খ্বাইদগী অহানবা ওইনা নখোয় পুম্নমকপু ‘প্রধান মন্ত্রী রাস্ত্রিয় বাল পুরস্কার’গী মনা ফংবগীদমক্তা থাগৎপা ফোংদোক্লি। নখোয়বু মনা অসিগীদমক্তা খল্লে তাবদা, নখোয় খুদিংমক য়াম্না লাংতক্নরমগনি। নখোয়গী ইমা-ইম্পা, মরুপশিং, ওজাশিংসু নখোয়গুম্না লাংতক্নরমগনি। ঐহাকসু নখোয়না লাংতক্নবগুম্না নখোয়গা উন্ননিংবগী য়াম্না লাংতক্নৈ অদুবু কোরোনানা মরম ওইদুনা  ঐখোয়-নখোয় অসে ভর্চুএলগী খুত্থাংদা ওইনা উন্নরে।

নুংশীরবা অঙাংশিং,

নখোয়না মনা অসি ফংনবগীদমক্তা পাংথোকখিবা থৌওংশিং অসি কোরোনাগী মতমদা পাংথোকখিবা ওইবনা হান্নদগী হেন্না অখন্নবা ওই। অসুক য়াম্না য়ামদবা চহি মতাং অসিদা নখোয়না অসিগুম্বা থৌওং পাংথোকপা অসি য়াম্না ঙক্নিংঙাইনি। মীওই খরা অমনা শান-খোৎনবদা অমসুং খরআ অমনা হৌজিক্তগী হৌনা রিসর্চ অমসুং অনৌবা থৌওং পাংথোকপদা মশাগী অমসুং লৈবাক্কী মিংচৎপুরক্লি। হয়েংদি, নখোয়গী মরক্তগী লৈবাক অসিগী শান্নরোই, সাইন্তিস্ত, নেতা, অচৌ-অচৌবা সি.ই.ও. কয়া ওইদুনা লৈবাকপু চাউথোকচহনবগী চৎনবী অসি উবা ফংগনি। হৌজিক ঙৈহাক্কী মমাংদা থাখিবা ভিদিও ফিল্ম অদুদা, নখোয়না পাংথোকখিবা থবকশিং অদুগী মতাংদা কুপ্না পাউদমখিবনি। নখোয়গী মরক্তগী অঙাং খরগী মরমদদি ঐহাক্না মরক-মরক্তা তাদুনা অমসুং উদুনা লাক্লি। হৌজিক মুম্বাইগী ইচানুপী কাময়া কার্তিকেয়নগী মতাংদা য়েংশি। ঐহাক্না মদুগী মতাংদা ঐহাক্কী মন কী বাত্তা পনখিবা অদু নীংশিংলমগনি। কাময়ানা চীঙ কাবগী হীরমদা লৈবাক্কী মিংচৎ পুরকপগীদমক্তা ঙসিগী মনা অসি ফংলিবনি। মঙোন্দগী হেক্তা হৌরসি। মঙোন্দা ঐহাক্না করিগুম্বা খরসু হংনীংই।

ৱাহং- কাময়া, হৌজিক্কান অসিদা নহাক্না তুমিন্না ফমদুনা লৈরমগনি থাজদে, করিগুম্বা অমা নত্ত্রগা অমা শোইদনা তৌরমগনি হায়না খল্লি। অদোম্না করম্বা অনৌবা চিংদোলদা নহাক্কী মাই-পাকপা অসি ফংখ্রিবনো? হৌজিক্কান্দা করি তৌরিবগে? নত্ত্রগা কোরোনানা মরম ওইদুনা খুদোংচাবা থেংনবরা, করি তৌরগে?

পাউখুম – সর, কোরোনানা লৈবাক পুম্বা অসিদা খুদোংচাদবা কয়া পীরি। অদুবু, অদোম্না হায়বগুম্না, ঐখোয় তুমিন্না ফমদুনা লৈবদি য়াদে। কোরোনাগী মতুংদা ঐখোয়না পাঙ্গল লৈনা অমুক থোক্লক্কদবনি। ঐহাক্না কোরোনাগী মনুংদা ঐহাক্কী ত্রেনিং অমসুং রুতিনশিংবু লেপ্তনা পাংথোক্লি অমসুং ঐহাক হৌজিকসু জম্মু কশ্মিরগী মনুং চনবা গুল্মার্গতা লৈরি। অমসুং ঐহাক্না মথংদা কাগদবা চীঙগী শেম-শারি। মদুদি অৱাং-অমেরিকাগী মাউন্ত দেনালীনি। অদুগা হন্দক্কী চহিগী জুন্দা চীঙদোল অসিবু লোম্নবা শেম শারি।

ৱাহং- অদুদি নহাকসি হৌজিক বারামুলাদা লৈ হায়বা নত্ত্রো?

পাউখুম- হোই, সর। লাইবক ফবনা ওইবদগী, ওফিসনা য়াম্না তেংবাংবীখি অমসুং মখোয়না হৌখিবা নুমিৎ হুম্নিদগী ২৪*৭তা থবক তৌবীরি। অদুগা ঐখোয়না বারামুলাগী মফম অসিদা লাকপদা অদোমগা ৱারী শাবসু ফংজরে।

ৱাহং – হৌজিকপু নহাক্কা কনাগা লোয়নবগে? শকখঙ-মাইখঙনসি।

পাউখুম- সর, মহাক্না ঐহাক্কী ইমানি অমসুং মহাক্না ঐহাক্কী ইপানি।

মপা- খুরুমজরী।

মোদীজী- অদোম্বু ঐহাক্না থাগৎচরি। ইচানুপীগী পুক্নিংসু থৌগৎপীরে অমসুং মতেংসু পাংবীরি। মতাং অসিদা মহাক্কী মমা-মপাদা ঐহাক্না ইকায় খুম্নবা উৎচরি।

ৱাহং- নহাক্কী খ্বাইদগী চাউবা মনাদি নহাক্কী হোৎনজমন অমসুং থ ৱাই য়াওবগী মাই-পাকপা অসিনি। অদোমদি চীঙ কায়, ত্রেক্কিং তৌই অমসুং মালেম পুম্বগী মফম কোয়রী। অদুগা কোরোনানা মরম অদুনা পুম্নক্না চপ লাউনা লেপখিবা অসিদা মতম করম্না লেনবগে? করি তৌবগে?

