খুরুমজরি,

তামিল নাদুগী গভর্নর অমসুং য়ুনিভর্সিতীগী চাঞ্চেলর শ্রী বানৱারিলাল পুরোহিৎ, ভাইস চাঞ্চেলর সুধা সেশ্যায়ান, ফেকল্তী, স্তাফ অমসুং ঐগী নুংশিজরবা মহৈরোইশিং,

মেদিকেল, দেন্তেল, আয়ুশ অমসুং পেরামেদিকেলগী তোঙান তোঙানবা লমশিংদা নখোয়না দিগ্রীশিং অমসুং দিপ্লোমাশিং ফংবা মতম ওইরিবা য়ুনিভর্সিতীগী ৩৩শুবা কনভোকেসন অসিদা নখোয়গী উন্নবা ফংবা অসিদা য়াম্না নুংঙাইবা ফাওজৈ। ঙসি কেন্দিদেৎ লিশিং ২১ হেনবদা দিগ্রীশিং অমসুং দিপ্লোমাশিং পীনি হায়না তাজৈ। অদুবু ঐহাক্না পঞ্জনিংবা ৱাফম অমা লৈ। মশিং অসিনা নুপা ৩০% অমসুং নুপী ৭০%রোম ওই হায়না তাক্লি। ঐহাক্না গ্রেজ্যুৎ পুম্নমক্তা নুংঙাইবা ফোঙদোকচরি অমসুং নুপী কেন্দিদেৎশিংদা ঐহাক্না অখন্ননা থাগৎ ৱাহৈ ফোঙদোকচরি। মহাক্না লম অমা হেক্তদা নুপীশিংনা মাং থানা চংশিনবা উবা খুদিং অখন্নবা ওই। অসিগুম্বা মীকুপশিং অসি চাউথোকচনবগী মীকুপ অমনি অমসুং হরাও-তয়াম্বগী মীকুপ অমনি।

মরুপশিং,

মহৈরোইশিং অমসুং ইন্সতিত্যুসন অসিনা মাই পাকপনা এম.জি.আর.পু য়াম্না নুংঙাইহল্লগনি।

এম.জি.আর.গী লৈঙাক অসি লায়রবশিংদা মপুং ফানা মীনুংশি উৎখিবা অমনি। হেল্থকিয়র, এজুকেসন অমসুং নুপীশিংবু শক্তি পীবা হায়বা লমশিং অসি মঙোন্দা মরু ওইখি। চহি খরগী মমাংদা ঐহাক্না এম.জি.আর.না পোকখিবা স্রী লঙ্কাদা চৎখি। ঐখোয়গী তামিল ইচিল-ইনাওশিংনা হেল্থ সেক্তরগীদমক থবক তৌরিবা অসি ভারতকী ওইনা লাইবক ফাবনি। ভারতনা শেন্থং পীথবা লেম্না এম্ব্যুলেন্স সর্ভিস অসি তামিল কাংলুপা পাক শন্না শিজিন্নরি। দিক্কোয়াদা হোস্পিতাল শঙ্গাখিবগী থৌরম অসি ঐহাক্না কাউররোই। অসুম্না তামিল কাংলুপকীদমক হেল্থকিয়রদা হোৎনরিবশিং অসিনা এম.জি.আর.বু য়াম্না নুংঙাইহল্লগনি।

মহৈরোই মরুপশিং,

মসি নখোয়গী পুন্সিগী য়াম্না মরু ওইবা তাঙ্কক অমদগী অমদা ওল্লকপগী তানফম অমনি

মসি মহৈ তম্বদগী লায়েংবদা ওল্লিবা নখোয়গী তানফম অমনি। মসি নখোয়না একজামশিংদা মার্ক ফংনবা হোৎনরম্বদগী খুন্নাইদা মার্ক অমা থম্নবা হোৎনবগী তানফম অমনি।

