ভর্চুএল থৌরম অমদা ঙসি নিতি অয়োগ অমসুং ইন্সতিতুৎ ফোর কম্পিতিতিপনেসনা ইন্দিয়া ইন্নোবেসন ইন্দেক্সকী অনিশুবা ইদিসন ফোঙখ্রে। রিপোর্ত অসিনা রাজ্যশিং অমসুং য়ুনিয়ন তেরিতোরিশিংগী অনৌবা থবক পাংথোকপা ঙম্বগী থৌনাশিং অমসুং থবক কয়া য়াম্না ফজনা পাংথোকপগে হায়বা য়েংশিল্লি। ইন্দেক্স অসিগী অহানবা ইদিসন ওক্তোবর ২০১৯দা হৌদোকখি।

ইন্দিয়া ইন্নোবেসন ইন্দেক্স ২০২০ অসি নিতি অয়োগকী ভাইস চিয়রমেন দোক্তর রজিব কুমার, মেম্বর(হেল্থ) দোক্তর ভি.কে পাউল, মেম্বর(এগ্রিকলচর) দোক্তর রমেস চান্দ, সি.ই.ও অমিতাভ কান্ত, এদভাইজর(সাইন্স অমসুং তেক্নোলোজি) নিরাজ সিনহা অমসুং ইন্সতিতুৎ ফোর কম্পিতিতিপনেসকী চিয়রমেন দোক্তর অমিত কাপুরনা ফোঙখি।

থৌরম অদুদা সাইন্তিফিক এন্দ্ ইন্দস্ত্রিএল রিছর্স দিপার্তমেন্তগী সেক্রেতরি দোক্তর সেখর সি.মান্দে, বাইওতেক্নোলোজি দিপার্তমেন্তগী সেক্রেতরি দোক্তর রেনু শ্বারুপ, আর্থ সাইন্সেস মিনিস্ত্রিগী সেক্রেতরি দোক্তর এম.এন রাজিবান, সিবিল এভিএসন মিনিস্ত্রিগী সেক্রেতরি প্রদিপ সিংহ খারোলা অমসুং স্তেতিসতিক্স অমসুং প্রোগ্রাম ইমপ্লিমেন্তেসন মিনিস্ত্রিগী সেক্রেতরি দোক্তর ছত্রপতি সিবাজি অমসুং অতোপ্পাশিং শরুক য়াখি।

অনিশুবা ইদিসন অসিদশু, রাজ্যশিং অমসুং য়ুনিয়ন তেরিতোরিশিংগী মরক্তা চাংদম্না হেনগৎলকপা ইন্দেক্স অসিদা উবা ফংখি। মসি মখোয় মখা তানা ফিবম ফগৎলক্নবা তঙাইফদবনি অমসুং চহি খুদিংগী অনৌবা থবকশিং পাংথোকপা ঙমহনগনি।

অচৌবা রাজ্যশিংগী কাংলুপ্তা কর্নাতাকানা মকোক্তা লৈখি, মহারাস্ত্রানা অনিশুবদা লৈখি। মকোক ১০ অসিদা তামিল নাদু, তেলঙ্গানা, কেরলা, হরিয়ানা, অন্ধ্র প্রদেস, গুজরাত, উত্তর প্রদেস অমসুং পঞ্জাব য়াওরি। রাজ্য অসিনা ভেঞ্চর কেপিতেলশিং মশিং য়াম্না পায়খৎপা, রেজিস্তার তৌরবা জিওগ্রাফিকেল ইন্দিকেতরশিং অমসুং ইনফোর্মেসন অমসুং কম্মুনিকেসন তেক্নোলোজি মপান্দা থাদোকপগীদমক কর্নাতাকা রাজ্যনা মকোক তারকপনি। কর্নাতাকাদা ফোরেন দাইরেক্ত ইনভেস্তমেন্ত(এফ দি আই) য়াম্না চঙলকপা অসিনা রাজ্য অসিদা অনৌবা থবকশিং পায়খৎপা হেনগৎলকপনি। চহি অসিগী ওইনা অচৌবা রাজ্যগী কাংলুপ্তা খা ভারতকী রাজ্য মরি-কর্নাতাকা, তামিল নাদু, তেলঙ্গানা অমসুং কেরলা মকোক মঙাগী মনুং চনখি।

