কমদৌনা মীয়াম্না প্লাস্তিক্কী পোৎথোকশিং মফম চানা লোইশিনগদগে হায়বগী মতাংদা চৎন-লোনচৎশিংদা অহোঙবা পুরক্নবা মাস মেদিয়া কেম্পেন অমা পাংথোক্নবা উপ-রাস্ত্রপতি শ্রী এম.ভেনকিয়া নাইদুনা তকশিনখ্রে। মহাক্না হায়খি অমাং-অতা থোকহল্লিবা অসি প্লাস্তিকশিং নত্তে, প্লাস্তিক শীজিন্নবগী মতাংদা লৈরিবা ঐখোয়গী হৈনবীশিং অসিনা ফত্তবা ওইহনবনি।

ঙসি সেন্ত্রেল ইন্সতিতুৎ ওফ পেত্রোকেমিকেল ইঞ্জিনিয়ারিং এন্দ তেক্নোলোজি(সিপেত),বিজয়াৱাদাগী মহৈরোয়শিং, ওজাশিং অমসুং স্তাফশিংদা ৱা ঙাংবদা উপ-রাস্ত্রপতিনা হায়খি প্লাস্তিকশিং কুইনা শীজিন্নবা য়াবা অসিনা মরম ওইদুনা অকোয়বগী ফিবম শোকহনবনি। প্লাস্তিক্কী অমোৎপশিং লোইশিন্নবা খ্বাইদগী ফবা থবকশিং পাংথোকপা দরকার ওই অমসুং আর ৩-রিদিউজ, রিয়ুজ অমসুং রিসাইকলগী  মরুওইবা মীয়ামদা খঙহনগদবনি। প্লাস্তিক শীজিন্নবা তোকপনা পাম্বৈ ওইরোই, মসি নিংথিনা শীজিন্নগদবনি অমসুং ফজনা রিসাইকল তৌগদবনি।

শ্বাছ ভারত মিসন খুদম ওইনা পীরদুনা মহাক্না হায়খি শিঙ্গল য়ুজ প্লাস্তিক্কী মরমদা মীয়াম খঙহন্নবা মসিগা মান্নবা খোঙজং অমা লৈবাক শীনবা থুংনা পায়খৎকদবনি অমসুং মসিগী খোঙজং অসিদা মেদিয়া, মীয়ামগী লুপশিং, মহৈরোয়শিং অমসুং থৌমীশিং শরুক য়াহনবা দরকার ওই। প্লাস্তিক্না ঐখোয়গী অকোয়বদা পীরিবা অমাঙবশিং মীয়াম্না খঙগদবনি অমসুং মীওইবা খুন্নাইগী তুংগী খনগদবনি। ঐখোয়গী অঙাংশিংগীদমক লু-নানবা অমসুং অশং-অমান্না থনবা মালেম অমা থম্লম্বা অসি ঐখোয়গী থৌদাংনি। মীয়াম্না মরম চানা শিঙ্গল য়ুজ প্লাস্তিক্কী পোৎলমশিং শীজিন্নগদবনি।

মহাক্না হায়খি ২০২৩গী অরোইবা ফাওবদা ভারত্তা প্লাস্তিক রিসাইকল তৌবগী কৈথেল চাদা ৬.৫ হেনগৎতুনা দোল্লর বিল্লিয়ন ৫৩.৭২ পাক-চাউবা কৈথেল অমা ওইরক্কনি হায়না পানরি। অমোৎপা লোইশিনবা অসি ঐখোয়গী ওন্ত্রেপ্রেনিউয়রশিংগী অচৌবা খুদোংচাবা অমা ওইরে।

প্লাস্তিক রিসাইকল তৌবা অমসুং অমোৎপা লোইশিনবগী স্কিল দিবলপমেন্ত ত্রেনিং প্রোগ্রামশিং পাংথোকপা মোদেল প্লাস্তিক ৱেস্ত মেনেজমেন্ত সেন্তর অমা গুৱাহাতিদা লিংখৎপগীদমক মহাক্না সিপেত থাগৎখি।

