অৱাং-নোংপোক রাজ্যশিংবু য়াম্না থুনা চাউখৎহনবগী পান্দমগা লোয়ননা, ভারত সরকারনা লমদম অসিগী রাজ্য ৮দা ইং ২০২১-২২গী মনুংদা খুঙ্গংগী য়ুমশিংদা থক্নবা তোতি ঈশিং ফংহন্নবা জল জীবন মিসনগী থবক পাথোক্নবগীদমক্তা লুপা করোর ১৬০৫ থাদখ্রে। মসিগী থৌওং অসিনা শেনবা চহি অসিগী মনুংদা মরিরক থাদোক্কদবা শেনফমগী অহানবনি। খুঙ্গংগী য়ুমশিংদা পাইপকী খুত্থাংদা থক্নবা ঈশিং ফংহন্নবগীদমক্তা অসুক য়াম্বা শেনফম থাদবা অসিনা খুঙ্গংগী লমদমদা লৈরিবা মীওইশিংগী পুন্সি মহিং ফগৎহন্নবা কেন্দ্র সরকারনা খ্বাইদগী অহানবা মিৎয়েং চঙলি হায়বা তাক্লি।

প্রধান মন্ত্রী, শ্রী নরেন্দ্র মোদীনা লুচিংবা কেন্দ্র সরকারনা লৈবাক অসিগী অৱাং-নোংপোক লমদম চাউখৎপদা খ্বাইদগী অহেনবা মরু ওইবা পীদুনা লাক্লি। প্রধান মন্ত্রীনা অৱাং-নোংপোক্কী তৌবা ঙম্বা মতিক মপুং-ফানা শিজিন্নবা অমসুং মসিগী চাউখৎপা থুগৎহন্নবা খোঙফম চেৎলিবা অসি মীয়াম্না খঙনরবনি। শেনবা চহি ২০২১-২২দসু, জল জীবন মিসনগী মখাদা অৱাং-নোংপোক রাজ্যশিংগী লুপা করোর ৯২৬২বু সেন্ত্রেল গ্রান্ত ওইনা য়েন্থোক্তুনা থমখ্রবনি। হৌজিক্কী লুরবা তাঞ্জা অসিদা এন.ই. রাজ্যশিংগী খুঙ্গংগী য়ুমশিংদা তেপ ৱাতর কন্নেক্সন পীনবগীদমক্তা অহেনবা শেল য়েন্থোক্তুনা থাদোকপা অসিনা লমদম অসিগী শেন্মিৎলোন চাউখৎহনগনি।

জল জীবন মিসনগী মখাদা থাদরক্লিবা সেন্ত্রেল ফন্দ অসিগী ৯৩%গী শরুক্তি ঈশিং পীনবা ইনফ্রাস্ত্রকচর শেম-শাবদা, মসিবু শৌগৎপগী ৫% অমসুং ২%না ঈশিংগী মগুন শেন্নবা অমসুং য়েংশিনবগী থবকশিংদা শিজিন্নগনি। রাজ্য/য়ু.তি.শিংনা পীগদবা তেপ ৱাতর কন্নেক্সনগী অপুনবা মশিং অমসুং কেন্দ্র অমসুং শরুক মান্ননা লৈরিবা রাজ্যগী শেনফম শিজিন্নবদা য়ুম্ফম ওইরগা ভারত সরকারনা সেন্ত্রেল ফন্দ অসি থাদোক্কনি।

রাজ্যগী মান্নবা শরুক্কা লোয়ননা থাদোরক্লবা সেন্ত্রেল ফন্দ অসি থাদোরক্লবা মতুংগী নুমিৎ ১৫নিগী মনুংদা রাজ্যশিংনা ফন্দ অসি নোদেল একাউন্ত অমখক্তদা অমুক থাজিনগনি। রাজ্যগী শরুক্কা মান্নহন্নবা অমসুং থবক পায়খৎকদৌরিবা এজসেন্সীশিংদা শেলগী অৱাৎপা লৈহন্দনবা রাজ্যনা মখা তানা হোৎনগদবনি।  চহি অমগী মতমদা চাং নাইনা অমসুং মান্ননা য়েন্থোক্তুনা চাদিং তৌনবগীদমক্তা হীরম অসিগী মতাংদা নীংথিনা থৌরাং য়াৎকদবনি।

অসমদা খ্বাইদগী য়াম্বা ইমুং লাখ ৬৩.৩৫ লৈদুনা এন.ই. রাজ্য অপুনবদা খুঙ্গংগী ইমুং-মনুং চাউরাক্না লাখ ৯০মুক লৈ। ইং ২০২০-২১দা, রাজ্যশিং অসিদা অনৌবা তেপ ৱাতর কন্নেক্সন চাউরাকপা লাখ ১১ পীখ্রে। প্রধান মন্ত্রীনা ওগস্ত ১৫, ২০১৯দা জল জীবন মিসন লাউথোকখিবদা লৈরম্বা ইমুং-মনুং লাখ ৩.২ (৩%)গা চাংদম্নবদা রাজ্যশিং অসিদা ঙসি ফাওবগী ওইনা, ইমুং লাখ ১৬.২৭ (১৮%)না তোতি ঈশিং ফংলি।