পাউখুম-  –সর, ঐহাক্না কোরোনাবু খুদোংচাবা অমদা ওন্থোকখি।

ৱাহং –হায়বদি, অদোম্নসু খুদোংচাদববু খুদোংচাবদা ওন্থোক্লে হায়বা?

পাউখুম- হোই, সর।

ৱাহং –মখা তাবীয়ু।

পাউখুম-  সর, চীঙদি কাবা ঙমদ্রে, অদুবু ঐহাক্না অতোপ্পা মীওইনসু ঐহাক্কী থাক অসিদা য়ৌবা ঙম্নবা ইথিল পীবদি ঙম্মি। অদুনা, ঐহাক্না স্কুল অমসুং ইন্সতিত্যুসন কয়াদা ৱেবিনার পীদুনা ঐহাক্কী মিসনগী মতাংদা পাউজেল কয়া অমা তম্মি অমসুং মসিগা লোয়নবা পাউজেল কয়াসু মখোয়দা পীজনীঙই।

ৱাহং –অদুবু হকচেং ফনা লৈনবসু খরদি হোৎনরমগনি?

পাউখুম- হোই, সর। অয়াম্বা মতমদা চেনবা অমসুং সাইকল তৌরম্মি অদুবু অহানবা লোকদাউন্দা পুম্নমক অসি থিংজিনখি, অমসুং ঐখোয়না মুম্বাইদা মথোল ২১গী বিলদিংদা লৈ, অদুনা মদুদা কাথোক-কাশিন তোউদুনা হকচাং ফনবা হোৎনখি। অদুগা লোকদাউন খরা কোমথোরকপদগী, মুম্বাইদগী শহয়াদ্রিদা থোক্লক্লে অমসুং মদুদা ৱী কেন্দদা ঐহাক্না অতেনবা ত্রেক খরা তৌই।

ৱাহং –অদুগা মুম্বাইদদি অইংবা অসি করিনো হায়বা কয়া খঙলম্লোই। ঙসিদি বারামুলা অসিদা য়াম্না ইংঙমগনি?

পাউখুম- হোই, সর।

পি.এম. সরগী ৱারোলঃ কোরোনানা মীয়াম্বু য়াম্না ৱাহল্লে। অদুবু লৈবাক্কী অঙাংশিং, চারোন-শুরোনশিংনা মসিগা থৌনা ফনা মায়োক্নবগী মওং ঐহাক্না উবা ফংই। সাপোন শিজিন্নদুনা সেকেন্দ ২০ চঙনা খুৎ হামগদবনি হায়বসি অঙাংশিংনা খ্বাইদগী হেন্না ইল্লি। অঙাংশিংনা কোরোনাদগী ঙাকথোক্তুনা লৈনবা পাম্বৈ তাকপগী ভিদিও কয়া অমা ঐহাক্না সোসিএল মীদিয়াদা উবা ফংলি। অদুগা মসিগী এৱার্দ অসি অদুগুম্বা অঙাংশিংনা ফংলি। অঙাংশিংদগী তমজবা ফংবা খুন্নাই অমসুং ইমুং-মনুং, অঙাংশিংবু চাউখৎনবা হোৎনবগী থৌওং লৈবা, মদুদা নত্তনা অহলশিংদসু নীংহন্নবা লৈতনা অনৌবা তম্নিংবগী ইথিল লৈবা, মসিনা মখোয়গী পুক্নিং ফাদুনা থম্মি। অদুগা অহলশিংনসু মখোয়গী অঙাংশিংনা হায়বনিনা মখোয়সু তৌগনি হায়বগী ৱাখল লৈ। ঐখোয়না অসিগুম্বশিং অসি কোরোনাগী মতমদা উবা ফংখি। অদুগা স্বচ্ছতা ভারত মিসনগী মনুংদসু উবা ফংখি। অঙাংশিংনা করিগুম্বা অমদা থৱাই য়াওরক্লবদি, মদুনা শোইদনা মাই পাক্নৈ। কাময়া, নহাক, নহাক্কী ইমা-ইপা, ত্রেনরশিংবু ঐহাক্না থাগৎলি। কশ্মিরগী নুংঙাইবসু লৌবীয়ু অমসুং অনৌবা থৌনা অমগা লোয়ননা মাং থাবীয়ু। ইশাগী হকশেলগী মতাংদা চেকশিনবীয়ু, অনৌবা-অনৌবা চিংদোল কয়া কাবীয়ু। নুংশীরবা অঙাংশিং, ঐখোয়গী মরক্তা ঝারখন্দগী ইচানুপী অমা য়াওরি, সবিতা কুমারী। মহাক্না শান-খোৎনবদা মশক থোকপা থবক উৎপগীদমক্তা ঙসিগী মনা অসি ফংলিবনি।

ৱাহং- সবিতাজী, অদোম্না তেন কাপ্পগুম্বা খুৎ চুম্বগী মশানা অসিদা চঙগে হায়না করম্না খনখিবগে? মসিগী ৱাখল্লোন অসি কদায়দগী লাকই অমসুং মসিদা নহাক্কী ইমুংনা শৌগৎপীরমগনি। অদুনা ঐহাক্না নহাক্কী নফমদগী তানীঙই মরমদি ঐখোয়গী লৈবাক্কী অঙাং খুদিংনা ঝারখন্দগী মনুং চঙলবা জঙ্গল মনুংদা ঐখোয়গী ইচানুপীশিংনা করি তৌরিবগে হায়বা খঙনীংই অমসুং মসিনা মখোয়দা ইথিলসু পীগনি। অমুক্তা হায়বীয়ু।

পাউখুম- সর, ঐহাক কস্তুর্বা গান্ধী বালিকা বিদ্যালয়দা তমজৈ, মফম অদুদা আর্চরী তম্বগী ইথিল লাকখি।

ৱাহং- অদোম্না লৈবাক্কীদমক্তা মেদল পুরকপসু হৌখ্রে। লৈবাক পুম্বগী য়াইফ-পাউজেলসু নহাক্কীদমক্তা পীরি। তুংগী পুন্সিগী ওইনা নহাক্কী ৱাখল্লোন্দা করি পান্দম লৈবগে, কদায় ফাওবা শান্নখিগদোইনো?