পোলিমরশিং অসি অঙকপা পোৎলমশিং হায়না ফোঙদোক্লদুনা উপ-রাস্ত্রপতিনা হায়খি মখোয়না পুন্সিগী হিংবগী থাক অঙকপা ফংনা হেনগৎহল্লে অমসুং মখোয়গী য়াম্না য়াংবা, কুইনা চৎপা অমসুং শীজিন্নফম য়াম্না লৈবা অসিনা মরম ওইদুনা মালেমগী শেন-থুমগী মরুওইবা শরুক অমা ওইরক্লে। মখোয় হিরম কয়া শীজিন্নবা য়াবা অমসুং শেন য়াম্না চঙদনা পোৎথোক ওইনা পুথোক্নবগী তেক্নিকশিং অসিনা মরম ওইদুনা পুন্সিগী তোঙান-তোঙানবা শীনফমশিংদা প্লাস্তিক্না মমাঙঙৈদগী শীজিন্নরক্লবা পোৎলমশিংগী মহুৎশীল্লে।

কোবিদ-১৯ লাইচৎ মনুংদা প্লাস্তিক্কী মরুওইবশিং থাগৎলদুনা শ্রী নাইদুনা হায়খি কোবিদ-১৯ শন্দোরকপা থিংনবা মেদিকেলগী ঙাকথোক্নবা পোৎলমশিং অমসুং পি.পি.ই কিৎশিং শাবদা প্লাস্তিক ফজনা শীজিন্নখি। মেদিকেলগী পোৎলমশিং শাবদা হায়বদি ইন্সুলিন পেনশিং, আই.ভি তুবশিং, ইমপ্লান্তশিং অমসুং তিসু ইঞ্জিনিয়ারিংদা পোলিমরশিং পাক-শন্না শীজিন্নখি।

ভারতকী শেন্মিৎলোন্দা পোলিমরশিংগী মরুওইবা পল্লদুনা উপ-রাস্ত্রপতিনা হায়খি লৈবাক অসিদা প্লাস্তিক প্রোসেসিং য়ুনিত ৩০,০০০ হেনবনা মীওই মিল্লিয়ন ৪ হেন্না থবক ফংহল্লে। চহি অমদা মীওই অমনা চাউরাক্না কিলোগ্রাম ১২ রোম শীজিন্নদুনা, মালেমদা পোলিমর শীজিন্নবা মকোক থোঙবা লৈবাক ৫গী মনুংদা ভারত য়াওরি।

পোলিমরশিং শীজিন্নবগী চাং চাদা ৮ হেনগৎলক্লি হায়বা ৱাফম থম্লদুনা উপ-রাস্ত্রপতিনা হায়খি মালেমগী পেত্রোকেমিকেল ইন্দস্ত্রি অসি ২০২৫দা য়ু.এস দোল্লর বিল্লিয়ন ৯৫৮.৮ য়ৌগনি হায়না পানরি। মেক ইন ইন্দিয়া অমসুং স্তার্দ-অপ ইন্দিয়াগুম্বা সরকারগী থবকশিংনা পেত্রোকেমিকেল সেক্তরদা তুংগী মীরোলগী রিছর্সকী অমসুং লৈবাক অসিগী মশাগী ওইবা তেক্নোলোজি পুথোক্নবা লম্বী অমা শেম্লগনি।

উপ-রাস্ত্রপতিনা হায়খি লৈবাক অসিদা পুথোকপা রো মেতিরিএলশিং ফংবা অসিনা পোলিমর ইন্দস্ত্রি চাউখৎনবগী অচৌবা পাঙ্গল অমনি। ভারতনা মপান্দা প্লাস্তিক্কী পোৎলমশিং থাদোকপগী হৌজিক লৈরিবা ফিবম অসি পুক্নিং থৌগৎনিঙাইনি। ভারতকী প্লাস্তিক এক্সপোর্ত ইন্দস্ত্রি অসি পুথোক পুথোকপা ঙম্বা, মচাক-মথুমশিং অমসুং হৈশিংলবা শিন্মীশিংগী য়েংলগা য়াম্না ফিবম ফনা লৈরি।

