প্রধান মন্ত্রী, শ্রী নরেন্দ্র মোদীনা ঙসি ভিদিও কনফরেন্সকী থোংদা ৱর্ল্দ ইকনোমিক ফোরমগী দাবোস দাইলোগতা ৱা ঙাংখ্রে। মহাক্না ‘মরিশুবা ইন্দস্ত্রিএল রিভোলুসন – মীওইবা খুন্নাইগী য়াইফনবা তেক্নোলোজী শিজিন্নবা’ অসিগী মতাংদা ৱা ঙাংখ্রে। প্রধান মন্ত্রীনা থৌরম অসিদা সি.ই.ও.শিংগা ৱারী শান্নখ্রে।

থৌরম অসিদা ৱা ঙাংলদুনা প্রধান মন্ত্রীনা হায় অকিবনা থল্লবা চৈরক অসিদা মহাক্না ভারত মচা বিলিয়ন ১.৩গী থাজবা, অফবা ৱাখল্লোন অমসুং আশাগী পাউজেল পুদুনা লাক্লি। মীতিন অদুদা প্রধান মন্ত্রীনা হায় ভারতনা লাইচৎ অসি লাকশিনবা ঙম্বগী মপাঙ্গলদা অহানবদা থাজবা থমখিদবা তারবসু হৌজিক্তি ভারতনা প্রো-এক্তিব ওইনা অমসুং প্রো-পার্তিসিপেসন এপ্রোচকা লোইননা মাংলোমদা চংশিনদুনা কোবিদকী অখন্নবা হেল্থ ইনফ্রাস্ত্রকচর মপাঙ্গল কনখৎনবা হোৎনখি, লাইচৎ অসি লাকশিন্নবা হ্যুমেন রিসোর্স ত্রেন তৌখি অমসুং কেসশিং তেস্ত তৌবা অমদি ত্রেক তৌবদা তেক্নোলোজী চাউনা শিজিন্নখি। ভারত্তা কোরোনাগী মায়োক্তা লান্থেংনবা অসি মীয়ামগী ইহৌ ওইহনখি অমসুং ভারতনা মাগী মশিং য়াম্লবা প্রজাশিংগী থৱায় কনবদা মাই পাকপা ঙমখি। ভারতনা মাই পাকপা অসি মালেমগী ওইনসু নকোইননা উৎখি মরমদি মালেমগী মীশিং চাদা ১৮দি মফম অসিদা লৈরিবা অমসিং মপুং ফানা লাকশিনবা অসিনা মীওইবা খুন্নাইবু অচৌবা খুদোংথিবা অমদগী কলহৌবা ঙমখি। শ্রী মোদীনা মালেমগী খ্বাইদগী চাউবা বেক্সিনেসন দ্রাইভ অমসুং ভারতনা মালেমগী থাক্তা লাইচৎ মনুংদা হোৎনখিবা অদুগী মতাংদসু ৱা ঙাংখি। মহাক্না এয়র স্পেস থিংখিবা মতমদা প্রজাশিং হোনদোকা অমসুং লৈবাক ১৫০ হেনবদা হিদাকশিং সপ্লাই তৌবগী মতাংদা ৱা ঙাংখি। ঙসি ভারতনা ওনলাইন ত্রেনিং তৌদুনা, ত্রেদিস্নেল নোলেৎজকী লৌশিং, বেক্সিনশিং অমসুং বেক্সিন ইনফ্রাস্ত্রকচরগা লোইননা লৈবাকশিং মতেং পাংলি। মহাক্না হায় ভারত্তা হৌজিক শারিবা বেক্সিন অনি অসিগী মথক্তা অতোপ্পা বেক্সিনশিং পাইপলাইন্দা লৈরি মসিনা ভারতনা মালেমদা চাউনা অমসুং খোঙজেল য়াংনা মতেং পাংবা ঙমহল্লগনি।

প্রধান মন্ত্রীনা ফোরম অসিদা শেন্মীৎলোনগী লমদা লৌখৎখিবা খোঙথাংশিংগী মতাংদসু পাউদমখি। মহাক্না হায় ভারতনা লুপা কয়াগী ওইগদবা ইনফ্রাস্ত্রকচর প্রোজেক্তশিং হৌদুনা অমসুং থবক পীনবা অখন্নবা স্কীমশিং পাইখৎতুনা শেন্মীৎলোনগী থবক-থৌরমশিং মখা চত্থহনখি। মমাংদা পুন্সি কনবদা মীৎয়েং থম্লমখি অদুবু হৌজিক্তি মীপুম খুদিংমক্না লৈবাক অসি চাউখৎহনবদা মীৎয়েং থম্লি। ভারতকী মরোমদোম লেপচবগী আশা অসিনা গ্লোবেলিজম মপাঙ্গল কনখৎহল্লগনি অমসুং ইন্দস্ত্রী ৪.০দা মতেং পাংলগনি, হায়না শ্রী মোদীনা ফোঙদোকখ্রে।

