ବୈଜ୍ଞାନିକ ପ୍ରମାଣକୁ ଆଧାର କରି ନିର୍ଦ୍ଦିଷ୍ଟ କୋଭିଡ-19 ଟୀକା- କୋଭିଶିଲ୍ଡର ଦୁଇଟି ଡୋଜ୍‌ ମଧ୍ୟରେ ବ୍ୟବଧାନ ଅବଧିକୁ ବୃଦ୍ଧି କରିବା ଲାଗି ନିଷ୍ପତ୍ତି ନିଆଯାଇଛି । ଟୀକାକରଣ ଉପରେ ଜାତୀୟ ବୈଷୟିକ ପରାମର୍ଶଦାତା ଗୋଷ୍ଠୀ (ଏନଟିଏଜିଆଇ) ଏବଂ କୋଭିଡ-19 ଟୀକାକରଣ ପରିଚାଳନା ଉପରେ ଗଠିତ ଜାତୀୟ ବିଶେଷଜ୍ଞ ଗୋଷ୍ଠୀ (ଏନଇଜିଭିଏସି)ର 20ତମ ବୈଠକରେ ଆଲୋଚନା ପରେ ଏହି ନିଷ୍ପତ୍ତି ନିଆଯାଇଛି । ଏହି ବୈଠକରେ ସମୀକ୍ଷା କରାଯିବା ପରେ, ପ୍ରଥମ ଡୋଜ୍‌ ନିଆଯିବାର 4-8 ସପ୍ତାହ ବ୍ୟବଧାନରେ ଦ୍ୱିତୀୟ ଡୋଜ୍‌ ନିଆଯିବା ପାଇଁ ସୁପାରିସ କରାଯାଇଥିଲା। ପୂର୍ବରୁ ଏହା 4-6 ସପ୍ତାହ ମଧ୍ୟରେ ନିଆଯାଉଥିଲା। ଦୁଇଟି ଡୋଜ୍‌ ମଧ୍ୟରେ ବ୍ୟବଧାନ ବଜାୟ ରଖିବା ନିମନ୍ତେ ଏହି ସଂଶୋଧିତ ସମୟ ଅବଧି କେବଳ କୋଭିଶିଲ୍ଡ କ୍ଷେତ୍ରରେ କାର୍ଯ୍ୟକାରୀ ହେବ ଏବଂ କୋଭାକ୍ସିନ ଟୀକା କ୍ଷେତ୍ରରେ ନୁହେଁ ବୋଲି ସ୍ପଷ୍ଟ କରି ଦିଆଯାଇଛି ।

ଏ ସଂକ୍ରାନ୍ତରେ ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ପ୍ରଦେଶର ମୁଖ୍ୟ ଶାସନ ସଚିବମାନଙ୍କୁ କେନ୍ଦ୍ର ସ୍ୱାସ୍ଥ୍ୟ ସଚିବ ଶ୍ରୀ ରାଜେଶ ଭୂଷଣ ଏକ ପତ୍ର ଲେଖି ଅବଗତ କରାଇଛନ୍ତି । ଏହି ପତ୍ରରେ ସେ ଅବଗତ କରାଇଛନ୍ତି ଯେ ଏନଟିଏଜିଆଇ ଏବଂ ଏନଇଜିଭିଏସିର ସୁପାରିସକୁ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଗ୍ରହଣ କରିନେଇଛି । କୋଭିଶିଲ୍ଡର ପ୍ରଥମ ଡୋଜ୍‌ ନେବାର 4-8 ସପ୍ତାହ ବ୍ୟବଧାନରେ ଦ୍ୱିତୀୟ ଡୋଜ ହିତାଧିକାରୀମାନଙ୍କୁ ଦେବା ଲାଗି ମନ୍ତ୍ରଣାଳୟ ସୁପାରିସ କରୁଛି ।

ବୈଜ୍ଞାନିକ ପ୍ରମାଣକୁ ଦୃଷ୍ଟିରେ ରଖି, ଏହା ଜଣାପଡ଼ିଛି ଯେ କୋଭିଶିଲ୍ଡର ପ୍ରଥମ ଡୋଜ୍‌ ନେବାର 6-8 ସପ୍ତାହ ମଧ୍ୟରେ ଦ୍ୱିତୀୟ ଡୋଜ ନେଲେ ଏହା ଅଧିକ ଫଳପ୍ରଦ ହେଉଛି । କିନ୍ତୁ 8ସପ୍ତାହ ପରେ ଏହାକୁ ନେବା ଉଚିତ୍‌ ନୁହେଁ । ସଂଶୋଧିତ ଡୋଜ୍‌ ପରିଚାଳନା ସମ୍ପର୍କରେ ସମ୍ପୃକ୍ତ ସମସ୍ତ ଅଧିକାରୀମାନଙ୍କୁ ଅବଗତ କରାଇବା ଏବଂ ଏହି ସୂଚନା ତୁରନ୍ତ ପହଞ୍ଚାଇବା ନିମନ୍ତେ ପଦକ୍ଷେପ ଗ୍ରହଣ କରିବା ଲାଗି କେନ୍ଦ୍ର ସ୍ୱାସ୍ଥ୍ୟ ସଚିବଙ୍କ ପକ୍ଷରୁ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶଗୁଡ଼ିକୁ କୁହାଯାଇଛି। ଏହି ସୂଚନା ପ୍ରୋଗ୍ରାମ ମ୍ୟାନେଜର, ଟୀକା ପ୍ରଦାନକାରୀ, କୋଭିଶିଲ୍ଡ ଟୀକା ଗ୍ରହଣକାରୀଙ୍କ ନିକଟରେ ପହଞ୍ଚାଇବା ଓ ଟୀକାର ଡୋଜ୍‌ ମଧ୍ୟରେ ସୁପାରିସ ଅନୁଯାୟୀ ବ୍ୟବଧାନ ବଜାୟ ରଖିବା ନିମନ୍ତେ ସେ ପରାମର୍ଶ ଦେଇଛନ୍ତି ।

*******

P.S