স্কিল ত্রেনিংশিং, তেক্নিকেলগী মতেং পাংবা, একাদেমিক অমসুং রিছর্স অমসুং দিবলপমেন্তগী থবকশিংগী খুৎথাংদা লৈবাক্কী চাউখৎ-থৌরাংদা মতেং পাংবগীদমক মহাক্না সিপেত থাগৎখি। সিপেতনা মরুওইবা রিছর্স প্রোজেক ৫০ লোইশিনখিবা অমসুং পেতেন্ত ১২ ফাইল তৌখিবদা উপ-রাস্ত্রপতিনা হরাওবা ফোঙদোকখি। ইন্সতিতুৎ অসিনা অকোয়বগী ফিবম অমসুং চাউখৎপা থোঙ মান্না চৎনবা বাইওদিগ্রেদেবল প্লাস্তিকগুম্বা অকোয়বগী ফিবম শোকহন্দবা পোৎথোকশিং পুথোকপা মহাক্না পামখি।

শ্রী নাইদুনা হায়খি অপুনবা মীশিংগী তঙ্খাই অমা চহি ৩০ মখাগী মীওইশিং ওইদুনা, ভারত অসি মালেমদা খ্বাইদগী নহা ওইবা লৈবাকশিংগী মনুংদা য়াওরি। মতিক চানা স্কিল লৈহন্দুনা অমসুং চুম্না পুক্নিং থৌগৎতুনা লৈবাক শেমগৎনবগীদমক মসিগী নহারোলশিংগী থৌনা অসি শীজিন্নগদবনি। ‘তুংগী ফিবম অসি হৈশিংবদা লৈরে’ হায়না ফোঙদোক্লদুনা মসিগীদমক তোখাইবা স্কিল দিবলপমেন্ত মিনিস্ত্রি অমা লিংখৎপগীদমক শ্রী নাইদুনা প্রধান মন্ত্রী শ্রী নরেন্দ্র মোদী থাগৎখি।

মহাক্না হায়খি স্কিল ত্রেনিংগী লমদা সিপেতনা অফবা থবক পাঙথোক্লে অমসুং হৌখিবা চহি ৫ অসিদা ইন্সতিতুৎ অসিগী স্কিল দিবলপেম্ত প্রোগ্রামশিংগী মখাদা থবক ফংদ্রিবা নহারোল লাখ ৩ হেন্না ত্রেনিং পীখ্রে।

মহাক্না হায়খি পেত্রোকেমিকেল ইন্দস্ত্রিগী দরকার ওইবা স্কিল লৈবা শিন্মীশিং ফংহন্নবা ২০১৫-১৬দগী হৌনা অনৌবা সিপেত সেন্তর ১৬ লিংখৎলে। লম অসিদা ঐখোয়গী লৈবাক্না তেক্নিকেলগী ওইনা মাংজিল থাবদা সিপেতনা মরুওইবা থৌদাং অমা লৌগনি হায়বগী থাজবা থম্লি।

থৌরম অসিদা, সিপেত, বিজায়াৱাদাগা মহাক্কা লৈনবা মরী নিংশিংলদুনা শ্রী নাইদুনা হায়খি মতম অদুগী কেমিকেলস অমসুং ফর্তিলাইজরসগী মিনিস্তর অমসুং অন্ধ্র প্রদেসকী চীফ মিনিস্তরগা লোয়ন্না ইন্সিতিতুৎ অসি মহাক্না ২০১৬দা উরেপ-উয়ুং তমখিবনি। অন্ধ্র প্রদেস শীনবা থুংনা লৈরিবা ইন্দস্ত্রিশিংগা লোয়ন্না সিপেত, বিজয়াৱাদানা পুন্না থবক তৌমিন্নবগীদমক মহাক্না অপেনবা ফোঙদোকখি।