প্রধান মন্ত্রীনা হায় ইন্দস্ত্রী ৪.০গী ফেক্তর মরিমক্তা – কন্নেক্তিবিতী, ওতোমেসন, আর্তিফিসিএল ইন্তেলিজেন্স নত্ত্রগা মেছিন লর্নিং অমসুং রিএল-তাইম দেতাদা থবক পাইখৎলি। ভারত অসি দেতাগী চার্জশিং হোংবা লৈবাকশিংগী মরক্তা য়াওরি অমসুং মোবাইল কন্নেক্তিবিতী অমদি স্মার্ত ফোনশিংনা কাচিন-কোয়া থুংনা য়ৌহনখ্রে। ভারতকী ওতোমেসন দিজাইন এক্সপর্ত পুল অসি পাক-চাউই অমসুং লৈবাক অসিনা এ.আই. অমসুং মেছিন লর্নিংগী লমদা চাউখৎপা ঙম্লে। দিজিতেল ইনফ্রাস্ত্রকচর হেনগৎলকপা অসিনা দিজিতেল সোলুসনশিং অসি ভারতকী নুংতিগী পুন্সিগী শরুক ওইহনখি। প্রধান মন্ত্রীনা হায় ঙসি ভারত মচা বিলিয়ন ১.৩গী য়ুনিভর্সেল আই.দি.-আধার লৈরে মসি মখোয়গী একাউন্ত অমসধং ফোনগা কন্নেক তৌখি। দিসেম্বর খক্তদা য়ু.পি.আই.গী খুত্থাংদা লুপা ত্রিলিয়ন ৪গী ত্রাঞ্জেক্সন তৌখি। লাইচৎ মনুংদা ভারতনা দাইরেক্ত বেনিফিৎ ত্রান্সফরগী খুত্থাংদা ভারত মচা মিলিয়ন ৭৬০গী একাউন্তশিংদা লুপা ত্রিলিয়ন ১.৮কী শেলগী তেংবাং ত্রান্সফর তৌবা ঙমখি। দিজিতেল ইনফ্রাস্ত্রকচরনা পব্লিক সর্ভিস দেলিবরী ফগৎহনখি অমসুং মনুং মপান ফাওনা উবা ঙমহনখি। ভারতনা মাগী প্রজাশিংদা তোপ-তোপ্পা হেল্থ আই.দি. পীদুনা হেল্থ কিয়র লাইনা ফংহন্নবা কেম্পেন অমা হৌখ্রে হায়না প্রধান মন্ত্রীনা পাউদমখি।

প্রধান মন্ত্রী ফোরম অসিদা ভারতকী আত্মানির্ভর ভারতকী ইহৌ অসিনা গ্লোবেল গুদ অমসুং গ্লোবেল সপ্লাই চেন পীবা ঙমগনি মরমদি ভারত্তা গ্লোবেল সপ্লাই চেন মপাঙ্গল কনখৎহন্নবা কেপাসিতী, কেপাবিলিতী অমসুং রিলাইএবিলিতী লৈ হায়না থাজবা পীখি। মাগী কঞ্জুমর বেজ চাউবা অসি মখা তানা হেনগৎলক্কনি অমসুং মালেমগী শেন্মীৎলোনদা কান্নবা পীগনি।

প্রধান মন্ত্রীনা হায় ভারতনা ওইথোকপা য়াবশিংগা লোইননা থাজবনা থল্লি অমসুং রিফোর্মশিং পুরকপদা অমসুং ইনসেন্তিবতা য়ুম্ফম ওইবা স্তিমুলসতা মখা তানা মীৎয়েং চংনবা দ্রাইভ চত্থরি। কোরোনাগী মতমশিংদা স্ত্রকচরেল রিফোর্মশিং অসি প্রদক্সন লিঙ্ক ইনসেন্তিবশিংনা শৌগৎখি। ভারতনা ইজ ওফ দুইং বিজিনেস ফংহনখি মরমদি তেক্স রেজিমদগী এফ.দি.আই. নোর্মশিংগী ওইথোকপা য়াবা অমসুং ফ্রেন্দলী এনভাইরনমেন্ত অমা লৈবা উখি। মসি পুম্নমক্কী মথক্তা ভারতনা ক্লাইমেৎ চেঞ্জকী পান্দমশিংগা লোইননা চান্ননা খুমাং চাউশিল্লি হায়না শ্রী মোদীনা ফোঙদোকখ্রে।

