নেস্নেল সাইন্স অমসুং তেক্নোলোজী অমসুং ইন্নোভেসন পোলিসীগী ৫শুবা দ্রাফপু মপাঙ্গল হেন্না কনখৎনবা কান্নবা ৱাখল্লোনশিং পুরক্নবগীদমক্তা তোঙান-তোঙানবা হীরমদগী মকোক থোংবা অখঙ-অহৈশিং অমসুং ৱাখল্লোন লৈবা মীওইশিংনা দ্রাফ তৌরবা মতুংগী খন্ন-নৈনবগী থৌওংদা শরুক য়াখি।

“হৌখিবা চহি খরদা, তেক্নোলোজীদা অচৌবা অহোংবা কয়া লাক্তুনা দিজিতেলগী ওইবা ইহৌ অমা লৈরক্লি। মসিগী অহোংবশিং অসিবু নৈনরিঙৈদা, ঐখোয়না চৎনবীগসু নক্ননা লৈফম থোকই। মসিগী মাইকৈ অসিদা থাংজিনবা খোঙথাং অমদি লোলগী লেবপু মপাঙ্গল লৈহনবা অসিনি। মসিগী মথক্তা, পাক চাউনা খঙনবগীদমক্তা হায়রিবা অসিবু তসেংনা থবক ওইনা পাংথোকপা অসিসু এস.তি.আই.গী ওইনা য়াম্না মরু ওইবনি। মসিগী পোলিসী অসিনা লৈবাক্কী তুংগী মতম্বু হেন্না ফহন্নবা শেম-শাবগীদমক্তা হীরম খুদিংবু খন্নবদা য়াওহনবা অসিদা পান্দম থম্মি”, হায়না ভারত সরকারগী সাইন্তিফিক এদ্ভাইজর ওইরিবা, প্রোফঃ কে. বিজয় রাঘবন্না জনুৱারি ২৩, ২০২১দা ৱেবিনারগী খুত্থাংদা শিনখিবা খন্ন-নৈনবগী থৌরমদা ফোংদোকখি। মহাক্না পোলিসী প্রোসেস ফ্রেমৱর্ক দোক্যুমেন্ত অমসুং থবক ওইনা পাংথোকপগী থৌরাং য়াৎপবু অকোনবা দোক্যুমেন্ত অসিদা পুনশিনবগী মতাংদা মিৎয়েং চঙখি।

“তুংগী মতমগীদমক্তা শেম-শাদুনা লৈনবগীদমক্তা, রাজ্যশিংনা কেন্দ্রগা শম্নদুনা সাইন্স, তেক্নোলোজী অমসুং অনৌবা থৌওং কয়াবু মখোয়গী খুদোংচাদবশিংগী ৱারোইশিন পুরকপদা শিজিন্নবগী তঙাই ফদবা লৈ। মসিগা মান্নবা মতম অসিদা, মালেমগা শম্নবা অমসুং সাইন্স দিপ্লোমেসীদসু মান্নবা মিৎয়েং চঙফম থোকই”, হায়না দি.এস.তি.গী সেক্রেতরী, প্রোফঃ আশুতোশ শর্মনা হায়খি। মহাক্না মখা তাখিবদা, ভারত্তদি ঐখোয়না অতানবা লৌশিংদা মিৎয়েং চঙই, অদুবু ঐখোয়না লৌশিংগা অনৌবা থৌওংগা শম্নহন্নবা মখোয়শিং অসিবু অনৌবা থৌওং পাংথোক্নবগীদমক্তা শিজিন্নগদবনি হায়নসু ফোংদোকখি।

 “খন্ন-নৈনবগী তাঙ্কক ৩০০ পাংথোকখি। ঐখোয়না খ্বাইদগী অহানবা ওইনা, রাজ্য, মরী লৈনবা মন্ত্রী অমসুং মীরমদা লৈবা ভারত মচাশিংগা খন্ন-নৈনখি। মসিগী খন্ন-নৈনবগী থৌওং অসিনা দোক্যুমেন্ত অসিবু হীরম খুদিং মনুং চলহনবা ওইহনগনি”, হায়না দি.এস.তি.গী এদভাইজর অমসুং এস.তি.আই.পি. সেক্রেতরিএৎকী মকোক, দাঃ অখিলেশ গুপ্তনা হায়খি।