থৌরম অদুদা অন্ধ্র প্রদেসকী ইন্দোমেন্ত মিনিস্তর শ্রী এম. শ্রীনিভাস রাও, কেমিকেলস অমসুং ফর্তিলাইজরস মিনিস্ত্রিগী জোইন্ত সেক্রেতরি শ্রী কাসিনাথ ঝা, সিপেতকী দিরেক্তর জেনেরেল প্রোফেসার(দোক্তর) এস.কে নাইক, সিপেত, বিজয়াৱাদাগী সেন্তর হেদ, শ্রী চিন্তা সেখর, সিপেতকী প্রিন্সিপাল দিরেক্তর শ্রী আর রাজেন্দ্রন শরুক য়াখি।

মখাগী অসি মপুংফাবা ৱারোলনি:

নুংশিরবা মরুপশিং,

পোলিমর/পেত্রোকেমিকেল অমসুং মরী লৈনবা ইন্দস্ত্রিশিং চাউখৎনবা লৈনরিবা মমিং লৈরবা নেসনেল ইন্সতিতুৎ অসিদা ঙসি ময়ামগী মরক্তা লৈবা অসিদা ঐ অপেনবা পোক্লে। স্কিল ত্রেনিং প্রোগ্রামশিং, তেক্নিকেলগী মতেং, একাদেমিক অমসুং রিছর্স অমসুং দিবলপমেন্তগী হিরমদা মসিগী তোঙান-তোঙানবা থবকশিংনা লৈবাক চাউখৎনবা সেন্ত্রেল ইন্সতিতুৎ ওফ পেত্রোকেমিকেল ইঞ্জিনিয়ারিং এন্দ তেক্নোলোজি(সিপেত)না মতেং পাংবদা ঐ হরাওই।

পোলিমরশিং অসি অঙকপা পোৎলমশিং।মখোয়না পুন্সি হিংবগী থাক অঙকপা ফংনা হেনগৎহল্লে অমসুং মখোয়গী য়াম্না য়াংবা, কুইনা চৎপা অমসুং শীজিন্নফম য়াম্না লৈবা অসিনা মরম ওইদুনা মালেমগী শেন-থুমগী মরুওইবা শরুক অমা ওইরক্লে। ঙসি, করিগুম্বা অদোম্না কোইনা য়েংলবদি, অদোম্না মফম খুদিংদা প্লাস্তিক ঙাক্ত উবা ফংগনি। অদোমগী খুদাং ঘরি, অদোমগী কলম, মোবাইল ফোন, কম্পুতর, চাকশঙ নৎত্রগা কারদা প্লাস্তিক উবা ফগনি.. মসিগী কান্নবা অসিনা মরম ওইদুনা প্লাস্তিক অসি থাদোক্নবা য়াদ্রবা ওইরে।

কোবিদ-১৯ লাইচৎ মনুংদা, মেদিকেলগী পোৎলমশিং অমসুং পি.পি.ই কিৎশিং শাবদা শাবদা প্লাস্তিকশিংনা মরুওইবা থৌদাং অমা লৌরে। অৱাবা তারবা মতম অসিদা দিস্পোসেবল প্লাস্তিক সিরিঞ্জশিং, ব্লদ বেগশিং, গ্লোবশিং অমসুং অতোপ্পা মেদিকেলগী পোৎলমশিংগী শীজিন্নফম ফজনা লৈরে। মেদিকেলগী খুৎলায়শিং অমসুং পোৎলমশিং হায়বদি ইন্সুলিন পেন, আই.ভি তুব, কেথেতর, ইমপ্লান্তশিং অমসুং তিসু ইঞ্জিনিয়ারিংদা পোলিমরগী মচাকশিং পাক-শন্না শীজিন্নরে।

