জনুৱারি ১৩, ২০২১ ফাওবদা রাজ্য ১০দা এভিয়ান ইনফ্লুয়েঞ্জাগী কেসশিং লৈরে। মখা তানা, জম্মু অমসুং কাস্মিরগী গন্দরবাল জিলা অমসুং ঝারখান্দগী জিলা ৪দা মহৌশাগী নত্তবা মওংদা উচেকশিং শিবগী পাউ লৈরে।

জনুৱারি ১২, ২০২১দা দি.এ.ঐচ.দিগী সেক্রেতরিনা লুচিংদুনা ভিদিও কনফরেন্স অমা পাংথোকখ্রে অমসুং রাজ্য ১৭গী মীহুৎশিং শরুক য়াখি। মীফম অদুগী খুৎথাংদা, এক্সন প্লান ২০২১গী মতুংইন্না মখোয়গী রাজ্যশিংদা এভিয়ান ইনফ্লুয়েঞ্জা শন্দোরকপা মপুংফানা লাকশিন্নবা রাজ্যশিংদা পাউতাক পীখ্রে। ফিবম অসি লাকশিন্নবা হেল্থ অমসুং ফোরেস্ত দিপার্তমেন্তশিংগা পুন্না চৎমিন্ননবা অমসুং লাইচৎ অসিগী মতাংদা মখোয়দা খঙহন্নবা রাজ্যশিংদা খঙহনখ্রে।

হকচাংদা মহিক চঙদনবা পোৎলমশিং মরাংকাইনা থম্নবা অমসুং য়েন লোইবা ফার্মশিংদা বাইও-সেকুরিতিগী চেকশিন-থৌরাংশিং লৌখৎনবা রাজ্যশিংদা খঙহনখ্রে। রাজ্য অমদা লায়না শন্দোরকপা মতমদা মশক খঙদোক্নবা রাজ্য থাক্তা লৈরিবা বি.এস.এল-২ লেবোরেতোরিশিং মশক খঙদোক্নবগী থবক য়াংনা লৌখৎনবা রাজ্যশিংদা খঙহনখ্রে। য়েন লোইবা লৌমীশিংদা শেন য়াম্না মাঙগদবা মরম্না, য়েনশিংদা লায়না অসি শন্দোক্তনবা চেকশিন-থৌরাং লৌখৎনবা রাজ্যশিংদশু খঙহনখ্রে। রাজ্য অয়াম্বা অতোপ্পা রাজ্যশিংদগী য়েন অমসুং য়েরুম পুশিল্লকপা থিংলে। মসিনা য়েন লোইবগী ইন্দস্ত্রিদা চাউনা চৈথেং পীগদবা মরম্না, অসিগুম্বা ৱারেপ অসি অমুক হন্না খন্ননবা রাজ্যশিংদা হায়জখ্রে।

পাউ-চেগী এদভর্তাইজমেন্তশিং, সেমিনারগী খুৎথাংদা মীয়াম ৱাখল তাহন্নবা থবকশিং রাজ্যশিংনা পাংথোক্লে। মখোয়গী রাজ্যগী ইনফোর্মেসন অমসুং পব্লিক রিলেসনগী মতেংগা লোয়ন্না অসিগুম্বা মীয়াম ৱাখল তাহনবগী থবকশিং মখা তানা পাংথোক্নবা রাজ্যশিং পুক্নিং থৌগৎলে। তোকঙা শন্দোক্তুনা য়েন লোইবা লৌমীশিং শেন মাঙবদগী কন্নবা য়েন অমসুং য়েরুম চাবদগী মতাংদা তৌগদবশিং অমসুং তৌরোইদবশিংগী মতাংদা রাজ্যশিংনা চেকশিনৱাশিং পীগদবনি।

*****