শেল-থুম মন্ত্রালয়গী এক্সপেন্দিচর বিভাগনা রাজ্যশিংনা তোঙান-তোঙানবা সেক্তরশিংদা মীয়ামদা য়ুম্ফম ওইবা শেমদোকপশিং লোইশিনবগী অরোইবা মতম শাংদোকখ্রে। হৌজিক, করিগুম্বা ফেব্রুৱারি ১৫, ২০২১ ফাওবগী মনুংদা শেমদোকপশিংবু থবক ওইনা পাংথোকপগী মতাংদা নোদেল মন্ত্রালয়দগী পাউতাক ফংলবদি রাজ্যশিং অসিনা শেমদোকপশিং অসিগা মরী লৈনবা কান্নবা কয়া অমা ফংগনি।

ভারত সরকারনা রাজ্যশিংনা শেমদোক্কদবা মরু ওইবা লম মরি মশক খঙদোকখ্রেঃ

১) লৈবাক অমা, রেসন কার্দ অমগী পথাপ্পু থঙ্ক ওইনা পাংথোকপা

২) কারবার তৌবদা লাইহনবগী শেমদোকপা

৩) অর্বান লোকেল বোদী/য়ুতিলিতীগী শেমদোকপশিং অমসুং

৪) পাৱর সেক্তরদা শেমদোকপশিং

হায়রিবশিং অসিগী মতাংদা রাজ্যশিংদা মে ১৭, ২০২০দা পাউ ফাউখ্রবনি।

শেমদোকপশিং অসিবু মাই পাক্না পাংথোকপা ঙম্বা রাজ্যশিংনা কান্নবা অনি ফংগনি। অসিগুম্বা রাজ্যশিং অসিনা শেমদোকপা অমমম খুদিং লোইশিনবা ঙম্নবা মখোয়গী গ্রোস দোমেস্তিক প্রদক্ত (জি.এস.দি.পি.)গী ০.২৫%গী শরুক্কা মান্নবা অহেনবা শেনফম পুবগী খুদোংচাবা ফংগনি। কান্নবা পীরিবা অসিগী মখাদা, হায়রিবা শেমদোকপা মরি অসি লোইশিনবা মতমদা রাজ্যশিংদা অহেনবা ওইনা পুনবা লুপা করোর লাখ ২.১৪গী শেমফমশিং ফংহনগনি।

কোবিদ-১৯গী লাইচৎ অসিনা লৈহল্লিবা শিংনবশিং অসি থেংননবা তঙাই ফদ্রবা রিসোর্সশিংগীদমক্তা য়েংদুনা ভারত সরকারনা মে, ২০২০দা রাজ্যশিংনা শেল পুবা য়াবা অকক্নবা অসি মখোয়গী জি.এস.দি.পি.গী ২% ফাওবগী চাংদা হেনগৎনবা ৱারেপ লৌখি। মসিগী থৌওং অসিগী পান্দমদি রাজ্যশিংনা লুপা করোর লাখ ৪.২৭ ফাওবগী শেল-থুমগী রিসোর্স শেমগৎপা ঙমহনবনি। মসিগী অখন্ননা কান্নবা পীরিবা অসিগী তংখায়দি শেমদোকপশিং অসিগা মরী লৈনগদবনি। মসিগী মপুং ওইবা পান্দমদি রাজ্যশিংদা মসিগী তোঙান-তোঙানবা মীয়ামদা য়ুম্ফম ওইবা শেমদোকপা কয়া পাঙথোক্নবা ইথিল পীবনি।

হায়রিবা শেমদোকপা মরি অসিগী মনুংদগী অহুম লোইশিনবা মতমদা রাজ্যশিংনা ফংগদবা অনিশুবা কান্নবা অসিনা “স্কিম ফোর ফাইনান্সিএল এসিস্তেন্স তু স্তেৎস ফোর কেপিতেল এক্সপেন্দিচর”গী মখাদা অহেনবা ফন্দ পীদুনা তেংবাংবনি। স্কিম অসিগী মখাদা, শেমদোকপা মরি অসিগী মনুংদগী য়ামদ্রবদা অহুমদি লোইশিনবা ঙমহন্নবা রাজ্যশিংগী ওইনা লুপা করোর ২,০০০ কাইথোক্তুনা থম্লি।

স্কিম অসি শেম-থুমগী মন্ত্রীনা ওক্তোবর ১২, ২০২০দা আত্মানির্ভর ভারত পেকেজ ২.০গী শরুক অমা ওইনা লাউথোকখিবনি। মসিগী স্কিম অসিনা কোবিদ-১৯গী লাইচৎ অসিনা মরম ওইদুনা তেক্সতগী লাক্কদবা শেনফমশিং হন্থরকপদগী ওইরক্লিবা শেল থুমগী ওইবা খুদোংচাদবা কয়া রাজ্য সরকারশিংনা হন্দক্কী চহি অসিদা থেংনরিবা অসিদা তেংবাংবা ওইনা মখোয়গী কেপিতেল এক্সপেন্দিচরবু মপাঙ্গল হেনগৎহন্নবা পান্দম থম্লি। ভারত সরকারনা স্কিম অসিগী মখাদা অপুনবা শেনফম লুপা করোর ১২,০০০ খাক্তুনা থম্লি। কেপিতেল এক্সপেন্দিচর অসিনা শেন্মিৎলোন অসিবু তুংদা ওইরক্কদবা মতমদা চাউখৎপা ঙমহনবগী মতিক লৈদুনা অৱাংবা মলতিপ্লাইয়র এফেক্ত লৈ অমসুং শেন্মিৎলোন চাউখৎপগী চাং য়াম্না ৱাংহনবা ঙমহল্লি।

কান্নবা অনি অসিনা রাজ্যশিংদা শেমদোকপশিং অসি পাংথোক্নবা ইথিল পীরি। হৌজিক ফাওবগী ওইনা, রাজ্য ৯না লৈবাক অমা, রেসন কার্দ অমগী পথাপ অসি থবক ওইনা পাংথোকখ্রে, রাজ্য মরিনা কারবার তৌবদা লাইহনবগী শেমদোকপা লোইখ্রে অমসুং রাজ্য অমনা অর্বান লোকেল বোদী/য়ুতিলিতী রিফোর্ম থবক ওইনা পাংথোকখ্রে। হায়রিবা রাজ্যশিং অসিদা লুপা করোর ৪০,২৫১গী অহেনবা শেনফম পুবগী অয়াবা পীখ্রে। শেমদোকপশিং অসিবু লোইশিনবগী মতম শাংদোকপা অসিনা অতোপ্পা রাজ্যশিংদা শেমদোকপশিং অসি অথুবা মতমদা লোইশিনবা ঙম্নবা  অমসুং মরী লৈনবা কান্নবশিং অসি ফংনবা ইথিল পীরি।

****