লেপ্তনা অফবা মখলগী পোলিমরগী মচাকশিং পুথোরকপা অমসুং মমল হোঙনা শানবা তেক্নিকশিং শীজিন্নবদগী পুন্সিগী তোঙান-তোঙানবা শীনফমশিংদা মহৌশাদগী শীজিন্নরক্লবা পোৎলমশিং প্লাস্তিক্না মহুৎশিল্লে।

চহি অমদা মীওই অমনা চাউরাক্না কিলোমগ্রাম ১২ রোম শীজিন্নদুনা, মালেমদা পোলিমর শীজিন্নবা মকোক থোঙবা লৈবাক ৫গী মনুংদা ভারত য়াওরি। লৈবাক অসিদা প্লাস্তিক প্রোসেসিং য়ুনিত ৩০,০০০ হেনবনা মীওই মিল্লিয়ন ৪ হেন্না থবক ফংহল্লে।

ঙসিদি, দরকার ওইবগী চাং চাদা ৮দা হেনগৎলক্তুনা পোলিমরশিং অসি পেত্রোকেমিকেল সেক্তরগী মরুওইবা শরুক অমা ওইরে। অপুনবা থাউ শীজিন্নবগী চাদা ২০ পোলিমর সেক্তরনা ওইগনি হায়না পানরি অমসুং ২০৫০ ফাওবদা চহিগী কার্বোন বজেতগী চাদা ১৫ ওইগনি।

মালেমগী পেত্রোকেমিকেল ইন্দস্ত্রি অসি চহি ১৫ হেনবগী গ্রোথ লৈরে অমসুং চহি অমদা পাকথোক-চাউথোকপগী চাং চাদা ১৫ ওইদুনা, ২০১৫ ফাওবদা মালেমগী কৈথেলগী পাক-চাউবা অসি য়ু.এস দোল্লর বিল্লিয়ন ৯৫৮.৮ য়ৌগনি হায়না পানরি। ২০২৩ ফাওবগী মনুংদা ভারত্তা পেত্রোকেমিকেল দরকার ওইবা অসি চহি অমদা চাদা ৭.৫ হেনগৎলক্কনি হায়না পানরি।

পেত্রোকেমিকেল সেক্তর চাউখৎহণ্নবা তুংগী মীরোলগী রিছর্সগীদমক অমসুং লৈবাক অসিগী মশাগী ওইবা তেক্নোলোজিগী চাউখৎপা পুরক্নবা সরকারগী তোঙান-তোঙানবা থবকশিং হায়বদি মেক ইন ইন্দিয়া, স্তার্দ-অপ ইন্দিয়া, স্তেন্দ-অপ ইন্দিয়া, দিজিতেল ইন্দিয়ানা ফিবম অমা শেমগৎকনি।

অমরোমদা, প্লাস্তিক্কী তুংকোইনা শীজিন্নবা য়াবা অসিনা ঐখোয়গী অকোয়গী ফিবমদা শোকহল্লে। অমুক্তং শীজিন্নগদবা পোৎলমশিং লেপ্তনা লম ফুঞ্জিনবদা শীজিন্নরে; ঐখোয়গী অকোয়বশিং মোৎহল্লে,মসিনা ঈশিং অমসুং সমুদ্রগী থৱায়পানবশিংদা চাউনা শিংনরে। মসিগা লোয়ন্না মফম চাদনা লংথোকপগী হৈনবীশিং অমসুং প্লাস্তিক্কী অমোৎপা লোইশিনবগী মতাংদা খঙবা ৱাৎপদগী অকোয়বগী ফিবমদা অমাং-অতা থোকহল্লে। খুদোংচাদ্রিবা অসি প্লাস্তিকশিং নত্তে, প্লাস্তিক শীজিন্নবগী মতাংদা লৈরিবা ঐখোয়গী হৈনবীশিং অসিনা ফত্তবা ওইহনবনি। মসি ঐখোয়না ফজনা শীজিন্নগদবনি অমসুং নিংথিনা রিসাইকল তৌগদবনি।