নেস্নেল দিজাজতর মেনেজমেন্ত ওথোরিতীগী হান্নগী মেম্বর, ওসীন দিভেলপমেন্ত বিভাগকী সেক্রেতরী অমসুং মালেমগী শক্নাইরবা সিস্মোলোজিস্ত, দাঃ হর্শ গুপ্তনা পান্দম য়েংদুনা য়াৎথোক্লবা থৌরাং অমসুং মেন পাৱগী তাইমলাইনগা পুনবা থবক ওইনা পাংথোকপগী মেকানিজম অমসুং সাইন্স অমসুং তেক্নোলোজীদা শেল থাদবা হেনগৎহন্নবা শেল-থুমগী থৌরাং য়াৎপগী  তঙাই ফদবা লৈবগী মতাংদা মিৎয়েং চঙখি।

য়ু.এস.এ.গী হার্ভার্দ কেনেদী স্কুলগী সাইন্স অমসুং তেক্নোলোজীগী অখঙ-অহৈ, প্রোফঃ শীলা জাসানোফনা সাইন্স, মীওইবা খুন্নাই অমসুং ইথিক্সকী থৌদাংশিং অসিসু লৈবাক খুদিংগী ওইনা য়াম্না মরু ওই অমসুং পোলিসী অসিনা মসিগী মমি তাহনগদবনি হায়খি।

রাজ্য সভাগী হান্নগী সেক্রেতরী জেনেরেল অমসুং য়ু.পি.গী চীফ সেক্রেতরী, শ্রী য়োগেন্দ্র নারাইন্না রিসর্চকী থৌওং অসিবু য়েংশিনগদবা সুপর্ভাইজরশিংগী ত্রেনিং তৌবগী তঙাই ফদবা অমসুং ইন্সতিত্যুসনশিংগী তেংবাংনবগী থৌওংবু মপাঙ্গল কলহনবগী মতাংদা মিৎয়েং চঙখি।

ইন্দিয়ন ইন্সতিত্যুৎ ওফ সাইন্সকী হোনোরেরী প্রোফেসর, অজয় সুদনা লৈবাক অসিগী একাদমিশিংগী থৌদাংশিং খন্নবগী তঙাই ফদবগী মতাংদা মিৎয়েং চঙলদুনা একাদমিশিং, মরু ওইনা সাইন্স দিপ্লোমেসী, অসিবু হেন্না কুপথবা মওংদা শরুক য়াওহন্দুনা মখোয়বু থবক কনবা  ওইহন্দুনা মখোয়না নীংথিবা মওংদা তেংবাংহনবগী মরু ওইবগী ৱাফমসু ফোংদোকখি।

ইন্দিয়ন ইন্সতিত্যুৎ ওফ মেনেজমেন্ত, অহমেদবাদকী হান্নগী প্রোফেসর অমসুং গ্রাসরুৎ ইন্নোভেসন্দা মালেমগী শক্নাইরবা মীওই, প্রোফঃ অনিল গুপ্তনা আর্তপু সাইন্সকা নক্ননা পুরকপগী মরু ওইবা অমসুং ইন্সতিত্যুসনশিংদা চৎনবীগী থৌদাংশিংগী মতাংদা মিৎয়েং চঙখি। মহাক্না লৌশিং পীবা খুদিংমকপু শক-খঙবগী অমসুং কৃষি বিগ্যান কেন্দ্র, ইন্দিয়ন রেলৱেজ অমসুং পোস্ত-ওফিসকুম্বা হান্ননা লৈরবা নেৎৱর্কশিংগী খুত্থাংদা মীয়ামদা নুংতিগী ওইনা পাউ ফাওবগী মতাংদা মিৎয়েং চঙখি।

মমিং লৈরবা ইনভাইরনমেন্তলিস্ত অমসুং সেন্তর ফোর সাইন্স অমসুং ইনভাইরনমেন্তকী দাইরেক্তর জেনেরেল, দাঃ সুনিতা নারাইন্না সোসাইতেল সাইন্সকী মাইকৈদা চঙশিনবগী তঙাই ফদবগী মতাংদা পল্লদুনা সাইন্স অসি হীরমশিংগী মনুং চলহনবগী থৌওং হেনগৎহনগদবনি হায়খি। “ভারতকী সাইন্সকা মীয়ামগা মরী লৈনহনবা অসি ঈশিং ইচাউ অমসুং সাইক্লোনগী মরমদা হান্ননা হায়দোকপা থৌওং অসিগুম্না থৌওংশিং অসিগী চাং হেনগৎপগী তঙাই ফদবা লৈ”, হায়না মহাক্না মখা তাখি।