মরুপশিং,

কোবিদ-১৯ লাইচৎ অসি মালেমগী ওইনা অমুক্তা থোকখিদ্রিবা অমনি। মসিগীদমক প্রি-সেৎ ফোর্ম্যুলা অমত্তা লৈখিদে। অসিগুম্বা তানফম অসিদা ভারতনা অনৌবা লম্বী অমা শেম্বা খক্তা নত্তনা মসিগা লোইননা চৎলিবা অতোপ্পা মীওইশিংসু মতেং পাংখি। নাবা ফগৎপগী চাং খ্বাইদগী ৱাংবা ওইখি। ভারতনা মালেমগীদমক হিদাক-লাংথকশিং অমসুং বেক্সিনশিং পুথোক্লি। ভারতকী মেদিকেল প্রোফেস্নেলশিং, সাইন্তিস্তশিং অমসুং ফার্মা প্রোফেস্নেলশিং অসিবু য়াম্না থাগৎনবা অমসুং ইকাই খুম্নবা তানফম অমদা নখোয়না গ্রেজ্যুৎ তৌরি। পুম্নমক অসিগী মথক্তা ভারতকী হেল্থ ইকোসিস্তেম অসি অনৌবা মীৎয়েং, অনৌবা ইকাই খুম্নবা অমসুং অনৌবা থাজবগা লোইননা য়েংনরি। অদুম ওইনমক মসিনসু মালেমনা নখোয়দগী চাউনা থাজবা থম্লি হায়বনি, মসি নৌরিবা অমদি মপাঙ্গল লৈবা নখোয়দা পীরিবা থৌদাং অমনি। লাইচৎ অসিগী তমশিলহৌবশিংনা তি.বি.গুম্বা অতোপ্পা লাইনশিংগী লাঞ্জংদা ঐখোয়দা মতেং ওইগনি।

মরুপশিং,

তিরুবল্লুভরনা হায়: নারিবা, দোক্তর, হিদাক-লাংথক অমসুং কিয়রগীভর, মরিমক লায়েংবনা কোল্লি। লাইচৎ মনুংদা অমসুং অপনবা কয়াগী চৈরক্তা য়ুম্বী মরি অসিনা শকখঙদবা য়েক্নবা অসিগা লান্থেংনবদা মাং থাখি। ভাইরস অসিগী লান্থেংনখিবা পুম্নমক মীওইবা জাতিগী অথোইবশিং ওইখি।

মরুপশিং,

ঐখোয়না মেদিকেল এজুকেসন অমসুং হেল্থ সেক্তরদা অওনবা পুরক্লি। দি নেস্নেল মিদেকেল কম্মিসননা ত্রান্সপরেন্সী পুরক্কনি। মসিনা অনৌবা মেদিকেল কোলেজশিং লিংখৎনবা কাংলোনশিং রেস্নেলাইজ তৌগনি। সেক্তর অসিদা ক্বালিতী অমসুং হ্যুমেন রিসোর্স লৈহনবা হেনগৎহল্লগনি। হৌখিবা চহি ৬ অসিদা এম.বি.বি.এস. সিৎশিং অসি লিশিং ৩০ হেন্না হেনগৎহনখ্রে হায়রিবা অসি ২০১৪দগীদি ৫০% হেন্না হেনগৎলে। পি.জি.গী সিৎ মশিং অসি লিশিং ২৪ হেনগৎহনখ্রে মসি ২০১৪দগী ৮০%রোম হেনগৎলিবনি। ২০১৪দা লৈবাক অসিদা এম্স ৬ লৈরমখি। হৌখিবা চহি ৬তা লৈবাক অসিদা এম্স ১৫ অমগা অয়াবা পীখ্রে। তামিল নাদু অসি মাগী মেদিকেল এজুকেসনগীদমক খঙনৈ। রাজ্য অসিদগী ঐখোয়গী নহাশিং মতেং পাংনবা ঐখোয়গী সরকারনা রাজ্য অসিদা অনৌবা মেদিকেল কোলেজ ১১ লিংখৎনবা অয়াবা পীখ্রে। অনৌবা মেদিকেল কোলেজশিং অসি হৌজিক মেদিকেল কোলেজ অমত্তা লৈতবা জিলাশিংদা লিংখৎকনি। কোলেজ অমমমগী ওইনা ভারত সরকারনা লুপা করোর ২০০০ হেন্না পীগনি।

বজেৎ অসিদা আউৎলে লুপা করোর লিশিং ৬৪ হেনবগা লোইননা ঐখোয়না পি.এম. আত্মানির্ভর স্বাস্থ ভারত য়োজনা লাউথোকখি। মসিনা অনৌবা অমসুং থোরক্লিবা লাইনাশিং খঙদোক্নবা অমসুং লায়েংনবা প্রাইমারী, সেকেন্দরী অমসুং তর্সিয়রী হেল্থকিয়রগী মতিক-মগুনশিং হেনগৎহল্লগনি। ঐখোয়গী আয়ুশ্মান ভারত অসি মীওই করোর ৫০দা মেদিকেল অমসুঢ সর্জিকেল প্রোসিজর ১৬০০ রোমগী ক্বালিতী কিয়র ফংহনখিবা মালেমগী খ্বাইদগী চাউবা হেল্থ এস্যুরেন্স প্রোগ্রাম অমনি।

