কেন্দ্রগী এজুকেসন মন্ত্রী, শ্রী রমেশ পোখ্রিয়াল ‘নিশাঙ্ক’না ঙসি স্কুলগী মহৈরোয়, ওজা অমসুং মমা-মপাশিংগা প্রধান মন্ত্রীগা ৱারী শাবগী থৌরম, পরিক্সা পে চর্চা ২০২১গী মরিশুবা তাঙ্কক্কী রেজিস্ত্রেসন তৌবা হৌরে হায়না মহাক্কী সোসিএল মিদিয়া প্লেৎফোর্মগী খুত্থাংদা লাউথোকখ্রে।

পরিক্সা পে চর্চা অসি পরিখাগা মরি লৈনবা থৱাই ৱাবা অমসুং অতোপ্পা হীরমশিংগী মতাংদা মহৈরোয়শিংনা ৱাহং হংদুনা প্রধান মন্ত্রীনা মহাক্কী নুংঙাইরবা মওং-মতৌগা লোয়ননা লাইব ওইনা পাউখুম পীবা য়াম্না নুংঙাইবা চহি খুদিংগী পাংথোকপা মীয়াম্না ঙাইনদুনা লৈবা থৌরম অমনি। শ্রী পোখ্রিয়ালনা হন্দক্কী চহিগী ওইনদি থৌরম অসি ভর্চুএলগী খুত্থাংদা পাংথোক্লগনি হায়না লাউথোকখ্রে। ক্লাস ৯দগী ১২ ফাওবগী মনুং চনবা মহৈরোয়শিংনা পরিখাগী মতাংদা থৱাই ৱাবগা মরী লৈনবা হংনিংবা ৱাহংশিং অসি মাইগোব প্লেৎফোর্মগী খুত্থাংদা পীরকপা য়াগনি অমসুং খনগৎলবা ৱাহংশিং অদুবুনা মরু ওইবা থৌরমগী মনুং চলহনগনি হায়না মহাক্না মখা তানা হায়খি। থৌরম অসিদা শরুক য়াগদবা লৈবাক শিনবা থুংবগী মহৈরোয়, ওজা অমসুং মমা-মপাশিং অসি মাইগোব প্লেৎফোর্মদা মখোয়গীদমক্তা শেম-শাবা ওনলাইন ক্রিএতিব রাইতিং কম্পিতিসন অমগী খুত্থাংদা খনগনি হায়নসু মহাক্না পাউদমখি। চাংয়েংনবা অসিগী ওইনা মহৈরোয়, ওজা অমসুং মমা-মপাশিংগী ওইনা তোঙান-তোঙানবা হীরম কয়া লৈগনি। প্লেৎফোর্ম অসিদা শরুক য়ানিংবা মীওইশিংনা ৱাহং হংবসু য়াগনি। খনগৎলবা মীওইশিংনা মখোয়-মখোয়গী রাজ্য অমসুং হেদক্বার্তরশিংদগী ওনলাইনগী খুত্থাংদা থৌরম অসিদা শরুক য়াগনি অমসুং মখোয়শিংদা অখন্নবা পি.পি.সি. কিৎ (পরিক্সা পে চর্চা কিৎ) পীগনি। ওনলাইন ক্রিএতিব রাইতিং কম্পিতিসনগী পোর্তেল অসি মার্চ ১৪, ২০২১ ফাওবা হাংগনি হায়না মহাক্না মখা তানা হায়খি।

পোর্তেল অসিদা চঙনবগীদমক্তা লিঙ্ক অসিদা ক্লিক তৌবীয়ুঃ https://innovateindia.mygov.in/ppc-2021/

