রাস্ত্রপতিগী লোইশঙ
পার্লিয়ামেন্তকী হাউস অনিগী অপুনবা মীফমদা ভারতকী রাস্ত্রপতি শ্রী রাম নাথ কোবিন্দনা পীখিবা ৱারোল
Posted On:
29 JAN 2021 12:36PM by PIB Imphal
ইকায়খুম্নরবা মেম্বরশিং,
কোরোনাভাইরস লাইচৎ মনুংসিদা পাঙথোক্লিবা পার্লিয়ামেন্তকী অপুনবা মীফম অসি য়াম্নমক মশক থোকবা অমনি। হৌজিক অসি অনৌবা চহী অমসুং অনৌবা দিকেদ অমগী অহৌবনি। ঐখোয়না ভারতকী নীং তম্বগী ৭৫শুবা চহীদসু খোঙ থাংজিনগদৌরি। ঙসি মফমসিদা তিনবিরিবা পার্লিয়ামেন্তকী মেম্বর পুম্নমক্কী মফমদা খ্বাইদগী চাউরবা শিংনবা অসিনা ঐখোয়বু অমদি ভারতপু কৈদৌঙৈদসু নিংহন্নহল্লোই হায়বা ভারত মচা খুদিংমক্কী ফিরেপকী মমি তারিবনি।
ভারতনা পুন্না লৈবা মতম খুদিং, ফংবা ঙম্লোইদবা মানবা পান্দমশিং ফংবা ঙম্লি। অসিগুম্বা অপুনবা ফিরেপ অমসুং অথোইবা বাপুগী পুক্নিং থৌগৎনিংঙাই ওইরবা ফিদম্না মীখা পোনবগী চহী চা কয়াগী পুন্সিদগী মনীং তমহল্লকখিবনি। হায়রিবা ৱাখল্লোন অসিমক খোন্থাং য়ৈদুনা অসাম কেসরি, অম্বিকাগিরি রাইচৌধুরি কৌবা মরৈবাক নীংবা শৈরেংবনা হায়বিরম্মি –
“ওম তৎসৎ ভারত মহাত, এক চেতোনাত, এক ধ্যানোত,
এক সাধোনাত, এক অভেগোত, এক হোই জা, এক হোই জা”
মদুমক ভারতকী মশক নাইরবা লেঙদ্রবা অচুম্বদুনি। অমত্তা ওইবা পুক্নিং লিচিংদা, অমত্তা ওইবা ৱাখল্লোন্দা, অমত্তা ওইনা কত্থোকপদা, অমত্ত ওইবা পুক্নিং থৌগৎনিংঙাই ওইবা মওংদা ঐখোয় পুন্সিল্লসি; ঐখোয় পুন্সিল্লসি।
ভারত মচাশিংগী লিংজেল মান্নবা অমদি কত্থোকপনা লৈবাক অসিবু মশিং লাকঙমদ্রবা য়েক্নবশিংগী মথক্তা মায় পাকহল্লি। ঐখোয়গী লৈবাকসিনা লাংফম খুদিংমক, কোরোনাভাইরস লাইচৎ ওইরবসু, ঈচাউ, য়ুহা হাবা নৎত্রগা তোঙান তোঙানবা স্তেতশিংদা অচৌবা সাইক্লোন, কৌজেংগী লান্দা নৎত্রগা বর্দ ফ্লু ওইরবসু, থৌনা ফনা মায়োং য়াখি। ইকুই কুইদ্রিবা মতমদসু ঙমখৈ পরিংদা হান্নগা মান্নদবা মওংদা চরাংনবা ফীভম অমা লাকখি। লৈবাকসিনা পুন্না লেপমিন্নদুনা মায়কৈ কয়াদা লাংফমশিং মায়োক্নখি অমদি শিংনবা খুদিংমক নমথখি। মতম অসিদা, ঐখোয় পুম্নমক্না ঐখোয়গী লৈবাক মীয়ামগী তোপ তোপ্পা থৌনা, খাংবা কনবা, লমচৎ অমসুং থৌগলগী ৱাখল্লোন উনখ্রে।
লাইচৎ অসি থেংনবদা, ঐখোয়না লৈবাক মীয়াম কয়াগী পুন্সি মনুং মতম চাদনা লোমখিবা কয়া থেংনখ্রে। ঐখোয়গী নুংশিরবা হান্নগী রাস্ত্রপতি অমসুং ঐগী ইমাঙদা লৈবিরম্বা শ্রী প্রনাব মুখর্জীসু লাইচৎ মনুংসিদা লৈখিদ্রে। পার্লিয়ামেন্তকী মেম্বর তরুক্না মনুং মতম চাদনা লৈখিদ্রিবা অসিসু কোরোনাভাইরসননি। ঐনা মখোয়গী মফমদা থম্মোয়নুংদগী শ্রদ্ধাঞ্জলি কৎচরি।
ইকায়খুম্নরবা মেম্বরশিং,
“ক্রিতম মে দক্সিনে হস্তে জায়ো মে সব্য আহীতাহ” হায়না ঐখোয়গী সাস্ত্রদা হায়বিরম্মি।
মসিনা তাক্লিবদি, করিগুম্বা ঐখোয়না ইথৌ পাঙথোক্লবদি মায় পাকপা হায়বসি শোয়দ্রবনি হায়বসিনি। মালেমসিগী লৈবাক খুদিংদা মীপুম খুদিংমক্কী পুন্সিদা চৈথেং পীরিবা কোরোনাভাইরস লাইচৎ মনুংদা ভারতনা অনৌবা থৌনাগা লোয়ননা মালেমগী ফম্পাক্তা লিৎখৎলকখি। ঐগী লৈঙাক অসিনা মতম চানা অমদি মপা চুম্না থবক লৌখৎখিবনা মরম ওইরগা ঐখোয়না লৈবাক মীয়াম লাখ কয়াগী পুন্সি কনবা ঙমহৌবসিদা ঐঙোন্দা অপেনবা পোকই। ঙসিদি কোরোনাভাইরসকী অনৌবা কেস মশিং য়াম্না থুনা হন্থরক্লি অমদি হায়রিবা মতমসিমক্তদা ফগৎলকপগী মশিংসু মশক থোক্না হেনগৎলকখি।
ইকায়খুম্নরবা মেম্বরশিং,
ঐখোয়না মমাঙ চহীগী মতাঙদা খল্লুবা মতমদা মীয়ামগী পুন্সি কনবা অমদি শেন্মিৎলোনবু ঙাক্তুনা থমবা হায়রিবা ঐখোয়না থেংনখিবা শিংনবা অনিসুবু নীংশিংহল্লি। শেন্মিৎলোন হিঙ্গৎহন্নবা রেকোর্দ ওইবা শেন্মিৎলোনগী পেকেজ অমা লাউথোকপগী মথক্তা ঐগী লৈঙাক অসিনা লায়রবা মীওই অমত্তা চরা হেলহন্দনবা থবক লৌখৎখি।
‘প্রধান মন্ত্রী গরিব কল্য়ান য়োজনা’গী মখাদা থা ৮ চুপ্না মীওই করোর ৮০দা থাদা মীওই অমমমদা চেং কে.জি. ৫ লেম্না ফংহনখি। লৈঙাক অসিনা লংফৈদা লৈবা শিন্মীশিং অমসুং ময়ুমদগী লাপ্না লৈখিবশিংগী অৱাববুসু পুক্নিংদা থমখি। মখোয়দা ‘ৱন নেসন ৱন রেসন কার্দ’কী খুদোংচাবা ফংহনবগী মথক্তা লৈঙাক অসিনা চানবা চেং হৱাই লেম্না ফংহনখি অমদি মখোয়গীদমক শ্রমিক স্পিসিএল ত্রেনশিং থৌরাং তৌখি।
ঐগী লৈঙাক অসিনা লাইচৎ মনুংদা মখোয় মখোয়গী খুঙ্গঙদা হন্নরকখিবা লংফৈদা লৈরুবা শিন্মীশিংদা থবক পীননবগীদমক স্তেত ৬তা গরিব কল্য়ান রোজগার য়োজনা হৌদোকখি। মদুগী মহৈনা মেনদেজ করোর ৫০গী থবক পীখি। লৈঙাক অসিনা স্বানিধি – কৌবা স্ত্রীত ভেন্দরশিং অমসুং হোকরশিংগী ওইবা অখন্নবা স্কিম অমসু হৌদোকখি। মখা তানা, লায়রবা নুপীশিংগী জন ধন একাউন্ততা চাউরাক্না লুপা করোর ৩১,০০০ হকথেংননা ত্রান্সফর তৌখি। হায়রিবা মতমসিদা উজ্বলা য়োজনাগী মখাদা লৈবাক শিনবা থুংনা লায়রবা নুপী বিনিফিসিয়রীশিংদা গ্যাস সিলিন্দর করোর ১৪ লেম্না ফংহনখি।
ফিরেপ পুম্নমক অসিগী খুত্থাঙদা ঐগী লৈঙাক্না ফেদরেল স্ত্রকচরগী অপুনবগী থৌনাগী তোপ তোপ্পা খুদম অমা উৎখি। কেন্দ্র অমসুং স্তেত লৈঙাকশিং খুৎশম্নখিবনা দিমোক্রেসীবু মপাঙ্গল কনখৎহনবতা নত্তনা সংবিধানগী ইকায়খুম্নবসু হেনগৎহনখি।
ইকায়খুম্নরবা মেম্বরশিং,
অচার্য় চানক্যনা হায়বিরম্মি –
“ত্রিনাম লঘু ত্রিনাতুলম তুলদপি চা য়াচকাহ
বুয়ুন কিম না নীতোসো মময়ম য়চয়িস্যাতি”
তেংথাদুনা নৎত্রগা নিদুনা লৈবা মীওই অমগী মমলদি চরু নৎত্রগা লশিংদগীসু হন্থৈ।
লশিং অমসু চরুবু হুমদুনা পুরিবা নুংশিৎনফাওবা নিদুনা লৈরিবা মীওই অমবু মহাক্না নুংশিত্তগী করিগুম্বা অমা লৌনবা তক্নদ্রবদি পুবিদে। মতৌ অসুম্না মীপুম খুদিংমক্না চাক্নিবা অমা ওইদনবা হোৎনৈ।
মসিনা তাক্লিবদি ঐখোয়গী কান্নবা অমদি মরু ওইবা হেনগৎহন্নবগীদমক ঐখোয়না অতোপ্পদা তাংবা হন্থহন্দুনা ইরোমদোম লেপচবা ঙম্নবা হোৎনগদবনি হায়বসিনি।
ঐখোয়গী নীংতম লান্মীশিংনা মঙবিরম্বা মপাঙ্গল কনবা অমদি মনীং তম্বা ভারত অমগী মঙলান অসি লৈবাকসিনা মরোমদোম লেপচবা হায়বা ৱাখল পরিংসিদা য়ুম্ফম ওইখিবনি। কোরোনা ভাইরস লাইচৎ মনুংদা ওইরকখিবা ফীভমদুদা লৈবাক খুদিংমক্না মশাগী মথৌ তাবশিংদা অহেনবা পুক্নিং চঙনখিবা মতমদুনা ঐখোয়বু মরোমদোম লেপচবা ভারত অমা শেম্নবগী মরুওইবদু নীংশিংহল্লকখি।