প্রধান মন্ত্রীনা তেক্নোলোজী অসি হিংবদা লাইথোক্নবা খুৎলাই অমা ওইখি মসি মাংনবা নত্তে হায়না চেকশিল ৱা থমখি, ঐখোয়না কাউরোইদবদি কোরোনাগী অৱাবনা ঐখোয়দা মীওইবা জাতিগী ভেল্যু অদু খহনখি হায়না ফোঙদোক্লদুনা প্রধান মন্ত্রীগী ৱারোল লোইশিনখি।

ৱাহং অমসদি পাউখুমগী সেসন মনুংদা প্রধান মন্ত্রীনা সাইমেন্সকী প্রসিদেন্ত অমসুং সি.ই.ও. জো কেসরদা আত্মানির্ভর ভারত কেম্পেনগী মরমদা খঙহনখি অমসুং মহাক্না হায় ভারত অসি মেন্যুফেকচরিং অমসুং এক্সপোর্ত হন অমা ওইহনবা হায়বা অসি মঙলান অসিগী অচৌবা শরুক অমনি। মহাক্না গ্লোবেল প্লেয়রশিংদা প্রদক্সন লিঙ্ক ইনসেন্তিব (পি.এল.আই.) স্কীমগী দোলর বিলিয়ন ২৬কী কান্নবা অসি লৌহৌনবসু ফোঙদোকখি। এ.বি.বি.গী সি.ই.ও. বিয়ান রোজনগ্রেনগী ৱাহংগী পাউখুম ওইনা শ্রী মোদীনা লৈবাক অসিদা হৌজিক পাইখৎলিবা ইনফ্রাস্ত্রকচর প্রোজেক্তশিংগী অমসুং নেস্নেল ইনফ্রাস্ত্রকচর পাইপলাইনগী মখাদা লাক্কদৌরিবা চহি মঙা অসিদা লৈবাক অসিদা ইমপ্লিমেন্ত তৌগদবা য়ু.এস. দোলর ত্রিলিয়ন ১.৫কী প্রোজেক্তশিংগী মতাংদা পাউদমখি। মাস্তরকার্দকী সি.ই.ও. এজে এস বঙ্গাদা শ্রী মোদীনা মতম খরা অসিদা লৈবাক অসিদা পাইখৎখিবা অচৌবা ফাইনান্সিএল ইনক্লুজন অমসুং এম.এস.এম.ই সেক্তর মপাঙ্গল কনখৎনবা লৌখৎখিবা খোঙথাংশিংগী মরমদা খঙহনখি। আই.বি.এম.গী আর্বিন্দ কৃষ্ণদা পাউখুম পীরদুনা প্রধান মন্ত্রীনা দিজিতেল ইন্দিয়াগী লৈরিবা মওং অসি পাউদমখি। প্রধান মন্ত্রীনা লৈবাক অসিগী দিজিতেল প্রোফাইল অসি মপুং ফানা অওনবা পুরকখ্রে হায়না ফোঙদোকখি। সরকারগী মঙলানদি লৈবাক অসিদা য়ুজরশিংদা প্রাইবেসী লৈহনদুনা একসেস, ইনক্লুজন অমসিং এম্পাৱরমেন্তগী খুত্থাংদা অওনবা পুরকপনি। এন.ই.সি. কোওপরেসনগী বোর্দ কী চিয়রমেন নোবুহিরো এন্দোদা পাউখুম পীরদুনা প্রধান মন্ত্রীনা অর্বনাইজেসননা পীবা খুদোংচাবশিং ফংহন্নবা ভারতকী এপ্রোচকী মতাংদা খঙহনখি। ভারতনা ইজ ওফ লিবিং, ইজ ওফ দুইং বিজিনেস অমসুং ক্লাইমেৎ সেন্সিতিব দেবেলপমেন্তদা মীৎয়েং থম্বগা লোইননা সস্তেনেবল অর্বনাইজেসনদা ভারতনা মীৎয়েং থম্লি। মসিগী হোৎনবা অসি ২০১৪দগী ২০২০গী মনুংদা অর্বান ইন্দিয়াদা বিলিয়ন দোলর ১৫০গী ইনবেস্তমেন্ত তৌহনখি।

******