল অমদনা, য়ুম্থোং খুদিংমক তোতী ঈশিং ফংহল্লি অমসুং নাকল অমদনা লৈনুংগী ঈশিংগী থাক হেনগৎহন্নবা অতল ভুজল য়োজনা অমসুং কেৎচ দি রেনগুম্বা কেম্পেনশিং পায়খৎলি।

মরূপশিং,

শেমগৎ শাগৎপা অমসুং অকোইবগী ফীভমগী চাং মান্ননা থম্বা অসি ঐখোয়গী অরিবা চৎনবীগী য়াম্না মরু ওইবা শরুক অমনি, মসিদগী ঐখোয়না মরোমদোম লেপচবা ঙম্বা ভারতকী থৌনা অদুসু ফংলি। জীবা অমসুং মহৌশাগী মরী চাং মান্ননা থম্বা, বয়স্তি অমসুং সমস্তি চাং মান্ননা থম্বা, জীবা অমসুং শিব চাং মান্ননা থম্বা হায়বা অসি ঐখোয়গী শাস্ত্রাশিংনা ঐখোয়দা তাকপীখি। ঐখোয়দা য়ত পিন্দে তত ব্রহ্মান্দে হায়না তাকপী। হায়বদি পিন্দ হায়বদি জীবা অদু ব্রহ্মানদা লৈ হায়বনি। ঐখোয়না ইশাগীদমক তৌরিবা খুদিংমক অদুনা অকোইবদা হকথেংননা অকাইবা থোকহল্লি। মরম অসিনা ভারতনা মশাগী রিসোর্সশিংগী ইফিসিয়েন্সী অসি হেনগৎহন্নবা হোৎনবা কনখৎলক্লি। ঙসি সর্ক্যুলর ইকনোমীগী মরমদা ৱারী শারিবা অসিদা রিসোর্সশিংদা অকাইবা পীবা হন্থগদবা অদুগুম্বা প্রদক্তশিং অমসুং প্রোসেসশিংদা মীৎয়েং চংলি। অনৌবা তেক্নোলোজী শিজিন্নদুনা রিসাইকল তৌদুনা রিসোর্সশিংবু নীংথিজনা শিজিন্নবা ঙম্বা সেক্তর ১১বু সরকারনা শক-খঙদোক্লে। ৱেস্ত তু ৱেল্থ, হায়বদি কচরা তু কাঞ্চন কেম্পেনগী মতাংদা থবক কয়া অমা পায়খৎলি অমসুং মসিবু হৌজিক্তি, মিসন মোদতা য়াম্না থুনা মাংজিল থানা চৎনবা হোৎনরি। মদু য়ুমগী অমসুং লৌবক্কী অমোৎ-অকাই, স্ক্রেপ মেতল, লিথিয়ম আইওন বেত্তরীশিং ওইরবসু অসিগুম্বা মফম কয়াদা অনৌবা তেক্নোলোজীগী মতেংনা রিসাইক্ল তৌনবা থৌগৎলি। মসিগা মরী লৈনবা হীরম কয়া য়াওবা থবক অসিগা মরী লৈনবা এক্সন প্লান শেম্লে অমদি মসিবু লাক্কদৌরিবা থা খরদা থবক ওইনা পাংথোক্লগনি।

মরূপশিং,

অইং-অশাগী খল ঙাক্নবগীদমক্তা অকোয়ববু ঙাক শেনবগী থবকশিং অসি পুনশিন্নবা অসি য়াম্না তঙাই ফদে। লৈবাক অসিগী মীপুম খুদিংমক্না ঈশিং, নুংশিৎ অমসুং কংফালগী খল ঙাক্তুনা থম্নবা অমত্তা ওইনা হোৎনরবা মতমদতা ঐখোয়না তুংদা লাক্কদৌরিবা মীরোলশিংগী মফমদা শাফবা মহৌশাগী ফীভম অমা পীরম্বা ঙমগদৌরিবনি। ঐখোয়গী ইপা-ইপুনা পামজরম্বনি – অমসুং ঐখোয়গীদমক ঐখোয়গী ইপা-ইপুশিংনা অফবা ৱাফম অমা তাকপীরম্মি। ঐখোয়গী ইপা-ইপুনা ঐখোয়গীদমক করি পাম্লমখি। মখোয়না য়াম্না অফবা ৱাফম হায়বীরম্মি – পৃথিবী: পু চা উর্বি ভৱ। হায়বদি পৃথিবী পুম্বা, অকোইবা পুম্বা, পুম্নমক অসিগীদমক ঐখোয় মতিক খ্বাইদগী চাই, ঐখোয়গী মঙলানশিং অসিগী খুদোংচাবা অমা পীবিয়ু, য়াইফ পাউজেলশিং অসিগী লোইননা ঙসি মালেমগী অকোইবগী ফীভম কনবা নুমিৎ অসিদা মসিগা মরী লৈনবা মশক নাইবা মীওইশিংদা য়াইফ পাউজেল পীজরি।  অদোম চেকশিন্না লৈবীয়ু, নশাবু হকচাং ফনা থম্মু। অদোমগী ইমুংগী মীওইশিং হকচাং ফনা থম্বীয়ু। অমসুং কোবিদকী প্রোতোকলদা কোমথোকপা অমত্তা তৌরোইসি, মসিগী থাজবা অসি থম্বগা লোইননা হন্না-হন্না থাগৎচরি।

****