হায়রিবা মতমসিদা ভারতনা সাইন্তিফিক ওইবা মতিং, তেক্নিংকেলগী লমদা হৈশিংবা অমদি মশাগী স্তার্ত-অপ ইকোসিস্তেমগী মপাঙ্গল তেনখ্রবা মতমগী মনুংদা লেবোরেতরী ২২০০ হেনবা লিংখত্তুনা, ভেন্তিলেতর, পি.পি.ই. কিত অমসুং তেস্ত কিত লিশিং কয়া পুথোকচদুনা মরোমদোম লেপচবা ফীভম পুরক্তুনা উৎখি। ভারতনা মালেমগী খ্বাইদগী চাউবা তিকা থাবগী থবক পায়খৎলিবসি য়াম্না চাউথোকচনিংঙাইগী ৱাফমনি। থৌরাং অসিগী মখাদা শীজিন্নবা হৌদোকখিবা তিকা অনিমক লমদমসিদা পুথোকচবা ঙাক্তনি। লৈবাক কয়াদা কোরোনাগী তিকা দোজ লাখ কয়া ফংহন্দুনা ভারতনা খুদোংথিরবা তান্ফমসিদা মীওইবু খুন্নাইগীদমক মশাগী মথৌদাং মপুং ফানা য়ারি। থবক অসিগীদমক মালেমগী মফম শিন্বা থুংবদগী ভারতপু থাগৎনরক্লিবা লোয়ননা ঐখোয়গী লিরবা চৎনবী ‘সার্বে সন্তু নিরমায়হ’ অমসুং মীওইবা খুন্নাইগী য়াইফনবগীদমক থবক তৌবগী খোঙচৎ অসিনা ঐখোয়না হোৎনরিবশিং অসিদা থৌনা হাপ্লি।
ইকায়খুম্নরবা মেম্বরশিং,
ঐগী লৈঙাক্না হৌখিবা চহী ৬সিদা হকশেলগী লমদা তৌখিবা থবকশিং অসিগী কান্নবা কোরোনাভাইরস লাইচৎ মনুংসিদা উবা ফংলি। হায়রিবা চহীশিং অসিদা হকশেলগী সিস্তেমবু মতমগা চুনবা ওইহনবা হায়বা ৱাফমসিদা নত্তনা লায়না কয়া ঙাকথোক্নবগী লমদা অহেনবা মীৎয়েঙ থমখি। রাস্ত্রিয় পোসন অভিয়ান, ফিত ইন্দিয়া মুভমেন্ত অমসুং খেলো ইন্দিয়া অভিয়ান অসিনচিংবা থৌরাংশিং অসিনা লৈবাক মনুংসিদা হকশেলগী লমদা মীয়ামদা পাক শন্না খঙহনবদা মতেং ওইখি। অয়ুর্বেদ অমসুং য়োগ য়োকখৎনবা ঐগী লৈঙাক্না হোৎনখিবা থৌরাং কয়াগী কান্নবা শাফু ঐখোয়না উরি।
ঐগী লৈঙাক্কী হোৎনজমলগী মহৈনা লায়রবশিংনা হকশেলগী খুদোংচাবশিংগী কান্নবা লায়না ফংবা ঙম্লে অমদি মখোয়গী লায়েংবগী চাদিংসু শাথিনা হন্থহল্লে। অয়ুস্মান ভারত – প্রধান মন্ত্রী জন অরোগ্য য়োজনাগী মখাদা লৈবাকসিগী লায়রবা মীওই করোর ১.৫তা লুপা লাখ ৫ ফাওবগী লায়েংবগী কান্নবা লেম্না ফংহল্লে। মসিগী মহৈনা লায়রবশুংনা লুপা করোর ৩০,০০০গী মথক্তা শেল চৎপা হন্থহল্লে। ঙসিদি, অয়ুস্মান ভারত য়োজনাগী কান্নবশিং লৈবাক শিনবা থুংনা লৈরিবা অনা লায়েংশঙ ২৪,০০০ হেন্বদা ফংবা য়ারে। মতৌ অসুম্না প্রধান মন্ত্রী ভারতিয় জনঔসধি য়োজনাগী মখাদা লায়রবশিংনা হিদাক লাংথকশিং লৈবাক শিনবা থুংবদা লৈরিবা জনঔসধি কেন্দ্র ৭০০০তগী য়াম্না হোংবা মমলদা ফংলি। হায়রিবা কেন্দ্রশিং অসিদগী অনাবা মীওই লাখ কয়ানা নুংতিগী হিদাক লাংথকশিং লৈরি অমদি চুনবা মমলদা পীবনা মরম ওইরগা চহীদা লুপা করোর ৩৬০০ ওইজহল্লে।
ইকায়খুম্নরবা মেম্বরশিং,
লৈবাক শিনবা থুংনা হকশেলগী খুদোংচাবশিং শেমগৎনবগীদমক মেদিকেলগী মহৈ মশিংদা চুননা পাকথোক চাউথোকহনবসু চপ মান্ননা মরু ওইরি। ২০১৪দা মেদিকেল কলেজ ৩৮৭ খক্তমক লৈরম্মি, অদুবু ঙসিদি লৈবাকসিদা কেদিকেল কলেজ ৫৬২ লৈরে। হৌখিবা চহী ৬সিদা মেদিকেল এজুকেসন্দা অন্দর-গ্রেজুএত অমসুং পোস্ত গ্রেজুএত সীত ৫০,০০০গী মথক্তা হেনগৎহল্লে। প্রধান মন্ত্রী স্বাস্থ্য সুরক্সা য়োজনাগী মখাদা লৈঙাক অসিনা এইমস ২২ লিংখৎনবা অয়াবা পীখ্রে।
ওতোনোমস বোর্দ ৪গা লোয়ননা নেসনেল মেদিকেল কম্মিসন লিংখত্তুনা কেন্দ্র লৈঙাক্না মেদিকেল এজুকেসনগী লমদা পুৱারী ওইরগদবা অওনবা পুরক্নবা য়ুম্ফম থোনখ্রে। চহী কয়া লিরবা মেদিকেল কাউন্সিল ওফ ইন্দিয়াবু অওনবা পুরকপা অসিগী শরুক অমা ওইনা নেসনেল মেদিকেল কম্মিসন্না মহুৎ শিনখ্রে।
ইকায়খুম্নরবা মেম্বরশিং,
আত্মনিরভর ভারত অভিয়ান অসি ভারত্তা পোত্থোক পুথোকপখক্তদা লোইবা নত্তে, মসি ভারত মচা খুদিংমক্কী পুন্সিগী থাক ৱাংখৎহন্নবা অমদি লৈবাকসিদা মশানা মশাবু থাজবা হেনগৎহন্নবা কেম্পেন অমসুনি।
মরোমদোম লেপচবা ভারত অমগী ঐখোয়গী পান্দম অসি লৌউ-শিংউ সেক্তরদা মরোমদোম লেপচবা ঙমহন্দুনা হেন্না মপাঙ্গল কনখৎহনগনি। হায়রিবা ৱাখল্লোন অসিদা লৈঙাক অসিনা হৌখিবা চহী ৬সিদা ভারতকী লৌউ শিংউগী মওং অসি মতমগা চুনহন্নবা অমদি চাউখৎপা পুরক্নবা ‘সীদ তু মার্কেত’ সিস্তেম অসিদা কান্নবা মওংদা অওনবা পুরক্নবা হোৎনদুনা লাক্লি। হায়রিবা থৌরাং অসিগী মখা চত্থরকপা ওইনা ঐগী লৈঙাক্না স্বামিনাথন কম্মিতীগী রিপোর্তকী রিকমেন্দেসন চৎনহন্নবা অমদি এম.এস.পি.বু পোত্থোক পুথোকপগী অচঙবা শেন্ফমগী য়ামদ্রবদা শরুক ১.৫তা হেনগৎহন্নবা ফিরেপ লৌখি। ঙসিদি ঐগী লৈঙাক্না এম.এস.পি.তা রেকোর্দ ওইনা পোৎ লৌশিনবতা নত্তনা প্রোকরমেন্ত সেন্তর মশিংসু হেনগৎহল্লি।
ঈথৈ লৌখোংগী তোঙান তোঙানবা হৌরকফমশিংদা পাক্তক্ননা ফীভম ফগৎহল্লি। ‘পর দ্রোপ মোর ক্রোপ’কী লাইৱা ইন্দুনা লৈঙাক অসিনা পন্দুনা লৈরিবা ঈথৈ লৌখোংগী প্রোজেক্তশিং লোইশিনবতা নত্তনা লৌমীশিংদা মতমগা চুনবা ঈথৈ লৌখোংসু ফংহল্লি। ২০১৩-১৪দা লৌফম হেক্তর লাখ ৪২ খক্তমক মাইক্রো-ইরিগেসনগী মখাদা লৈরম্মি অদুগা ঙইইদি লৌফম হেক্তর লাখ ৫৬ হেনবদা মাইক্রো-ইরিগেসনগী খুদোংচাবা ফংহল্লে।
মখোয়গী শুবা নোম্বা কনবা মতৌনা ঐখোয়গী লৌমীশিংনা লৈঙাক্কী থৌরাং অসিদা মতেং পাংশিল্লি হায়না পাউদম্বদা ঐঙোন্দা নুংঙাইবা পোকই। ঙসিদি লৈবাকসিদা চাননবা চেং হৱাই ফংবগী চাং অসি রেকোর্দ ওইনা ৱাংলে। ২০০৮-০৯দা লৈবাকসিগী চাননবা চেং হৱাই পুথোকপগী চাং অসি তন মিলিয়ন ২৩৪ খক্তা ওইরম্মি অদুগা ২০১৯-২০দা পুথোকপগী চাং অসি তন মিলিয়ন ২৯৬ য়ৌরে। হায়রিবা মতমসিদা উহৈ-ৱাহৈ অমসুং মনা মশিং পুথোকপগী চাংসু তন মিলিয়ন ২১৫ ওইরম্বদগী তন মিলিয়ন ৩২০ য়ৌরে। হায়রিবা ফীভম অসি ফংহনবগীদমক্তা ঐনা লৈবাকসিগী লৌমীশিংগী মফমদা নুংঙাইবা ফোঙদোকচরি।
ইকায়খুম্নরবা মেম্বরশিং,
লৌউ-শিংউ সেক্তরদা হৌজিক মথৌ তারিবসি মশাগী লৌফম হেক্তর ১ নৎত্রগা ২ রোমতমক লৈজবা অপীকপা অমদি নাথৈবিরবা লৌমীশিংদা মায় ওনশিনবনি। লৈবাকসিগী লৈরিবা লৌমীশিংগী চাদা ৮০ হেনবদি হায়রিবা কাঙলুপসিগী মনুংদা লৈ।
ঐগী লৈঙাক্না হায়রিবা লৌমী কাঙলুপসিদসু অহেনবা মীৎয়েঙ চঙলি। হায়রিবা লৌমীশিং অসিদা মখোয়গী চাদিংদা মতেং পাংনবগীদমক মখোয়গী বেঙ্ক একাউন্তশিংদা প্রধান মন্ত্রী কিসান সম্মান নিধিগী মখাদা লুপা করোর ১,১৩,০০০গী ময়াদা ত্রান্সফর তৌখ্রে। প্রধান মন্ত্রী ফসল বিমা য়োজনানা লৈবাকসিগী অপীকপা লৌমীশিংদসু কান্নবা ফংহল্লি। হৌখিবা চহী ৫সিদা হায়রিবা স্কিম অসিগী মখাদা লৌমীশিংদা প্রেমিয়ম লুপা করোর ১৭,০০০ থীরকপদা কম্পেন্সেসন ওইনা লুপা করোর ৯০,০০০ ফংহনখ্রে।
লৈবাকসিগী অপীকপা লৌমী ময়াম পুনশিন্নদুনা ফার্মর প্রদ্যুসর ওর্গনাইজেসন ১০,০০০ শেমগৎনবগী পান্দম অসিসু য়াম্না কান্নরবা খোঙথাঙ অমনি। মসিনা ইনাক খুল্লবা লৌমীশিংগুম্না অপীকপা লৌমীশিংদা হেন্না ফবা তেক্নোলোজী, অহেনবা ক্রেদিত, লৌরোক মতুংগী প্রোসেসিং অমসুং কৈথেলগী খুদোংচাবা অমদি মহৌশাগী ওইবা অমাঙ অতা থোক্লকপদা ইন্সুরেন্স কভরগী কান্নবা ফংহল্লি। মসিনা লৌমীশিংদা মখোয়গী পোত্থোকশিংগী শেন্দোং লৈবা মমল ফংহন্দুনা শেল হেন্না তুংশিনবা ঙমহল্লি।
ইকায়খুম্নরবা মেম্বরশিং,
