ভারতকী তরেৎশুবা ত্রেদ পোলিসী রীভ্যু (তি.পি.আর.)গী অনিশুবা অমসুং অরোইবা সেসন অসি ঙসি, জনুৱারি ৮, ২০২১দা জেনেভাদা লৈবা ৱর্ল্দ ত্রেদ ওর্গনাইজেসন্দা লোইশিনখ্রে। তি.পি.আর. অসি দবল্যু.তি.ও.গী য়েংশিনবগী থৌওংগী মখাদা লৈবা য়াম্না মরু ওইবা মেকানিজম অমনি। মসিদা মেম্বর লৈবাকশিংগী ত্রেদ অমসুং মরী লৈনবা পোলিসীশিং অসি দবল্যু.তি.ও.না মখোয়গী কাঙলোনশিং ইনবগী মওং হেনগৎহন্নবা তেংবাংবগা লোয়ননা য়েংশিনবগী থবক চত্থৈ অমসুং য়েংশিল্লিবা মেম্বর লৈবাকশিংদা কান্নবা পাউতাক কয়া অমসু পীবগী থৌওং য়াওই।

ভারতকী তি.পি.আর.গী ওফিসিএল দেলিগেসন অসি কম্মর্স সেক্রেতরী, দাঃ অনুপ ৱাধাৱন্না লুচিংবনি। মহাক্না দবল্যু.তি.ও.গী মেম্বরশিপ্তা ঙসি পীখিবা ৱারোলগী লোইশিনবদা জনুৱারি ৬, ২০২১দা পাংথোকখিবা ভারতকী অহানবা তি.পি.আর.দা মেম্বরশিংনা হংলকখিবা ৱাহংশিংগী মতিক চাবা পাউখুম পীখি। মসিগা লোয়ননা মহাক্না দবল্যু.তি.ও.গী মেম্বরশিংনা ভারতনা মালেমগী ত্রেদতা তেংবাংবা অমসুং থৌদাং য়াবগা লোয়ননা মলতিলেতরেল ত্রেদিং সীস্তেমদা শৌগৎপগী থৌওংশিংদা মরু ওইবা পীবীবগীদমক্তা থাগৎপসু ফোংদোকখি। মসিগী থৌওংশিং অসি থৌরম অসিগী মনুংদা হংখিবা ৱাহং ১০৫০ অমসুং তি.পি.আর.গী মীফমশিংদা মেম্বর লৈবাকশিংনা পাংথোকখিবা থৌওং ৫৩না মতিক চানা ফোঙদোকপা ঙমগনি।

কম্মর্স সেক্রেতরীনা শেমদোকপা অসি লেপ্তনা অমসুং হৌজিক-হৌজিক চত্থরিবা থৌওংনি অমসুং ভারত সরকারনা ভারতপু মালেমগী নুংঙাইরবা ললোন-ইতিক অমসুং শেল-থাদবগী খোঙলোই অমা ওইহন্নবা খোঙফম চেৎপা লম্বী অমদা চৎলি হায়রদুনা মীয়ামগী অউক্নিং চীংশিনখি। মহাক্না ভারতনা অফংবা এভেন্যুশিংবু নীংথিনা শিজিন্নদুনা অচৌবা অমসুং মপাঙ্গল কনবা শেন্মিৎলোন অমা শেম্নবা অমসুং মালেমগী ললোন-ইতিক্কী মতাংদা নীংথিনা শম্ননবা হোৎনরি হায়না মখা তানা হায়খি।

কম্মর্স সেক্রেতরীনা হৌজিক চৎলিবা লাইচৎ অসিনা চিঞ্জাক অমসুং হিংবগী সেক্যুরিতীগী মরু ওইবা অসি মাংদা অমুক পুরক্লে হায়রদুনা মেম্বরশিংনা ফুদ সেক্যুরিতীগীদমক্তা মতম কুইনা চৎকদবা পব্লিক স্তোক হোলদিং (পি.এস.ঐচ.)গী ৱারোইশিন অমা পুরক্নবা হায়খি। মহাক্না দবল্যু.তি.ও.দগী হেন্না তাথবা মমলগা লোয়নবা তংদু লৈতাবা পোলিসীগী অকোয়বা অসি ভারত্তা লৈ হায়না পাউদমখি। ভারতকী ললোন-ইতিক ফগৎহন্নবা থিজিনবগী থবকশিং অসি নুং-পান্না ফাউনা উবগী মওংদা অমসুং দবল্যু.তি.ও.গী কাঙলোনগী মতুং ইন্না চত্থৈ হায়না মিৎয়েং চঙলদুনা ভারতকী মীরমদগী পোত্থোক লৈবগী অপিকপা শরুক অমক্তংনা মসিগী খোঙথাংশিং অসিগী পুক্নিং চীংশিল্লি হায়খি।