প্লাস্তিক্কী অমোৎপশিং নিংথিনা লোইশিন্নবগী খ্বাইদগী ফবা থবকশিং পায়খৎপা মতম ওইরে। ঐখোয়না আর ৩- রিদিউজ, রিয়ুজ অমসুং রিসাইকলগী মরমদা পাক-শন্না খঙহনবা দরকার ওইরে। মীয়াম্না কমদৌনা প্লাস্তিক্কী পোৎথোকশিং লোইশিনগনি হায়বগী মতাংদা চৎন-লোনচৎশিংদা অহোঙবা পুরক্নবা মাস মেদিয়া কেম্পেন অমা পাংথোকপা দরকার ওইরে।

সেনিতেসন অমসুং লমহাংদা খোঙহাম্বগী মতাংদা মীয়ামগী হৈনবীশিং হোঙদোক্নবা শ্বাছ ভারত মিসন মাইপাক্না পাংথোকখিবগী ঐখোয়গী খুদম লৈরে। শিঙ্গল য়ুজ প্লাস্তিক শীজিন্নবগী মতাংদা মীয়াম ৱাখল তাহন্নবা মসিগা মান্নবা লৈবাক শীনবা থুংনা পাংথোকপা ইহৌ অমা দরকার ওইরে। মসি মীয়ামগী খোঙজং অমা ওইহনগদবনি। ফৎত্রিবা অসি প্লাস্তিক নত্তে, খুদোংচাদবা অসি প্লাস্তিক শীজিন্নবগী মতাংদা লৈরিবা ঐখোয়গী হৈনবীশিং অদুনি হায়বা মীয়াম্না খঙগদবনি। প্লাস্তিক্না ঐখোয়গী অকোয়বদা পীরিবা অমাঙবশিং মীয়াম খঙগদবনি অমসুং মীওইবা খুন্নাইগী তুংগী খনগদবনি। ঐখোয়গী অঙাংশিংগীদমক লু-নানবা অমসুং অশং-অমান্না থনবা মালেম অমা থম্লম্বা অসি ঐখোয়গী থৌদাংনি। মীয়াম্না মরম চানা শিঙ্গল য়ুজ প্লাস্তিক্কী পোৎলমশিং শীজিন্নগদবনি।

অমোৎপা লোইশিনবা অসি ঐখোয়গী ওন্ত্রেপ্রেনিউয়রশিংগী অচৌবা খুদোংচাবা অমা ওইরে। ২০২৩গী অরোইবা ফাওবদা ভারত্তা প্লাস্তিক রিসাইকল তৌবগী কৈথেল চাদা ৬.৫ হেনগৎতুনা দোল্লর বিল্লিয়ন ৫৩.৭২ পাক-চাউবা কৈথেল অমা ওইরক্কনি হায়না পানরি। অমরোমদা ভারত্তা অমোৎপা লোইশিনবগী কৈথেল অসি ২০১৫ ফাওবগী মনুংদা বিল্লিয়ন দোল্লর ১৩.৬২ য়ৌগনি হায়না পানরি। “অমোৎপদগী শেন ওন্থোকপা” হায়বা ৱাফম অসি মীয়াম্না য়ানরে।

প্লাস্তিক্কী পোৎলমশিং অমুক হন্না শীজিন্ননবা মীয়াম ৱাখল তাহন্নবা অমসুং পুক্নিং থৌগৎনবা দরকার ওইবা থবকশিং সিপেতনা পায়খৎপদা ঐ হরাওই। প্লাস্তিক রিসাইকল তৌবা অমসুং অমোৎপা লোইশিনবগী স্কিল দিবলপমেন্ত ত্রেনিং প্রোগ্রামশিং পাংথোক্নবা মিৎয়েং থম্বা মোদেল প্লাস্তিক ৱেস্ত মেনেজমেন্ত সেন্তর অমা গুৱাহাতিদা সিপেতনা লিংখৎপা অসি থাগৎনিঙাইনি।