মুন্না খন্নরবা মতুংদা পার্লিয়ামেন্তনা থা ৭কী মমাঙদা মরুওইবা ফার্ম রিফোর্ম বিল ৩ মমিং ওইনা পল্লবদা দি ফার্মর্স প্রদ্যুস ত্রেদ এন্দ কম্মর্স (প্রমোসন এন্দ ফেসিলিতেসন) বিল, দি ফার্মর্স (এম্পৱারমেন্ত এন্দ প্রোতেক্সন) এগ্রীমেন্ত ওন প্রাইস এস্যুরেন্স এন্দ ফার্ম সর্ভিস বিল, অমসুং দি ইসেন্সিএল কমোদিতিজ (এমেন্দমেন্ত) বিল অসি অয়াবা পীখি। হায়রিবা মরুওইবা ফার্ম রিফোর্ম অহুমসিগী কান্নবা অপীকপা লৌমী করোর ১০দা খুদক্তা ফংহল্লে। হায়রিবা অওনবশিং অসিনা অপীকপা লৌমীশিংদা পীগদবা খুদোংচাবশিং অসিবু থাগত্তুনা তোঙান তোঙানবা পোলিতিকেল পার্তীশিংনসু মতম মতমগী ওইনা মসিবু শৌগৎপা ফোঙদোক্নরি। হৌখিবা চহী ২০সিদা লৈবাকসিগী মফম খুদিংদা খন্নরকখিবা অমদি তোঙান তোঙানবা ফোরমশিংদা অওনবা পুরক্নবা দিমান্দ তৌখিবা মচাকশিং হাউসতা মসিগী মতাঙদা খন্নবা মতমদা পুথোক্নখিবনি।
হৌজিক্কী ওইনা মকোক থোংবা ৱায়েলশঙনা হায়রিবা লোশিং অসি চৎনবদা অথিংবা পীদুনা লৈরি। ঐগী লৈঙাক্না মকোক থোংবা ৱায়েলশঙগী ফিরেপ অসিবু ইকায় খুম্নৈ অমদি মসিবু ঙাক্তুনা চৎকনি।
ঐগী লৈঙাক্না মীয়ামগী লৈঙাক অমসুং শেংলবা সংবিধানবু মমল ৱাংনা থাক ৱাংনা থমজৈ। হায়রিবা লোশিং অসিগী মতাঙদা থোরক্লিবা ৱাখল তানবা ৱাফমশিংবু কোকহন্নবা লেপ্পা লৈতনা হোৎনরি। ঐগী লৈঙাক্না মতম পুম্নমক্তা ফোঙদোক্নিংবা ফোঙদোকপগী অমদি মীয়ামগী লৈঙাক মখাদা ইংনা চিক্না য়ানিংদবা ফোঙদোকপগী নীং তম্ববু ঙাক্তুনা লাকখি। অদুম ওইনমক হন্দক্তা লৈবাক্কী ফিরালবু ইকায় খুম্নদবা মতৌ উৎখিবা অমদি গনতন্ত্র নুমিৎকী য়াইফরবা থৌরমবু ইকায় খুম্নখিদবা মতৌ অদুদি লাইবক থিবনি। সংবিধান্না ঐখোয়দা অনীংবা ফোঙদোকপগী মঙম পীরবসু চৎন-কাংলোন অমসুং চৎন-পথাপশিং ঐখোয়না পুকচেল শেংনা ইনবসু মথৌ তাই।
অনৌবা লো অহুম অসি চৎনদ্রিঙৈদা লৈরম্বা মঙম অমসুং খুদোংচাবশিং মওং অমত্তদা শোকহন্দে হায়না ঐগী লৈঙাক্না মীয়ামদা তশেং তশেংনা খঙহনবা পাম্মি। অহোইনদুম হায়রিবা লৌউ-শিংউগী অওনবা অসিগী খুত্থাঙদা লৈঙাক্না লৌমীশিংদা অনৌবা খুদোংচাবশিং ফংহল্লি অমদি মখোয়বু মপাঙ্গল কনখৎহল্লি।
ইকায়খুম্নরবা মেম্বরশিং,
লৌউ-শিংউদা শেন্দোং হেনগৎহন্নবগীদমক ঐগী লৈঙাক্না মতমগা চুনবা লৌউ-শিংউগী মচাক মথুম শেমগৎপদা অহেনবা মীৎয়েঙ চঙলি। মসিগীদমক লুপা করোর ১,০০,০০০গী এগ্রিকলচর ইনফ্রাস্ত্রকচর ফন্দ হৌদোকখ্রে।
লৈবাক শিনবা থুংনা হৌদোকখিবা কিসান রেলনা ভারতকী লৌমীশিংবু অনৌবা কৈথেলশিংদা য়ৌবা ঙমহন্দুনা মখোয়গী অনৌবা লম্বী অমা য়াৎলি। রেল অসি মোবাইল কোল্দ স্তোরেজ অমগুম্বনি। হৌজিক ফাওবদা কিসান রেল ১০০গী মথক্তা মথৌ তৌবা হৌখিদুনা লৌমীশিংদা মফম অমদগী মফম অমদা চেং হৱাই, উহৈ ৱাহৈ অমসুং মনা মশিং তন ৩৮,০০০গী মথক্তা পুথোক পুশিন তৌবদা কান্নবা পীখ্রে।
ইকায়খুম্নরবা মেম্বরশিং,
লৌমীশিংগী শেন্থোক হেনগৎহন্নবা ঐগী লৈঙাক্না শা শন লোইববুসু শেন্থোক্কী হৌরকফম অমা ওইনা শেমগৎনবা মীৎয়েঙ থম্লি। মসিগী মহৈনা লৈবাকসিগী শা শন মশিং হৌখিবা চহী ৫সিদা চাদা ৮.২গী চাংদা হেনগৎলক্লি। লৈঙাক্না দেরী সেক্তরদা তঙাই ফদবা মচাক মথুম শেমগৎনবা অমদি শেল থাদবদা পুক্নিং থৌগৎনবা লুপা করোর ১৫,০০০গী এনিমেল হজবেন্দ্রী ইনফ্রাস্ত্রকচর দেভেলপমেন্ত ফন্দসু শেম্লে।
ঐগী লৈঙাক্না কিসান ক্রেদিত কার্দকী খুদোংচাবসু শা-শন লোইবা অমসুং ঙা য়োকপগী লমদসু ফংহল্লে। প্রধান মন্ত্রী মতস্য সম্পদ য়োজনাগী মখাদা ঙামীশিংগী শেন্থোক হেনগৎহন্নবা থৌরাংশিংসু লৌখৎলি। সেক্তর অসিদা লাক্কদৌরিবা চহী ৫সিদা লুপা করোর ২০,০০০ থাদনবা পান্দম থম্লি।
লৌমীশিংগী শেন্থোক হেনগৎহন্ননবা লৈঙাক্না ‘অন্নদাতা’বু ‘উর্জাদাতা’ ওন্থোক্নবা কেম্পেন অমসু হৌদোকখ্রে। প্রধান মন্ত্রী কুসুম য়োজনাগী মখাদা লৌমীশিংদা সোলার পম্প লাখ ২০ ফংহনখ্রে। লৈঙাক্না চু, চুজাক অমসুং ফৌদগী ইথানোল শুংবদগী থবকসু পুক্নিং থৌগৎলি। লৈঙাক্কী ফোঙফম চেৎপা থৌরাংনা মরম ওইরগা হৌখিবা চহী ৬সিদা ইথানোল পুথোকপগী চাং লিতর করোর ৩৮দগী লিতর করোর ১৯০দা হেনগৎলে। পুথোকপগী চাং অসি চৎলিবা চহীসিদা লিতর করোর ৩২০ য়ৌগনি হায়না পারি। ইথানোল অসি লৌমীশিংগী শেন্থোক হেনগৎহন্নবা অচৌবা মফম অমা ওইরক্লি।
ইকায়খুম্নরবা মেম্বরশিং,
অথোইবা বাপুনা মরোমদোম লেপচবা ‘আদর্স গ্রাম’ শেমগৎনবা মঙলান মঙলম্মি। হায়রিবা ৱাখল্লোন অসিগী পরিংদা ঐগী লৈঙাক্না মায়কৈ কয়াদা চাউখৎপা ফীভম পুরক্নবা চোকথবা নাইদনা হোৎনরি। খুঞ্জাশিংগী পুন্সি মহিংগী থাক হেনগৎহনবা হায়বসিনা ঐগী লৈঙাক্কী মাঙজিন থাবা পান্দম্নি। ২০১৪দগী হৌনা খুঙ্গঙশিংদা লায়রবা ইমুংশিংগী য়ুম করোর ২ শাখিবসিনা ৱাফম অসিগী খুদম ওইরি। প্রধান মন্ত্রী অৱাস য়োজনাগী থবক থৌরমশিং ২০২২ ফাওবগী মনুংদা লায়রবা মীপুম খুদিংদা পক্কাগী য়ুম অমা ফংহন্নবগীদমক খোঙজেল য়াঙখৎহল্লে।
ঐগী লৈঙাক্না হৌদোকখিবা স্বামিত্ব স্কিমগী মখাদা খুঞ্জাশিংনা হৌজিক্তি মখোয়গী লমগী লিগেল রাইত ফংলি। মপু ওইবগী মঙমগা লোয়ননা খুঞ্জাশিংনা হৌজিক্তি বেঙ্ক লোন অমসুং য়ুম শাবগী লোন মখোয়গী লমথুম কোলেতরেল ওইনা থমদুনা লৌবা য়ারগনি অমদি শেন্মিৎলোনগী থৌওংশিং খুঙ্গঙগী মফমশিংদা খোঙজেল য়াঙখৎলক্লগনি। অপীকপা ওন্ত্রপ্রিন্যুরশিং, কোত্তেজ ইন্দস্ত্রীদা থবক তৌরিবা মীওইশিং অমদি অপীকপা লৌমীশিংনা স্কিম অসিগী মখাদা কান্নবা ফংলগনি।
ইকায়খুম্নরবা মেম্বরশিং,
ববা সাহেব অম্বেদকর ভারতকী সংবিধানগী থৌবু ওইবা আর্কিতেক্ত ওইবখক নত্তনা লৈবাকসিগী ঈশিংগী থৌরাং শেমগৎপদসু লমজিং পীরম্মি। নবেম্বর ৮, ১৯৪৫তা কত্তক্তা পাঙথোকপা মীফম অমদা মহাক্না হায়রম্মি – “ঈশিং হায়বসি লন্নি। ঈশিংনা মীয়ামগী লন ওইবগা লোয়ননা মসি মফম মফমদা ফংবগী ফীভম তম্বা ঙমদবা মওংদা লৈরিবসিনা মহৌশাগী মায়োক্তা ৱাকৎপনা অচুম্বা লম্বী ওইরোই, ঈশিং য়োক্তুনা থম্বনা ওইগনি”।
ববা সাহেবকী ৱাফমদুদগী পুক্নিং লৌশিং ওইদুনা, ঐগী লৈঙাক্না ইচঙ থৌরবা ‘জল জীবন মিসন’ স্কিমগী থবক পায়খৎলি। য়ুমথোঙ খুদিংদা ঈশিং (হর ঘর জল) ফংহনবগী মথক্তা, ঈশিং য়োকশিনবগী থবকসু খুমাঙ চাওশিন্না চঙশিল্লি। স্কিম অসিগী মখাদা হৌজিক ফাওবদা ইমুং করোর ৩দা তোতি ঈশিং ফংহল্লে হায়বসি মফমসিদা পাউদম্বদা ঐঙোন্দা নুংঙাইবা ফাওই। স্কিম অসিগী মখাদা সিদ্যুল কাস্ত অমসুং সিদ্যুল ত্রাইবকী ইচিন ইনাউশিং অমসুং খুন্নাইগী শোত্থহৌরবা কাঙলুপশিংদা অহেনবা মীৎয়েঙ চঙদুনা তোতি ঈশিং শম্লি।
ইকায়খুম্নরবা মেম্বরশিং,