পাউখুম- সর, ঐহাক্না মালেমগী মেদল ফংজনীঙই অমসুং মদুদা লৈবাক্কী এন্থেম খোংলকপা অদুদা ঐহাক্না য়াম্না হরাওজগনি।

ৱাহং –য়াম্না ফজৈ। নহাক্কী মনাক্তা কনা-কনা লৈবগে?

পাউখুম-  সর, ইমা অমসুং ইপা লৈরি।

ৱাহং– ইপাসিবু শান-খোৎনবা তৌবরো? করি মশানদা শান্নবা য়াওখিবা লৈবরো?

পাউখুম-  সর, মহাক য়াওদে।

ৱাহং –অদুদি, নহাক্না ইহান হানবা তারে।

পাউখুম-  হোই, সর।

ৱাহং– অদুদি, নহাক্না মপান চৎপা মতমদা ইমা-ইপাদি পাখত্ত্রো?

পাউখুম- সর, হৌজিক্তি সর লৈরিসিদি, অদুনা সরগা লোয়ননা চৎচরি।

ৱাহং– য়াম্না ফজৈ।

পি.এম. সরগী ৱারোলঃ অদোম্না ওলীম্পিক ফাওবা য়ৌবীয়ু, সনাগী মেদল ফংবীয়ু, নহাক্কী ৱাখল্লোন অসিনা লৈবাক্কী অঙাংশিংদা অনৌবা ৱাখল খনবগী ইথিল পীগনি। ঐহাক্কী য়াইফ-পাউজেলনা নহাক্কী নাক্তা মতম পুম্বদা লৈগনি। স্পোর্তকী মালেম অসিদা ঝারখন্দদা লৈরিবা হৈ-শিংবশিং অসিদা লৈবাক পুম্বনা চাউথোকচৈ। ঐহাক্না উবদদি ঝারখন্দগী ইচানুপীশিংনা য়াম্না নীংথিবা থবক কয়া পাংথোকপা উজৈ। শান-খোৎনবদা ইশাগী মমিং কয়া শেম্নখ্রে। অপিক-অপিকপা খুঙ্গং, শহরশিংদা অদোমগুম্বা হৈ-শিংবা থোক্লক্লবদি, মালেম শিনবা থুংনা ভারতকী মমিং পুরক্কনি। সবিতা, অদোম্বু ঐহাক্না য়াইফ-পাউজেল পীরি। য়াম্না মাই-পাকপা ওইবীয়ু।

পাউখুম-  সরবু থাগৎচরি।

ফরে, মরুপশিং, হন্দক্কী রাস্ত্রিয় বাল পুরস্কার অসিদা তোঙান-তোঙানবা খেৎনবা কয়া লৈরিবা অসি য়াম্না ফবা ৱানি। আর্চরীদগী আর্তকী মালেমদা অমুক লাক্লসি। মনিপুরগী মচানুপী, ঐখোয়গী নবিশ কিশম, নীংথিরবা লাই কয়া য়েকপগীদমক্তা মহাক্না মনা অসি ফংলিবনি।

ৱাহং- অদুদি, নবিশ, ঐখোয়না নঙোন্দগী তাবা পাম্মি। অদোম্না লাই ফজনা য়েকই। মচুদদি মহৌশানা অদুম মপাঙ্গল লৈ। অদুগা অৱাং-নোংপোক অসি মশানসু মচু কয়ানা থনবনি। মখোয়শিং অদুবু মচু শঙবা অসি, পুন্সি অমা পীবা গুম্বনি। অদোম্না অকোয়বা, অশংবগী হীরমদা অয়াম্বা লাই য়েকই হায়না ঐঙোন্দা পাউদমলকখি। মসিগী হীরম অসিদা অদোম্না য়াম্না খোইদারিবা অসি করিগীনো?

পাউখুম- অহানবদা সরবু থাগৎচরি। অদোমগা ইশা-ইশা থেংনদুনা ৱারী শাজবা অসি য়াম্না লাইবক ফবনি অমসুং সর, ঐহাক্কী মিং অসি বনিশ কিশম হায়বনি অমসুং ঐহাক্না অকোয়বগীদমক্তা লাই য়েক্লিবা অসি হৌজিক্কান অসিদা অকোয়বসি নোংম-নোংমগী মোৎশিল্লকপা অসিগীদমক্তনি। হৌজিকসে পোল্ল্যুসনগী চাং য়াম্না ৱাংলে অমসুং ইম্ফালদসু পোল্ল্যুসন য়াম্না থোক্লে। ঐহাক্না উ কয়া থাদুনা অহোংবা পুরক্তুনা অকোয়বা, ঐখোয়গী পাম্বীশিং অমসুং শা-ঙাশিংবু কনবা পাম্মি। ঐহাক্না খ্বাইদগী ৱাইল্দ ওইবা মফমশিংবু কনবা পাম্মি। মসিগী ৱাফম অসিবু মীয়াম খুদিংদা য়ৌহন্নবগীদমক্তা ঐহাক্না লাই য়েক্লিবনি।

ৱাহং- য়াম্না ফজবা ৱাখল্লোন্নি। অদোমগী ইমুং মনুংদা লাই য়েকপা অতোপ্পা মীওইসু লৈবরা? ইমা, ইপা, ইচিল ইনাও নত্ত্রগা অমা হেক্তা?

পাউখুম- লৈতে, সর। ঐহাক্কী ইপাদি কারবার তৌই, ইমানা য়ুম শেন্নৈ অমসুং লাই য়েকপদি ঐ খক্তনি।

ৱাহং –অদোমগী ইমা, ইপাসি হৌজিক ঐখোয়গী নাক্তা লৈবরা?

পাউখুম- লৈ, সর।

ৱাহং – নুমিৎ চুপ্পা নঙনা লাই য়েক্লিবা করিগীনো হায়না মখোয়না চৈদ্রো? লাইরিক্তি পাদে কায়না হায়দ্রো? চাকসু থোংদে, থবকসু তৌদে কায়না চৈবদি য়াওদ্রো?

