ত্রাইবেল এফিয়র্স মন্ত্রালয়
দিল্লী হাত্তা পাংথোকপা ত্রাইব ইন্দিয়া আদী মহোৎসবতা অৱাং-নোংপোক্কী লমদমদা মিৎয়েং অমা য়েংবা
চয়োলগী অরোয়বদা খুৎনা শাবা নাৎকী ফিজোল উৎপগী ফেশন শো অমা শিন-লাঙলি
Posted On:
06 FEB 2021 11:43AM by PIB Imphal
তোপ-তোপ্পা ত্রাইব মখল ২০০ হেনবগী লৈফম ওইরিবা, অৱাং-নোংপোক্কী লমদম অসি লৈবাক অসিগী খ্বাইদগী তোঙানবা অমসুং শীংথানিংঙাই ওইরবা মফমশিংগী মরক্তা অমনি। দিল্লী হাত্তা হৌজিক চত্থরিবা ত্রাইব আদী মহোৎসব অসিদা পোত্থোক কয়া অমা উৎলিবা অৱাং-নোংপোক রাজ্যশিংগী স্তোলশিংনা মফম অসিগী মগুন হাপ্লিবা অসিদা করিসু য়াম্না ঙক্নিংঙাই ওইদে।
অৱাং-নোংপোক্কী ত্রাইবশিংনা মশাগী ইনাক খুল্লবা খুৎ-শা হৈবগী চৎনবী লৈজৈ অমসুং মসিদা মখোয়গী ইচম-চমজবা, ৱাখল্লোন শেংবগী মমি তাবতা নত্তনা মশাগী শক্তাকচবসু ঙমহল্লি। মসিগী ইনাক খুল্লবা চৎনবী অসি হৌজিক মফম অসিদা উৎলি। লশিং নত্ত্রগা ইরীদগী লোনবা বোরোগী মগুন লৈরবা ফিরোল ওইরো; নাগালেন্দ অমসুং মনিপুরগী মমিং লৈরবা সিল্ককী ফিরোল, ফোং-ফোং শাবা কপ অমসুং খুৎনা লোনবা শাল ওইরো; অসমগী ৱাগী পোত্থোকশিং ওইরো; নত্ত্রগা খোইহী, মরু-মরাং অমসুং হিদাক মনাগুম্বা হকচাংগী ইম্ম্যুন কনখৎহনবগী মথৌ তৌবা মহৌশাগী ওইবা ওর্গানিক্কী পোত্থোকশিং ওইরো; হায়রিবশিং অসি হৌজিক পাংথোক্লিবা লৈবাক্কী কুমহৈ অসিদা লোইনা ফংগনি।
বোরোগী ফি শাবী নুপীশিং অসি লমদমসিগী ওইনা ফি শাবা খ্বাইদগী হৈবগী মনুং চল্লি অমসুং মখোয়গী নীংথিবা থবক্কীদমক্তা মমিং চৎলি। মখোয়না হান্নগী মতমদা ফি অমসুং দোখোনা খক্তমক শারম্বা অদু হৌজিক্তি মখোয়গী পোত্থোকশিংসু পাকথোক চাউথোক্লে। হৌজিক্তি নখোয়না কুর্তা, ফিজোল, স্তোল, শাল, ফনেক, ফুরিৎ, কুর্তী অমসুং অতোপ্পা মখলগী ফিরোলশিংসু ফংলগনি। অসমগী মোগা সিল্কতগী শাবা শারী, মেখলা, চাদোর, খুৎনা নীংথিজনা ময়েক লোনবা ব্লাউজ; তুপী অরোনবা, অঙাংশিংগী বুতী অমসুং মনিপুর অমদি সিক্কিমগী অরোনবা খাউশিংসু লৈবা য়াগনি। অৱাং-নোংপোক্কী ত্রাইবেলশিংনা ফিশাকোন শিজিন্নন্দুনা নীংথিরবা খাউ, মোনখুম, খাউগুম্বা কয়া অমসু শাই। মসিগী অরোনবশিং অসিগী মওং-মতৌশিং অসি মহৌশা লাইরেম্বীনা ইথিল পী অমসুং য়েংবদা য়াম্না ফজৈ, তুং কোইনা শিজিন্নবা য়াই অমসুং শিজিন্নবদা য়াম্না নুংঙাইবা ওই। অতোপ্পা মিৎয়েং চঙনীংঙাই ওইবা পোত্থোক অমদি মনিপুরগী তাংখুল-নাগা ত্রাইবকী লোংপী খুলদা শাবা লৈবাক্কী চফুশিংনি। মুরৈনবা শমু মচুগী চফু, কেত্তলী, মগ অমসুং তেংকোৎ ময়াম অমা খিনবা স্তোল অদুনা অতৈ ময়াম মরক্তগী তোঙান্না তাদুনা লৈ। মসিগী পোত্থোকশিং অসিগী খ্বাইদগী তোঙান্না তাবা মগুন্দি, মখোয়শিং অসি চফু শাবগী চকা শিজিন্নদুনা শাবা অমত্তা নত্তে। মখোয়শিং অসি খুৎনা শেম শাবা ঙাক্তনি।