জন ঔশাধি কেন্দ্রশিংগী মশিং অসি ৭০০০তা হেনগৎতুনা হেন্না হোংবা মমলশিংদা হিদাক-লাংথকশিং ফংহল্লি। লায়রবা করোর কয়াদা মতেং পাংদুনা ঐখোয়গী লৈবাক অসিদা স্তেন্তশিং অমসুং নী ইম্প্লান্তশিং অসিগুম্বা মেদিকেল দিভাইসশং হেন্না হোংনা ফংহনখ্রে।

মরুপশিং,

দোক্তরশিং অসি ঐখোয়গী লৈবাক্তা খ্বাইদগী ইকাই খুম্নবা শিনফমশিংগী মরক্তা অমনি। ঙসিদি ইকাই খুম্নবা অসি লাইচৎ মতুংদনা হেন্না হেনগৎলকখ্রে। ইকাই খুম্নবা অসিগী মরমদি মীয়াম্না নখোয়গী শিনফম অসি কয়াম লুবগে হায়বা থেঙ্খাং কয়াদা খংবা ঙমখি কনাগুম্বা মীওই অমগী শিবা-চংবগী মরক্তা লৈরিবা ৱাফম অমা ওইখি। অদুম ওইনমক অরুবা অমসুং অরুবা মানবা হায়বা অনি অসি তোখাইবা পোৎশকশিংনি। নখোয় পুম্নমক্তা ঐহাক্না ফাগী জুগাইসু তৌবা হৈজন্নবা হায়জনিংঙি। মসিনা মখোয়গী মমা-মপাশিং হরাও হনবদা অমদি মখোয়গী থাক ৱাংনা থম্বদা মতেংসু ওইরগনি। দোক্তর খরনা মখোয়গী মথৌ তৌবদা শিংথানিংঙাই ওইবা খক্তা নত্তনা হোস্পিতালগী মনুংদা ফাগী জুগাই তৌদুনা নাবা মীওইশিং অমসুং মখোয়গী স্তাফ ফাওবা নুংঙাইহনবা ঐহাক্না উজৈ। মসিনা মীয়ামদা নাবা ফগৎপদা খ্বাইদগী মরু ওইরিবা আশা অদু পোকহল্লি। নখোয়গী ফাগী জুগাই তৌনবগী ৱাখল্লোন অদুনা নখোয়গী হকচাং অমসুং ৱাখল ফনা থম্বা ঙমগনি। নখোয়না লৈবাক অসিগী মীয়াম হকচাং ফনা থম্বীরি অমসুং মসি পাঙথোক্নবা নখোয়না নশাগী হকশেল অমসুং মশা-মউ ফনা থম্বদা মীৎয়েং চংনবা তাই। য়োগ, মেদিতেসন, লমজেল চেনবা, সাইকল থৌবা - নশা ফনা থম্বদা মতেং পাংলিবা হকচাং শাজেল মখল অমা খল্লু।

মরুপশিং,

শ্রী রামাকৃষ্ণ পরমহমসা, স্বামি বিবেকানন্দী গুরু অসিনা অসুম্না হায়রম্মি “शिव ज्ञाने जीव सेवा” – মসিগী আর্থদি, মীয়ামগী থৌগল তৌবা অসি শিবা নত্ত্রগা ঈশ্বরগী থৌগৎ তৌবগা চপ মান্নৈ। করিগুম্বা কনাগুম্বনা পুন্সিদা মসিগী অফবা ৱাখল্লোন অসিগা লোইননা হিংবগী খুদোংচাবা ফংলবদি মদু মেদিকেল প্রোফেস্নেলশিং ওইগনি। নখোয়গী শাংলবা কেরিয়র অসিদা শিনফম খঙনা চৎপা অমসুং মসিগা ইরোইননা নখোয় নশাগী খুমাং চাউশিনহনবা অসি কাওরোইদবনি। নখোয় নশাগী খক্তা খনবা থাদোকউ। মসি তৌবনা নখোয়দা অকিবা পোকহল্লোই।

মরুপশিং,

অমুক হন্না ঐহাক্না দিগ্রী ফংখ্রবশিংবু থাগৎচরী। ৱাহৈ খরা অসিগা লোইননা ঐহাক্না ৱারোল অসি লোইশিঞ্জরি অমসুং নখোয় পুম্নমক্তা সেক্তর অসিদা কান্নগদবা, অফবা অমসুং শিংথানিংঙাই ওইবা কেরিয়র অমা শেম্নবা য়াইফ-পাউজেল পীজরি।

থাগৎচরী।

*****