পাউখুম- লৈতে, সর। মখোয়না ঐহাকপু য়াম্না শৌগৎলি।

ৱাহং – অদুদি নহাকসে লাইবক য়াম্না ফরেকো। ফরেনে, নহাক্কী চহিদি য়াম্না য়ামদ্রি, অদুবু ৱাখল্লোন্দি য়াম্না ৱাংই। অদুদি, লাই য়েকপা নত্তবা অতোপ্পা করি-করি অপাম্বা লৈবগে?

পাউখুম- সর, ঐদি ঈশৈ শকপা পাম্মি। ঐহাক্না ঈশৈ শকপা অমসুং লৈ-কোয়বা পাম্মি।

পি.এম.গী ৱারোলঃ

নবিশ, ঐহাক্না মনিপুরদা য়াম্না লাকখ্রে। অদুগা মফম অসিগী অকোয়বা অসিনা ঐহাক্কী পুক্নিং চিংশিনবগী থৌওং কয়া থেংনখ্রে। মফমদুগী মীওইশিংসু অকোয়ববু য়াম্না লাৎচৈ অমসুং মদুবু ঙাক-শেন্নবা থৱাই-থাবা ফাওবা কিদে। মসি মনিপুরদা উবা ফংই অমসুং মসি থাক য়াম্না ৱাংবা ৱাখল্লোন্নি।

ৱাহং –অদুদি, অদোম ঈশৈ শকই হায়বা। ঐঙোন্দা খরা তাহনবা য়াগদরো?

পাউখুম- হোই, সর। ঐহাক য়াম্না হৈবদি নত্তে, অদুবু শকপদি য়াম্না পামজৈ। অদুনা খুনুং ঈশৈ অমা শক্কে।

পাউখুম- য়াম্না ফজৈ, ঐহাক্না নহাক্কী ইমা-ইপাবুসু থাগৎচরি অমসুং ঈশৈ-নোংমাইদসু নহাক্না করিগুম্বা খরা তৌফম থোকই হায়না ঐনা খল্লি। নহাক্কী খোঞ্জেল য়াম্না ফজৈ। ঐহাক য়াম্না খঙবদি নত্তে, অদুবু তাবদা ইয়াম্না নুংঙাই। হীরমশিং অসিদা নহাক্না হোৎনফম থোকই। ঐহাক্না নঙোন্দা য়াইফ-মঙ্গোল য়াম্না পীরি।

মরুপশিং,

ঐখোয়গী লৈবাক্কী অঙাংশিংনা হৈ-শিংবগী মগুন কয়াগা লোয়ননা হিংলি, মখোয়বু থাগৎপগী লোইবা নাইরোই। নাকল অমদনা নীংথিবা লাই য়েকপা নবিশ লৈরে,  অদুগা অতোপ্পা অমদনা করনাতকাগী রাকেশ কৃষ্ণসু লৈরে। রাকেশনা লৌউবগী হীরম অমগা মরী লৈননা মনা অসি ফংলিবনি। রাকেশ, নহাকপু ঐহাক্না য়াম্না থাগৎলি। অদুগা, ঐহাক্না নহাক্কসু ৱারী য়াম্না শানিংই।

ৱাহং- রাকেশ, নহাক্কী প্রোফাইল য়েংবদা ঐহাক্না য়াম্না নুংঙাইখি। নহাক্না চহি অশুক য়াম্না ঙন্না অনৌবা থৌওং পাংথোক্তুনা লৌমীশিংগীদমক্তসু খল্লি। অদোম সাইন্সকী মহৈরোয় অমসু ওইরি। অদুনা অনৌবা থৌওং পাংথোকপা অসিদি মশানা তাবনি। অদুবু লৌমীশিংগীদমক্তা অনৌবা থৌওং পাংথোক্কদবনি খনবা অসিদি অরায়বা নত্তে। অদুনা মসিগী ৱাখল্লোন অসি করম্না লাকপগে হায়বসি ঐহাক্না য়াম্না খঙনীংই। মসিগী থবক অসিদা মতৌ করম্না থৱাই তাখিবগে?

পাউখুম- সর, অহানবমক্তদা খুরুমজরি অমসুং সাইন্স অমসুং অনৌবা থৌওং পাংথোকপা অসি ঐহাক্না য়াম্না পামজদুনা লাকখি। ঐহাক্কী ইমা-ইপাদি লৌমীনি অমসুং ঐহাকসু লৌমীগী ইমুং-মনুংদগীনি। মহাক্না ঐহাক্কী ইপানি অমসুং মহাক্না ইমানি। সর, হৌজিক লৈরিবা লৌউবগী থৌওং অসিদা খুদোংচাদবা কয়া লৈবা ঐহাক্না উজৈ, অদুনা করিগুম্বা খরদি তৌবগী তঙাই ফদবা লৈ। অদুনা লৈবাক্কী চেং পীরিবা লৌমীশিংগীদমক্তা করিগুম্বা খরা তৌবগী ঐহাক্কী ৱাখল্লোন লৈ। ঐহাক্না তেক্নোলোজীগী অনৌবা থৌওং অসিনা মখোয়দা তেংবাংনীংবগী ঐহাক্কী ৱাখল্লোন লৈ। হৌজিক লৈরিবা থৌওং অসিদগী ঐহাক্কী মেছিন অসিনা ৫০%গী চাং হেন্না শেন্দোং লৈবা হেনগনি।

ৱাহং- য়াম্না ফজৈ। মসিবু লৌউবগী থৌওংদা ইপাগা লোয়ননা শিজিন্নবা য়াওখ্রবো?