কুমহৈ অসিবু য়েংবা লাক্লিবা মীয়াম্না অসমগী জোহা চেং, মনিপুরগী চাকহাও; সিক্কিমগী হৱাই, মরু-মরাং, অচৌবা কার্দামোম; মেঘালয়গী সিনামোম অমসুং মমিং চৎলবা লাকাদোং য়াইঙং অমসুং মমিং চৎলবা নাগা মোরোক্নচিংবা মখল কয়াগী মগুন লৈবা ওর্গানিক্কী চানবা চিঞ্জাকশিংসু ফংগনি।
মসি ময়াম অসিগী মথক্তা, নখোয়না আদী ব্যঞ্জন অসিদা অৱাং-নোংপোক লমদমগী চাক-এঞ্জাং কয়াসু চাবগী খুদোংচাবা ফংগনি।
আদী মহোৎসব অসিদা চৎলুবা মতমদা নখোয়না অৱাং-নোংপোক্কী মীয়ামগী ইনাক খুল্লবা চৎনবী কয়াগী মহাও লৌবা ফংগনি।
“আদী মহোৎসব- ত্রাইবেলগী খুৎ-শা হৈবা, নাৎ অমসুং ললোন-ইতিক্কী হরাওবা ফোংদোকপা”গী কুমহৈ অসি ফেব্রুৱারি ১৫, ২০২১ ফাওবা অয়ুক্কী পুং ১১দগী নুমিদাংগী পুং ৯ ফাওবা নই-দিল্লীগী আই.এন.এ., দিল্লী হাত্তা পাংথোক্কনি।
হৌজিক লাক্লিবা ফেব্রুৱারি ৬ অমসুং ৭কী চয়োল লোইবগী নুমিৎ অসিদা হেন্দিক্রাফকী আর্তিসান মিস রুমা দেবী অমসুং শক্নাইরবা দিজাইনর, মিস রিনা ধাকাগী ক্রিএসনগী নাৎকী ওইবা ফিজেত-লৈতেং উৎপা ফেশন শো অমগা লোয়ননা নুংঙাইরবা থৌরম কয়া অমা পাংথোক্কদবগী ঙাইদুনা লৈরি।
আদী মহোৎসব অসি ইং ২০১৭তগী হৌদুনা চহি খুদিংগী পাংথোকপা কুমহৈ অমনি। কুমহৈ অসি লৈবাক শিনবা থুংবগী ত্রাইবেল খুন্নাইগী মীওইশিংগী তোঙান-তোঙানবা চৎনবী, খুৎ-শা হৈবগী মওং অমসুং নাৎকী ইনাক খুল্লবা মওং-মতৌশিংবু মফম অমদা পুনশিন্দুনা লৈবাক মীয়ামদা খঙহন্নবা পাংথোকপা থৌরম অমনি। অদুবু, লাইচৎ লৈবনা মরম ওইদুনা ইং ২০২০দা কুমহৈ অসি পাংথোকখিদে।
নুমিৎ ১৫নি চঙনা পাংথোকপা কুমহৈ অসিদা ত্রাইবেলগী হেন্দিক্রাফ, আর্ত, অয়েকপা লাই, লিক-কোন অমসুং অতোপ্পা পোৎলম কয়া অমা স্তোল ২০০ হেনবদা উৎপা অমসুং য়োনবগী থৌওং য়াওরি। লৈবাক শিনবা থুংবগী চাউরাকপা ত্রাইবেল আর্তিসান ১০০০মুক্না কুমহৈ অসিদা শরুক য়ারি।
ত্রাইবেলগী মীওইশিংবু মপাঙ্গল হাপ্পগী থবক তৌবগী নোদেল এজেন্সী অমা ওইরিবা ত্রাইবেল এফিয়র্স মন্ত্রালয়গী মখাদা লৈবা ত্রাইবেল কো-ওপরেতিব মার্কেতিং দিভেলপমেন্ত ফেদেরেসন ওফ ইন্দিয়া (ত্রাইফেদ)না ত্রাইবেল মীয়ামগী চৎনবী অমসুং পুশিরোল ঙাক শেনবগা লোয়ননা মখোয়গী শেন্থোক অমসুং য়াইফ-য়ুম্বালদা চাউখৎপা পুরকপদা তেংবাংনবগীদমক্তা অসিগুম্বা খোঙথাং কয়া লৈবাক্কী মফম খুদিংদা পায়খৎলি। আদী মহোৎসব অসিবু ত্রাইবেল মীয়ামগী য়াইফনবা অমসুং মীয়াম মরক্তা তিলহন্নবা হোৎনবগী খোঙথাং অমনি।
আদী মহোৎসবতা লাকপীদুনা “ভোকেল ফোর লোকেল”গী ইহৌ অসিবু শৌগৎপীয়ু। #BuyTribal
*****
(Release ID: 1695774)
Visitor Counter : 182