২১শুবা চহীচাগী মথৌ তাবশিং পুক্নিংদা থমদুনা অমদি ঐখোয়গী খুঙ্গঙশিংগী লম্বী থোংগী ফীভম ফগৎহনবদা মীৎয়েঙ থমদুনা ঐগী লৈঙাক্না খুঙ্গঙগী লম্বী-থোঙগী নেতৱর্ক পাকথোক চাউথোকপগী থবক শিংথানিংঙাই ওইবা চাংদা চঙশিল্লি। প্রধান মন্ত্রী গ্রাম সরক য়োজনাগী মখাদা লৈবাকসিগী খুঙ্গঙগী মফমশিংদা লম্বীগী নেতৱর্ক কিলোমিতর লাখ ৬.৪২ শেমবা লোইখ্রে। স্কিম অসিগী অহুমসুবা তাঙ্কক্তা খুঙ্গঙগী লমশিংদা লৈবা খুলশিংগা মহৈ তম্ফমশঙশিং, কৈথেলশিং অমসুং অনা লায়েংশঙশিংগা শম্নহনগদবা লম্বী কিলোমিতর লাখ ১.২৫ শেমগৎকদৌরি। লম্বীগা লোয়ননা ইন্তরনেত কনেক্তিভিতী অসিসু খুঙ্গঙগী মফমশিংদা চপ মান্ননা মরু ওই। খুঙ্গঙ খুদিংদা মৈ ফংহল্লবা মতুংদা ঐগী লৈঙাক্না লৈবাকসিগী খুঙ্গঙ লাখ ৬ ওপ্তিকেল ফাইবরগী খুত্থাঙদা শমজিন্ননবা থৌরাং অমসু পায়খৎলি।
ইকায়খুম্নরবা মেম্বরশিং,
খুঙ্গঙ অমসুং অপীকপা ময়োল্লমশিংদা শন্দোক্তুনা লৈরিবা ঐখোয়গী স্মোল স্কেল ইন্দস্ত্রীশিং, কোত্তেজ ইন্দস্ত্রীশিং অমসুং এম.এস.এম.ই.শিং অসি ঐখোয়গী শেন্মিৎলোনগী য়াঙলেন শরুনি। হায়রিবা অপীকপা থাক্কী ইন্দস্ত্রীশিং অসিদা ভারতপু মরোমদোম লেপচবা ঙমহন্নবা য়াম্লবা মতিং লৈরি। সেক্তর অসিনা ভারতকী অপুনবা এক্সপোর্তকী চাদা ৫০ ওইরি। আত্মনিরভর ভারত শেমগৎনবা পান্দম থম্লিবা মিসন অসিদা এম.এস.এম.ই.শিংগী থৌদাং হেনগৎহন্নবা খোঙথাঙ কয়াসু লৌখৎলি।
অপীকপা অমদি কোত্তেজ ইন্দস্ত্রীশিং চাউখৎহনবগী থৌরাং অসিদা এম.এস.এম.ই.শিংগী ৱাহন্থোক শেমদোকপা, শেল থাদবগী লিমিত হেনগৎহনবা নৎত্রগা লৈঙাক্না পোত্থোক লৌশিনবগী প্রাইওরিতী পীবা অসিনচিংবা থৌরাংশিংনা ইনোৎ হাপ্লি। লুপা করোর ৩,০০,০০০গী ইমর্জেন্সী ক্রেদিত গরেন্তী স্কিম, অৱাবা তারবা এম.এস.এম.ই.শিংগী লুপা করোর ২০,০০০গী অখন্নবা স্কিম অমসুং ফন্দশিংগী ফন্দ অসিনচিংবা থৌরাংশিংনা অপীকপা থাক্কী ইন্দস্ত্রী লাখ কয়াদা কান্নবা পীরি। লৌথুপ লৌকোয় লৈতবা ফীভম পুরকপগী মথক্তা জি.ই.এম. পোর্তেলনা লৈঙাক্কী প্রোকরমেন্ততা অরাপ্পা মফম অমদি মনুং হঞ্জিনবা মফমশিংদগী ফাওবা য়াওনা এম.এস.এম.ই.শিং মশিং হেন্না য়াওশিনবদা মতেং ওইরি।
ওন্ত্রপ্রিন্যুরসিপকী কান্নবশিং লৈবাক্কী শরুক খুদিংমক্তা ফংহনবা হায়বসিনা ঐগী লৈঙাক্কী লেঙদ্রবা পান্দম্নি। হুনর হাত অমসুং উসতাদ অসিনচিংবা স্কিমশিংগী মখাদা খুৎহৈবা মীওই লাখ কয়াগী হৈ শিংবা হেনগৎহনবতা নত্তনা থবক পীবগী খুদোংচাবশিংসু শেম্লি। হায়রিবা স্কিমশিং অসিগী মখাদা নুপী খুৎহৈবীশিংনা মশিং তঙ্খায় হেন্না য়াওরি। খুৎহৈবশিং অসি ই-হাতকী খুত্থাঙদা মালেমগী কৈথেলদা শম্নহল্লি।
মরোমদোম লেপচবা ভারত অমা শেমগৎপদা নুপী ওন্ত্রপ্রিন্যুরশিংগী মরুওইবা থৌদাং লৈ। ঐগী লৈঙাক্না নুপীশিংদা মশানা মশাবু থবক পীজবগী অনৌবা খুদোংচাবা কয়া পীননবা খোঙথাঙ কয়া লৌখৎলে। মুদ্রা স্কিমগী মখাদা, লোন করোর ২৫ হেন্না সেংসন তৌখ্রে, মদুগী মনুংদা চাদা ৭০গী ময়াদি নুপী ওন্ত্রপ্রিন্যুরশিংদা পীখিবনি।
দীনদয়াল অন্ত্যোদয়া য়োজনা – রাস্ত্রিয় গ্রামীন অজীবিকা মিসনগী মখাদা নুপী ওন্ত্রপ্রিন্যুর করোর ৭ হেনবনা লৈবাকসিগী সেল্ফ হেল্প গ্রুপ লাখ ৬৬কী ময়াগী ওইবা নেতৱর্ক অসিগী শরুক অমা ওইরে। হায়রিবা নুপীগী কাঙলুপশিং অসিদা হৌখিবা চহী ৬সিদা লুপা করোর ৩,৪০,০০০গী বেঙ্ক লোনশিং ফংহনখ্রে।
লৈবাকসিগী খুঙ্গঙগী মফমশিংদা থবক তৌরিবা নুপীশিংগী হকশেলগী ফীভমপু পুক্নিংদা থমদুনা লৈঙাক অসিনা ‘সুবিধা’ স্কিম পায়খত্তুনা মসিগী মখাদা সেনিতরী নেপকিনশিং মমিংগী ওইবা মমল লুপা ১দা ফংহল্লি। ঐগী লৈঙাক্না রাস্ত্রিয় পোসন অভিয়ান, লেম্না চেক-অপ তৌবা অমদি মীরোনবী নুপীশিংদা শেলগী তেংবাং পীবনজিংবা তোঙান তোঙানবা থৌরাংশিংগী মখাদা অঙাঙ মচাশিং অমসুং মীরোনবী নুপীশিংগী হকশেল ঙাক্তুনা থম্ননবা থবক থৌরমশিং চোকথবা নাইদনা পায়খৎলি। মসিগী মহৈনা মেতর্নেল মোর্তেলিতী রেদ ২০১৪দা লাখ অমদা ১৩০ ওইরম্বদু ১১৩দা হন্থরক্লে। অন্দর ৫ চাইল্দ মোর্তেলিতী রেতসু অহানবা ওইনা ৩৬দা হন্থরক্তুনা মালেমগী লৈরিবা চাংচৎ ৩৯গী মখাদা লৈরে।
ঐগী লৈঙাক্না নুপীশিংনা চপ মান্ননা শরুক য়াবা হায়বসি মরুওইবা ৱাফম অমনি হায়না লৌবগা লোয়ননা তোঙান তোঙানবা হীরমশিংদা ঐখোয়গী ইচে-ইচলশিং অমদি ইচানুপীশিংগীদমক অনৌবা খুদোংচাবা কয়া ফংহল্লি। হায়রিবা মায়কৈ অসিদা ঐগী লৈঙাক্না ইন্দিয়ন এয়র ফোর্সকী ফাইতর স্ত্রীমদা অমদি অহানবা ওইনা মিলিতরী পুলিস্তা নুপী থবক হাপ্পা, লোয়ননা নুপীশিংবু লৈনুংদা অমদি নুমিদাংগী মতমদা ওপন কাস্ত মাইনশিংদা থবক শুবা য়াহন্দুনা ফিরে কয়া লৌখ্রে। নুপীশিংগী শাফনবা ৱাফমবু পুক্নিংদা থমদুনা ৱন স্তোপ সেন্তর, নেসনেল দেতাবেজ ওফ ক্রিমিনেল, ইমর্জেন্সী রেসপোন্স সপ্পোর্ত সিস্তেম অমসুং ফাস্ত ত্রেক কোর্তনচিংবা লিংখৎপগী থৌরাংশিং লৈবাক শিনবা থুংনা খোঙলৈ থুনা চঙশিল্লি।
ইকায়খুম্নরবা মেম্বরশিং,
২১শুবা চহীচাগী মালেমগী মথৌ তাবশিং অমদি শিংনবশিং পুক্নিংদা থমদুনা লৈঙাক অসিনা নেসনেল এজুকেসন পোলিসী লাউথোকখি। অহানবা ওইনা মহৈরোয়শিংদা নেসনেল এজুকেসন পোলিসীগী মখাদা মখোয়না অপামবা সবজেক্তশিং খঞ্জনবগী নীং তম্বা পিরি। মহৈরোয়শিংদা মখোয়গী কোর্স ময়ায়দা মখোয়গী সবজেক্ত নৎত্রগা স্ত্রীম হোংবা য়ানবগী খুদোংচাবসু ফংহল্লে।
প্রধান মন্ত্রী ই-বিদ্যাগী মখাদা ঐগী লৈঙাক্না স্কুল এজুকেসনগীদমক ৱন নেসন, ৱন দিজিতেল প্লেতফোর্ম ওইনা দিক্সা ওনলাইন পোর্তেল শেম্লে। মহৈরোয়শিংগী অপাম্বা ঙাক্তুনা থম্নবগীদমক মতম চুপ্পা লেপ্তুনা ঐগী লৈঙাক্না একাদমিক চহী অমা মাঙহন্দনবা জী অমসুং নিত চাংয়েংশিং মায় পাক্না পাঙথোকখি।
ইকায়খুম্নরবা মেম্বরশিং,
খ্বাইদগী শোত্থরবা খুন্নাইগী কাঙলুপশিংগী খুন্নাই অমসুং শেন্মিৎলোন চাউখৎপগী খোঙচৎ অসি মতিং লৈবা মহৈ মশিং ফংহনবদগী হৌগদবনি হায়না ঐগী লৈঙাক্না থাজৈ। অসিগুম্বা মহৈরোয় করোর ৩ লাখ ২০ হেনবনা লৈঙাক্কী তোঙান তোঙানগী স্কোলারসিপ স্কিমশিংদগী কান্নবা ফংলি। মসিদা সিদ্যুল কাস্ত, শোত্থহৌরবা কাঙলুপ, উমংদা খুন্দাবা, ত্রাইবেল ফুরুপশিং অমসুং অতোনবা ফুরুপশিংদগী মহৈরোয়শিং য়াওরি। খনগৎপা য়াবা অমসুং খুদোং চাদ্রবা মহৈরোয় মশিং য়াম্না স্কোলারসিপশিং অসিগী কান্নবা ফংহনন্নবা লৈঙাক্না হোৎনরি। মসিগা লোয়ননা সিদ্যুল কাস্ত মহৈরোয়শিংগী পোস্ত মেত্রিক স্কোলারসিপ স্কিমগী ফন্দিংদা কেন্দ্র লৈঙাক্কী শরুকসু হেনগৎহল্লে। মতৌ অসুম্না ত্রাইবেল মহৈরোয়শিংদা মহৈ মশিং তম্বা ফংহন্নবগীদমক ত্রাইবেলনা নম্না খুন্দাবা ব্লোকশিংদা একলব্যা মোদেল রেসিদেন্সিএল স্কুলগী নেতৱর্কসু পাকথোক চাউথোকহল্লি। হৌজিক ফাওবদা অসিগুম্বা মহৈ তম্ফমশঙ ৫৫০ হেনবা সেংসন তৌখ্রে।
মহৈ মশিংগী ফীভম ফগৎহনবগা লোয়ননা, থবক লৌবগী থৌওং লায়থোকহনবা অমদি মওং মরিল চুমহনবদসু ঐগী লৈঙাক্না অহেনবা মীৎয়েং চঙলি। গ্রুপ সি অমসুং গ্রুপ দিগী থবকশিং লৌবদা ইন্তর্ভিউ তৌহন্দবসিনা নহাশিংদা চাউনা কান্নহল্লে। নেসনেল রিক্রুতমেন্ত এজেন্সী লিংখত্তুনা লৈঙাক অসিনা নহাশিংবু চাংয়েং কয়ামরুম য়াওবগী খুদোংচাদবদসু কোকহল্লে।
