ଭାରତୀୟ ସମ୍ବିଧାନର ଧାରା ୧୨୪ର ଖଣ୍ଡ (୨)ରେ ଥିବା କ୍ଷମତାକୁ ପ୍ରୟୋଗ କରି ଭାରତର ରାଷ୍ଟ୍ରପତି ସୁପ୍ରିମକୋର୍ଟ ବିଚାରପତି ଶ୍ରୀ ଜଷ୍ଟିସ ନଥାଲପତି ଭେଙ୍କଟ ରମଣଙ୍କୁ ଭାରତର ମୁଖ୍ୟ ବିଚାରପତି ଭାବେ ନିଯୁକ୍ତ କରିଛନ୍ତି । ଏ ବାବଦରେ ଆଜି ଆଇନ ଓ ନ୍ୟାୟ ମନ୍ତ୍ରଣାଳୟର ନ୍ୟାୟ ବିଭାଗ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି । ନିଯୁକ୍ତି ଅଧିକାର ଏବଂ ନିଯୁକ୍ତି ସଂକ୍ରାନ୍ତ ବିଜ୍ଞପ୍ତିର ନକଲକୁ ଶ୍ରୀ ଜଷ୍ଟିସ ଏନ.ଭି. ରମଣଙ୍କୁ ହସ୍ତାନ୍ତର କରାଯାଇଛି ।

ଜଷ୍ଟିସ ନଥାଲପତି ଭେଙ୍କଟ ରମଣ ୨୦୨୧ ଏପ୍ରିଲ ୨୪ରେ ସୁପ୍ରିମକୋର୍ଟର ମୁଖ୍ୟ ବିଚାରପତି ଭାବେ ଦାୟିତ୍ୱ ଗ୍ରହଣ କରିବେ । ସେ ଭାରତର ୪୮ତମ ମୁଖ୍ୟ ବିଚାରପତି ହେବେ ।

ଜଷ୍ଟିସ ରମଣ ଆନ୍ଧ୍ର ପ୍ରଦେଶର କ୍ରିଷ୍ଣା ଜିଲ୍ଲା ଅଧୀନ ପୋନ୍ନାବରମ ଗ୍ରାମର ଏକ ଚାଷୀ ପରିବାରରେ ଜନ୍ମଗ୍ରହଣ କରିଥିଲେ । ସେ ଜଣେ ଉତ୍ସାହୀ ପାଠକ ଏବଂ ସାହିତ୍ୟରେ ତାଙ୍କର ରୁଚି ରହିଛି । କର୍ଣ୍ଣାଟକୀ ସଙ୍ଗୀତକୁ ସେ ଯଥେଷ୍ଟ ପସନ୍ଦ କରନ୍ତି ।

୧୦-୦୨-୧୯୮୩ରେ ତାଙ୍କୁ ବାରକୁ ଆମନ୍ତ୍ରଣ କରାଯାଇଥିଲା । ସେ ଆନ୍ଧ୍ର ପ୍ରଦେଶ ହାଇକୋର୍ଟ, କେନ୍ଦ୍ରୀୟ ଏବଂ ଆନ୍ଧ୍ର ପ୍ରଦେଶ ପ୍ରଶାସନିକ ଟ୍ରିବ୍ୟୁନାଲ ଓ ଭାରତର ସୁପ୍ରିମକୋର୍ଟରେ ଓକିଲାତି କରିଥିଲେ । ସମ୍ବିଧାନ, ନାଗରିକ, ଶ୍ରମ, ସେବା ଓ ନିର୍ବାଚନ ପ୍ରସଙ୍ଗରେ ତାଙ୍କର ବିଶେଷ ଅଭିଜ୍ଞତା ରହିଛି । ଏଥିସହ ଆନ୍ତଃ-ରାଜ୍ୟ ଜଳ ବିବାଦ ଟ୍ରିବ୍ୟୁନାଲ ଗୁଡ଼ିକରେ ମଧ୍ୟ ସେ ଓକିଲାତି କରିଛନ୍ତି ।

ନିଜ ଓକିଲାତି ବର୍ଷଗୁଡ଼ିକରେ ସେ ଆନ୍ଧ୍ର ପ୍ରଦେଶର ଅତିରିକ୍ତ ଆଡଭୋକେଟ ଜେନେରାଲ ଭାବେ ସେବା ଦେବା ପୂର୍ବରୁ ହାଇଦ୍ରାବାଦରେ କେନ୍ଦ୍ରୀୟ ପ୍ରଶାସନିକ ଟ୍ରିବ୍ୟୁନାଲରେ ରେଳପଥ ପାଇଁ ଅତିରିକ୍ତ ଷ୍ଟାଣ୍ଡିଙ୍ଗ କାଉନସେଲ ଓ ବିଭିନ୍ନ ସରକାରୀ ସଂଗଠନ ପାଇଁ ଜଣେ ପ୍ୟାନେଲ କାଉନସେଲ ଭାବେ କାର୍ଯ୍ୟ କରିଥିଲେ ।

ଜଷ୍ଟିସ ନଥାଲପତି ଭେଙ୍କଟ ରମଣ ୧୭-୦୨-୨୦୧୪ରୁ ଭାରତର ସର୍ବୋଚ୍ଚ ଅଦାଲତରେ ଉପନ୍ୟାୟାଧୀଶ ଭାବେ କାର୍ଯ୍ୟ କରିଥିଲେ । ୨୦୧୯ ମାର୍ଚ୍ଚ ୭ରୁ ୨୦୧୯ ନଭେମ୍ବର ୨୬ ପର୍ଯ୍ୟନ୍ତ ସୁପ୍ରିମକୋର୍ଟ ନ୍ୟାୟିକ ସେବା କମିଟିର ଅଧ୍ୟକ୍ଷ ରହିଥିଲେ । ୨୭-୧୧-୨୦୧୯ରୁ ସେ ଜାତୀୟ ନ୍ୟାୟିକ ସେବା ପ୍ରାଧିକରଣ (ଏନଏଏଲଏସଏ)ର କାର୍ଯ୍ୟନିର୍ବାହୀ ଅଧ୍ୟକ୍ଷ ଭାବେ ମଧ୍ୟ ସେବା ଯୋଗାଇଥିଲେ ।

ପ୍ରଥମେ ୨୭-୦୬-୨୦୦୦ରୁ ସେ ଆନ୍ଧ୍ର ପ୍ରଦେଶ ହାଇକୋର୍ଟର ଜଣେ ସ୍ଥାୟୀ ବିଚାରପତି ଭାବେ ନିଯୁକ୍ତି ପାଇଥିଲେ । ଏମିତି କି ନିଜ ମୂଳ ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ଭାବେ ସେ ୧୦-୩-୨୦୧୩ରୁ ୨୦-୫-୨୦୧୩ ପର୍ଯ୍ୟନ୍ତ କାର୍ଯ୍ୟ କରିଥିଲେ ।

***

SR