পাউখুম-  হোই, সর, শিজিন্নরে। ঐহাক্না হায়নীংবদি, ঐহাক্কী মছিন অসিনা মতম অসি শরুক ১০-১৫গী চাং হেন্না চংদে, ঐহাক্না থবক ওইনা পাংথোক্তুনসু য়েংলে, ঐহাক্কী মছিন অসিনা খ্বাইদগী হেনবা শেন্দোং অমসুং খ্বাইদগী য়াম্বা জর্মিনেসনগী চাংসু পী। লৌউবগীদমক্তা স্কিল লৈবা মীওইগী তঙাই ফদে, অদুগা মখোয়গুম্বা মীওই শিজিন্নবগী শেলদি য়াম্না ৱাংই, অদুনা ঐখোয়না মখোয়বু নেকপা কয়া ফংদে। অদুনা মতম অমদা থবক ময়াম অমা তৌবা য়াবা মথৌ য়াম্বা মেছিন অমা শেম্বনি অমসুংমসিনা মতম অমসুং শেল চঙবসু কনবা ঙম্লে।

ৱাহং – ফরে। মসি নহাক্না শারবা তুংদা, খবরদা য়াওরকপদগী মীয়াম্না খঙনরকপদগী পোত্থোক শাবা মীওইশিং, কারবার তৌবা কম্পেনীশিং, স্তার্ত-অপকী মীওইশিংনা নহাক্কী মনাক্তা লাকপা য়াওখ্রবরা? মসিবু ঐখোয়না পাক-চাউনা পুথোকপা ঙমগনি হায়না হায়রকপা য়াওখ্রবরা?

পাউখুম- হোই, সর। ঐহাক্না রাস্ত্রপতি ভৱন্দা পাংথোকপা ফেস্তিবেল ওফ ইন্নোবেসন্দা য়াওরিঙৈদা কম্পেনী অনি-অহুম্না ঐঙোন্দা হঙলকখি। অদুবু ঐহাক্কী প্রোতোতাইপ অদু মপুং ফানা শাবা লোইদ্রি। ঐহাক্না হৌজিকসু মসিদা হোৎনদুনা নীংথিবা মওংদা শেমদোকপা পাম্মি।

ৱাহং –অদুদি নহাক্কী ওজাশিংনা মসিদা থৱাই য়াওবীদুনা মহাক্কী তেংবাংবরা? অদুগা সাইন্তিস্ত অমদি লৈবাক অসিগী অতোপ্পা মীওইনসু নহাক্কী তেংবাংবরা? কনা কনানা নঙোন্দা ওনলাইন্দা পাউ ফাওরকপা য়াওবরা?

পাউখুম- হোই, সর। ঐহাক্কী হাই-স্কুলগী ওজাশিং, ঐখোয়গী প্রী-য়ুনিভর্সিতীগী ওজাশিং খুদিংনা ঐহাকপু লমজিং লমতাকপীরি অমসুং পুক্নিংসু থৌগৎপী। ঐহাক্কী খোঙচৎ অসিগী থাক খুদিংদা ঐহাক্কী হোৎনবা কনবা অসিবু ইমা-ইপা অমসুং ওজাশিংনা থৱাই য়াম্না হাপ্পী। অদুনা সর, ঐহাক্না ঙসি ওইরিবা অসি মখোয়গী মরমদগীনি অমসুং মসিনা ঐহাকপু থাক অসিদা য়ৌহল্লকপনি।

ৱাহং- ফরে, অদুদি ঐহাক্না নহাক্কী ইমা-ইপাবু লৌমীশিংগী খনবা অমসুং ইচাবু লৌমীশিংগা মরী লৈনহনবগীদমক্তা থাগৎলি। ইচানুপাগী হৈ-শিংবা অসিবু লৌমীশিংগা মরী লৈনহল্লে। অদুনা নহাক্তি থাগৎপা ফংবগী হক য়াম্না লৈরে।

ইকায় খুম্ননীংঙাই ওইরবা প্রধান মন্ত্রীগী ৱারোলঃ রাকেশ, ঐখোয়গী লৈবাক অসিনা মতমগা চান্নবা লৌউবগী তঙাই ফদবা য়াম্না লৈরি। অদুগা নহাক্কী চহি য়ামদ্রিবা মতম অদিদা লৌউবগী থৌওংবু মতমগা চান্নহন্নবা তেক্নোলোজী শিজিন্ননবা হোৎনবা উবা অসিদা ঐহাক্না য়াম্না হরাওবা ফাওই। নহাক অদুম মাই-পাকপা ওইয়ু অমসুং নহাকপু ঐহাক্না য়াইফ-পাউজেল পীরি অমসুং নহাক্কী ইমা-ইপাবুসু লৈবাক্কী লৌমীশিংদা কান্নবা পীনবা ইথিল পীবগীদমক্তা য়াম্না থাগৎচরি। অদুদি, হৌজিক ঐখোয় য়ু.পি.দা অমুক চৎলসি। য়ু.পি.গী অলিগরদা লৈবা মোহম্মদ শদাবকা ৱারী অমুক শাশি। হৌজিক হায়খিবগী মতুং ইন্না, মোহম্মদ শদাবনা ভারতকী ফিরালবু অমেরিকা ফাওবা পায়হনখি অমসুং ভারতকী মিংচৎ পুরকখি।

ৱাহং – শদাব, অদোম্না অমেরিকাদা নহাশিংগী এম্বেসেদর ওইনা থবক তৌরি। অদোম্না স্কোলার্শিপ ফংদুনা অলিগরদগী অমেরিকাদা চৎখি। নহাক্না মনা কয়া অমসু ফংখ্রে অমসুং নুপীশিংবু মপাঙ্গল লৈহন্নবগী থবক কয়া অমসু তৌরি। থবক অসি তৌনবা ইথিল অসি কদায়দগী ফংবগে?

পাউখুম – ইকায় খুননীংঙাই ওইরবা প্রধান মন্ত্রীজী, খুরুমজরি। ঐহাক্না অহানবা ওইনা হায়জনিংবদি ঐহাক অলিগর মুস্লিম য়ুনিভর্সিতীগী ক্লাস ১১দা তম্লিবা মহৈরোয় অমনি অমসুং ঐহাক্কী থবকশিং অসি পাংথোকপগী ইথিলদি ঐহাক্কী ইমা-ইপা অমসুং অলিগর মুস্লিম য়ুনিভর্সিতীগী ওজাশিংদগী ফংখি। অলিগর মুস্লিম য়ুনিভর্সিতী অসি লৈবাক অসিগী অফবা মীওই কয়া অমা পুথোকখিবা মফম অমনি হায়না ঐখোয় পুম্নমক্না খঙনরবা অদুনি। অদুনা ঐহাক্না মসিগী মিংচৎ পুরকপগা লোয়ননা লৈবাক্কীসু করি গুম্বা খরা তৌবা পামখি।

ৱাহং – অদুদি নহাক্কী ইমা-ইপাসু অসিগুম্বা খরা তৌবরা নত্ত্রগা নহাক খক্তদা তৌহনবরা?