ইকায়খুম্নরবা মেম্বরশিং,
‘সবকা সাথ, সবকা বিকাস, সবকা বিস্বাস’ হায়বা লাইৱা অসিগী পরিংদা ঐগী লৈঙাক্না খুন্নাইগী হীরম খুদিংমক কাঙলুপ খুদিংমক চাউখৎমিন্ননবা অহেনবা মীৎয়েঙ চঙলি। শোইনাইরবাশিংনা থেংনরিবা খুদোংচাদবশিং কোকহন্নবগীদমক বিল্দিং লিশিং কয়া, পব্লিক ত্রান্সপোর্ত বসশিং অমদি রেলৱেশিং মখোয়না চঙথোক চঙশিন তৌবদা খুদোং চানবা শেমদোক্লে। ৱৱেবসাইত ৭০০লোম শোইনাইরবশিংনা শীজিন্নবা ঙমহল্লে। মতৌ অসুম্না ত্রান্সজেন্দরশিংদা হেন্না ফবা খুদোংচাবা অমদি মান্নবা খুদোংচাবা ফংহন্নবা ত্রান্সজেন্দর পর্সন্স (প্রোতেক্সন ওফ রাইতস) এক্ত চৎনহল্লে। দিনোতিফাইদ, নোমেদিক অমসুং সেমি-নোমেদিক ফুরুপশিংগীদমক দেবেলপমেন্ত অমসুং ৱেলফ্যার বোর্দ অমসু লিংখৎলে।
চাউখৎ লমজেলদা মনিংদা লৈহৌরবা এস্পিরেসনেল দিস্ত্রিক্ত ১১২দা চাউখৎ থৌরাংগী স্কিমশিং ঐগী লৈঙাক্না অহেনবা মীৎয়েঙ চঙদুনা পায়খৎলি। হায়রিবা থৌরাংসিদগী ত্রাইবেলগী ইচিন ইনাউশিংনা চাউনা কান্নবা ফংলি। ত্রাইবেল ফউরুপশিংগী হিংনবগী মরুওইবা লম্বী অমা ওইরিবা উমংগী পোত্থোকশিং কৈথেলদা য়ৌহনবা অমদি উমংগী পোত্থোকশিংদা তাংবা অপীকপা লল্লোন ইতিকশিং শেমগৎপগা মরী লৈনবা থবকশিংসু চঙশিল্লি। হায়রিবা থৌরাং অসিগী মহৈ ওইনা ত্রাইবেল ইমুংশিংদা লুপা করোর ৬০০কী অহেনবা শেন্ফম ফংহল্লে। উমংগী পোত্থোক মখল ৪৬কী এম.এস.পি. লৈঙাক্না চাদা ৯০ ফাওবগী চাংদা হেনগৎহল্লে।
ইকায়খুম্নরবা মেম্বরশিং,
ভারত্তা মতমগা চুনবা তেক্নোলোজী চাউখৎপা অমদি ভারত মচা খুদিংমক্তা মতমগা চুনবা তেক্নোলোজী ফংহনবা হায়বসি মরোমদোম লেপচবা ভারত অমগী পান্দমদা চঙশিনবগী মরুওইবা খুদম চাংদমশিংনি।
‘মিতর অনিগী অরাপ্প’ থমবগী মথৌ তাবা ঙাক্তুনা দিজিতেল ইন্দিয়াগী মতিক শীজিন্নদুনা ঐখোয়গী লৈবাক মীয়াম অমদি ইন্সতিত্যুসনশিংনা চাউখৎ লমজেল তপথহন্দ্রি। দিসেম্বর ২০২০দা য়ু.পি.আই.গী খুত্থাঙদা লুপা করোর ৪,০০,০০০ হেনবগী দিজিতেল ত্রাঞ্জেক্সন তৌখি। ঙসিদি, বেঙ্ক ২০০ হেনবনা য়ু.পি.আই. সিস্তেমগা শম্নরি। মতৌ অসুম্না দিজিলোকরবুসু দিজিতেল দোকুমেন্ত করোর ৪০০ হেনবগী পেপরলেস প্লেতফোর্ম ওইনা শীজিন্নরি। উমঙ এপকী খুত্থাঙদসু লৈবাক মীয়াম করোর কয়ানা সর্ভিস ২০০০ হেনবা শীজিন্নরি। কম্মন সর্ভিস সেন্তর লাখ অহুম মখায় হেনবনা খুঙ্গঙগী মফমশিংদা লৈবা মীয়ামগা লৈঙাক্কী সর্ভিসশিংগা শমজিন্নরি। পরিং অসিদা ইন্দিয়ন স্তাম্প এক্ত শেমদোক্তুনা ই-স্তাম্প সর্ভিস হৌদোকখ্রে।
জন ধন একাউন্ত, আধার অমসুং মোবাইলগী তাজিন অহুম্না মীয়ামগী মঙম ঙাক্তুনা থমবদা মতেং ওইরি। জাম হায়রিবা তাজিন অহুমসিগী মরম্না লুপা করোর ১,৮০,০০০ অরানবা খুত্তা তাখিগদবদগী কল্লি।
ঐগী লৈঙাক্না মেদিকেল সর্ভিসপুসু ‘রাস্ত্রিয় হেল্থ মিসন’গী খুত্থাঙদা দিজিতাইজেসন তৌনবগী থৌরাং লৌখৎখি। মীয়াম্না দিজিতেল এপোইন্তমেন্ত, দিজিতেল রিপোর্ত লোয়ননা দিজিতেল হেল্থ রেকোর্দনচিংবা খুদোংচাবশিং লাক্কদৌরিবা নুমিৎশিংদা মিসম অসিগী খুত্থাঙদা ফংলগনি।
ঐখোয়গী ইশাগী নেভিগেসন সেতলাইত সিস্তেম ‘নাভিক’ অসিনসু লৈবাকসিগী মীংচৎ হেনগৎহল্লি। ঙামী লিশিং কয়ানা হৌজিক মসিদগী কান্নবা ফংলি। কুইদ্রিঙৈদা লৈবাক মীয়ামদা কত্থোকখ্রবা নেসনেল এতোমিক তাইমস্কেল অমসুং ভার্তিয় নির্দেশক দ্রাব্য প্রনালিগী মওংদা অনৌবা স্তেন্দর্দশিং শেম্লে। হায়রিবা লমদমসিদা পুথোকচবা পাম্বৈশিং অসিনা ভারতকী পোত্থোকশিং মালেমগী থাক্তা শেমগৎপদা মতেং ওইরগনি।
হায়রিবা তেক্নোলোজীগী লমদা ইল্লিবা অসিনা লৈবাকসিগী দিমোক্রেতিক ইন্সতিত্যুসনবুসু মপাঙ্গল কনখৎহল্লগনি। পরিং অসিদা ই-বিধান এককী খুত্থাঙদা লেজিস্লেতিব এসেমব্লীশিং, লেজিস্লেতিব কাউন্সিলশিং অমদি পার্লিয়ামেন্তকী হাউস অনিমকপু দিজিতাইজেসন তৌবগী থবক চঙশিল্লি। স্তেত লেজিস্লেতিব এসেমব্লীশিংদা নেভা – নেসনেল ই-বিধান এপ্লিকেসন চৎনহনবনা লেজিস্লেতিব অমসুং দিমোক্রেতিক প্রোসেসতা মতেং পাংবগী অনৌবা মতম অমা পুরক্লগনি।
ইকায়খুম্নরবা মেম্বরশিং,
ঐখোয়গী পার্লিয়ামেন্ত অসি দিমোক্রেতিক প্রোসেস্তা মীয়াম শরুক হেন্না য়াহন্নবা অমদি অনৌবা ভারতকী পান্দমশিং ফংহন্নবগী মরুওইবা মেদিয়ম অমনি। মমাঙগী লৈঙাক্কী মতমদা অমদি পার্লিয়ামেন্তকী হাউসশিংদা হৌজিক লৈরিবা বিল্দিং অসিনা হৌজিক্কী মথৌ তাবশিং থুংহনবদা মতিক চাদ্রে হায়বা ৱাফমসি হঞ্জিন হঞ্জিন পন্নখ্রে। মমাঙগী লৈঙাক্নসু পার্লিয়ামেন্তকী অনৌবা বিল্দিং অমা শাননবা থৌরাং তৌখি। ঐখোয়গী নীং তম্বগী চহী ৭৫ শুরকপগী পরিংদা চঙশিল্লকপগা লোয়ননা অনৌবা পার্লিয়ামেন্ত হাউস অমা শাগৎপগী থবক হৌখিবা অসিমক নুংঙাইরবা তাঞ্জা চানরুবা থৌওং অমনি। অনৌবা পরি্লিয়ামেন্ত বিল্দিং অসি শাগৎপগা লোয়ননা মেম্বর খুদিংমক মখোয়গী থৌদাং মপুং ফানা পাঙথোকপা ঙমহন্নবা হেন্না ফবা খুদোংচাবশিং ফংলগনি।
ইকায়খুম্নরবা মেম্বরশিং,
লৈবাক মীয়াম্না তেক্নোলোজী অমসুং হোংলক্লিবা মওংবু থুনা য়াঙনা লৌশিল্লিবা অসি ভারত মচা খুদিংনা লৈবাকসিনা চাউখৎপগী অনৌবা পন্দোল অমা য়ৌববু য়েংননবা খৌরাংনা ঙাইরিবা অদুগী খুদম্নি। মীয়ামগী অপাম্বশিং পুক্নিংদা থমদুনা ঐগী লৈঙাক্না খুৎলৈ থুবা ফিরেপশিং লৌরি অমদি শেন্মিৎলোনগী সেক্তর খুদিংদা মতম কুইনা ঙাইরক্লবা অওনবা পুরক্লি।
ফেসলেস তেক্স এসেসমেন্ত অমসুং অপিল থম্বগী মথক্তা কম্পেনী এক্তকী প্রোভিজন কয়াবু ওন্ত্রপ্রিন্যুরসিপ পুক্নিং থৌগৎনবা ঐগী লৈঙাক্না দি-ক্রিমিনেলাইজ তৌখ্রে। ইন্দস্ত্রীশিংদা মরুওইবা সর্ভিসশিং ফংহনবা ঙম্নবগীদমক জি.আই.এস.তা য়ুম্ফম ওইবা ইন্দস্ত্রিএল জোনগী দেতাবেজ অমা শেম্লে। হায়রিবা দেতাবেজ অসিগী খুত্থাঙদা ইন্দস্ত্রগী মফম হেক্তর লাখ ৫ হেনবগী ইনফোর্মেসন ফংলে।
শ্রমেব জয়তেগী পুকচেল উত্তুনা পার্লিয়ামেন্তকী হাউস অনিমক্না শিন্মীশিংগী পুন্সিদা অওনবা পুরক্নবা ফিরেপ অমা লৌবসিদা ঐঙোন্দা নুংঙাইবা ফাওই। কেন্দ্রগী লেবর লো ২৯ লেবর কোদ ৪দা পুনশিনখ্রে। স্তেতশিংনসু হায়রিবা লেবর রিফোর্মশিং অসি চৎনহন্নবগী থৌরাং তৌবা উবা ফংলি। হায়রিবা অওনবশিং অসিনা শিন্মীগী য়াইফনবা, খুৎশুমল মতম চানা পীথোক্নবা অমদি অনৌবা থবক্কী খুদোংচাবশি শেম্ননবগী মীৎয়েং পাকথোক চাউথোকহল্লগনি। অনৌবা লেবর কোদশিং অসিনা নুপীগী ৱর্ক ফোর্স হেনগৎহনবা অমদি হেন্না শরুক য়াহনবদসু মতেং ওইরগনি।
শিন্মীগা লোয়ননা শেল্লেপ লায়না ফংহনবা হায়বসিসু ইন্দস্ত্রীশিংগী মরুওইবা অমনি। মসিগীদমক লৈবাকসিগী বেঙ্কিং সিস্তেম মপাঙ্গল কনখৎহল্লি। বেঙ্ক মচাশিং পুনশিন্দুনা অচৌবা মপাঙ্গল কনবা বেঙ্কশিং শেমবা অসি মায়কৈ অসিদা থাংজিল্লিবা অচুম্বা খোঙথাঙ অমনি।
