প্রধান মন্ত্রী শ্রী নরেন্দ্র মোদীনা ঙসি শ্রী গুরু তেগ বাহাদুর জিগী ৪০০শুবা মপোক কুমোনগী নিংশিং থৌরম (প্রকাশ পুরব) পাংথোকনবা শিনবা অৱাংবা থাক্কী কমিতিগী মিতিংদা ময়ায় তাঙবল লৌখ্রে। মিতিং অসি ভিদিও কনফরেন্সকী খুত্থাংদা পাংথোকখি।  

মিতিং অসিদা শরুক য়ারিবশিংনা প্রধান মন্ত্রীবু শ্রী গুরু তেগ বাহাদুর জিগী ৪০০শুবা মপোক কুমোন নিংশিং থৌরম প্রকাশ পুরবকী চাওনা থম্লিবা মিয়েং অসিবু থাগৎপা ফোংদোরক্লি। মখোয়না শ্রী গুরু তেগ বাহাদুর জিনা ধর্ম্মগী ওইবা নিং-খা তম্নবা হোৎনবদা মহাক্না লৌবিরম্বা থৌদাংশিং অমসুং মহাক্কী কৎথোকখিবশিংবু নিংশিংখি। শরুক য়ারিবশিংনা নিংশিং থৌরম অসিগীদমক অপাম্বা ৱাফম অমসুং পাউতাক কয়া অমা পীনরকখি অমসুং মহাক্কী পুন্সিদা লৌখিবা শক্লোন কয়া অমবু উৎপা তঙাইফদবা লৈ হায়না পুথোকখি। য়ুনিয়ন হোম মিনিস্তরনা হায়খি মদুদি পুন্না হোৎনমিন্নদুনা শ্রী গুরু তেগ বাহাদুর জিগী পাওজেল অসি মীপুম খুদিংদা য়ৌহনগদবনি হায়খি। কলচরেলগী সেক্রেতরীনা নিংশিং থৌরম অসিগীদমক ৱাফম কয়া অমা উৎখি।

মিতিং অসিদা ৱা ঙাংলদুনা প্রধান মন্ত্রীনা শরুক য়ারিবশিংবু মখোয়না থম্লক্লিবা ৱাফমশিং অসিদা থাগৎপা ফোংদোকখি। মহাক্না হায়খি মদুদি শ্রী গুরু তেগ বাহাদুর জিগী ৪০০শুবা মপোক কুমোন নিংশিং থৌরম অসি লাইনিং লাইশোন্দা পুক্নিং চংবা অমসুং মমা লৈবাক্কীদমক থৱায় য়াওবা মীওইনি হায়খি। মহাক্না শ্রী গুরু তেগ বাহাদুর জিনা তম্বীরম্বা অমসুং মহাক্কী পুন্সিদা তমজনিঙাই ওইবশিং তমখি অমসুং ঐখোয় পুম্বা মহাক্না চিংদুনা পুবিরকপনি হায়রি। মহাক্না উৎখি মদুদি হৌজিক লৈরিবা নহা ওইরিবা মীরোল অসি মসিগী পারাশিং অসিগী মরুওইবা খঙহনবা অমা মথৌ তাই অমসুং দিজিতেলগী মতেংনা মালেম অসিগী নহা ওইরিবা মীরোলশিংদা পাওজেল অসি শন্দোকপদা লায়না থোক্কনি হায়রি।  

প্রধান মিনিস্তরনা হায় মদুদি সিখ গুরুগী চৎন লোনচৎ অসি মপুং ফাবা পুন্সিগী ওইবা ফিলোজোফী অমনি। ৫৫০শুবা শ্রী গুরু নানক দেব জিগী প্রকাশ পুরব, ৪০০শুবা শ্রী গুরু তেগ বাহাদুর জিগী প্রকাশ পুরব অমসুং ৩৫০শুবা শ্রী গুরু গোবিন্দ সিংহ জিগী প্রকাশ পুরব পাংথোকপগী খুদোংচাবা অমা ফংবা অসি সরকার অসিগী লাইবক ফবনি।

মিতিং অসিগী খন্ন-নৈনবা অসি হেন্না মখা তারদুনা, প্রধান মন্ত্রীনা হায় মদুদি শ্রী গুরু তেগ বাহাদুর জিগী ৪০০শুবা মপোক কুমোন নিংশিং থৌরম অসিগী থৌরম পাংথোকপা অসিদা ঙম্লিবমখৈ মীয়াম্বু উন্নবিয়ু অমসুং চহি চুপ্পা থৌরম কয়া অমা শিনবিয়ু। মহাক্না হায়খি মদুদি শ্রী গুরু তেগ বাহাদুর জিগী পারা অসিদা নত্তনা গুরু পুম্বগী চৎন্নরীবশিং অসিদা শিনবিয়ু। মালেম অসিদা লৈরিবা সিখ কাংবু অমসুং অসিনা পাংথোক্লম্বা সমাজগী ওইবা থবকশিং অসি পুথোক্লদুনা প্রধান মন্ত্রীনা হায় মদুদি চপ চাবা রিসর্স অমসুং চে-চাংশিং সিখ চৎনবী অসিগীদমক থমগদবনি।

মিতিং অসিদা শরুক য়ারিবশিংদি হান্না প্রধান মন্ত্রী ওইবিরম্বা দাঃ মনমোহন সিংহ; য়ুনিয়নগী হোম মিনিস্তর শ্রী অমিত শাহ; লোক সভাগী স্পিকর শ্রী ওম বির্লা; রাজ্য সভাগী দিপুতী চেয়রমেন শ্রী হরিবনচ; ওপোজিসনগী লুচিংবা, রাজ্য সভা, শ্রী মালিকার্জুন খার্গে; হারিয়ানাগী সি.এম. শ্রী মনোহর লাল; পঞ্জাবকী সি.এম. কেপ্তেইন অমিরিন্দর সিংহ; রাজস্থানগী সি.এম. শ্রী অশোক গেহলোত; প্রসিদেন্ত শিরোমানি গুরুদ্বারা পার্বন্দক কমিতি, অম্রিতসর, বিবি জাগির কৌর; এম.পি. শ্রী শুখবির সিংহ বাদল অমসুং শ্রী সুখদেব সিংহ ধিনশা; হান্নগী এম.পি. তার্লোচান্দ সিংহ; এম.দি. অমুল শ্রী আর.এস. সোধি; মমিং লৈরবা স্কোলার শ্রী অমর্জিৎ সিংহ গ্রেৱাল, অতৈশিং অসিনচিংবা।

****