সরকারনা খ্বাইদগী মরু ওইবনি হায়খ্রবা তুংদা, জল জীবন মিসনগীদমক্তা থাদবা শেনফম অসি ইং ২০২১-২২দা লুপা করোর ৫০,০১১দা মশক থোক্না হেনগৎখি। মসিগী মথক্তা, ১৫শুবা ফাইনান্স কম্মিসনগা লোয়নবা লুপা করোর ২৬,৯৪০গী শেনফমসু “ঈশিং অমসুং সেনিতেসন” সর্ভিসকী পি.আর.আই. ওইনা লৈগনি। মখা তাবা ওইনা, ফন্দ অসি রাজ্যগী মান্নবা শরুক অমসুং মপান্দগী তেংবাংলকপা প্রোজেক্তশিংগী খুত্থাংদসু ফংগনি। মতৌ অসুম্না, ইং ২০২১-২২দা খুঙ্গংগী ইমুংশিংদা তোতি ঈশিং পীনবগীদমক্তা লৈবাক অসিদা লুপা করোর লাখ ১ থাদবগী থৌরাং য়াৎলি।

 “য়ুম খুদিংদা ঈশিং ফংবা” হায়বা পান্দম অসি ফংনবগীদমক্তা মথংগী চহি অহুম হেনবদা হায়রিবা শেল থাদবগী পথাপ অসি লৈগনি হায়বগী থাজবা থম্নরি। খুঙ্গংগী লমদমশিংদা অসিগুম্বা অচৌবা শেনফম থাদবা অসিনা লোকেলগী শেন্মিৎলোনগী থবকশিংদা খুমাং চাউশিলহনবতা নত্তনা মখোয়গী শেন্মিৎলোনসু হেন্না চাউখৎহনগনি অমসুং মসিনা লোকেলগী মীওইশিংদা কান্নবা থবক পীবগী খুদোংচাবা কয়াসু ফংহনগনি।

খুঙ্গংগী ইমুং খুদিংদা ইং ২০২৪ ফাওবগী মনুংদা তোতি ঈশিং শোইদনা ফংহনবগী পান্দমগা লোয়ননা, প্রধান মন্ত্রী, শ্রী নরেন্দ্র মোদীনা ওগস্ত ১৫, ২০১৯দা লাউথোকখিবা জল জীবন মিসন অসি রাজ্য/য়ু.তি.শিংগা খুৎশম্নদুনা পায়খৎপনি। কোবিদ-১৯গী লাইচৎ অমসুং মখা তারকপা লোকদাউনগী শিংনবা কয়া থেংনরবসু, ইমুং করোর ৪.২০ (২১.৮৭%) হেনবদা তোতি ঈশিং পীখ্রে। হৌজিক্তি, খুঙ্গংগী ইমুং করোর ৭.৪৪ (৩৯%)না তোতি ঈশিং ফংলে। গোৱা, তেলঙ্গানা, অন্দমান অমসুং নিকোবর ইথৎ অমসুং পুদুচেরীনা “ইমুং খুদিং ঈশিং ফংবা” রাজ্য ওইরে। মখা তাবা ওইনা, মান্নবা অমসুং শরুক য়ামিন্নবগী ৱাখল্লোন ইন্দুনা, হায়বদি- খুঙ্গংগী মীওই অমত্তা চিত্থদবা, জল জীবন মিসন্না জিলা ৬১ অমসুং খুঙ্গং লিশিং ৯০ হেনবদা লৈরিবা খুঙ্গংগী ইমুং খুদিংদা তোতি ঈশিং ফংহনখ্রে। “খুঙ্গংগী মীওই অমত্তা চিত্থহন্দবা” ওইনবগীদমক্তা, হৌজিক্তি, রাজ্য/য়ু.তি.শিংনা লৈবাক অসিগী ইমুং খুদিংনা তেক্ত কায়দবা থক্নবা ঈশিং ফংনবা অহেনবা মিৎয়েং চঙলি।

ইং ২০২১-২২গী কেন্দ্রগী বজেৎ লাউথোক্লবা মতুংদা, জল শক্তিগী কেন্দ্র মন্ত্রীনা রুরেল ৱাতর সপ্লাইগী ইন-চার্জশিং/রাজ্য অমসুং য়ু.তি.শিংগী পি.ঐচ.ই.দি. ময়ামগী মীফম অমা লুচিংদুনা ফমখি অমসুং মসিদা জল জীবন মিসনগী থবক পায়খৎপগী মতাংদা খন্নখি অমসুং থৌরাংসু য়াৎখি। শেনবা চহি ২০২১-২২না এপ্রিল ৯দগী হৌদুনা এনুএল এক্সন প্লান (এ.এ.পি.) লৈখায় তাবগী পুন্না য়েংশিনমিন্নবা অচৌবা থবক অমগা লোয়ননা হৌখি। মসিগী অহুমশুবা চহি অসি জে.জে.এম.গীদমক্তা য়াম্না মরু ওইবা চহি অমনি অমসুং মসিদা নীংথিনা থৌরাং য়াৎপা, হৌখিবা চহি ২গী মায়-পাকপদা য়ুম্ফম ওইদুনা রাজ্য/য়ু.তি.শিংনা থবক পাংথোকপা ঙম্বগী মতিক য়েংশিনবা, ইন্সতিত্যুসনগী ওইবা শেম-শাবনচিংবা কয়াগী মথৌ য়াম্না তারি।

****