পাউখুম – নত্তে, ঐহাক্কী ইমা-ইপানা হৌরকপদগী হৌনা ঐহাকপু শৌগৎখি। ঐহাক্না ভারতপু মিসাইল কয়া অমা পীবিদুনা অতোপ্পা লৈবাক্কী মখা পোন্দবা ভারত ওইহল্লিবা দাঃ এ.পি.জে. অবদুল কলাম অজাদকী মতাংদা ঐহাক্কী ইমা-ইপানা ঐঙোন্দা হায়বী। অদুনা মখোয়না ঐহাকসু লৈবাক অসিনা চহি কয়া-কয়াগী ওইনা নীংশিংগদবা লৈবাক্কীদমক্তা থবক খরা তৌনবা হায়বী।

ৱাহং ২- নহাক্না তসেংনা লৈবাক্কী মিংচৎ পুরক্লি। তুংগীদমক্তা করি খল্লিবগে? ৱাখলদা ময়াম অমদি লৈরমগনি?

পাউখুম- হোই, সর। ঐহাক্না পাম্বদি হয়েং চাউরগা এই.এ.এস. ওফিসর ওইদুনা ঐহাক্কী খুন্নাইগী তেংবাংবা পামজৈ। অদুগা ঐহাক্না মসিদা খক্তা লোইবা পামদে, য়ুনাইতেদ নেসন্দা মীওইবগী হক্কীদমক্তা থবক তৌবসু পামজৈ। অদুগা ঐহাক্কী মঙলানি য়ুনাইতেদ নেসন্সতা ভারতকী ফিরাল পায়হন্দুনা লৈবাক অসিগী মিংচৎ পুরকপনি।

ইকায় খুম্নরবা প্রধান মন্ত্রীগী ৱারোলঃ য়াম্ন ফজৈ। মালেমদা ভারতপু ইকায় খুম্নহনবা, লেংদবা শক্তাক লৈবা অমসুং মপাঙ্গল লৈহনবা অসি ঐখোয়গী নহাশিংগী থৌদাংনি। অদুগা শদাব, ঐহাক্না নহাকপু য়াইফ-পাউজেল পীরি। নহাক্কী ৱাখল্লোন অসি য়াম্না শেংই অমসুং নহাক্কী ইমা-ইপানা অঙাং ওইরিঙৈদগী হৌনা নহাক্কী ৱাখল্লোন্দা অব্দুল কলামগী ইথিল পীদুনা হীরো ওইহল্লি। মখোয়না নহাকপু অচুম্বা লম্বী তাকপীবগীদমক্তা ঐহাক্না মখোয়বু থাগৎচরি।

অদুদি, ঐখোয় গুজরাত্তা অমুক চৎসি। গুজরাৎকী মন্ত্রা জিতেন্দ্র হরখানী, মহাক্না ৱারী অমুক শাসি। মন্ত্রা জিতেন্দ্রনা শান-খোৎনবগী মালেমদা নীংথিবা থবক পাংথোকপগীদমক্তা লৈবাক্কী মনা অসি ফংবনি।

ৱাহং ১- মন্ত্রা, কেম ছো। মজা মাথে। তারে সাথ কোন-কোন ছে? (মন্ত্রা, কমদৌরি? নুংঙাইরিবা নত্ত্রা? নহাক্কী মনাক্তা কনা-কনা লৈবগে?)

পাউখুম-  – ঐহাক্কী ইনাক্তা ইমাগা ইপাগা লৈ।

ৱাহং – লৈবাক মীয়াম পুম্বনা ঙসি নহাকপু য়েংলি। নহাক্না থৌনা ফবা থৌওংগা লোয়ননা লৈবাক্কী মিংচৎ পুরকখি। ঐহাক্না অঙাং ওইরিঙৈদসু, ঐহাক্কী মদনগর খুঙ্গংদা, অচৌবা পুখ্রি অমা লৈরম্মি। মদুদা, ঐখোয় অঙাংশিংনা ইরোইরম্মি। মদুগী ইরোইবা অদুগা নহাক্কী ইরোইবগী মরক্তদি য়াম্না খেৎনৈ। নহাক্কী অদুদি ত্রেনিং য়াম্না চঙই, হোৎনবগী কনবগী তঙাই ফদবা লৈ। অদুবু নহাক্নদি ইরোইবদা রেকোর্দ থমদুনা মীয়ামগী ইথিল অমসু ওইরে। অদোমদি শান্নরোইনি। অদুগা শান্নরোইশিংগী পান্দমদি য়াম্না চেৎনৈ। নহাক্কী পান্দম অসি করিনো হায়বা ঐহাক্না নঙোন্দগী তানীঙই। অদোম্না করি তৌনিংবগে? মতৌ করম্না তুংগী পুন্সিদা চৎনিংবগে? মসিমা হায়বীয়ু, ঐহাক্কা ৱারী শাশি।

পাউখুম – গুদ মোর্নিং, সর।

ৱাহং –  গুদ মোর্নিং। হায়বীয়ু।

পাউখুম- সর, ঐহাক মালেমগী খ্বাইদগী ফবা ইরোইবা মীওই ওইবা পাম্মি। অদোমগুম্না লৈবাক্কী সেবা তৌনিংই।

ৱাহং – অমুক্তা খন্নসি, নহাক্কী পুক্নিংদা মঙলান কয়া অমা লৈ। নহাক্কী ইমা-ইপানা অশেংবা ৱাখল্লোনগা লোয়ননা নহাক্কীদমক্তা মতম কায়থোক্লিবা অসিনা নহাক অসি মখোয়গী পুন্সিগী মঙলান অমসুং মন্ত্রা ওইরম্লগনি হায়বসি ঐহাক্না থাজৈ। অদুগা নহাক্না কন্না হোৎনদুনা পাংথোক্লিবা কয়া অসি নহাক্কী ইমা-ইপা খক্তদা নত্তনা অদোমগুম্বা মচাশিংগী মমা-মপা খুদিংমক্কী ওইনা নহাক্কী ইমা-ইপা অসি ইথিলনি অমসুং নহাক নশামকসু ইথিল অমনি। অদুনা ঐহাক্না মহাকপু থাগৎপা ফোংদোক্লি। য়াম্না নীংথিবা ৱাখল্লোন অমগা লোয়ননা নহাক্না ৱা ঙাংলি। মসিমক য়াম্না চাউবা ৱাফম্নি। ঐহাক্না নহাকপু অমুক্কা হন্না থাগৎলি অমসুং অমসুং ঐঙোন্দা কনাগুম্বনা পাউদম্বগী মতুং ইন্না, নহাক্কী কোচনরা, কনা অমনা নহাকপু ঐহাক্কা উন্নহনগনি হায়না ৱাশকই হায়না তাখি। তৌখিবা নত্ত্রো? অদুদি, নহাক্না কোচতা হৌজিক ফাওবা উনহন্দ্রিবা করিগীনো হায়না খনদ্রিবা করিগীনো?