লৈবাকসিদা অহানবা ওইনা, মেনুফেকচরিং সেক্তর ১০দা লুপা কোরর লাখ ১.৫রোমগী ওইগদবা প্রদক্সন লিঙ্ক ইন্সেন্তিব স্কিম অমা চৎনহল্লে। মসিগী শাফম ইলেক্ত্রোনিক্কী পোৎলমশিং অমদি অতৈ পোত্থোকশিং পুথোকপদা উবা ফংলি। থৌরাং অসিগী মহৈনা, অচৌবা নেসনেল অমসুং ইন্তরনেসনেল কম্পেনীশিংনা মখোয়গী থবক ভারত্তা পায়খৎলক্লি।
ঐগী লৈঙাক্না লমদমসিদা শাবা পোৎলমশিং শীজিন্নবদা মীয়াম্না মায়পুননা শরুক য়াননবা পুক্নিং থৌগৎলি। ঙসিদি ‘ভোকেল ফোর লোকেল’ হায়বসিনা লৈবাকসিদা মীয়ামগী ইহৌ ওইরক্লি। ভারত্তা শাবা পোৎলমশিংগা পুক্নিংগী ওইবা মরী অমা শেমগৎনবা অমদি পোৎলমশিং অসি অৱাংবা থাক্কী ওইহন্নবা থৌরাংশিং লৌখৎলি।
ভারত্তা ‘ইজ ওফ দুইং বিজিনেস’কী ফীভম ফগৎহন্নবা লেপ্পা নাইদবা খোঙথাঙশিং লৌখৎলি। হীরমসিদা স্তেতশিংগী মরক্তা অফবা মওংদা হিদান্নবগী থৌওং পুক্নিং থৌগৎলি। স্তেতশিংনসু রেঙ্কিং হেনগৎহনবগী মরুওইবা অসি লৌশিন্দুনা থৱায় য়াওনা শরুক য়ারি হায়বা ৱাফমসিমক নুংঙাইবা ৱাফমনি।
কোরোনাভাইরস লাইচৎ মরকসিদা ভারত মচাশিংগী পুন্সি কনবরোমদা মায় ওনশিল্লিঙৈ চৈরকসিদা লৈবাক অসিনা শেন্মিৎলোনগী মনিং হনবা ফীভমদগী থোকপা হৌরক্লি। ফীভমসি খুদম চাংদম কয়ানা তাক্লি। লুরবা তান্ফমসিদসু ভারত অসি মপান লৈবাকশিংগী ইনভেস্তরশিংগী পুক্নিং চিংশিন্নিংঙাই ওইরবা পন্থুং অমা ওইরক্লি। এপ্রিল অমসুং ওগস্ত ২০২০গী মরক্তা ভারত্তা রেকোর্দ ওইনা দোলর বি,ইয়ন ৩৬কী ফোরেন দাইরেক্ত ইনভেস্তমেন্ত লাকখি।
ইকায়খুম্নরবা মেম্বরশিং,
মতমগা চুনবা ইনফ্রাস্ত্রকচর শেমগৎপনা অনৌবা অমদি ‘মরোমদোম লেপচবা ভারত’ অমগী মপাঙ্গল কল্লবা য়ুম্ফম থোনগনি হায়না ঐগী লৈঙাক্না খল্লি। লাইচৎ মনুংসিদসু অচৌবা ইনফ্রাস্ত্রকচর প্রোজেক্তশিং থুনা য়াঙনা পায়খৎপা অমদি মখোয়বু লোইশিনবা অসিনা ঐখোয়গী ফিরেপ উৎলি। চেন্নাইদগী পোর্ত ব্লেয়র ফাওবগী সবমেরিন ওপ্তিকেল ফাইবর কেবল, অতল তনেল নৎত্রগা চার ধাম রোদ প্রোজেক্ত ওইরবসু ঐখোয়গী লৈবাকসিনা চাউখৎ থৌরাংগী থবকশিংদা ইচঙ থৌনা মাঙদা চঙশিল্লি।
নুমিৎ খরনিগী মমাঙদা, ইস্তর্ন এন্দ ৱেস্তর্ন দেদিকেতেদ ফ্রৈত কোরিদোরগী শরুক খরা লৈবাক মীয়ামদা কত্থোকখ্রে। নোংপোক ভারত্তা ইন্দস্ত্রিএলাইজেসন য়োকখৎপগা লোয়ননা ফ্রৈত কোরিদোর অসিনা মরক্তা পনবগী চাংসু হন্থহল্লগনি।
লৈবাক্কী ইনফ্রাস্ত্রকচর মতমগা চুননা শেমগৎনবা ঐগী লৈঙাক্না লুপা করোর লাখ ১১০গী ‘নেসনেল ইনফ্রাস্ত্রকচর পাইপলাইন’গী থবকসু পায়খৎলি। মসিগা লোয়ননা ‘ভারতমালা পরিয়োজনা’গী মখাদা অনৌবা এক্সপ্রেসৱে ৬ অমসুং অনৌবা এক্সেস কন্ত্রোল্দ কোরিদোর ১৮গী থবকসু পায়খৎলি।
গুজরাতকী হজিরা অমসুং ঘোঘাগী মরক্তা পায়খৎলিবা রো-পেক্স ফেরী সর্ভিস নৎত্রগা কেবরিয়া অমসুং সাবরমতি রিভর ফ্রন্তকী মরক্তা পায়খৎলিবা সীপ্লেন সর্ভিস ওইরবসু, হায়রিবশিং অসিনা ভারতকী ঈশিংগী লম্বীগী চত্থোক চৎশিনগী মায়কৈদা অনৌবা মায়ওন অমা পীরি। মালেমগী খ্বাইদগী ৱাংবা সরদার পতেলগী মীতমগী চাউথোকচবা লৈরিবা কেবরিয়া অসি হৌজিক্তি লৈবাকসিগী ময়োল্লম কয়াগা ত্রেন কয়ানা হকথেংননা শমজিন্নরে।
ইকায়খুম্নরবা মেম্বরশিং,
লৈবাক অসিবু গ্যাসতা য়ুম্ফম ওইবা শেন্মিৎলোন অমা ওন্থোক্নবগীদমক গ্যাস কন্নেক্তিভিতীগী থবকশিং খোঙজেল য়াঙখৎহল্লি। নুমিৎ খরনিগী মমাঙদা, কোচি-মেঙ্গলুরু গ্যাস পাইপলাইন লৈবাক মীয়ামদা কত্থোকখি। দোভি-দুর্গাপুর গ্যাস পাইপলাইন শেমগৎপনা ‘উর্জা গঙ্গা’দা ইনোৎ হাপ্লি। পাইপলাইন অসি ৱেস্ত বেঙ্গল ফাওবা য়ৌদুনা তোঙান তোঙানবা ইন্দস্ত্রীশিংদা, মরুওইনা নোংপোক ভারতকী হারগী প্লান্তশিংদা গ্যাস ফংহনগনি। মতৌ অসুম্না তামিল নাদুনা লৈবা হারগী প্লান্তশিং অমসুং অতৈ ইন্দস্ত্রিএল য়ুনিৎশিংদা গ্যাস কন্নেক্তিভিতী পীরিবা তুতিকোরিন-রামনাথপুরম গ্যাস পাইপলাইনগী থবকসু খোঙজেল য়াঙনা চঙশিল্লি।
ইকায়খুম্নরবা মেম্বরশিং,
ঐগী লৈঙাক্না ময়োল্লমশিং চাউখৎহনবা অসি খুদোংচাবা অমা ওইনা খল্লি অমদি মরম অসিননি ময়োল্লমগী ইনফ্রাস্ত্রকচর শেমগৎপদা শেল চাউনা থাদরিবসি। ময়োল্লমশিংদা লৈবা লায়রবশিংগীদমক য়ুম করোর ১ হেন্না সেংসন তৌখ্রে, মসিগী মনুংদা য়ুম লাখ ৪০দি শাখ্রে। নুমিৎ খরনিগী মমাঙদা লৈবাকসিগী ময়োল্লম তরুক্তা মতমগা চুনবা তেক্নোলোজী শীজিন্নদুনা য়ুম শাবগী থবক হৌখ্রে। ময়োল্লমশিংদা থবক শুরিবা শিন্মীশিংদা হেন্না ফবা অমদি অহোংবা ভরাগী য়ুমশিং ফংহন্নবা স্কিম অমসু হৌদোকখ্রে।
কন্নেক্তিভিতীগা শম্নবা ময়োল্লমগী ইনফ্রাস্ত্রকচর অসিসু লৈঙাক অসিনা অহেনবা মীৎয়েঙ চঙলিবা ৱাফম অমনি। ঙসি মেত্রো রেল সর্ভিস ময়োল্লম ২৭তা হৌদোকখ্রে। নুমিৎ খরনিগী মমাঙদা দিল্লী মেত্রোগী রুতশিংগী মরক্তা অমদা দ্রাইভর য়াওদবা মেত্রো ত্রেনসু মথৌ তৌবা হৌখ্রে। রিজনেল রেপিদ ত্রাঞ্জিত সিস্তেম শেমগত্তুনা ময়োল্লমশিংদা মীয়ামগী চত্থোক চৎশিনগী সিস্তেমসু ফগৎহল্লি। কম্মন মোবিলিতী কার্দ পাকথোক চাউথোকহনবনা লৈবাক শিনবা থুংনা তোঙান তোঙানবা ময়োল্লমশিংদা চত্থোক চৎশিনদা মতেং ওইগনি।
ইকায়খুম্নরবা মেম্বরশিং,
ঐগী লৈঙাক অসি নোংপোক ভারত্তা মপুং ওইনা অমদি মান্নবা থাক্কী চাউখৎপা পুরক্নবা খোঙফম চেৎনা লেপ্লি। অৱাং নোংপোক লমদমদা মখোয়গী তোপ তোপ্পা জিওগ্রাফিকেল, নাৎ অমসুং লোনগী মশক অমদি খুন্নাইগী মশক য়োকখত্তুনা থুনা চাউখৎপা পুরক্নবা থৌরাং অমসু পায়খৎলি। অসাম অমসুং অৱাং-নোংপোক স্তেতশিংগীদমক্তা ব্রহ্মপুত্র তুরেল অসি মখোয়গী ‘জিবোনধারা’নি। লাইফলাইন অসিবু শেন্মিৎলোনগী থৌওংগী য়ুম্ফম ওইহন্দুনা তোঙান তোঙানবা নেসনেল ৱাতরৱেশিং মথৌ তৌহন্নবা থবক চঙশিল্লি। মসিনা অৱাং নোংপোক্কী লৌমী, নহা অমসুং ওন্ত্রপ্রিন্যুর য়াওনা মীওই কাঙলুপ খুদিংদা কান্নবা পীগনি। ‘অর্থ ব্রহ্মপুত্র’ প্রোগ্রামগী মখাদা ইন্তিগ্রেতেদ নেসনেল ৱাতরৱে শেমগত্তুনা ব্রহ্মপুত্র অমসুং বরাক তুরেলবু চাউখৎপগী ঈচেল ওন্থোক্নবা থৌরাং চঙশিল্লি।
ইহুল খঙনা অমদি খুৎশম্নদুনা অৱাং নোংপোক্তা তুং কোইনা ইং-চিকপা পুরক্নবগীদমক ঐগী লৈঙাক্কী থৌরাং মহৈ য়ানবা হৌরক্লে। ঙসিদি অৱাং নোংপোক্কী লাল হৌরিবশিং শিথরক্লে অমদি হিংসাগী থৌদোক মশিং শাথিনা হন্থরে। হিংসাগী লম্বীদা লম্হাংনদুনা চৎলুরবা নহাশিং চাউখৎপগী অমদি লৈবাক শেমগৎপগী পরিংদা হন্নরক্লি।
ব্রু রিফ্যুজীশিং খুন্দা লৈতাহনবগী থবক ইং চিক্না অমদি নুংশি চান্ননা মপুং ফারক্লি। মতৌ অসুম্না, পুৱারী ওইরবা বোরো পীস একোর্দ খুৎয়েক পীনদুনা মায় পাক্না থবক্তা ওন্থোক্লি। য়ানচে অসিগী মতুংদা হন্দক্তি বোরো তেরিতোরিএল কাউন্সিলগী মীখলসু মায় পাক্না পাঙথোকখ্রে।
