‘আত্মানির্ভর ভারত’কী মঙলান্দা মরু ওইবা অতোপ্পা খোঙ্কাপ অমা কানশিনবা ওইনা, প্রধান মন্ত্রী, শ্রী নরেন্দ্র মোদীনা লুচিংবা কেন্দ্রগী মন্ত্রী-মন্দলনা লুপা করোর ৬,২৩৮গী শেনফমগা লোয়নবা হ্বাইৎ গুদ (এয়র কন্দিসন অমসুং এল.ই.দি. লাইৎশিং)কী প্রদক্সন লিঙ্ক ইন্সেন্তিব স্কিম (পি.এল.আই.)গী অয়াবা পীখ্রে।

পি.এল.আই. স্কিম অসিগী মরু-ওইবা পান্দম অমদি ভারত্তা পোত্থোক শাবগী থৌওং অসিদগী সেক্তরগী অশোনবা লৌথোকপা, চাং মান্নবা শেন্মিৎলোন শেমগৎপা অমসুং মথৌ শোইদনা পাংথোকহন্দুনা মালেমগী থাক্তা চাংয়েংনবা ঙমহনবনি। থৌওং অসিবু ভারত্তা মপুং ফাবা কম্পোনেন্ত ইকোসীস্তেম শেমগৎনবা শেম-শাবনি অমসুং মতৌ অসুম্না ভারতপু মালেমগী সপ্লাই চেনগী মপুং ওইবা শরুক অমা ওইহনবনি। স্কিম অসিনা মালেমগী শেল থাদবগী পুক্নিং চীংশিনবা, থবক পীবগী পাক-চাউবা খুদোংচাবা লৈহনবা অমসুং মীরমদা পোত্থোক থাদোকপবু মশক থোক্না হেনগৎপা ঙমহনগনি হায়না থাজবা থম্নরি।

হ্বাইৎ গুদশিংগী পি.এল.আই. স্কিম অসিনা এয়র কন্দিসন অমসুং এল.ই.দি. লাইৎ শাবগা মরী লৈনবা কম্পেনীশিংদা ভারত্তা শাবা পোত্থোকশিংবু য়োনবা হেনগৎপগী মতুং ইন্না ৪%দগী ৬%গী চাংদা ইন্সেন্তিবসু পীগনি। অপাম্বা লমশিংদা মালেমগী শেল থাদবগী পুক্নিং চীংশিন্নবগীদমক্তা তোঙান-তোঙানবা পোৎলমশিংগী ওইনা তোঙানবা কাঙলুপ কয়া অমা খায়দুনা থম্লি। হৌজিক্কী মতম অসিদা ভারত্তা মরাং কায়না পুথোকপা ঙমদ্রিবা পোৎলমশিংবু শাবা নত্ত্রগা মখা তানা পানখৎপদা ইন্সেন্তিব পীনবগীদমক্তা স্কিম অসিগীদমক্তা কম্পেনীশিংবু খনগনি। শাবা লোইরবা পোথোকশিংবু পানখৎপগীদমক্তদি হায়রিবা ইন্সেন্তিব অসি পীরোই।

তোঙান-তোঙানবা পান্দম থম্লিবা কাঙলুপশিংগী মতিক-চাবগী হীরম ইনবা কম্পেনীশিংনা স্কিম অসিদা শরুক য়াবগী মতিক চাই হায়না লৌগনি। ব্রাউন ফিল্দ নত্ত্রগা গ্রীন ফিল্দ ইনভেস্তমেন্ত শাবা কম্পেনীশিংনা ইন্সেন্তিব অসিবু ফংবা য়াগনি। ইন্সেন্তিব অসি ফংবদা মতিক চানবগীদমক্তা বেজ চহিদগী য়েংবদা শেল থাদবগী অপুনবা শেনফম হেনগৎলকপগী চাং অমসুং শাবা লোইরবা পোত্থোকশিং য়োনবদা হেনগৎপগী চাং য়ৌগদবনি।

ভারত সরকারগী অতোপ্পা পি.এল.আই. ফংবা এন্তাইতী অমদা স্কিম অসিগী মনুং চনবা মান্নবা পোত্থোক্কীদমক্তা স্কিম অসিগী মখাদা ইন্সেন্তিব ফংবগী খুদোংচাবা পীরোই অদুবু এন্তাইতী অদুনা ভারত সরকার নত্ত্রগা কেন্দ্র সরকারগী অতোপ্পা মতিক চাবা স্কিমগী খুদোংচাবা লৌবদি য়াগনি। স্কিম অসি পেন-ইন্দিয়া স্কিম ওইনা চলাইগনি অমসুং অখন্নবা মফম, কাঙলুপ নত্ত্রগা মীশিংগী কাঙলুপ অমত্তদা অকক্নবা লৈরোই। এম.এস.এম.ই. কয়া য়াওনা মালেমগী অমসুং লৈবাক্কী থাক্তা লৈবা কম্পেনী কয়ানা স্কিম অসিদগী কান্নবা কয়া ফংবা য়াগনি।

এ.সি. অমসুং এল.ই.দি. ইন্দস্ত্রীশিংগী হৌজিক ওইরিবা শাহৌ-লৌবগী চাংদগী অহেনবা চাং য়ৌবা ঙমহনবা, ভারত্তা মপুং ফাবা কম্পোনেন্ত ইকোসীস্তেম শেমগৎহনবা অমসুং ভারত্তা মালেমগী ওইবা পোত্থোক শাবগী মাংজিল থাবা মফম অমা ওইহনবদা স্কিম অসিনা তেংবাংগনি হায়না থাজনরি। মখোয়না লৈবাক মনুংদা পোত্থোক য়োনবগী চংদবা য়াদ্রবা বি.আই.এস. অমসুং বি.ই.ই. ক্বালিতী স্তেন্দর্দ অমসুং মালেগী কৈথেলগী চৎনবী স্তেন্দর্দ শোইদনা ইন্দবদি য়াদে। মসিনা অনৌবা পুথোকপা অমদি রিসর্চ অমসুং দিভেলপমেন্ততা শেল থাদবগী চাং হেনগৎহনবগা লোয়ননা তেক্নোলোজীবু হেন্না ফগৎহনবগী থৌওংসু ওইথোকহনগনি।

পি.এল.আই. স্কিম অসিনা চহি ৫গী মনুংদা লুপা করোর ৭৯২০গী অহেনবা শেল থাদবগী শেনফম হেনগৎহনবা, লুপা করোর লাখ ১.৬৮গী পোত্থোক পুথোকপা হেনগৎহনবা অমসুং মীরমদা লুপা করোর ৬৪,৪০০গী পোত্থোক থাদোকপা ঙমহনগনি হায়না পানরি। মসিগা লোয়ননা লুপা করোর ৪৯,৩০০গী দাইরেক্ত অমসুং ইন্দাইরেক্ত রেভেন্যু পুথোকপা অমসুং থবক লাখ ৪ লৈহনবদসু তেংবাংগনি।
 

*******