পাউখুম – অদোম ওইনা লাকপীরো, ঐহাক্না চা পীথক্কে।

ৱাহং – অদুদি, ঐহাক্না গুজরাত্তা লাকপা মতমদা ঐহাক্কা উন্নবা লাক্কদ্রা?

পাউখুম-  – শোইদনা লাক্কনি।

ৱাহং- অদুদি রাজকোৎকী গান্থিয়া পুরগা লাকপা তাবনিনে। করি হায়গে?

পাউখুম- সরনা হায়বীরিবা অসিদি অদোম্না মফম অসিদা লাকপা মতমদা জিলিবী, গান্থিয়া লোইনা পুরগা লাক্কনি হায়বনিনে। অদোম্না হায়রদি, চাসু পীথকচগে।

ইকায়খুম্ননীংঙাই ওইরবা প্রধান মন্ত্রীগী ৱাফমঃ

অদোম্বুসু হন্না হন্না থাগচরি। নখোয় পুম্নমক্না য়াম্না নুংঙাইরবা ৱাফম কয়া হায়খ্রে। ঙসিগী ৱারীশিং অসিদগী অমসুং নখোয় খুদিংমক্না ফংলিবা মনা অসিনা খ্বাইদগী পিকপা ৱাখল্লোন অমবু নীংথিনা মাইকৈ চুম্বীরবদি মশক থোকপা ফল ফংগনি হায়বা ঐখোয়না খঙবা ঙম্লে। নখোয় খুদিংমক ৱাফম অসিগী খুদম ঙাক্তনি। ঙসি নখোয়না ফংবা ঙম্বা মাই পাকপশিং অসি অহৌবদা ৱাখল্লোন অমদগী হৌবা ওইরমগনি। মসিগী মরী লৈননা, নোংচুপ বেঙ্গোলগী সৌহাদর্য় দেবসুনি। মহাক্না পুৱারী ওইরবা ৱারী অমসুং লৈবাক্কী মমাই ওইবা পুৱারীগা মরী লৈনবা ৱারী ইবনি। মহাক্না হীরম অসিগী মতাংদা ইগদবনি হায়বা অহানবা ৱাখল লাকপা মতমদা মহাক্না ফমদুনা খক লৈথোক্লম্মোই। মহাক্না মতিক চাবা থবক পাংথোকপদগী ইবা হৌরে অমসুং মসিগী ফলদি ঙসি ঐখোয়গী ইমাংদা লৈরিবা অসিনি। অসিগুম্বা অমা ওইনা অসমগী তনুজ সমাদ্দার, বিহারগী জ্যোতী কুমারী, অঙাং অনিগী মপুন্সি কনখিবা মহারাস্ত্রাগী  কামেশ্বর জগন্নাথ ৱাঘমারে, সিক্কিমগী অয়ুশ রঞ্জন, পঞ্জাবকী ইচানুপী নাময়া জোশীসুনি। অঙাং খুদিংগী অপাম্বা, হৈ-শিংবা অসিনা লৈবাক্কী মিংচৎ হেন্না লৈহনগদৌরিবনি। ঐহাক্তি নখোয় খুদিংমক্কা ৱারী শান্ননিংবনি। নখোয় অসি ভারত অমা, মপাঙ্গল কনবা ভারত অমগী ফজরবা শক্তম অমনি। অদুবু মতম য়াম্না লৈতবনা, ৱারী শাবা ফংদরে।

মরুপশিং,

সংস্কৃত্তা য়াম্না ফজবা পাউরৌ অমা লৈ অমসুং ঐখোয়না অঙাং ওইরিঙৈদা ঐখোয়গী ওজানা তাকপীদুনা ঐখোয়দা হন্না-হন্না হায়হল্লম্মি। মদুদি অসুম্না হায়-