কম্মর্স সেক্রেতরীনা ভারতকী পোলিসী য়েংশিনবা অসিদা মেম্বরশিংনা থৱাই য়াওনা শরুক য়াবগীদমক্তা থাগৎপা ফোংদোকপগা লোয়ননা মসিগী থৌওং অসিনা মখোয়না ভারতকা লৈনরিবা ত্রেদকী মরী অসি হেন্না ফগৎহন্নিঙই হায়বা তাকপনি হায়খি। মহাক্না এল.দি.সি.গী মেম্বরশিংবু মখোয়না ভারতনা দবল্যু.তি.ও.দা থৱাই য়াওনা হোৎনরিবা অমসুং মীয়াম্না য়াবা ভারতকী দ্যুতী-ফ্রী তারিফ প্রিফরেন্স স্কিম অসিদা থাগৎপগীদমক্তা অখন্ননা থাগৎপগী ৱাফম ফোংদোকখি। মলতিলেতরেল ত্রেদিং সীস্তেমদা ভারতনা খোঙফম চেৎলিবা অমসুং মালেমগী মরক্তা কান্নবা থৌদাং য়ারিবা অসিগী মতাংদা খোঙফম চেৎপগী ৱাফম ফোংদোকপগা লোয়ননা মহাক্না ভারতকী লৈবাক মনুংগী কারবার অপুনববু হেন্না পরিং চুম্বা অমসুং লাইহন্নবা হোৎনদুনা ৱর্ল্দ বেঙ্ককী দুইং বিজনেস রিপোর্তকী মকোক থংবা ৫০গী মনুং চনবা ঙম্নবা হোৎনরি হায়বগী ৱাফমসু ফোংদোকখি।

ভারতকী তি.পি.আর.গী খন্ন-নৈনবদা য়াওরিবা, থাইলেন্দগী এম্বেসেদর (মিস) সুনন্তা কাংবাল্কুল্কিজনা মহাক্কী ৱারোল লোইশিনবদা মসিগী মনুং-মপান ফাওনা উবা থৌওংশিং অসিদা ভারতনা হোৎনবগী থৌওংবু থাগৎখি। ভারতকী পোলিসী য়েংশিনবগী থৌওং অসিদা দবল্যু.তি.ও.গী মেম্বরশিংনা থৱাই য়াওবগী মওং উৎপা অসিগী মতাংদা পল্লদুনা ভারতনা হৌখিবা চহি ৫দা তোঙান-তোঙানবা শেন্মিৎলোনগী হীরমশিংদা লৌখৎখিবা খোঙথাংশিংবুসু থাগৎপা ফোংদোকখি। ভারতনা গুদ অমসুং সর্ভিস তেক্সকী মওংদা তোঙানবা মওংগী স্ত্রকচরেল রীফোরম অমা পাংথোকখিবা অসুদু য়েংশিনবগী থৌরম অসিদা থাগৎপা ফোংদোকখি। খন্ন-নৈনরিবা মীওই অসিনা ভারতনা দবল্যু.তি.ও.গী ত্রেদ ফেসিলিতেসন এগ্রীমেন্তকী কাঙলোনশিংবু থবক ওইনা পাংথোকপদা থৱাই য়াওবগী মওং উৎলিবা অমসুং ‘দুইং বিজনেস রীপোর্ত’কী মখাদা ভারতকী ‘ত্রেদিং এক্রোস বোর্দর’গী থাক ৱাংখৎলক্লিবা অসিবু য়েংলদুনা ভারতনা লৈবাক অসিদা কারবার তৌবা নুংঙাইহন্নবা পাংথোকপদা লৌরিবা থৌদাংশিংবু অখন্ননা য়েংশিনখি। মহাক্না ভারতনা এফ.দি.আই.গী চৎনবীবু মীয়াম্না পাম্নবা হোৎনবগীদমক্তা পায়খৎলিবা খোঙথাংশিং অমসুং ভারতকী নেস্নেল ইন্তেলেকচুএল প্রোপর্তী রাইৎ পোলিসী, ২০১৬পু দবল্যু.তি.ও.গী মেম্বরশিংনা য়াম্না থাগৎনৈ হায়না ফোঙদোকখি।

দবল্যু.তি.ও.গী তি.পি.আর. বোদী, এম্বেসেদর হারাল্দ এস্পেলুন্দনা ভারতনা য়েংশিনবগী থৌওংগী মনুংদা মপাঙ্গল লৈনা শেন্মিৎলোনগী শাহৌ লৌবগীদমক্তা থাগৎপা ফোংদোকপগা লোয়ননা তি.পি.আর.গী থবক পাংথোক্লিঙৈগী মনুংদা ভারতনা শৌগৎপগী থৌওংবু থাগৎপগা লোয়ননা মীফম অসি লোইশিনখি।

*****