 ‘শিঙ্গল য়ুজ প্লাস্তিক’কী মতাংদা থবক ওইনা পাংথোকপা য়াবা পাম্বৈশিং পুথোক্নবা কেমিকেল অমসুং পেত্রোকেমিকেল দিপার্তমেন্তনা শেম্বা অখঙ—হৈশিংগী কমিতিদা ইন্সতিতুৎ অসিনা চাউনা মতেং পাংলে হায়বা ঐ খঙলে। অকোয়গী ফিবম শোকহনবা অকক্নবা পোৎথোকশিং মখল খাইদোক্তুনা শিঙ্গল য়ুজ প্লাস্তিক লোইশিন্নবগী মতাংদা ইন্সতিতুৎ অসিনা কমিতিদা পাউতাকশিং পীরে।

মরুপশিং,

লৈবাক অসিদা পুথোকপা রো মেতিরিএলশিং ফংবা অসিনা পোলিমর ইন্দস্ত্রি চাউখৎনবগী অচৌবা পাঙ্গল অমনি। ভারতনা মপান্দা প্লাস্তিক্কী পোৎলমশিং থাদোকপগী হৌজিক লৈরিবা ফিবম অসি পুক্নিং থৌগৎনিঙাইনি। ভারতকী প্লাস্তিক এক্সপোর্ত ইন্দস্ত্রি অসি পোৎথোক পুথোকপা ঙম্বা, মচাক-মথুমশিং অমসুং হৈশিংলবা শিন্মীশিংগী য়েংলগা য়াম্না ফিবম ফনা লৈরি।

সেক্তর অসি তুংকোইনা চাউখৎহনবদা সিপেতগুম্বা ইন্সতিতুৎশিংগী মরুওইবা থৌদাং অমা লৈরি। অচৌবা ইন্দস্ত্রিশিং অমসুং পি.এস.য়ুশিং হায়বদি বেল, হাল, এন.তি.পি.সিগা পুন্না থবক তৌমিন্নদুনা সিপেতকী আর অমসুং দিগী মশাশিংনা এরোস্পেস, ওতোমেতিপ, লৌউ-শিংউ অমসুং হকশেলগী লমদা থবক তৌরি। সিপেতনা মরুওইবা রিছর্স প্রোজেক ৫০ লোইশিনখ্রে, মালেমগী চেফোঙশিংদা রিছর্স পেপর ৩০০ হেনা ফোঙখ্রে অমসুং পেতেন্ত ১২ ফাইল তৌখ্রে হায়বা ঐ খঙলে। হায়রিবা মাইপাকপশিং অসিগীদমক ঐনা ময়াম পুম্নমক থাগৎচরি।

মসিগা লোয়ন্না, ইন্সতিতুৎ অসিনা অকোয়বগী ফিবম অমসুং চাউখৎপা থোঙ মান্না চৎনবা বাইওদিগ্রেদেবল প্লাস্তিকগুম্বা অকোয়বগী ফিবম শোকহন্দবা পোৎথোকশিং পুথোক্নবা ঐনা তকশিনবা পাম্মী।

নুংশিরবা মরুপশিং, অপুনবা মীশিংগী তঙ্খাই অমা চহি ৩০ মখাগী মীওইশিং ওইদুনা, ভারত অসি মালেমদা খ্বাইদগী নহা ওইবা লৈবাকশিংগী মনুংদা য়াওরি। মতিক চানা স্কিল লৈহন্দুনা অমসুং চুম্না পুক্নিং থৌগৎতুনা লৈবাক শেমগৎনবগীদমক মসিগী নহারোলশিংগী থৌনা অসি শীজিন্নগদবনি।