ইন্দিয়ন ইন্সতিত্যুৎ ওফ এদভান্স স্তদীজকী দাইরেক্তর, মকারন্দ আর. পরাঞ্জপেনা পোলিসী অসিদা থকশি খাসি য়াওহনবা অমসুং লৈবাক শিনবা থুংনা অফবা তৌবগী চৎনবী অমা লৈহনবগী তঙাই ফদবগী মতাংদা ৱাফম ফোংদোকখি।

মিচিগান য়ুনিভর্সিতীগী পব্লিক পোলিসীগী প্রোফেসর, সাইন্স, তেক্নোলোজী অমসুং পব্লিক পোলিসী প্রোগ্রামগী দাইরেক্তর, শোবিতা পার্থাসারথীনা খুন্নাই, অকোয়বা অমসুং শেন্মিৎলোনগী মরক্তা মান্নবা খল অমা থম্বগী মতাংদা ফোংদোকখি। “গ্রাসরুৎ ইন্নোভেসন অমসুং নাৎকী লৌশিং অসি ভারতকী মপাঙ্গলনি অমসুং মসিনা খুদোংচাদবা কয়াগী ৱারোইশিন পুরকই। গ্রাসরুৎ ইন্নোভেসনশিংদা নুপীশিংনা অচৌবা থৌদাং লৌই অমসুং মখোয়গী থৌদাং অসি মশক খঙবীদগনি”, হায়না মহাক্না ফোংদোকখি।

হিমালয়ান ইনভাইরনমেন্তেল স্তদীজ অমসুং কঞ্জর্ভেসন ওর্গনাইজেসন (ঐচ.ই.এস.সি.ও.)গী ফাউন্দর, দাঃ অনিল প্রকাশ জোশীনা অয়াম্বা মীশিংনা খুঙ্গংদা লৈবা ভারতকুম্বা লৈবাক্তদি পোলিসী অসিনা মখোয়গী অপাম্বা অমসুং তঙাই ফদবশিংগী মমি তাগদবনি। “নাৎকী লৌশিং অসিবু সাইন্তিফিক ওইবা মওংদা অচুম অরান থীদোকপগী তঙাই ফদবা লৈ”, হায়না মহাক্না মখা তাখি।

শক্নাইরবা ফেল্লো অমসুং ওবজর্ভর রিসর্চ ফাউন্দেসন (ও.আর.এফ.)কী ন্যুক্লিয়র অমসুং স্পেস পোলিসী ইনিসিএতিবকী মকোক ওইরিবা দাঃ রাজেশ্বরি রাজাগোপালন্না শেল-থাদবা অমসুং মসিগী কান্নবশিংবু মতম নাইনা য়েংশিনবগী খুদোংচাবা লৈগদবনি অমসুং পোলিসী অসিনা ব্রেন-দ্রেনবু হন্দোকহনবা অমসুং খ্বাইদগী ফবা ব্রেনশিংবু খাক্তুনা থম্বা অমসুং অতোপ্পশিংবু লৈবাক অসিদা অমুক্কা হন্না হল্লকহন্নবগী মতাংদা খন্নগদবনি হায়খি।

দ্রাফ এস.তি.আই.পি. অসি ভারত সরকারগী (জি.ও.আই.)গী প্রিন্সিপাল সাইন্তিফিক এদভাইজর (পি.এস.এ.)গী লোইশঙ অমসুং সাইন্স অমসুং তেক্নোলোজী বিভাগ (দি.এস.তি.)গী পাউতাক্কা লোয়ননা দাঃ অখিলেশ গুপ্তনা লুচিংবা এস.তি.আই.পি. সেক্রেত্রিএৎনা পুথোকপনি। মসিগী দ্রাফ এস.তি.আই.পি. অসি মীয়াম্না য়েংনবা হায়দুনা দিসেম্বর ৩১, ২০২০দা পুথোকখি। মদুদগী হৌনা, দ্রাফ শেম্লবা মতুংগী খন্ন-নৈনবগী থৌরম মশিং কয়া অমা পাংথোক্তুনা ৱাহৌদোক অমসুং পাউতাক কয়া কৌখ্রে। মথংগী চয়োল অনি অসিদা খন্ন-নৈনবগী থৌরম কয়া পাংথোকপগী থৌরাং লৈরি। পাউতাক লৌবগী অরোইবা নুমিৎ অসি জনুৱারি ৩১, ২০২১ ফাওবা শাংদোকখ্রে।

******