দিল্লিনা পুম্নমক্কী ওইনা মসিগী অহানবা রেঙ্ক অমুক হন্না ফংখ্রে অমসুং ২০১৯দগী চান্দিগরগী ফিবম ফগৎলে অমসুং চহি অসিদা অনিশুবা তারে। অৱাং-নোংপোক/চীংগী রাজ্যশিংগী কাংলুপ্তা চহি অসিদা হিমাচল প্রদেসনা অনিশুবা মফমদগী হাইগৎলক্তুনা অহানবা তারে অমসুং কাংলুপ অসিদা ২০১৯দা অহানবা তাখিবা সিক্কিম মরিশুবদা লৈরে।

ইনেবল পেরামিতর ৫দা ইন্নোবেতিপকী থবকশিং অমসুং পর্ফোমেন্স পেরামিতরশিংদা আউদপুতশিং য়েংলি। হুমেন কেপিতেল, ইনভেস্তমেন্ত, নোলেজ ৱার্কর, বিজিনেস ইনভাইরোনমেন্ত, সেফতি অমসুং লিগেল ইনভাইরোনমেন্তনা ইনেবল পেরামিতরশিং ওইনা মশক তাক্লি অমসুং নোলেজ আউদপুত অমসুং নোলেজ দিফুজন্না পর্ফোমেন্স পেরামিতরশিং ওইরি।

নিতি অয়োগকী ভাইস চিয়রমেন দোক্তর রজিব কুমারনা হায়খি ইন্দিয়া ইন্নোবেসন ইন্দেক্সনা ভারত্তা অফবা চাংদম্নবা লৈঙাক অমা শেমগৎনবা মাইকৈদা পুরকপা ঙমহল্লে। ইন্দেক্স অসি লৈবাক অসিদা অনৌবা থবকশিং পায়খৎনবগী ফিবম ফগৎহন্নবা অচৌবা খোঙথাং অমা হৌরকপনি। মসি মালেমদা ভারতনা ইন্নোবেসনগী লুচিংবা অমা ওইনবা অচুম্বা খোঙথাংনি।

নিতি অয়োগকী সি.ই.ও অমিতাভ কান্তনা হায়খি ইন্দিয়া ইন্নোবেসন ইন্দেক্স অসি রাজ্যশিংনা পায়খৎলিবা অনৌবা থবকশিং ওন্নবা অচৌবা খোঙথাং অমনি অমসুং মসিনা অত্মানির্ভর ভারত অমগী পান্দম ফংনবা লৈবাক্কী অমসুং রাজ্যগী খুদোংচাবশিং মপুংফানা শীজিন্নবা ঙমহনগনি।

নিতি অয়োগকী এদভাইজর নিরাজ সিনহানা হায়খি রাজ্যশিংনা মখোয়গী অনৌবা থবকশিং মশক খঙদোক্নবা ইন্দেক্স অসি মরুওইবা অমনি অমসুং মসিনা মখোয়গী অঙকপা থৌনাশিং শীজিন্নবা ঙম্নবা দরকার ওইবা থৌশিলশিং পায়খৎপা ঙমহনগনি।

ইন্সতিতুৎ ফোর কম্পিতিতিপনেসকী চিয়রমেন দোক্তর অমিত কাপুরনা হায়খি ইন্নোবেসন অমসুং ফিবম ফগৎনবা দরকার ওইবা থৌশিল শেম্বদা ইন্দেক্স অসিনা কেন্দ্র অমসুং রাজ্য সরকারশিং মতেং পাংগনি।

ভারতকী ইন্নোবেসনগী ফিবম মখা তানা য়েংশিন্নবা ফ্রেমৱার্ক অমা শেম্নবা ইন্দিয়া ইন্নোবেসন ইন্দেক্সনা পান্দম থম্লি। মখোয়গী স্কোরশিং, মশক খঙলবা খুদোংচাবশিং অমসুং শিংনবশিংদা য়ুমফম ওইরগা রাজ্যশিং অমসুং য়ু.তিশিং রেঙ্ক পীনবা ইন্দেক্স অসিনা পান্দম থম্লি অমসুং সরকারগী থৌশিলশিং শেম্বদা মতেং পাংলি।

লৈবাক অসিদা অনৌবা থবক পায়খৎপা হেনগৎহন্নবা ইন্দিয়া ইন্নোবেসন ইন্দেক্স শীজিন্ননবা রাজ্যশিং অমসুং য়ুনিয়ন তেরিতোরিশিংগী মরক্তা ‘কম্পিতিতিপ ফেদেরেলিজম’ য়োকখৎনবা নিতি অয়োগনা থবক পায়খৎলি।

মপুংফাবা দোকুমেন্ত মসিদা ফংগনি:

https://niti.gov.in/sites/default/files/2021-01/IndiaInnovationReport2020Book.pdf

*****