ইন্দস্ত্রিগী তোঙান-তোঙানবা থাকশিংদা থবক তৌনবা দিপ্লোমা অমসুং গ্রেজুয়েত/পোস্ত-গ্রেজুয়েত/পি.ঐচ.দি প্রোগ্রামশিংগী খুৎথাংদা সিপেতনা তোঙান-তোঙানবা স্কিল ত্রেনিং প্রোগ্রামশিং পাংথোকপদা ঐ হরাওই। সিপেতনা তেক্নিকেলগী মতেং অমসুং কন্সলতেন্সিগী থবকশিং পাংথোক্তুনা ইন্দস্ত্রিগী দরকার ওইবশিং ফংহল্লি। হৌখিবা চহি ৫গী মনুংদা তেক্নোলোজিগী মতেং পীবা থবক লাখ ৩.৫০ রোম পাংথোকখ্রে। হৌখিবা চহি ৫ অসিদা সিপেতকী স্কিল দিবলপমেন্ত প্রোগ্রামশিংগী মখাদা থবক ফংদ্রিবা নহারোল লাখ ৩ হেন্না ত্রেনিং পীদুনা থবক ফংহনখ্রে।

মসিগী মথক্তা, সিপেতকী লাইরিক তাকপী-তম্বীবগী মওং অসি হান্নদগী হৌনা নৌনা শেমদোক্লবা নেসনেল ইজুকেসন পোলিসি-২০২০গা মান্নরে। নেসনেল ইজুকেসন পোলিসি-২০২০ মপুংফানা চৎনবা হৌনবা সিপেতনা মাঙজৌন্না কোর্স করিকুলমশিং অমুক হন্না শেম্বগী থবক পায়খৎখ্রে।

২০১৫-১৬দগী হৌনা লৈবাক শীনবা থুংনা দরকার ওইবা অহৈবা শিন্মীশিং ফংহন্নবা সিপেতনা অনৌবা সিপেত সেন্তর ১৬ হাংদোকখ্রে খঙবদা ঐ অপেনবা পোকই।

২০১৬গী এপ্রিল ২২দা মতম অদুগী কেমিকেলস অমসুং ফর্তিলাইজরগী মিনিস্তর অমসুং অন্ধ্র প্রদেসকী চীফ মিনিস্তরগা লোয়ন্না ঐনা উরেপ-উয়ুং তমখিবা অমসুং ২০১৯গী ওক্তোবর ২৪দা লৈবাক মীয়ামদা কৎথোকখিবা অন্ধ্র প্রদেসকী সিপেত সেন্তর অসিদা লাকপদা ঐ হরাওই। সিপেত বিজয়াৱাদানা হৌজিক অনৌবা কেম্পসতা থবক তৌদুনা থবক ফংদ্রিবা/শোৎথরবা অন্ধ্র প্রদেসকী নহারোল কয়া মখল কয়াগী ত্রেনিংশিং পীরিবা অসি থাগৎনিঙাইনি।

ঐনা মহৈরোয়শিং অমসুং ইন্দস্ত্রিএলিস্তশিংগা উনরে অমসুং রাজ্য শীনবা থুংনা লৈরিবা ইন্দস্ত্রিশিংগা সিপেত বিজয়াৱাদানা পুন্না থবক তৌমিন্নবা অসিদা ঐ হরাওই। লৈবাক অসিগী পেত্রোকেমিকেল সেক্তরগী দরকার ওইবশিং ফংনবা অহেনবা ইন্দস্ত্রিশিং লিংখৎলক্কনি হায়না ঐনা থাজবা থম্লি।

লম অসিদা ঐখোয়গী লৈবাক্না তেক্নিকেলগী ওইনা মাংজিল থাবদা সিপেতনা মরুওইবা থৌদাং অমা লৌগনি হায়বগী থাজবা থম্লি।

থৌরম অসিদা, ঐনা সিপেতকী গভর্নিং বোদি, দিরেক্তর জেনেরেল, ইমপ্লোয়িশিং অমসুং মসিগী মহৈরোয়শিংদা ঐগী য়াইফ-পাউজেল পীজরি। তুংদা সিপেত মখা তানা চাউখৎপা  ওইরসনু !!!

অদোম থাগৎচরি।

জয় হিন্দ!”