ইকায়খুম্নরবা মেম্বরশিং,
ঐগী লৈঙাক্না থাক খুদিংদা লৈবাক্কী নীংতম্বা অমদি অপুনবগী শক্তমদা শিংনরকপা খুদিংমক থেংননা ফোঙফম চেৎনা লেপ্লি। নাকল অমরোমদা হিংসানা শোকহল্লবা মফমশিংদা চাউখৎ থৌরাংশিং পায়খৎলি অ্রদুগা মায়কৈ অমরোমদনা হিংসা থোক্নবা ইনশিল্লিবা শাফুশিংগী মায়োক্তা অকনবা থবক লৌখৎলি। মসিগী মহৈনা নক্সলগী হিংসাগী থৌদোক মশিং হন্থরক্লি অমদি নক্সলনা শোকহল্লবা মফমশিং পীকশিল্লক্লি।
ঐগী লৈঙাক্কী চাউখৎপদা য়ুম্ফম ওইবা থৌরাং অসি জম্মু অমসুং কাস্মিরগী মীয়ামগীসু থম্মোয়নুংদগী শৌগৎনরক্লি। চয়োল খরগী মমাঙদা, নীং তম্লবা মতুংদা অহানবা ওইনা দিস্ত্রিক্ত কাউন্সিলগী মীখল জম্মু অমসুং কাস্মিরদা পাঙথোকখ্রে। ভোতরশিংনা পাক্তক্ননা মীখলদা শরুক য়াখিবা অদুনা জম্মু অমসুং কাস্মিরনা অনৌবা দিমোক্রেসিগী তুংগী পুন্সি অমগী মায়কৈদা থুনা য়াঙনা চঙশিল্লক্লি হায়বা উৎলে। অনৌবা মপু ওইবগী অয়াবা পীবনা লমদম অদুগী মীয়ামগী মপাঙ্গল কনখৎহল্লে। ‘অয়ুস্মান ভারত হেল্থ স্কিম’ চৎনহল্লবা মতুংদা জম্মু অমসুং কাস্মিরগী ইমুং খুদিংমক্তা লুপা লাখ ৫ ফাওবগী লেম্না লায়েংবগী খুদোংচাবা ফংলে। সেন্ত্রেল এদমিনিস্ত্রেতিব ত্রাইব্যুনেলগী বেঞ্চ অমসু জম্মুদা লিংখৎওএ। য়ুনিয়ন তেরিতরী অমা ওইরবা মতুংদা থা খরগী মমাঙদা লদাখ ওতোনোমস হিল কাউন্সিলগী মীখল মায় পাক্না পাঙথোকখ্রে। হৌজিক্তি লদাখকী মীয়াম্না লমদমদুদা থুনা চাউখৎপা পুরকপগা মরী লৈনবা ফিরেপশিং মশানা লৌজরে।
ইকায়খুম্নরবা মেম্বরশিং,
কোরোনাভাইরস লাইচৎ মনুংদা লৈবাক অসিনা লাংফম অসি মায়োক্নরিঙৈদা ঙমখৈদা লৈবাকসিগী মতিংবু শিংননবা হোৎনরকখি। নাকল অনিগী ওইবা মরী অমদি য়ানচেশিং থৌওইদনা এল.এ.সি.দা ইং চিক্না লৈবা ফীভমবু য়ৈখাই থিনগাইনবা হোৎনরকখি। অদুম ওইনমক ঐখোয়গী ঙাকশেল লান্মীনা থৌরাং অসিবু খুৎলৈ থুনা, পাঙ্গল ফুদোক্তুনা থৌনা ফনা পাউখুম পীবদা নত্তনা ঙমখৈগী ফীভমদা অহোংবা পুরক্নবা থৌরাং খুদিংমক অরেম্বা তাহনখি। ঐখোয়গী লান্মীশিংনা পুক্নিং ফাথদুনা লৈখিবা, থৌনা অমদি লিংজেল উৎখিবা অদু থাক ৱাংনা থাগৎনিংঙাইগী মশক্নি। জুন ২০২০দা, ঐখোয়গী লান্মী কুন্না খ্বাইদগী অথোইবা মওংদা কত্থোক্তুনা গলৱান তম্পাক্তা লৈবাক ঙাক্নবা মথৱাই থাখি। হায়রিবা মরৈবাক নীংবা অথৌবশিং অসিগী মফমদা লৈবাক মীপুম খুদিংনা লমন তোনশিল্লবনি।
ঐগী লৈঙাক অসি লৈবাকসিগী ইন্তরেস্ত ঙাক্ননবা মীৎ শিংনা অমদি খোঙফম চেৎনা লেপ্লি। ভারতকী নীংতম্বা ঙাক্নবগীদমক এল.এ.সী.দা অহেনবা লান্মীসু থাজিল্লি।
ইকায়খুম্নরবা মেম্বরশিং,
নীংতম্বগী ইহৌ মনুংদা মুৎনাইদ্রবা লৈবাক নিংবগী ময়েকশিং ইরমবা মমিং লৈরবা মলয়ালম শৈরেংবা ভল্লাথোলনা হায়বিরম্মি:
“ভারতম এন্না পেরু কেত্তল অভিমনা পুরিদাম আগনম অন্ত্রঙ্গম”
মসিনা হায়রিবদি, নহাক্না ভারতকী মমিং হেক তাবা মতমদা, নহাক্কী থম্মোয় অদু চাউথোকচবনা থলহনগদবনি হায়বনি।
তুংদা ভারতনা লৌরক্কদবা হেন্না চাউবা থৌদাংশিং পুক্নিংদা থমদুনা ঐগী লৈঙাক্না ঐখোয়গী লান্মীগী শেম শাবা অসি মপাঙ্গল কনখৎহন্নবা পান্দমসু থম্লি। ভারতকী লান্মীগী মতিং হেনগৎহন্নবা মতমগা চুনবা খুৎলায় মখল কয়া লৌশিল্লি। দিফেন্স সেক্তরদা ইরোমদোম লেপচবা ঙম্নবা থৌরাংসু পায়খৎলি। নুমিৎ খরনিগী মমাঙদা লৈঙাক অসিনা ঐচ.এ.এল.দা লুপা করোর ৪৮,০০০গী ওইগদবা লমদমসিদা শাজবা ফাইতর এয়রক্রাফ্ত ‘তেজাস’ ৮৩ লৌননবা ওর্দর তৌখ্রে। ‘মেক ইন ইন্দিয়া’ য়োকখৎনবা দিফেন্সকা মরী লৈনবা পোৎলম ১০০ মপান্দগী পুশিল্লকপদা অথিংবা থমখ্রে। মতৌ অসুম্না সুপরসোনিক তোর্পিদো, ক্বিক রিএক্সন মিসাইল, তেঙ্ক অমসুং লমদমসিগী রাইফলনচিংবা য়াম্লবা এদভান্স ওইবা খুৎলায়শিং ভারত্তা পুথোক্লি। ভারতনা হৌজিক্তি দিফেন্সকী মচাকশিং মপান্দা থাদোকপগী শরুক থুনা হেনগৎহল্লি।
ইকায়খুম্নরবা মেম্বরশিং,
‘ইন্দিয়ন নেসনেল স্পেস প্রোমোসন এন্দ ওথোরাইজেসন সেন্তর – ইন-স্পেস’ শেমবনা স্পেস সেক্তরদা অচৌবা অওনবা পুরকপদা খুমাঙ চাউশিনহল্লগনি। ঙসিদি ইস্রোগী স্পেস সাইন্তিস্তশিংনা ‘চন্দ্রয়ান-৩’, ‘গগনয়ান’ অমসুং ‘স্মোল সেতলাইত লোঞ্চ ভেহিকল’ অসিনচিংবা মরুওইবা মিসনশিংদা থবক চঙশিল্লিবসিদা ঐখোয়দা চাউথোকচবা ফাওরি। ন্যুক্লিয়র ইনর্জীগী লমদসু লৈবাক অসিনা মরোমদোম লেপচবা ঙম্নবা ফীভম পুরকপগী মায়কৈদা য়াঙনা চঙশিল্লি। থা খরগী মমাঙদা, লৈবাকসিগী অহানবা লমদমসিদা শাজবা প্রেসরাইজ হেভী ৱাতর রিএক্তর কক্রাপুরদা মায় পাক্না চাংয়েং তৌখ্রে।
ইকায়খুম্নরবা মেম্বরশিং,
চাউখৎপগা লোয়ননা মহৌশাগী ফীভম ঙাক্তুনা থম্বা হায়বসিসু ঐগী লৈঙাক্কী খ্বাইদগী মকোক থোংবা ৱাফম অমনি। ফিরেপ অসিগা লোয়ননা ২০০৫কা চাংদম্নবদা ২০৩০ ফাওবদা ইমিসন ইন্তেন্সিতী ওফ জি.দি.পি. চাদা ৩৩ হন্থহন্দুনা চাদা ৩৫গী চাংদা থম্নবগী পান্দম ফংননবা থৌরাং পায়খৎলি। পেরিস এগ্রীমেন্ত চৎনহনবদা মাঙজিল থাবা লৈবাকশিংগী মনুংদা ভারতসু অমা ওইরি।
কত্চকী লৈকংলাদা মালেমগী খ্বাইদগী চাউবা হাইব্রিদ রিনিউএবল ইনর্জী পার্ক লিংখৎনবা থবক ইকুই কুইদনা হৌখ্রে। হৌখিবা চহী তরুকসিদা, ভারতকী রিনিউএবল ইনর্জীগী মতিং শরুক অনি মখায় হেনগৎলে, অদুগা নুংশা মঙালগী ইনর্জীগী মতিংনা শরুক ১৩ হেনগৎলে। ঙসিদি লৈবাকসিগী অপুনবা ইনর্জী প্রদক্সনগী শরুম মরী থোকপগী অমগী ময়াদি রিনিউএবল ইনর্জী সোর্সশিংদগী ওইরি।
ইকায়খুম্নরবা মেম্বরশিং,
কোরোনাভাইরস লাইচৎ মনুংসিদসু ভারতনা মাগী মালেমগী ওইবা থৌদাং পুকচেল শেংনা লৌরিবা অসি মালেম অসিনা খঙলি। ‘বাসুধৈব কুতুম্বক্কম’গী ৱাখল পরিংদা চত্তুনা ভারতনা মশাগী মথৌ তাবশিং ফংহনবগী মথক্তা লৈবাক ১৫০ হেনবদা মথৌ তাবা হিদাক লাংথকশিং ফংহল্লি। ভারতনা মালেমগী থাক্তা তিকা ফংহন্নবগীদমক খোঙফম চেৎনা লেপ্লি। মালেমগী মফম খুদিংদা পায়খৎখিবা মান্নবা থৌরাংশিংগী মরক্তা খ্বাইদগী চাউবা মিসন ওইখিবা ‘বন্দে ভারত মিসন’ অসিবু মীপুম খুদিংনা থাগৎনরিবসি লৈবাক অসিগী চাউথোকচনিংঙাইনি। মালেমগী মফম কয়াদগী ভারত মচা লাখ ৫০রোম পুরকখিবগী মথক্তা ভারতনা মপান লৈবাক্কী মীওই লাখ ১ হেনববু মখোয় মখোয়গী মরৈবাক্তা শাফনা হলহনখিনবা লম্বী য়াৎখি।
কোবিদ-১৯না খোঙলৌ পল্লৌবা কয়া পীখ্রবসু, ভারতনা অতৈ লৈবাকশিংগা শম্নবগী মরী হেন্না চেৎশিনহনখি। মতম অসিদা ভারতনা মশিং য়াম্লবা এপেক্স সম্মিতশিং, মল্তিলেতরেল থৌরম অমসুং ওফিসিএল মীফমশিং পাঙথোক্তুনা মালেমগী ওইনা তেংবাংনবগী ফীভম হেন্না মরা চেৎশিনহনখি। নিপান শুবা ওইনা চহী অসিদা পুৱারী ওইবা মওংদা মালেমগী ঙাক্লৌ ফংদুনা সুক্যুরিতী কাউন্সিলগী নন-পর্মেনেন্ত মেম্বর ওইনা শরুক য়ারি। ভারতনা ২০২১গী ওইনা বি.আর.আই.সি.এস.কী প্রেসিদেন্সীগী থৌদাংসু লৌরি।
