భారతదేశ ప్రజారోగ్య చరిత్రలో ఒక ప్రధాన ఘట్టం, దేశంలో కోవిడ్-19 టీకాలు వేసే కార్యక్రమాన్ని, ప్రధానమంత్రి శ్రీ నరేంద్ర మోదీ ప్రారంభించారు. ఇది, ఇప్పటివరకు ప్రపంచంలోనే అతిపెద్ద టీకాలు వేసే కార్యక్రమం. 

దేశవ్యాప్తంగా చేపట్టిన కోవిడ్-19 టీకాలు వేసే అతి పెద్ద కార్యక్రమం మొదటి రోజు విజయవంతంగా నిర్వహించబడింది.  మొత్తం 3,352 ప్రదేశాల్లో చేపట్టిన ఈ భారీ కార్యక్రమంలో ప్రాధమిక నివేదికల ప్రకారం 1,91,181 మంది లబ్ధిదారులకు టీకాలు వేయడం జరిగింది.   దీనికి అదనంగా, రక్షణ సంస్థలలో 3,429 మంది లబ్ధిదారులకు టీకాలు వేయడం జరిగింది.   వివిధ ప్రదేశాల్లో టీకాలు వేసే కార్యక్రమ నిర్వహణలో గరిష్టంగా 16,755 మంది సిబ్బంది చురుకుగా పాల్గొన్నారు.

టీకాలు వేసుకున్న అనంతరం ఎవరైనా ఆసుపత్రిలో చేరినట్లు ఇంతవరకు సమాచారం నమోదు కాలేదు.

టీకాలు వేసే కార్యక్రమానికి రెండు రకాల కోవిడ్-19 టీకాలు సరఫరా చేయబడ్డాయి:

- కోవిషీల్డ్ వ్యాక్సిన్ (సీరం ఇన్స్టిట్యూట్ ఆఫ్ ఇండియా లిమిటెడ్ తయారు చేసింది) అన్ని రాష్ట్రాలు / కేంద్రపాలిత ప్రాంతాలకు సరఫరా చేయబడింది. 

- కోవాక్సిన్ వ్యాక్సిన్ (భారత్ బయోటెక్ ఇంటర్నేషనల్ లిమిటెడ్ తయారు చేసింది) 12 రాష్ట్రాలకు సరఫరా చేయబడింది.

దేశవ్యాప్తంగా కోవిడ్-19 టీకాలు వేసే అన్ని ప్రదేశాల్లో, తగినంత పరిమాణంలో టీకాలతో పాటు అవసరమైన రవాణా సదుపాయాలను అందుబాటులో ఉంచడం జరిగింది.  టీకాలు వేసే కొన్ని ప్రదేశాల్లో లబ్ధిదారుల జాబితాను అప్‌లోడ్ చేయడంలో కొంత ఆలస్యం జరగడం వంటి చిన్న సమస్యలు విజయవంతంగా పరిష్కరించబడ్డాయి.