মাইগোবতা পাংথোক্কদবা ক্রিএতিব রাইতিং কম্পিতিসনগী হীরমশিংদি মখাদা পীরিঃ

মহৈরোয়শিংগী

হীরম ১: পরিখা হায়বসি কুমহৈগুম্বনি, মসিবু নুংঙাইবা পাংথোকউ

পাংথোক্কদবা থবকঃ নহাক্কী পামজবা হীরমগা মরী লৈনবা কুমহৈ অমগী মওং-মতৌ অমা য়েকপা।

হীরম ২: ভারত অসি য়াম্না পুক্নিং হুনীংঙাই ওইবনি, মসিবু কোয়দুনা খঙদোকউ।

পাংথোক্কদবা থবকঃ নহাক্কী মরূপনা নহাক্কী শহরদা নুমিৎ হুম্নি কোয়বা লাকই হায়না খল্লু। মখাদা পীরিবা মখলশিং অসিগা মরী লৈননা মহাক্না নীংশিংনবা করি থবক পাংথোক্কনি?

• য়েংগদবা মফমশিং- (অকক্নবা ৱাহৈ- ৫০০)
• চাগদবা চিঞ্জাকঃ (অকক্নবা ৱাহৈ- ৫০০)
• নীংশিংগদবা থৌদোকঃ (অকক্নবা ৱাহৈ- ৫০০)

হীরম ৩: খোঙচৎ অমা লোয়বগা, অনৌবা অমা হৌই

পাংথোক্কদবা থবকঃ নহাক্কী স্কুলগী পুন্সিগী খ্বাইদগী নীংশিংনীংঙাই ওইবা থৌদোক অমগী মতাংদা ৱাহৈ ১৫০০দগী হেন্দনা ফোংদোকউ।

হীরম ৪: ওইগনি হায়বা নত্তবিদা, পাংথোক্কনি হায়না লেপ্পু

পাংথোক্কদবা থবকঃ রিসোর্স নত্ত্রগা খুদোংচাবদা করিগুম্বা অকক্নবা অমত্তা লৈত্রবদি, নহাক্না খুন্নাইগীদমক্তা করি তৌগনি অমসুং করিগীদমক্তা তৌগদৌরিবনো? মসিগী মতাংদা ৱাহৈ ১৫০০দগী হেন্দনা ইরগা পীরকউ।

হীরম ৫: মীগী তৌবীমল খংঙু

পাংথোক্কদবা থবকঃ নহাক্না পেঞ্জখিবা মীওই অমগী মফমদা “তৌবীমল খঙবগী” কার্দ অমা ৱাহৈ ৫০০ হেন্দনা ইয়ু।

ওজাশিংগী

হীরমঃ ওনলাইন এজুকেসন সীস্তেম – মসিগী কান্নবা অমসুং মসিবু তুংদা মতৌ করম্না হেন্না ফগৎহনবা য়াবগে।

পাংথোক্কদবা থবকঃ ৱাহৈ ১৫০০দগী হেন্দনা এসে অমা ইয়ু।

মমা-মপাশিংগী

হীরম ১ : নহাক্কী ৱাহৈনা নহাক্কী অঙাংগী পুন্সি শেম্বনি – নহাক্না তৌদুনা লাকপগুম্না মখোয়বু পুক্নিং থৌগৎপীয়ু।

পাংথোক্কদবা থবকঃ নহাক্না নহাক্কী অঙাংশিংদা মখোয়গী তুংগীদমক্তা খঞ্জবা কয়া হায়বশিংগী মতাংদা ৱারী অমা ইয়ু। নহাক্কী অঙাংনা অহানবা ৱাহৈ পরেং অদু ইহল্লু। মদুদগী নহাক্না মখা তাথদুনা ইয়ু। (ৱাহৈ ১৫০০দগী হেনবা য়াদে)

হীরম ২:  নহাক্কী অঙাংগী মরূপ ওইয়ু – মখোয়বু ৱাখল নুংঙাইহন্দবা তৌগনু

পাংথোক্কদবা থবকঃ নহাক্কী অঙাংশিংবু নহাক্না য়াম্না অখন্নবা ওইনা লৌই হায়বগী মতাংদা মখোয়গী মফমদা পোস্তকার্দ অমা ইয়ু। (ৱাহৈ ১০০দগী হেন্দনা)

*****