ইকায়খুম্নরবা মেম্বরশিং,
ঙসিদি ভারতনা মালেম অসিদা ইচঙ থৌনা মাঙদা চৎশিনবগা লোয়ননা অনৌবা শক্লোন অসিগা চুনবা থৌদাংশিংসু পায়খৎনবা শেম শাবা মথৌ তাই। ২০২১ অসি মরম অসিগী য়েংলগা ঐখোয়গীদমক্তা মরুওইবা কুম অমনি। নুমিৎ খরনিগী মমাঙদা, লৈবাক অসিনা জনুৱারী ২৩দা নেতাজি সুভাস চন্দ্র বোসকী মপোক নুমিৎপু পরাক্রম দিবস হায়না পাঙথোকখি। চহী অসিদা ঐখোয়না নেতাজীগী ১২৫ শুবা মপোক কুমওন থৌরম পাঙথোক্লি। কুমওন থৌরম অসি মতিক চাবা মওংদা পাঙথোক্নবা ঐগী লৈঙাক্না অৱাংবা থাক্কী কম্মিতী অমা শেম্লে। ঐখোয়না ঐখোয়গী ইকাখুম্নরবা ‘গুরু তেগ বহাদুরগী ৪০০শুবা প্রকাস পর্ব’সু মশক থোক্না পাঙথোক্কনি। নীংশিং থৌরম অসিগা লোয়ননা ভারতকী নীং তম্বগী ৭৫শুবা চহীগী থৌরম ওইগদৌরিবা ‘অমরুত মহোতসব’সু চহী অসিদগী হৌগনি।
ইকায়খুম্নরবা মেম্বরশিং,
ঐখোয়না মমাঙ চহীদা অমত্তা ওইনা উৎখিবা থৌনাদুমক উত্তুনা অনৌবা পান্দমশিং ফংনবা তানবা তঙাই ফদে। হৌখিবা চহী খরসিদা ভারতনা ফংবদা ৱাগনি খল্লম্বা থবক থৌওং কয়া ভারতনা মায় পাক্না পাঙথোকখি।
- আর্তিকল ৩৭০গী প্রোভিজনশিং মুত্থৎখ্রবা মতুংদা জম্মু অমসুং কাস্মিরগী মীয়ামবু অনৌবা এন্তাইতলমেন্তশিংনা মপাঙ্গল কনখৎহল্লে।
- সিতিজনসিপ এমেন্দমেন্ত এক্ত পার্লিয়ামেন্তনা পাস তৌখ্রে।
- চীফ ওফ দিফেন্স স্তাফকী ফম শেমখিবসিদগী লৈবাকসিনা কান্নবা ফংবা হৌরে।
- খুৎলায় পায়বা লান্মীদা নুপী শরুক য়াবা হেনগৎলক্লি।
- সুপ্রিম কোর্তকী ৱায়েল মতুংদা অচৌবা রাম মন্দির অমা শাবা হৌরে।
- ইজ ওফ দুইং বিজিনেস রেঙ্কিংদা ভারতনা রেকোর্দ ওইনা ফীভম ফগৎলকপা ঙম্লে। হৌজিক্তি কম্প্লাইএন্স বর্দন হন্থহনবদা অখন্নবা মীৎয়েঙ চঙলি।
- ৱর্ল্দ তুরিজম ইন্দেক্স রেঙ্কিংদা ভারতকী মফম ৬৫দগী ৩৪দা হাইগৎলক্লে।
- মমাঙদা মশিং থানরুদবা দাইরেক্ত বিনিফিত ত্রান্সফরনা, হৌখিবা চহী ৬সিদা লুপা করোর ১৩,০০,০০০ হেনবগী শেন্ফম বিনিফিসিয়রীশিংদা য়ৌহনবদা মতেং ওইরি।
- মতম অমদা ঐখোয়দা মোবাইল শাবা ফেক্তরী অনিখক লৈরম্মি অদুগা ঙসিদি, ভারত অসি মোবাইল শাব খ্বাইদগী চাউবা অনিসুবা লৈবাক ওইরে।
- ঙসি, মিদল ক্লাস সিতিজন লাখ কয়ানা রিএল এস্তেত রিগুলেসন এন্দ দেভেলপমেন্ত এক্তকী মখাদা লিংখৎখিবা রিএল এস্তেত রিগুলেতরী ওথোরিতীদগী কান্নবা ফংলি।
- লাইচৎ মনুংসিদা অনৌবা লোশিং পাস তৌবদা নত্তনা অরিবা অমদি চৎনবা য়াদ্রবা লো ১৫০০ হেনবসু হন্দোকখ্রে।
অসিগুম্বা ফিরেপ কয়া হীরম অয়াম্বদা লৌখিবা লৈখ্রে। পান্দম ৱাংনা থম্লবা অমদি পুক্নিং শেংলবদি অওনবা পুরকবা ঙমগনি হায়বা ঐগী লৈঙাক্না উৎলে। হায়রিবা চহীশিং অসিদা ঐগী লৈঙাক্না পুন্সিদা অহোংবা পুরকখিবা মীশিং মশিং থিঙমদ্রে:
- লায়রবা মীওই খুদিংগী য়ুমদা মৈ ফংহন্নবা মৈ কন্নেক্সন করোর ২.৫ হেন্না লেম্না পীখ্রে।
- লায়রবা অমদি ময়ায় ওইবা থাক্কী ইমুংশিংগী মৈগী বিল হন্থহন্নবা এল.ই.দি. বল্ব করোর ৩৬ অহোঙবা মমলদা য়েন্থোকখ্রে।
লায়রবা মীওই করোর ২১ হেনববু এক্সিদেন্ত থোক্লকপা মতমদা লায়রবা ইমুংশিংনা মফম অমদগী মফম অমদা কোইচেন চেন্নদনবা থা অমদা লুপা ১খক প্রেমিয়ম থিহন্দুনা ‘প্রধান মন্ত্রী সুরক্সা বিমা য়োজনা’গা শম্নহনখ্রে।
- ইমুং অমগী শেল তাল্লিবা মীওইনা লৈখিদবা মতমদা ইমুং অদুদা ঙাক্লৌ খরা ফংজনবা নোংমদা পৈশা ৯০গী প্রেমিয়ম থিরগা মীওই করোর ৯.৫রোম ‘প্রধান মন্ত্রী জীবন জ্যোতি বিমা য়োজনা’গা শম্নহনখ্রে।
- লায়রবা ইমুংশিংগী অঙাঙশিং শাথিবা লায়নানা শোকহন্দনবা লৈঙাক অসিনা তিকা থাবগী থবক থৌরম অহেনবা লায়নাশিং কোনশিন্দুনা পাকথোক চাউথোকহনবদা নত্তনা মমাঙদা য়ৌশিনবা ঙমদবা মনুং হঞ্জিনবা ত্রাইবেল মফমশিংদসু তিকা থাবগী কেম্পেন য়ৌশিনখি।
- ‘মিসন ইন্দ্রধনুস’কী মখাদা অঙাঙ করোর ৩.৫ হেনবদা তিকা থাখি।
লায়রবশিংদা চেং-হৱাই ফংহন্নবগীদমক রেসন কার্দ দিজিতাইজেসন তৌবগী থবক চাদা ১০০ লোইশিল্লে অমদি রেসন কার্দ চাদা ৯০ আধারগা শম্নহল্লে।
- লায়রবা ইমুংগী ইচল-ইচেশিং অমদি ইচানুপীশিংগী হকশেলগী ফীভমদা চাকখুমগী মৈখুনা শোকহন্দনবা ‘উজ্বলা য়োজনা’গী মখাদা গ্যাস কনেক্সন করোর ৮ লেম্না ফংহল্লে।
- লায়রবা ইমুংশিংগী ইচল-ইচেশিং অমদি ইচানুপীশিংগী ইকায়খুম্নবা ঙাক্নবা অমদি মখোয়দা খুদোংচাদবা থোকহন্দনবা ‘স্বচ ভারত মিসন’গী মখাদা খোঙহাম খুৎহাম্ফম করোর ১০ হেন্না শাখ্রে।
- য়ুমগী থবক ইনখাঙ তৌরিবা, দ্রাইভর, মুজি, ফি স্ত্রি তক্লিবা, লৌবুক্তা মতেং পাংলিবা ইচিল ইনাউশিং য়াওনা লায়রবা মীয়ামদা পেন্সন ফংহন্নবা ‘প্রধান মন্ত্রী শ্রম য়োগি মান-ধন য়োজনা’ হৌদোকখি।
- লায়রবশিং বেঙ্কিং সিস্তেমগী কান্নবা ফংহন্নবা জন ধন একাউন্ত করোর ৪১ হেন্না হাংখ্রে। হায়রিবা একাউন্তশিং অসিগী তঙ্খায় হেনবদি ঐখোয়গী লায়রবা ইমুংশিংগী ইচল-ইচে অমদি ইচানুপীশিংগীনি।
ইকায়খুম্নরবা মেম্বরশিং,
হায়রিবশিং অসি চুম্নগী মশিং নত্তে। মশিং খুদিংমক্তা পুন্সিগী ৱারী অমমম য়াওরি। পার্লিয়ামেন্তকী মেম্বর কয়া অমদি মখোয়গী পুন্সিগী চাউরবা শরুক অমা অসিগুম্বা ফীভমদা লেল্লকখিবনি। ঐখোয়গী লায়রবা ইচিন ইনাউশিংগী অসিগুম্বা অৱা অনা অমদি লৈতাদবা ফীভম কোকহন্নবা অমদি মখোয়দা তঙাই ফদবা ফীভম ফংহন্নবা, মখোয়বু মপাঙ্গল কলহন্নবা, মখোয়গী ইকায়খুম্নবা হেনগৎহন্নবা ঐখোয়না তৌবা য়াবা তৌবসিনা পার্লিয়ামেন্ত অসিদা ঐখোয়না ফম্লিবসিগী ৱাহন্থোক হেনগৎহনগনি।
মাকৈ অসিদা ঐগী লৈঙাক্না হৌখিবা চহী ৬সিদা খোঙফম চেৎনা অমদি পুকচেল শেংনা ফিরেপ লৌদুনা অমদি থবক পায়খত্তুনা চঙশিল্লি হায়বা ৱাফমসিদা ঐনা চাউথোকচৈ।
ইকায়খুম্নরবা মেম্বরশিং,
থৌনা ফবা, অৱাংবা থাক্কী ৱাখল্লোন অমসুং হৈশিংবগী তুংনফম ওইরিবা ৱেস্ত বেঙ্গলকী মশক নাইরবা মপারি গুরুদেব রবিন্দ্রনাথ তেগোর ময়ামবা, জ্যোতিরিন্দ্রনাথ তেগোরনা মতিং লৈরবা লৈবাক নীংবা ঈশৈ অমা ইরম্মি। মহাক্না হায়রম্মি:
“চোল রে চোল সোবে ভারতো সন্তান,
মাত্রিভুমি কোরে অওহন,
বিরোদর্পে, পাউরুস গর্বে,
সাধ রে সাধ সোবে, দেসেরো কল্য়ান”।
মসিনা হায়রিবদি,
ইমা লৈবাক্না ভারতকী মচা পুম্নমক্তা কৌরক্লি, মাঙদা পুন্না চঙশিনমিন্ননবা; লৈবাক্কী য়াইফনবগীদমক ইকায়-খুম্নবা অমদি থৌনা অমসুং মঙলানগী থাজবগা লোয়ননা মাঙদা চঙশিন্নবা।
লাক্লো,
লৈবাক মীয়াম পুম্বা মাঙদা পুন্না চঙশিনমিন্নরসি।
ঐখোয়না ইথৌদাং পাঙথোক্তুনা লৈবাক শেমবদা থৌদাং য়ারসি,
লাক্লো ঐখোয় ‘ভারতপু মরোমদোম লেপচবা’ ঙমহল্লসি।
ময়াম পুম্নমক্কী মফমদা ঐনা খ্বাইদগী ফবা য়াইফ-পাউজেল পীজরি।
জয় হিন্দ।
**************
(Release ID: 1693466)
Visitor Counter : 192