 “উদ্যমেন হি সিধ্যন্তি কার্য়ানি না মনোরথে”। মসিনা হায়বদি থবক অসি হোৎনবনা মগুন লৈহল্লি, ৱাখলতমক খন্দুনা লৈবদগী ওইদে হায়বনি। করিগুম্বা ৱাখল্লোন অমবু থবক্কা মরী লৈনরবা মতমদা মখা তাবা থবক কয়া অমনা তুং ইনবনি। খুদম ওইনা হায়রবদা, নখোয়গী মাই-পাকপা অসিনা অতোপ্পা কয়াদসু ইথিল পীরি। নখোয়গী মরুপ, লৈবাক অসিগী অতোপ্পা অঙাংশিং কয়া অমনা নখোয়বু তি.ভি.দা হৌজিক য়েংলমগনি, খবরদা নখোয়গী মরমদা পারমগনি। মখোয়সু নখোয়দগী ইথিল ফংদুনা তুং ইনগনি, অনৌবা খোঙথাং থাংগনি, মদুবু মাই পাক্নবা কন্না হোৎনগনি। মতৌ অসুম্না, মখোয়দগীসু অতোপ্পশিংনা ইথিল অমুক ফংগনি। মসিগী খোঙজেল অসি অদুম মখা চত্থগনি। অদুবু, নুংশিরবা অঙাংশিং, ঐহাক্না নখোয়গী মফমদা করিগুম্বা অমসু হায়নীংই। মসিগী মনা অসি নখোয়গী পুন্সিগী অপিকপা তাঙ্কক অমনি হায়বসি মতম পুম্বদা কাওগনু, মসিগী মাই পাকপা অসিদা মাঙদুনা চৎখিগদবা নত্তে। নখোয়না হৌজিক মফম অসিদগী হনখিবা মতমদা, নখোয়বু মীয়াম্না য়াম্না থাগৎকনি। নখোয়গী নমিংশিং অসি খবরদা য়াওরম্লগনি, নখোয়গা ৱারী-ৱাতাইসু শারকখিগনি। মসিগী থাগৎলিবশিং অসি নখোয়না পাংথোকখিবা থবকশিং অদুদগীনি। মীয়াম্না থাগৎপগী মরক্তা ককঙাওনদুনা লম্বী মাঙহনগনু, মসিগী থাগৎপা অসিনা নখোয়গী খুদোংথিবা ওইরকপসু য়ারিবনি। হৌজিক্তি নখোয়না তুংগী পুন্সিদা অহেনবা মাই-পাকপা কয়া ফংগদৌবা ৱাৎলিবনি। অদুগা ঐহাক্না পাউতাক অমসু পীনিংই। নখোয়না করিগুম্বা অমা নত্ত্রগা অমদি শোইদনা পারমগনি। নখোয়না থমোই শেংনা পাম্বগী মতুং ইন্না, চহি খুদিংগী পুন্সি ৱারী অমদি অদুম পাহন্নিংই। মদুগী লাইরিক অদু সাইন্তিস্ত, অফাওবা লৌমী, ৱাখল খনবা মীওই অমা, লাইরিক ইবা মীওই অমা হেক্তা ওইবা য়াই, নখোয়না অপাম্বা অমা হেক্তা চহি অমগী মনুংদা অমদি পাদবা য়াদে হায়না লেপ্পীয়ু। য়ামদ্রবদা পুন্সি ৱারী অমা। মসিনা নখোয়গী পুন্সিদা ইথিল কয়া লেপ্তনা পীবিগনি। মসি অমুক্তা য়েংবীয়ু।

ঐহাক্কী নহা ওইরিবা মরুপশিং,

ঐহাক্না মসিগী ৱাফমশিং অসিদা মুন্না খন্থহন্নিংই অমসুং ঐহাক্না ৱাহৈ খরগসু মখা তানা হায়নীংই।

অহানবা – লেপ্তনা চত্থগনি হায়বগী ৱারেপ।

মসিনা হায়বদি, নখোয়গী থবক তৌবগী খোঙজেল অসি কৈদৌনুংদা লেপহল্লোইদবনি, অয়েৎপা/অকায়বা অমত্তা লাকহল্লোইদবনি। থবক অমা হেক লোইবগা, মথং করি অনৌবা অমুক পাংথোক্কনি হায়না মতম পুম্বদা খন্দুনা লৈগদবনি।

অনিশুবা- লৈবাক্কীদমক্তা হায়বা ৱারেপ।

করিগুম্বা থবক অমা তৌবা মতমদা, ঐহাক্কীনি খল্লগা তৌদবা। ঐগী থবক, ইশাগী থবক হায়বা অসিনা ঐখোয়গী ৱাখল্লোনবু য়াম্না পীকশিনহল্লি। করিগুম্বা অদোম্না লৈবাক্কীদমক্তা থবক তৌবা মতমদা, থবক অসিনা নশাদগী হেন্না মথন্নতা অদুমক হেন্না চাউখ্রগদবনি। য়াম্না চাউখৎলক্কনি। নখোয়গী থবক্কীদমক্তা অতোপ্পশিংনসু করিগুম্বা অমা নত্ত্রগা অমা পাংথোক্লি হায়না নখোয়না খনগনি। নখোয়গী ৱাখল খনবগী মওংসু হোংলক্কনি। হন্দক্কী চহিস অসিদা লৈবাক অসিনা নিং-তম্বা ফংবগী চহি ৭৫ শুরক্লিবনি। করি থবক পাংথোক্তুনা লৈবাক অসিনা তুং লমচৎকীদমক্তা চৎপা ঙমগনি হায়না নখোয়না অমুক্তা খন্থৌ।

অদুগা অহুমশুবা ৱাহৈ অসিদি ঐহাক্না শুংশোই শোইদনা হায়নীংই, মদুদি অতোপ্পবু ইকায় খুম্নবগী ৱারেপ।

মাই-পাকপা খুদিংগী নখোয়না অতোপ্পবু ইকায় খুম্নবা হেনগৎকনি হায়না ৱারেপ লৌগদবনি। মসিগী মরমদি, নখোয়না অতোপ্পবু ইকায় খুম্নরবদি, অতোপ্পা মীওই লিশিং-লিশিং কয়ানা নখোয়গা পুন্না নখোয়গী মাই-পাকপগী হরাওবা ফোংদোকমিন্নগনি। নখোয়গী মাই-পাকপা অসি মশানা অদুম য়াম্না চাউজখ্রগনি।

অদুদি, মসিগী ৱারেপশিং অসি নখোয়না কাওররোই হায়না ঐহাক্না খনবা য়ারবরা? শুংশোই শোইদনা নীংশিংঙু অমসুং ঐহাক্না নখোয় খুদিংমক অসি খোঙফম অমসুং মিৎয়েং চেৎলি হায়বদি ঐহাক্না থাজৈ, কাওবা য়াদেকো। নখোয় কাওরোই অমসুং অতোপ্পবুসু কাওহল্লোই হায়বা ঐহাক্না খংঙিদা। নখোয়না পুন্সিদা তুংগীদমক্তা খল্লিবা মঙলানশিংদা মাই পাকপা ওইয়ু, অদুগা অসিগুম্বা মাই-পাকপশিং অসিনা অতোপ্পা নহাশিং, লৈবাক্কী অঙাং খুদিংবুসু ইথিল পীদুনা মাং থানা চৎপা ঙমহল্লু। মসিগী য়াইফ পাউজেল অসিগা লোয়ননা, নখোয়গী ইমুং-মনুং, ওজা, মহৈ-তমফমশঙগী মরুপশিংদা নখোয়গী মাই-পাকপা অসিগীদমক্তা হন্না হন্না থাগৎচরি। অদুগা নখোয় খুদিংমক্তসু য়াইফ-মঙ্গোল পীরি।

হন্না হন্না থাগৎচরি।

*****